Read Northwest Gbaya 2 WANNU 6 Bible Online

2 WANNU 6 - Northwest Gbaya bible

2 WANNU 6

¹Ŋma ŋgimbi, o gbama *wi-tɔ̧-wen oi nú Sɔ̧ tɔ̧ɔ̧ ha̧ Elisee: «Fara n’ɛɛ ya nù sɛnɛ ti'nɛ́ɛ̀ nyɛm yɛ na.

²Ɛ̀nɛ̀ é ha̧ o ndé mɛ nɛ̀ɛ́ gɔm gaŋgala nú Jurdɛn, ɛ̀ɛ̀ dé nɛ tua sɛn hɛ̧ɛ̧ h’ɛ́ɛ́ mɛ ya sɛnɛ.» A̧ kifa nú ha̧ wa: «Ɛ̀nɛ̀ nɛ̀.»

³Ŋma bíí mgbara wa tɔ̧a̧: «Mi ai nú h’ɛ́nɛ́, ɛ̀nɛ̀ nɛ́ in o wi-de-tom k’ɛ́nɛ́.» A̧ kifa nú: «Mi tɛ nɛ.»

⁴A̧ nɛ̀ɛ̀ in wa. Wa hɔɔ nú Jurdɛn, ɓɛɛ wa gɔm o te.

⁵Hee mɔ'ɔ nɛ̀ ŋma kpɔk mgbara wa gɔm nɛ gaŋgala kɔ‘i ga, gba̧a̧-kpi̧i̧ kpɔ̧i̧a̧ tik ɗɔɔ yì, ɓɛɛ a̧ hiɗi mɔ: «Ho! Nyaa! Kpi̧i̧ n'am gbaka gbak’ɛ, mi tɛ de hee ge?»

⁶Ɓɛɛ bíí ko Sɔ̧ ak a̧: «A̧ tika déè?» Ɓɛɛ wi-gɔm-te'i usi fara-a ha̧ a̧. Elisee sɛka ŋma be te pi̧ ɗɔɔ yì fara'i, ɓɛɛ gba̧a̧-kpi̧i̧ kur duk zu yì.

⁷Elisee tɔ̧ɔ̧ ha̧ a̧: «Kaɗa, mɛ̀ bà.» Ɓɛɛ wi’ɛi nyɛi̧ er, ɓɛɛ ba.

⁸Duka, ɓɛɛ wannu Aram ba biro dúk nɛ̀ *Israɛl. Ŋgimbi n'aa mɔi̧ o gasa wi-biro kɔ̧-a̧, kà a̧ tɔ̧: «Gbagari kɔ‘m tɛ duk mɛ‘i,»

⁹ɓɛɛ bíí ko Sɔ̧ toma tɔ̧ ha̧ wannu *Israɛl'e: «K’ɛ́nɛ́ ɓir fara'i na, wen o be Aram zira si hi̧i̧.»

¹⁰Nɛ́ fara nɛ̀ Elisee usi ha̧ wannu Israɛl a̧ a̧ tom kànà o wi-biro kɔ̧-a̧ si sɛnɛ. Mɔ‘i dee war géè ndé, n'aa mbaŋ nɛ tɛ wannu wen pɛma mɔ.

¹¹Wannu Aram taa mɔ tɛ mɔ‘i batɛ; a̧ mɔi̧a o gasa wi-biro kɔ̧-a̧, ɓɛɛ a̧ tɔ̧ ha̧ wa: «Ɛ̀nɛ̀ tɔ̧́ ha̧‘m, mɛ̀ nɛ́ o mgbara yɛ a̧ gba ndaa biro k’ɛɛ ha̧ wannu Israɛl o nde?»

¹²Ŋma gasa wi-biro tɔ̧a̧: «Ŋma bíí bo na, nyaa wannu; nɛ́ Elisee *wi-tɔ̧-wen oi nú Sɔ̧ sɛn *Israɛl. Kóó nɛ́ hu̧sa̧ wen n’ɛnɛ tɔ̧ fara-ɔɔ k’ɛ́nɛ́ mɛ‘i, a̧ nyɛma mɛ tɔ̧ ha̧ wannu kɔ-wa.»

¹³Wannu Aram tɔ̧a̧: «Ɛ̀nɛ̀ nɛ́ɛ̀ zɔk mgbák fara n'aa duk sɛnɛ ha̧‘m tom o bíí nɛnɛ mɛ ba a̧.» Wa tɔ̧ɔ̧ ha̧ wannu ndé, a̧ a̧a̧ sɛn Dotaŋ.

¹⁴Wannu toma o nyaŋa, o keekee-nyaŋa in o wi-biro nɛ̀ dɔka-a nɛnɛ; wa hɔɔ hi̧i̧ mɛ zɛ, ɓɛɛ wa kɛr ye'i duk nú ŋmaa ɗɛ́kɛ́t.

¹⁵Wi-de-tom ko bíí ko Sɔ̧ gboo zan mɛ tutuyɛ sut, ɓɛɛ ká gba gíí wi-biro in o nyaŋa gú nɛ̀ o keekee-nyaŋa kɛra ye kpa nú ŋmaa. A̧ tɔ̧ɔ̧ ha̧ Elisee: «Ho! Nyaa! Ɛ́ɛ́ tɛ́ de héé ge?»

¹⁶Elisee kifa nú: «Ká mɛ́ de kíì na, wen o wi nɛ̀ ya in yɛɛ dɔka gan o wi nɛ̀ ya in wa.»

¹⁷Elisee kɔfa Sɔ̧ hee mɔ'ɔ ga: «GASA WAN, ɛ̀nɛ̀ hú̧í̧ yí wi-de-tom kɔ‘m ha̧ a̧ zɔk mɔ!» Nɛ́ mɔ'ɔ nɛ̀ GASA WAN hu̧i̧a̧ yi-a; a̧ zɔka mɔ si zu kaya, ɓɛɛ a̧ zɔk o nyaŋa in o keekee-nyaŋa-wee nɛ̀ zika Elisee kpa.

¹⁸O be Aram zira sitɛ Elisee, ɓɛɛ a̧ kɔfi GASA WAN hee mɔ'ɔ ga: «Ɛ̀nɛ̀ dé ha̧ yí o wi nɔ'ɔ mɛ ba tum.» GASA WAN dee ha̧ yí-wa mɛ ba tum nyɛm nɛ̀ ɗoŋ akamɔ ko Elisee.

¹⁹Elisee tɔ̧ɔ̧ ha̧ wa: «Yuwar bó nɛ́ mɔ'ɔ in ye bó nɛ́ mɔ'ɔ na mbɛt. Ɛ̀nɛ̀ tɛ́ ɗoŋ-am; mi tɛ mgbɔ‘nɛ́ nɛnɛ tɛ wi n’ɛnɛ kii'i.» Ɓɛɛ a̧ mgbɔ wa nɛnɛ si Samarii.

²⁰Ŋgimbi nɛ wa yee Samarii kaɗi, Elisee kɔfa GASA WAN: «GASA WAN, ɛ̀nɛ̀ hú̧í̧ yí o wi nɔ'ɔ ha̧ wa mɛ zɔk mɔ.» GASA WAN hu̧i̧a̧ yí-wa; wa zɔka'e ndé, wi a̧a̧ mgbák see ye Samarii.

²¹Wannu *Israɛl zɔka wa, ɓɛɛ tɔ̧ ha̧ Elisee: «A̧‘m gbɛ́ wa nde, dáà kɔ‘m?»[7]

²²Elisee kifa nú: «K’ɛ́nɛ́ gbɛ wa na. Nɛti, o bara-biro n’ɛ̀nɛ̀ kai’ɛ, ɛ́nɛ́ gbɛ wa gbɛɛ nɛ̀ gba-paa in góò nde? Ɛ̀nɛ̀ há̧ brɛt ha̧ wa nyɔŋ in yì ha̧ wa nɔ; ɓɛɛ ɛ̀nɛ̀ é ha̧ wa mɛ si ɗoŋ tɛ ko wan kɔ-wa.»

²³Ɓɛɛ wannu ha̧ zɔm nyɔŋmɔ in mɔɔ-nɔ ha̧ wa mbɛt nɛ̀ dɔka-a. Ɗoŋ nɛ wa nyɔŋa mɔ nɔ nɛ̀ mɔ kaɗi, a̧ toma wa si ɗoŋ tɛ wan kɔ-wa. Ɓɛɛ o be Aram nɔ‘i pii ɗoŋ sɛn nú *Israɛl woyo ɓɔna.

²⁴Ɗoŋ ŋgimbi tikiɗi, Bɛn-Hadad wannu Aram mɔi̧a o wi-biro kɔ‘i lɛŋ, ɓɛɛ kɛr ye Samarii.

²⁵Wa kɛra ye e nù, ɓɛɛ nyɔŋmɔ ɓan nyɛmna. Wi ɗɔr zu tuifuu kpɔk tɛ kɔya sede ɓu-mɔɔrɔ-ɗoŋ-taar, ɓɛɛ gɛnɛ o wa̧a̧-kpoo nɛ́ kɔya sede mɔɔrɔ.

²⁶Hee mɔ'ɔ nɛ̀ wannu *Israɛl ɓir so nɛ̀ zu garo ga, ŋma okoo hiɗa mɔ sitɛ a̧: «Ɛ̀nɛ̀ gbák am na nde, nyaa wannu!»

²⁷Wannu kifa nú: «Kà GASA WAN kɔ̧ gbaka mɛ na, mi tɛ gbak bɔɔ mɛ nɛ̀ ge? Brɛt, kóó dɔ̧ɔ̧ bo sɛn fara-a-nyɔŋmɔ kɔ‘m na.»

²⁸Ɓɛɛ wannu tɔ̧ ha̧ a̧ woyo: «Nɛ́ ge a̧ mɛ kɔ̧a̧ ge?» Kóò‘i kifa nú: «Ŋma okoo'e ndé, a̧‘m há̧ bem kɔ‘m ɛ̀ɛ̀ nyɔ́ŋ sɔsɔɔ, ɓɛɛ sa̧a̧mɔ ɛ́ɛ́ nyɔŋa kɔ‘i.

²⁹Nɛ́ mɔ'ɔ n’ɛɛ gbɛɛ bem kɔ‘m nyɔŋ; mɔ sa̧a̧, ɓɛɛ mi tɔ̧ ha̧ a̧, a̧ a̧ há̧ bem kɔ̧-a̧ ɛ̀ɛ̀ nyɔŋ, ɓɛɛ a̧ ba bem kɔ̧-a̧ hu̧si.»

³⁰Ŋgimbi nɛ wannu zia wen nɛ̀ kóò‘i wee ɗoŋ-aa'i, a̧ a̧ka̧ laa tɛ-a. A̧ duk so zu garo, ɓɛɛ o bíí zɔk laa bufu n'aa pi̧i̧ ɗɔɔ gasa laa kɔ̧-a̧.

³¹A̧ tɔ̧a̧: «Kà‘m nɛ́ ɓira ger Elisee, bem ko Safat sɔsɔɔ na, Sɔ̧'ɔ̧ dé ɗaŋmɔ in am!»

³²Elisee duka nú tua kɔ‘i in o gasawi, ɓɛɛ wannu tom betom tɛnɛ tɛ a̧. Nɛti ha̧ betom mɛ hɔ tɛ Elisee, Elisee tɔ̧ɔ̧ ha̧ o gasawi: «Ɛ̀nɛ̀ zɔk, bem ko wi-gbɛ-zu’ɛ tom nɛ ŋma bíí mɛ ɓir ger-am. Kà betom nɛ́ hɔa, n’ɛ̀nɛ̀ kpé nú tua, ɓɛɛ ɛ̀nɛ̀ ír a̧ nɛ̀ kpar-nú tua si ɗoŋ. Ɛnɛ zia giti naŋ wannu kɔ̧-a̧ nɛ de mɔ tɛnɛ ɗoŋ-aa'i?»

³³A̧ biti tɔ̧ɔ̧ wen, ɓɛɛ wannu[8] hɔ tɔ̧ ha̧ a̧: «Ŋgamɔ'ɛ tɛ́ nɛ̀ tɛ̀ GASA WAN! Mi tɛ e ta nɛ̀ GASA WAN woyo hee ge?»