Read Northwest Gbaya 2 WANNU 9 Bible Online

2 WANNU 9 - Northwest Gbaya bible

2 WANNU 9

¹Elisee *wi-tɔ̧-wen oi nú Sɔ̧ saa ŋma gbama *wi-tɔ̧-wen oi nú Sɔ̧, ɓɛɛ tɔ̧ ha̧ a̧: «Mɛ̀ hɛ́r zaŋ-mɛ, mɛ̀ bá be dak’ɛ, ɓɛɛ mɛ̀ nɛ́ sɛn Ramot nú Galad.

²Kà mɛ nɛ́ hɔɔ hi̧i̧ kaɗi, mɛ̀ kíí Jɛhu bem ko Josafat be-koo Nimsi; mɛ̀ yé tua, mɛ̀ tɔ̧́ ha̧ a̧ mɛ́ kur mgbara o nya-a̧, ɓɛɛ mɛ̀ mgbɔ́ a̧ si kɔ̧ ŋma bɛr-tua nɛtɛ.

³Mɛ̀ bá dak-nɔ̧́, mɛ̀ tɛ́n á zu-a, ɓɛɛ mɛ̀ tɔ̧‘e, GASA WAN tɔ̧a̧: ‹Mi tɛna nɔ̧́'ɛ a zu mɛ de nɛ̀ wan *Israɛl ha̧ mɛ.› Mɛ tɛ hu̧i̧ nú tua, ɓɛɛ mɛ yuu mɔ yak, ká mɛ yor na.»

⁴Ŋgaiwi tɔ̧ wen oi nú Sɔ̧‘i yaka si Ramot, nú Galad.

⁵A̧ hɔa, ká o gasawi ko o wi-biro ya nɛ nù, ɓɛɛ a̧ tɔ̧: «Mi a̧a̧ nɛ̀ be wen mɛ tɔ̧ h’ɛ́nɛ́, wanye.» Jɛhu aka mɔ: «Mɛ tɔ̧ bɔɔ wen ha̧ o, mgbara ɛɛ lɛŋ'ɛ o nde?» A̧ kifa nú: «Nɛ́ ɛnɛ gɔ, wanye.»

⁶Jɛhu kura, ye tua, ɓɛɛ ŋgaiwi'i tɛn nɔ̧́ a zu-a, tɔ̧ nɛnɛ‘e: «GASA WAN Sɔ̧ ko *Israɛl tɔ̧a̧: ‹Mi tɛna nɔ̧́'ɛ a zu mɛ de nɛ̀ wan zu dukbíí ko GASA WAN, wan-Israɛl ha̧ mɛ.

⁷Mɛ tɛ gbɛ o bíí nutua ko Akab wan kɔ-mɛ, sɛka'm kifa er ha̧ Jezabɛl, wen tɔk tɛ o *wi-tɔ̧-wen oi nú Sɔ̧, in tɔk tɛ o wi-de-tom ko Sɔ̧ lɛŋ n'aa gbaia a nù.

⁸O bíí nutua ko Akab lɛŋ tɛ kum; mi tɛ kum o wiwii lɛŋ, kóó nɛ́ o bara, kóó nɛ́ o géé bíí sɛn *Israɛl mbɛt.

⁹Nɛ́ mɔ n'am dee so in o bíí nutua ko Jeroboam bem ko Nɛbat in o bíí nutua ko Baɛsa, bem ko Ahiya'i, a̧‘m tɛ de in o bíí nutua ko Akab mbɛt.

¹⁰Ɓɛɛ nɛ̀ ko Jezabɛl, o toyo tɛ nyɔŋ wɔr-aa sɛn nú Yizreɛl, bíí beka gun a̧ na.› » A̧ hu̧i̧a̧ nú tua, ɓɛɛ a̧ yu mɔ yak.

¹¹Jɛhu gboo kpa o gasa wi-biro ko wan kɔ‘i, ɓɛɛ wa ak a̧: «Dee hee ge? Mgbelewi’ɛ tɛ̀ɛ́ bɔɔ tɛ mɛ mɛ de ge?» A̧ kifa nú: «Bo nɛ́ ɛ́nɛ́ iŋa a̧ nɛ̀ kpɔk wormɔ kɔ̧-a̧‘i na?»

¹²Wa tɔ̧ɔ̧ ha̧ a̧: «Ndela; mɛ̀ tɔ̧́ mɔ n'aa tɔ̧ɔ̧ ha̧ mɛ‘i h’ɛ́ɛ́!» A̧ kifa nú: «Mɔ lɛŋ n'aa tɔ̧ɔ̧ ha̧‘m nɛ́ mɔ'ɔ: ‹GASA WAN'e ndé: Mi tɛna nɔ̧́'ɛ a zu-mɛ de nɛ̀ wan *Israɛl ha̧ mɛ.› »

¹³Wa kaia o gasa laa kɔ-wa tati mbɔɗɔnu[10] nɛ̀ haya-a ha̧ Jɛhu mɛ nɛ nɔ̀ zu-a, ɓɛɛ wa dɔm zak hiɗi nɛ̀ mɔ‘e: «Wannu kànà nɛ́ ɛ́nɛ́ ɓɛɛ, nyaa Jɛhu!»

¹⁴Jɛhu bem ko Josafat be-koo Nimsi baa ɗaŋ keta zu Yoram, ká Yoram in o be *Israɛl lɛŋ pɛm so nɛ́ Ramot sɛn nú Galad, wen ká Hazaɛl wannu Aram tɛɛ ba.

¹⁵Wannu Yoram pia so ɗoŋ Yizreɛl mɛ a nyina yí da̧i̧ n'aa baa so tɛ dee biro in Hazaɛl wannu Aram'i. Jɛhu tɔ̧ɔ̧ ha̧ gbama gasa wi-biro'e: «Kà bo só h’ɛ́nɛ́ mɛ ye ɗoŋ am ga, ká ŋma bíí gbo tɛ ye’ɛ mɛ nɛ̀ɛ́ tɔ̧ nyɛrɛ mɔ nɛ̀ yaka hɛ̧ɛ̧ sɛn Yizreɛl mɛ na.»

¹⁶Nɛ́ mɔ'ɔ nɛ̀ Jɛhu daŋa keekee-nyaŋa kɔ‘i, ɓɛɛ yak si Yizreɛl wen Yoram ɔ so hi̧i̧, ɓɛɛ ká Akazias wannu Juda nɛɛ so mɛ zɔk a̧ mbɛt.

¹⁷Wi nɛ̀ pɛm kɔ‘i nɛ mɔ sɛn nú ye Yizreɛl'i zɔka o wi-biro ko Jɛhu fara tɛa-a, ɓɛɛ tɔ̧: «O wi-biro a̧ tɛ‘i.» Yoram tɔ̧ɔ̧ ha̧ o wi-biro kɔ‘i: «Ɛ̀nɛ̀ tóm ŋma wan-nyaŋa kpɔk mɛ nɛ̀ɛ́ ak o wi nɔ‘i ndé, wa kɔ̧ɔ̧ nɛ́ ga̧a̧mɔ nde?»

¹⁸Wan-nyaŋa'i wee ti wa nɛnɛ, ɓɛɛ ak mɔ: «Wannu-e ndé, ɛnɛ kɔ̧ɔ̧ nɛ ga̧a̧mɔ nde?» Jɛhu kifa nú: «Ŋma mɔ nɛ zɔk mɛ tɛ ga̧a̧mɔ nɛ́ ge? Mɛ̀ zík tɛ-mɛ, mɛ̀ tɛ́ ɗoŋ-am.» Ɓɛɛ wi-pɛm-mɔ so'i tɔ̧: «Be-tom'i kpaa ŋmaa in wa, ɓɛɛ a̧ pii ɗoŋ na.»

¹⁹Wannu toma ŋma wan-nyaŋa woyo nɛnɛ; a̧ nɛ̀ɛ̀ kpa wa, ɓɛɛ ak wa: «Wannu'e ndé, ɛnɛ kɔ̧ɔ̧ nɛ́ ga̧a̧mɔ nde?» Jɛhu kifa nú. «Ŋma mɔ nɛ zɔk mɛ tɛ ga̧a̧mɔ nɛ́ ge? Mɛ̀ zík tɛ-mɛ, mɛ̀ tɛ́ ɗoŋ-am.»

²⁰Ɓɛɛ wi-pɛm-mɔ‘i tɔ̧ woyo: «A̧ kpaa ŋmaa in wa, ɓɛɛ a̧ pii ɗoŋ na. Wi nɛ̀ daŋ nyaŋa'i hɔɔ ŋmaa in Jɛhu be-koo Nimsi; a̧ ŋgan nyaŋa hee wi-dawa ga.»

²¹Yoram tɔ̧a̧: «Ɛ̀nɛ̀ hɛ́r nyaŋa tɛ keekee!» Wa hɛra nyaŋa tɛ keekee kɔ̧-a̧. Yoram wannu *Israɛl daŋa keekee kɔ‘i, ɓɛɛ Akazias wannu Juda daŋ kɔ‘i; wa wee ti Jɛhu. Wa kpaa a̧ kpɛɛfɔ ko Nabot be Yizreɛl.

²²Ŋgimbi nɛ Yoram zɔka Jɛhu, a̧ aka a̧: «Mɛ kɔ̧ɔ̧ nɛ́ ga̧a̧mɔ nde?» Jɛhu kifa nú: «Ge ga̧a̧mɔ ge, nɛ̀ gasa géé-sɔ̧ ko nàà kɔ-mɛ Jezabɛl in o mɔɔ-dua kɔ̧-a̧ dɔk dɔk'i siti’ɛ ge?»

²³Yoram zika nú nyaŋa kɔ‘i mɛ yu mɔ yak, ɓɛɛ tɔ̧ ha̧ Akazias: «Wa ɗɔɔ yɛ, Akazias!»

²⁴Jɛhu baa kusaa kɔ‘i, ɓɛɛ pi̧ Yoram gɔn see. Gba̧a̧ góò toka see wannu sar, ɓɛɛ a̧ hɔ̧fi̧ tik kɔ̧ keekee-nyaŋa kɔ̧-a̧.

²⁵Jɛhu tɔ̧ɔ̧ ha̧ baka-nyaŋa kɔ‘i Bid-kar: «Mɛ̀ bá wɔr-aa pi̧ kpɛɛfɔ ko Nabot be Yizreɛl. Tɛ-mɛ'ɛ mbáŋ ɗoŋ ŋgimbi n’ɛɛ duka so nɛnɛ kɔ̧ keekee kpɔk ndak nɛ̀ ɗoŋ dáà kɔ̧-a̧. GASA WAN tɔ̧ɔ̧ so wen zu a'e ndé,

²⁶wi zɔka tɔk-tɛ Nabot in o bem kɔ̧-a̧ ɗoŋ-aa tɛ nyɛi̧ na, ɓɛɛ wi tɛ kundi ari-a kpɛɛfɔ'ɛ. GASA WAN a̧ tɔ̧a̧. Hegɔ, mɛ̀ bá a̧ pi̧ kpɛɛfɔ'ɛ nyɛm nɛ̀ ɗoŋ wen ko GASA WAN.»

²⁷Ŋgimbi nɛ Akazias wannu Juda zɔka mɔ‘i, a̧ yuu mɔ nɛ̀ yuwar Bɛt-Gaŋ; Jɛhu ndaka ɗoŋ-aa, ɓɛɛ tɔ̧: «Ɛ̀nɛ̀ gbé a̧ mbɛt!» Wa ee da̧i̧ tɛ-a zu keekee-nyaŋa kɔ̧-a̧ tɛ daŋa-a si Gur ká̧ Yiblɛam. A̧ yuu mɔ si Mɛgido, ɓɛɛ a̧ fe hi̧i̧.

²⁸O wi-de-tom kɔ̧-a̧ baa a̧ e zu keekee-nyaŋa sinɛ Jerusalɛm, ɓɛɛ wa gun a̧ *Ye ko David in o dáà kɔ̧-a̧.

²⁹Yoram bem ko Akab ɔɔ wan pɛ ɓu-zua-kpɔk sɛka Akazias ɔ wan Juda.

³⁰Jɛhu hɛɗa yea-a sɛn Yizreɛl, ɓɛɛ Jezabɛl zii nyɛrɛ-a. A̧ sɔ̧ɔ̧ mɔ yí-a, ɗafi nɛ̀ zu nɛ̀ de-a, ɓɛɛ yor woi-tua.

³¹Jɛhu hɔɔ nú garo ye, ɓɛɛ Jezabɛl tɔ̧: «Mɛ kɔ̧ɔ̧ nɛ́ ga̧a̧mɔ nde, Zimri,[11] wi-gbɛ-wan kɔ‘i?»

³²Jɛhu zɔka mɔ si woi-tua'i, ɓɛɛ tɔ̧: «Nɛ́ o'o duk ɗoŋ-am o?» Ɓɛɛ o kpàná yiitoo kóó taar gir tɛ sitɛ a̧ nɛ̀ woi-tua.

³³A̧ tɔ̧a̧: «Ɛ̀nɛ̀ ír a̧ pi̧ mbɔɗɔnu!» Wa ira a̧ pi̧ nù, ɓɛɛ tɔk tɛ-a kpíɗí a zaŋ ŋgeŋ in tɛ o nyaŋa; Jɛhu i̧sa wɔr-aa yak nɛnɛ.

³⁴A̧ yee tua, a̧ nyɔŋa mɔ, ɓɛɛ a̧ nɔ mɔ tɔ̧ nɛnɛ: «Hee a̧ nɛ́ zɔŋa-wan ga, ɛ̀nɛ̀ kíí yuwar mɛ gun a̧, kóó nɛ̀ oi fom nɛ̀ baa a̧‘i.»

³⁵Wa nɛɛ mɛ gun a̧, ɓɛɛ wa kpa nɛ́ gɔɔ-zu-a, o naŋ-a in kɔ̧ er-a ɓɛɛ.

³⁶Wa tɛɛ we ɗoŋ-aa ha̧ Jɛhu, ɓɛɛ a̧ tɔ̧: «Mɛ̀ nɛ́ wen nɛ̀ GASA WAN tɔ̧ɔ̧ nɛ nú *wi-tɔ̧-wen oi nú-a Elii be Tisbe’ɛ a̧ hɔɔ gba̧a̧ kaɗi'i. A̧ tɔ̧ɔ̧ so'e: ‹O toyo tɛ nyɔŋ wɔr Jezabɛl sɛn nú Yizreɛl.

³⁷Wɔr Jezabɛl tɛ kifi nɛ́ ɓuka nù sɛn kpɛɛfɔ Yizreɛl nɛ‘i beka nyɛm mɛ tɔ̧‘e, mɔ'ɔ nɛ́ Jezabɛl na.› »