Read Northwest Gbaya 1 KALATA NYƐRƐ 11 Bible Online

1 KALATA NYƐRƐ 11 - Northwest Gbaya bible

1 KALATA NYƐRƐ 11

¹Israɛl nɛ̀ oi zu lɛŋ tɛ̀ɛ̀ tɛ David sɛn Hebrɔŋ, ɓɛɛ wa tɔ̧ ha̧ a̧: «Ɛ̀nɛ̀ zɔ̀k, ɛ́ɛ́ nɛ́ tɔk tɛ‘nɛ́.

²Nɛti ká Saul ɓɔna tɛ wan zu yɛ, mɛ̀ nɛ́ ɛ́nɛ́ a̧ kai so o be Israɛl nɛ́ nɛ biro. GASA WAN Sɔ̧ k’ɛ́nɛ́ tɔ̧ɔ̧ so h’ɛ́nɛ́ ndé: ‹Nɛ́ ɛ́nɛ́ a̧ tɛ dai Israɛl dukbíí kɔ‘i, in nɛ́ ɛ́nɛ́ a̧ tɛ ɔ wan zu wa.› »

³O gasawi Israɛl lɛŋ tɛɛ kpa wannu sɛn Hebrɔŋ, ɓɛɛ David nɔ tɔk in wa hi̧i̧, sɛn ti GASA WAN. Wa tɛna nɔ̧́-wan Israɛl a zu David nyɛm nɛ̀ ɗoŋ wen ko GASA WAN nɛ̀ tɔ̧ɔ̧ so nɛ̀ nú Samuɛl.

⁴David in o be Israɛl lɛŋ nɛɛ si Jerusalɛm nɛ‘i sa'e Jebus. Nɛ́ sɛn fara'i a̧ o be Jebus dee so ye sɛnɛ,

⁵ɓɛɛ o be Jebus tɔ̧ ha̧ David: «Mɛ beka ye hɛ̧ɛ̧ na.» Ɓɛɛ David ba ŋgárá Siɔŋ nɛ̀ ŋgai. Mɛ̀ nɛ́ fara'i á̧ kifa duk nɛ́ ye ko David.

⁶David ha̧a̧ so nú nde: «Wi nɛ tɛ duk ti gbin nɛ̀ biro ti o be Jebus tɛ duk nɛ́ gasawi zu o wi-biro.» Kuti wi nɛ̀ baa biro dúk nɛ̀ o be Jebus nɛ́ Jɔab bem ko Sɛruya, ɓɛɛ David e a̧ nɛ́ gasawi zu o wi-biro.

⁷David baa fara kɔ̧ ŋgárá‘i; mɛ̀ nɛ́ hegɔ wa saa fara'i nɛ́ ye ko David.

⁸Ɓɛɛ a̧ mbo garo woyo zik nɛnɛ, ku̧u̧naŋ-a nɛ̀ Milo hɔ ká̧ ye, ɓɛɛ Jɔab ɗafi oi ye.

⁹Ŋgai ko David gasi gasi siti wen GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ duka so in a̧.

¹⁰O ŋgaŋa wi-biro in o be Israɛl lɛŋ yora ɗoŋ David nɛ̀ ŋgaya-a tɛ ŋgimbi-wan kɔ̧-a̧ ha̧ a̧ mɛ ɔ wan zu Israɛl nyɛm nɛ̀ ɗoŋ wen ko GASA WAN.

¹¹Nin o ŋgaŋa-wi nɔ‘i nɛ́ mɔɔ nɔ'ɔ: Yasobam, bem ko Hakmɔni gasawi zu o ŋgaŋa-wi Ɓu-taar[9]. Nɛ́ à̧ á̧ duka so ti nɛ̀ sɛ́ɛ̀, nasi nɛ̀ o bíí gɔmŋmaa-taar, kum nɛ̀ wa a nù.

¹²Hɔ-ɗoŋ-aa nɛ́ Eleazar bem ko Dodo, be Ahɔa, ŋma kpɔk mgbara o ŋgaŋa-wi taar.

¹³Mɛ̀ nɛ́ à̧ á̧ duka so in David sɛn Pas-Damin, ŋgimbi nɛ̀ o be Filistii mɔi̧a so nɛ̀ ŋmaa hi̧i̧ wen biro. O wi-biro Israɛl pɛsa yu mɔ yak ti o be Filistii. Ŋma fɔ alkamaari duka so hi̧i̧.

¹⁴Nɛ́ mɔ'ɔ nɛ̀ Eleazar in o bíí kɔ‘i hu̧sa̧ sɛnɛ, ɓɛɛ ndak o be Filistii kum nɛ̀ wa a nù. GASA WAN dee ha̧ wa mɛ gbin biro wese'i.

¹⁵Ŋma wese, o ŋma bíí taar mgbara o ŋgaŋa-wi Ɓu-taar zira pi̧i̧ tɛ David zu ta ká̧ di̧i̧ ko Adulam ŋgimbi nɛ̀ o be Filistii baa nɛ̀ gbagari kɔ‘i kɔ̧ ɗɔŋgɔ ko o be Refaim.

¹⁶David a̧a̧ fara hu̧sa̧-a̧ kɔ‘i, ɓɛɛ ká ŋma fara-pɛm-mɔ ko o be Filistii a̧a̧ so sɛn Bɛtlɛhɛm.

¹⁷David taa mɔ hee mɔ'ɔ ga: «Nɛ́ o'o tɛ nɛ̀ɛ́ ɗu gɔna-yì nɛ̀ a̧a̧ sɛn nú garo Bɛtlɛhɛm ha̧‘m nɔ o?»

¹⁸O ŋgaŋa-wi nɔ‘i taar'i gbaa war gbo nɛ̀ kɔ̧ gbagari ko o be Filistii, nɛ́ɛ̀ ɗu yì kɔ̧ gɔna-yì nú garo Bɛtlɛhɛm, ɓɛɛ wa ba sinɛ ɗoŋ ha̧ David. David nɔ so yì‘i na, ɓɛɛ a̧ tɛn a nù ha̧ GASA WAN,

¹⁹tɔ̧ nɛnɛ: «GASA WAN a̧ dór am tɛ dee mɔ hegɔ. Yì'ɛ nɛ́ tɔk-tɛ o bíí nɛ̀ ee tɛ tɛ fio!» Ɓɛɛ a̧ kɔ̧ mɛ nɔ yì‘i na. Mɔ nɛ̀ o ŋgaŋa-wi nɔ‘i taar'i dea nɛ́ mɔ‘i.

²⁰Nɛ́ Abisai nya Jɔab a̧ duka so gasawi ko o ŋgaŋa-wi Ɓu-taar; nɛ́ à̧ á̧ bìì so o bíí gɔmŋmaa-taar nɛ̀ kpɔk sɛ́ɛ̀ kɔ̧-a̧, ɓɛɛ nin-a hur mgbara o ŋgaŋa-wi Ɓu-taar[10].

²¹Wa tu̧u̧ tɛ-a gan o bíí ɓu-taar. A̧ duka gasawi kɔ-wa, ɓɛɛ a̧ nyɛm ŋmaa in o ŋgaŋa-wi taar na.

²²Bɛnaya bem ko Yehoyada be Kabsɛl nɛ́ ŋma ŋgaŋa-wi nɛ̀ dee o mɔ nɛ̀ dɔka-a. Nɛ́ à̧ á̧ gbɛɛ so o ŋgaŋa-wi Mɔab yiitoo a nù, nɛ́ à̧ á̧ gbɛɛ so dila kɔ̧ gɔna-yì wese gasa ɓɔrɔ;

²³nɛ́ kpɔk a̧‘i mbɛt a̧ gbɛɛ so ŋma zɔm kusa be Egiptɛ. Be Egiptɛ‘i a̧a̧ so nɛ̀ gba gasa sɛ́ɛ̀ er, ɓɛɛ a̧ ba kɔ̧-a̧ nɛ́ ɓira te. A̧ ɓara sɛ́ɛ̀ er be Egiptɛ‘i yinɛ, ɓɛɛ a̧ ba tok nɛ̀ a̧ gbɛ woyo.

²⁴Mɔ nɛ̀ Bɛnaya bem ko Yehoyada dea ha̧ nin-a mɛ hur nɛnɛ mgbara o ŋgaŋa-wi Ɓu-taar nɛ́ mɔ‘i.

²⁵A̧ dee ha̧ nin-a mɛ hur gan o ŋgaŋa-wi Ɓu-taar, ɓɛɛ a̧ gan o ŋgaŋa-wi taar na. David ea a̧ mgbara o wi-pɛm-wi.

²⁶O oi ŋgaŋa wi-biro nɛ́ mɔɔ nɔ'ɔ: Asahɛl nya Jɔab, Ɛlhanaŋ bem ko Dodo be Bɛtlɛhɛm;

²⁷Samɔt be Harɔr; Hɛlɛs be Pɛlɔŋ,

²⁸Ira bem ko Ikɛs be Tɛkɔa; Abiɛzɛr be Anatot;

²⁹Sibɛkai be Husa; Ilai be Ahɔa;

³⁰Marai be Nɛtɔfa, Hɛlɛd bem ko Bana be Nɛtɔfa mbɛt;

³¹Itai bem ko Ribai be Gibea tɛ nù ko Bɛnjamin, Bɛnaya be Pirɛatɔŋ;

³²Hurai be ká̧ zaŋ Gas, Abiɛl be Arbat;

³³Azmavɛt be Bahurim; Ɛliaba be Salbɔŋ;

³⁴Bɛnɛ-Hasim be Gisɔŋ; Yɔnataŋ bem ko Sage, be Harar;

³⁵Ahiam bem ko Sakar be Harar mbɛt; Ɛlifal bem ko Ur;

³⁶Hɛfɛr be Mɛkara; Ahiya be Pɛlɔŋ;

³⁷Hesro be Karmɛl; Narai bem ko Ɛsbai;

³⁸Jɔɛl nya Nataŋ; Mibar bem ko Hagri;

³⁹Sɛlɛk be Amɔŋ; Narai be Bɛrot baka-nyaŋa ko Jɔab bem ko Sɛruya;

⁴⁰Ira be Yitri; Garɛb be Yitri

⁴¹bá nɛ̀ Urii be Hit. O ŋma ŋgaŋa wi-biro nɔ‘i mbɛt nɛ́ Zabad bem ko Alai;

⁴²Adina bem ko Ziza bezaŋ Rubɛn; a̧ nɛ̀ ŋma gasawi ko o bezaŋ Rubɛn nɛ̀ a̧a̧ nɛ̀ wi-biro kɔ̧-a̧ ɓu-taar;

⁴³Hanaŋ bem ko Maka in Yɔsafat be Mɛtɛn;

⁴⁴Uzia be Astɛrot, Sama in Yɛiɛl o bem ko Hɔtam be Arɔɛr.

⁴⁵Yɛdiaɛl bem ko Simri in Yɔha nya kɔ̧-a̧ be Tis;

⁴⁶Eliɛl be Mahawa, Yɛribai in Yɔsarbia o bem ko Ɛlnam, Yitma be Mɔab;

⁴⁷Eliɛl, Obɛd in Yasiɛl be Soba.