Read Northwest Gbaya 1 KALATA NYƐRƐ 13 Bible Online

1 KALATA NYƐRƐ 13 - Northwest Gbaya bible

1 KALATA NYƐRƐ 13

¹David baa keta in o gasa wi-duk-zu o wi-biro booro in zu o wi-biro gɔmŋmaa gú nɛ̀ oi o gasawi lɛŋ.

²A̧ tɔ̧ɔ̧ ha̧ o gíí be Israɛl lɛŋ nɛ̀ mɔi̧a: «K’ɛ̀nɛ̀ nɛ́ zɔka ɔ dee in kà mɔ‘i á̧ tɛɛ nɛ̀ tɛ GASA WAN Sɔ̧ k’ɛɛ, ɛ̀ɛ̀ tóm nɛnɛ ha̧ o nya k’ɛɛ nɛ̀ ɓɔna tɛ o nú Israɛl lɛŋ, ha̧ o wi-ɗafi-sɔ̧ in ha̧ o be Levii sɛn saaye kɔ-wa fara nɛ̀ wa ɔ sɛnɛ‘i ha̧ wa mɛ yor ɗoŋ yɛ.

³Hegɔ, ɛɛ tɛ de ha̧ kuɓa ko GASA WAN k’ɛɛ mɛ pii ɗoŋ tɛ yɛ, wen n’ɛ̀ɛ̀ pi̧ nú ɗoŋ-aa ŋgimbi nɛ̀ Saul ɔɔ nɛ̀ wan na.»

⁴O bíí lɛŋ nɛ̀ mɔi̧a kpɛka ha̧ wa mɛ de hegɔ, wen wa zɔka mɔ‘i duk nɛ̀ yuwar-a.

⁵David mɔi̧a o be Israɛl lɛŋ, ku̧u̧naŋ-a nɛ̀ be-zer Egiptɛ hɔ nú Hamat, wen baa kuɓa ko Sɔ̧ piinɛ nɛ̀ Kiriat-Yearim.

⁶A̧ daŋa si Baala nɛ̀‘i sa'e Kiriat-Yearim, sɛn nú Juda in o be Israɛl lɛŋ ha̧ wa mɛ ba kuɓa ko GASA WAN Sɔ̧ wan nɛ̀ duk zu o keribim, fara nɛ̀ nin-a duk sɛnɛ.

⁷Wa baa kuɓa ko Sɔ̧ e zu mbe keekee sɛn nú tua ko Abinadab. Nɛ́ Uza in Ahio a̧ zɔk keekee'i nɛ́ nɛ̀nɛ́.

⁸David in o be Israɛl lɛŋ yɔ so kɔ‘i nɛ yɔyɛ nɛ̀ ŋgai tɛ-wa lɛŋ ti GASA WAN. Wa bíí nɛ́ o gima, mbɛr nɛ̀ o kunde, o koloŋ, o be bi̧ɔ̧, yak nɛ̀ o sɔkɔ, dɔm nɛ̀ o mbia mbɛt.

⁹Wa hɔɔ fara gusi alkamaari ko Kidɔŋ, ɓɛɛ Uza nyɛi̧ er mɛ kasi kuɓa wen nɛ̀ o ndai dee mɛ fo pi̧ nù.

¹⁰Nyimsea ko GASA WAN kura zu a̧, ɓɛɛ gbɛ a̧ yinɛ wen n'aa nyɛi̧a er-a si zu kuɓa. A̧ fea yí Sɔ̧ hi̧i̧.

¹¹See David ɗaŋa tɛ zɔka-a'e, GASA WAN gbɛɛ Uza pi̧ nù, ɓɛɛ wa a nin fara'i'e, Pɛrɛs-Uza[11] nɛ̀ duk kànà hɔ sɔsɔɔ.

¹²Wese'i, kíí Sɔ̧ dee David, ɓɛɛ a̧ tɔ̧: «Mi tɛ ba kuɓa ko Sɔ̧ pii tɛ kɔ‘m hee ge?»

¹³David ba Kuɓa nɔɔ-tɔk e tɛ kɔ‘i sɛn ye ko David na, ɓɛɛ a̧ tɔ̧ ha̧ wa mɛ ba e kɔ̧ tua ko Obɛd-Edɔm be Gat.

¹⁴Kuɓa nɔɔ-tɔk ko GASA WAN duka sɛn kɔ̧ tua ko Obɛd-Edɔm fio-zɛ taar, ɓɛɛ GASA WAN tok de yoŋgo zu o bíí nutua in zu o mɔ kɔ̧-a̧ lɛŋ.