Read Northwest Gbaya 2 WANNU 4 Bible Online

2 WANNU 4 - Northwest Gbaya bible

2 WANNU 4

¹Kóò ko ŋma *wi-tɔ̧-wen oi nú Sɔ̧ kpɔk kɔfa Elisee hee mɔ'ɔ ga: «Wi-de-tom kɔ-mɛ wíì kɔ‘m fea, ɓɛɛ mɛ iŋa'e wíì kɔ‘m duka so yu GASA WAN nyɛmna. Ɓɛɛ nɛ́ mɔ'ɔ nɛ̀ ŋma wan-nyamandoi tɛ̀ɛ̀ mɛ kai o bem kɔ‘m yiitoo nɛ̀ bara oi nyamandoi kɔ‘i.»

²Elisee tɔ̧ɔ̧ ha̧ a̧: «Mi tɛ de nɛ́ ge ha̧ mɛ ge nde? Nɛ́ ge a̧ mɛ a̧a̧ nɛnɛ kɔ̧ tua ge?» A̧ kifa nú-a: «Kó-de-tom k’ɛ́nɛ́ bó nɛ̀ ŋma mɔ na, nɛ́ dak-nɔ̧́ mɛ sɔ̧ tɛ‘m ɓɛɛ.»

³Elisee tɔ̧ɔ̧ ha̧ a̧: «Mɛ̀ nɛ́ɛ̀ kɔfi o yèè nɛ dɔka-a hee mɔ'ɔ nɛ mɛ nyɛma mɛ kpa er o sɛm kɔ-mɛ lɛŋ ga.

⁴Mɛ̀ sí ɗoŋ kɔ̧ tua kɔ-mɛ, mɛ̀ kpé nú tua e zu mɛ in o bem kɔ-mɛ, ɓɛɛ mɛ̀ tɛ́n nɔ̧́‘i a kɔ̧ o yèé nɔ‘i. Kà wa dun, ɓɛɛ mɛ̀ bá é.»

⁵Kóò‘i ee Elisee duk, ɓɛɛ a̧ kpe nú tua e zu a̧ in o bem kɔ̧-a̧. O bem ha̧ kɔ‘i nɛ́ yèè kpɔk kpɔk ha̧ nàà kɔ-wa, ɓɛɛ kɔ̧-a̧ nɛ́ tɛna nɔ̧́ a kɔ̧ a̧.

⁶Ŋgimbi nɛ o yèé nɔ‘i lɛŋ duna kaɗi, a̧ tɔ̧ɔ̧ ha̧ ŋma bem nɔ‘i: «Mɛ̀ há̧ ŋma yèè ha̧‘m;» bem’ɛi kifa nú: «Bo ɓɔna.» Ɓɛɛ nɔ̧́ kaɗi foka-a.

⁷Kóò‘i tɛɛ we ɗoŋ mɔ‘i ha̧ bíí ko Sɔ̧, ɓɛɛ a̧ tɔ̧ ha̧ a̧: «Mɛ̀ nɛ́ mɛ̀ ɗɔ́r nɔ̧́‘i lɛŋ, mɛ̀ gbó nɛ̀ nyamandoi kɔ-mɛ, ɓɛɛ mɛ nyɔŋa oi-aa nɛ tɛ ɓɔn nɛ mɔ in o bem kɔ-mɛ.»

⁸Ŋma wese, Elisee nɛɛ sɛn Sunɛm, ɓɛɛ ŋma ko-wan-mbɔi sa a̧ mɛ nyɔŋ mɔ tɛ kɔ‘i. Ɓɔnsɛnɛ, kà Elisee ɓir nɛ̀ hi̧i̧, kóò‘i sa kànà nɛ́ a̧ mɛ nyɔŋ mɔ.

⁹Kóò‘i tɔ̧ɔ̧ ha̧ wíì kɔ‘i: «Mi iŋa'e, wi’ɛ nɛ tɛ́ tɛ̀ k’ɛ́ɛ́ ɓɔnsɛnɛ'ɛ nɛ́ sa̧a̧ bíí ko So̧.

¹⁰Ɛ̀ɛ̀ ɗáfí fara ha̧ a̧ kɔ̧ gɔna-bɛr-tua mɛ ŋgɔn; ɛ̀ɛ̀ pí̧ gado sɛnɛ, ɛ̀ɛ̀ dáfí fara-nyɔŋ-mɔ, fara-duk-nù, in lamba ha̧ a̧; ŋgimbi n'aa be tɛ̀ɛ́ tɛ tɛ k’ɛɛ, ɓɛɛ a̧ ɔɔ sɛnɛ.»

¹¹Ŋma wese, Elisee tɛ̀ɛ́ tɛ kɔ-wa; a̧ daŋa si kɔ̧ gɔna-bɛr-tua mɛ ŋgɔn, ɓɛɛ a̧ o sɛnɛ.

¹²Elisee tɔ̧ɔ̧ ha̧ Gehazi wi-de-tom kɔ̧-a̧ mɛ nɛ̀ɛ́ sa kóò‘i tɛnɛ. Ŋgimbi n'aa hɔɔ hi̧i̧,

¹³Elisee tɔ̧ɔ̧ ha̧ wi-de-tom kɔ‘i: «Mɛ̀ ák a̧, nɛ́ ge a̧ a̧ kɔ̧ɔ̧ h’ɛ́ɛ́ mɛ de ha̧ a̧ oi demɔ n'aa dee in yɛɛ ge? A̧ kɔ̧ɔ̧ h’ɛ́ɛ́ mɛ tɔ̧ nɛ́ de wen zu a̧ ha̧ wannu náà, kóó ha̧ gasa wi-duk-zu o wi-biro nde?» Kóò‘i kifa nú: «Mi duk nɛ̀ de-a mgbara o bíí kɔ‘m.»

¹⁴Elisee aka mɔ: «Ɛ̀ɛ̀ dé nɛ́ ge ha̧ a̧ ge?» Gehazi kifa nú: «A̧ bo nɛ̀ bem na, ɓɛɛ wíì kɔ̧-a̧ sɔka kaɗi.»

¹⁵Elisee tɔ̧a̧: «Mɛ̀ sá a̧ tɛnɛ.» Wi-de-tom saa a̧ tɛnɛ, ɓɛɛ a̧ yor sɛn nú tua.

¹⁶Elisee tɔ̧a̧: «Mbe pɛ tɛ ŋgimbi hegɔ, mɛ tɛ ba zɔɗi bem er-mɛ.» Kóò‘i kifa nú: «Weyaa, nyaa, bíí ko Sɔ̧, k’ɛ́nɛ́ de ndela ha̧ kó-de-tom k’ɛ́nɛ́ na!»

¹⁷Nɛ̀ ŋgimbi'i hɔa, kóò‘i baa zaŋ, ɓɛɛ ko bem hee mɔ'ɔ nɛ̀ Elisee baa tɔ̧ so ha̧ a̧ ga.

¹⁸Bem’ɛi gasa; ɓɛɛ ŋma wese, a̧ nɛ́ ɗoŋ dáà kɔ̧-a̧ fara nɛ̀ o wi-mɔi̧-nyɔnɔ a̧a̧ sɛnɛ.

¹⁹Zu-a gbaa ɓɛɛ a̧ tɔ̧ ha̧ dáà kɔ̧-a̧: «Zu'm wa! Zu'm a̧ tɛ kɛ̧‘i!» Ɓɛɛ dáà kɔ̧-a̧ tɔ̧ ha̧ ŋma wi-de-tom mɛ ba a̧ sinɛ ha̧ nàà kɔ̧-a̧.

²⁰Wi-de-tom'i baa a̧ sinɛ ha̧ nàà kɔ̧-a̧. A̧ ɔɔ nù gɔn ku nàà kɔ̧-a̧ hɔ wese-see-zu, ɓɛɛ a̧ fe.

²¹Nàà kɔ̧-a̧ baa a̧ nɛ́ɛ̀ pi̧ gɔn gado ko bíí ko Sɔ̧, kpe nú tua, ɓɛɛ gbo zan.

²²A̧ saa wíì kɔ̧-a̧, ɓɛɛ tɔ̧: «Mi ai nú ha̧ mɛ, mɛ̀ tóm ŋma wi-de-tom in nana-tuifuu kpɔk tɛnɛ ha̧‘m. Mi tɛ ma yì nɛnɛ hɔ tɛ bíí ko Sɔ̧ sɛka'm pia ɗoŋ.»

²³Wíì kɔ̧-a̧ aka mɔ: «Mɛ́ nɛ tɛ a̧ sɔsɔɔ mɛ de bɔɔ ge? Bó nɛ́ mbe yí-zɛ na, bó nɛ́ wese Sabat na mbɛt.» Kóò‘i kifa nú: «Mɛ̀ dúk kɔ-mɛ geɗek.»

²⁴A̧ hɛra tuifuu daŋ duk zu a̧, ɓɛɛ a̧ tɔ̧ ha̧ wi-de-tom kɔ̧-a̧: «Mɛ̀ mgbɔ‘m ɛ̀ɛ̀ yàk; kà‘m nɛ́ tɔ̧ɔ̧ ŋma wen na, ká mɛ yor nɛ̀ yuwar na!»

²⁵Wa nɛɛ hegɔɔ, hɔ tɛ bíí ko Sɔ̧ sɛn zu kaya Karmɛl. Ŋgimbi nɛ Elisee zɔka a̧ nɛ̀ nyɛi̧a-a, a̧ tɔ̧ɔ̧ ha̧ wi-de-tom kɔ̧-a̧ Gehazi: «Mɛ̀ zɔ́k ko Sunɛm k’ɛɛ'ɛ.

²⁶Mɛ̀ nɛ́ mɛ̀ wé ti a̧, ɓɛɛ mɛ̀ fán a̧ hee mɔ'ɔ ga: ‹Mɛ́ dúk nɛ̀ de-a? Wíì kɔ-mɛ hee ge? Bem duk hee ge?› » A̧ kifa nú: «Mɔ lɛŋ duk nɛ̀ de-a.»

²⁷Kóò‘i daŋa hɔ zu kaya katɛ bíí ko Sɔ̧, ɓɛɛ tik nù hɛr naŋ-a. Gehazi daŋa pii ti mɛ ir a̧ yinɛ, ɓɛɛ bíí ko Sɔ̧ tɔ̧ ha̧ a̧: «Mɛ̀ é a̧, wen a̧ a̧a̧ nɛ̀ tu̧u̧-see, ɓɛɛ GASA WAN hu̧sa̧ gba̧a̧-a̧ nɛ‘m, a̧ tɛ tɔ̧ wen-aa ha̧‘m na.»

²⁸Ɓɛɛ kóò‘i tɔ̧: «Bo nɛ mi aka so bem ak er nyaa na! Bo nɛ mi tɔ̧ɔ̧ so h’ɛ́nɛ́‘e ndé, k’ɛ́nɛ́ ɔr am na, na nde?»

²⁹Elisee tɔ̧ɔ̧ ha̧ Gehazi: «Mɛ̀ hɛ́r zaŋ-mɛ, mɛ̀ bá dɔra kɔ‘m a̧ mɛ yak. Kà bíí a̧ fana mɛ, ká mɛ kɔ̧ ɗɔaa na; kà mɛ nɛ́ kpaa bíí, ká mɛ fan na mbɛt. Mɛ̀ nɛ́ɛ̀ e dɔra kɔ‘m zu bem’ɛi.»

³⁰Ɓɛɛ nàà ko bem’ɛi tɔ̧: «Hee mɔ'ɔ nɛ̀ GASA WAN duk kpasa in hee ɛnɛ duk kpasa mbɛt ga, mi beka e'nɛ́ duk na!» Elisee kura ŋgɔn yak in kóò‘i.

³¹Gehazi yaka so ti ha̧ wa, ɓɛɛ giti dɔra zu bem’ɛi; bem’ɛi fo géé foo tɛ, kà a̧ tɔ̧ nɛ wen na. Gehazi wee ti Elisee pii ɗoŋ, ɓɛɛ tɔ̧ ha̧ a̧: «Bem’ɛi tun na.»

³²Elisee hɔɔ nú tua, ká bem’ɛi fee so nɛ̀ mbetɛ; a̧ ɔ nɛ nù gɔn gado kɔ̧-a̧‘i.

³³Elisee yee gɔna-bɛr-tua mɛ ŋgɔn, kpe nú tua e zu wa yiitoo, ɓɛɛ a̧ kɔfi GASA WAN.

³⁴A̧ kura gu gɔn zaŋ bem’ɛi, e nú nú-a, gbaayí-a zu kɔ̧-a̧, in er-a mbɛt zu ko bem’ɛi, a̧ guu zu bem’ɛi, ɓɛɛ tɛ bem’ɛi ba wee.

³⁵Elisee zira si kɔ̧ gɔna-bɛr-tua mɛ ɗɔɔ, ɓɛɛ a̧ yar nɛ̀ bɛr-tua; a̧ daŋa nɛ́ɛ̀ gu zu a̧ woyo. Bem’ɛi zafa war mɔɔrɔ-ɗoŋ-yiitoo, ɓɛɛ hú̧í̧ yí.

³⁶Elisee saa Gehazi, ɓɛɛ tɔ̧ ha̧ a̧: «Mɛ̀ sá nàà kɔ̧-a̧ tɛnɛ.» A̧ saa a̧, ɓɛɛ a̧ tɛ. Elisee tɔ̧ɔ̧ ha̧ a̧: «Mɛ̀ bá bem kɔ-mɛ.»

³⁷A̧ yee tua, ɓɛɛ tik ká̧ naŋ Elisee, gu sɔnti nù, ɓɛɛ a̧ kur ba bem kɔ̧-a̧ gbo nɛnɛ.

³⁸Tɛ ŋma ŋgimbi, Elisee pia ɗoŋ Gil-gal, ɓɛɛ ká kaɓa tika so nù zu nù‘i. Hee mɔ'ɔ nɛ̀ o gbama *wi-tɔ̧-wen oi nú Sɔ̧ ya nɛ́ nù in a̧ ga, a̧ tɔ̧ɔ̧ ha̧ wi-de-tom kɔ̧-a̧: «Mɛ̀ é gba kpánà tɛ wee, ɓɛɛ mɛ̀ ɗáfí nyɔŋmɔ ha̧ o *wi-tɔ̧-wen oi nú Sɔ̧.»

³⁹Ŋma mgbara wa kpɔk nɛ̀ɛ̀ mɛ nder be nú-zɔ̧ɔ̧-mɔ, ɓɛɛ kpa ŋma be-nyak[6] nɛ̀ waya-a a̧a̧ sɛnɛ hee saa ga, ɓɛɛ a̧ ɓi hɛr nɛ̀ laa kɔ̧-a̧; a̧ pia ɗoŋ sɛr a kɔ̧ kpánà, gi, wi iŋ so yí waya mɔ‘i na.

⁴⁰Wa kɛ̧ɛ̧ ha̧ o bíí mɛ nyɔŋ. Wa wee nyɔŋa a̧ tikiɗi, ɓɛɛ wa hiɗi mɔ tɔ̧ nɛnɛ: «Bíí ko Sɔ̧! Fio a̧a̧ kɔ̧ kpánà‘i.» Ɓɛɛ wa nyɛm mɛ nyɔŋ na.

⁴¹Bíí ko Sɔ̧ tɔ̧a̧: «Ɛ̀nɛ̀ bá fuu tɛnɛ!» A̧ ɗuu ŋma a kɔ̧ kpánà, ɓɛɛ a̧ tɔ̧ woyo: «Ɛ̀nɛ̀ kɛ̧́ ha̧ o bíí mɛ nyɔŋ.» A̧ tɔ̧ɔ̧ hegɔ wen ŋma ɗaŋmɔ bo so kɔ̧ kpánà ɓɔna.

⁴²Ŋma bíí tɛ̀ɛ́ nɛ Bal-Salisa, ɓɛɛ ba kuti zu-mɔ tɛnɛ ha̧ bíí ko Sɔ̧; zu-mɔ‘i duka nɛ́ brɛt-fon ɓu-yiitoo in mbe alkamaari kɔ̧ bufu. Ɓɛɛ Elisee tɔ̧ ha̧ wi-de-tom kɔ‘i: «Mɛ̀ kɛ̧́ ha̧ o bíí mɛ nyɔŋ.»

⁴³Wi-de-tom kɔ̧-a̧ kifa nú: «Mi tɛ kɛ̧ mɔ'ɔ ká kpaa bíí gɔmŋmaa hee ge nde?» Elisee tɔ̧a̧: «Mɛ̀ kɛ̧́ nɛ̀ o bíí ha̧ wa nyɔŋ, wen nɛ́ GASA WAN a̧ tɔ̧a̧: ‹Wa tɛ nyɔn, ɓɛɛ oi-aa tɛ ɓɔn!› »

⁴⁴Wi-de-tom kɛ̧ɛ̧ nyɔŋmɔ‘i nɛ̀ gbaayí o bíí. Wa nyɔŋa, ɓɛɛ oi-aa ɓɔn hee mɔ'ɔ nɛ̀ GASA WAN tɔ̧ɔ̧ ga.