Read Northwest Gbaya 2 WANNU 5 Bible Online

2 WANNU 5 - Northwest Gbaya bible

2 WANNU 5

¹Naamaŋ duka nɛ́ gasawi ko o wi-biro ko wannu Aram; a̧ nɛ́ ŋma bíí nɛ wannu kɔ̧ɔ̧ so nyɛmna; mɛ̀ nɛ́ wen zu a̧ a̧ GASA WAN dee nɛnɛ ha̧ o be Aram mɛ gbin biro nɛ̀ ɗoŋ-aa; mɔ kpɔk, ŋgaŋa-wi’ɛi duka nɛ́ wi-doko.

²O be Aram nɛ̀ɛ̀ so mɛ ɓar mɔ nù ko o be Israɛl, ɓɛɛ wa ba ŋma boko-be *Israɛl piinɛ nɛ̀ bara. Boko-bem’ɛi duka de nɛ tom ha̧ kóò ko Naamaŋ.

³Be-okoo'i tɔ̧ɔ̧ ha̧ kóò ko Naamaŋ: «Kà wan kɔ‘m duk so katɛ ŋma *wi-tɔ̧-wen oi nú Sɔ̧ nɛ̀ a̧a̧ sɛn Samarii gáà, a̧ tɛ̀ɛ́ de ha̧ zɛɛ-doko kɔ̧-a̧ mɛ kaɗi.»

⁴Naamaŋ nɛ̀ɛ̀ wé ɗoŋ wen'i ha̧ wannu hee mɔ'ɔ nɛ be-zɔŋa *Israɛl'i tɔ̧a̧ ga.

⁵Wannu Aram kifa nú: «Mɛ̀ nɛ́; mi tɛ tom kalata ha̧ wannu Israɛl.» Naamaŋ yaka; a̧ baa kilo bu-mbɔi gɔmŋmaa-taar, kilo lɔr ɓu-mɔɔrɔ-ɗoŋ-kpɔk in o gasa laa ɓu nɛnɛ.

⁶A̧ ha̧a̧ kalata'i ha̧ wannu *Israɛl. Gba̧a̧ wen-aa nɛ́ mɔ'ɔ: «Ŋgimbi nɛ mɛ tɛ kpa kalata’ɛ, mɛ̀ íŋ ndé, mi tom nɛ wi-de-tom kɔ‘m Naamaŋ nɛnɛ tɛ mɛ ha̧ mɛ mɛ kpas'a tɛ zɛɛ-doko kɔ̧-a̧.»

⁷Ɗoŋ nɛ wannu *Israɛl tɔra kalata'i kaɗi, a̧ a̧ka̧ laa tɛ-a, ɓɛɛ a̧ tɔ̧: «Mi nɛ́ Sɔ̧ nɛ̀ gbɛ bíí ɓɛɛ kpasa bíí, sɛka wi’ɛ tom bíí kɔ‘i tɛnɛ‘e ndé, a̧‘m kpás'a tɛ zɛɛ-doko kɔ̧-a̧ wó'ɛ nde? Ɛ̀nɛ̀ íŋ nɛ mbetɛ ndé, a̧ kii nɛ nú‘m!»

⁸Ŋgimbi nɛ bíí ko Sɔ̧ Elisee zia'e, wannu *Israɛl a̧ka̧ laa tɛ, a̧ toma tɔ̧ ha̧ a̧ hee mɔ'ɔ ga: «Ɛnɛ a̧ka̧ laa tɛ‘nɛ́ wen ge? Naamaŋ a̧ tɛ́ɛ̀ kpa'm, ɓɛɛ a̧ tɛ iŋ‘e, *wi-tɔ̧-wen oi nú Sɔ̧ a̧a̧ sɛn *Israɛl!»

⁹Naamaŋ hɔɔ nɛ̀ oi keekee in o nyaŋa kɔ‘i, ɓɛɛ yor sɛn nú tua ko Elisee.

¹⁰Elisee toma betom mɛ tɔ̧ ha̧ a̧: «Mɛ̀ nɛ́ɛ̀ zui yì war mɔɔrɔ-ɗoŋ-yiitoo ɗɔɔ Jurdɛn, ɓɛɛ tɛ-mɛ tɛ sa̧.»

¹¹See Naamaŋ nyima, ɓɛɛ a̧ tɔ̧ yak nɛnɛ: «Mi ta kɔ‘m'e ndé, a̧ tɛ gbo yor ti'm; ɓɛɛ a̧ kɔfa GASA WAN Sɔ̧ kɔ̧-a̧, ɓɛɛ kà a̧ tam fara zɛɛ‘i nɛ̀ er-a, ɓɛɛ zɛɛ‘i kaɗa.

¹²Bó nɛ́ o foka-yí Damas, Abana in Parpar gana o foka-yí *Israɛl lɛŋ na nde? Kà‘m zui so yí nɔ‘i, ɓɛɛ tɛ‘m sa̧ na?» Nɛ́ mɔ'ɔ n'aa zika tɛ-a, ɓɛɛ a̧ si ɗoŋ nɛ̀ nyimsea.

¹³O wi-de-tom kɔ̧-a̧ ɗɔŋa pii ti, ɓɛɛ tɔ̧ ha̧ a̧: «Dáà, kóó *wi-tɔ̧-wen oi nú Sɔ̧ usa so nɛ́ ŋma ŋgaya mɔ h’ɛ́nɛ́ mɛ de, ɓɛɛ k’ɛ́nɛ́ de so na, kà bó nɛ̀ gee ɛ̧ɛ̧ n'aa tɔ̧ɔ̧ ndé, ɛ̀nɛ̀ nɛ́ɛ̀ zui nɛ yì ɓɛɛ ha̧ tɛ‘nɛ́ sa̧ wó-ɛ nde?»

¹⁴Tɛ wen-i, Naamaŋ zira nɛ́ɛ̀ tik ɗɔɔ Jurdɛn war mɔɔrɔ-ɗoŋ-yiitoo nyɛm nɛ̀ ɗoŋ wen ko bíí ko Sɔ̧, ɓɛɛ tɛ-a sa̧, yɔk hee tɛ obem ga.

¹⁵A̧ pia ɗoŋ in o bíí kɔ̧-a̧ lɛŋ tɛ bíí ko Sɔ̧, a̧ yee tua yor ti a̧, ɓɛɛ tɔ̧ ha̧ a̧: «Kinii, mi iŋa ŋma Sɔ̧ nɛtɛ bo zaŋnu na, kànà nɛ́ Sɔ̧ ko *Israɛl kpɔk ɓɛɛ! Kinii, mi ai nú h’ɛ́nɛ́ mɛ kpɛk gbakamɔ ko wi-de-tom k’ɛ́nɛ́.»

¹⁶Elisee tɔ̧ɔ̧ ha̧ a̧: «Mi tɔ̧ nɛ kpasawen nɛ̀ nin GASA WAN n'am de tom ha̧ a̧‘i, mi beka ba ŋma mɔ kpɔk na.» Naamaŋ aia nú ha̧ a̧ mɛ ba, ɓɛɛ a̧ bɛ̧.

¹⁷Naamaŋ tɔ̧a̧: «Hee mɔ'ɔ n’ɛnɛ kɔ̧ na ga, ɛ̀nɛ̀ é ha̧ wa mɛ ha̧ ŋma bufu fuunu a zu sunda yiitoo ha̧ wi-de-tom k’ɛ́nɛ́, wen mi wi-de-tom k’ɛ́nɛ́ beka ɗafi sɔ̧ in *dɔɔ-kpoo-sɔ̧ ha̧ ŋma sɔ̧ ɓɔna, kànà nɛ GASA WAN kpɔk ɓɛɛ.

¹⁸Mɔ kpɔk, GASA WAN a̧ é ɗaŋmɔ kɔ‘m wi-de-tom kɔ̧-a̧ ha̧ a̧. Kà wan kɔ‘m nɛ́ sí kɔ̧ tua ko Sɔ̧ Rimɔŋ mɛ gasi a̧, ɓɛɛ kà a̧ kasi er-am ha̧‘m mɛ gu nù mɛ gasi a̧, GASA WAN a̧ é ɗaŋmɔ ko wi-de-tom kɔ̧-a̧ ha̧ a̧!»

¹⁹Elisee kifa nú ha̧ a̧: «Mɛ̀ sí kɔ-mɛ ɗoŋ zaŋ ga̧a̧mɔ.» Ɗoŋ nɛ̀ Naamaŋ yaka benaŋ nyɛi̧ nɛ̀ Elisee tikiɗi,

²⁰Gehazi wi-de-tom ko Elisee bíí ko Sɔ̧ taa nɛ̀ kɔ̧ see: «Wan kɔ‘m dee ha̧ tɛ Naamaŋ be Aram’ɛ mɛ sa̧, ɓɛɛ sa a̧ kpɛk gbakamɔ kɔ̧-a̧‘i na, bɔɔ wen ge? Mi tɔ̧ nɛ kpasawen, hee mɔ'ɔ nɛ̀ GASA WAN duk kpasa ga, mi tɛ ndak ɗoŋ-aa mɛ kpa ŋma mɔ er-a.»

²¹Gehazi ndaka ɗoŋ Naamaŋ, ɓɛɛ ŋgimbi nɛ Naamaŋ zɔka a̧ fara maa yì tɛnɛ, a̧ zira nɛ̀ haya-a zu keekee kɔ̧-a̧ mɛ we ti a̧; a̧ tɔ̧a̧: «Ŋma mɔ a̧a̧ sɛnɛ?»

²²A̧ kifa nú: «Ŋma mɔ bo na! Kànà nɛ́ wan kɔ‘m a̧ tom am h’ɛ́nɛ́‘e ndé: o ŋma *wi-tɔ̧-wen oi nú Sɔ̧ yiitoo tɛ̀ɛ́ nɛ̀ zu kaya Efraim kinii sɛn ti wi, ɓɛɛ wi ai nú h’ɛ́nɛ́, ɛ̀nɛ̀ há̧ kilo bu-mbɔi ɓu-taar in gasa laa yiitoo ha'i ha̧ ha̧ wa.»

²³Naamaŋ tɔ̧a̧: «Mɛ̀ bá kilo bu-mbɔi ɓu-mɔɔrɔ-ɗoŋ-kpɔk.» Naamaŋ tɔ̧ɔ̧ ha̧ a̧ mɛ ba kànà, ɓɛɛ hɛr sede'i in gasa laa yiitoo a kɔ̧ bufu e zu o wi-de-tom kɔ̧-a̧ yiitoo mɛ́ tui nɛ́nɛ́ ha̧ Gehazi.

²⁴Nɛ̀ Gehazi hɔɔ Ofɛl kaɗi, a̧ kaia bufu er wa a kɔ̧ tua, ɓɛɛ a̧ tɔ̧ ha̧ wi nɔ‘i mɛ si ɗoŋ.

²⁵A̧ pia ɗoŋ duk katɛ wan kɔ̧-a̧. Elisee aka a̧: «Gehazi, mɛ́ nɛ̀ɛ̀ so déè?» A̧ kifa nú ha̧ a̧: «Wi-de-tom k’ɛ́nɛ́ nɛ́ ŋma mɔ̀ na.»

²⁶Elisee tɔ̧ɔ̧ ha̧ a̧: «Ŋgimbi nɛ ŋma bíí zira nɛnɛ zu keekee kɔ‘i nɛ̀ haya-a mɛ we nɛ̀ ti mɛ‘i, bo nɛ mi a̧a̧ hi̧i̧ na nde? Ŋgimbi wen kaia sede, in o laa, o te-nɔ̧́, o fɔ-nyak-dɔ̧ɔ̧, o sami in o ndai, o wi-de-tom in o kó-de-tom bo a̧a̧ na!

²⁷Kinii doko ko Naamaŋ tɛ ndaɗi mɛ in o bezaŋ-mɛ kpoo nɛ kpoo!» Gehazi ee Elisee duk; doko baa a̧, ɓɛɛ tɛ-a kifi nɛ̀ bu-a ndáká-ndáká.