Read Northwest Gbaya 1 KALATA NYƐRƐ 17 Bible Online

1 KALATA NYƐRƐ 17 - Northwest Gbaya bible

1 KALATA NYƐRƐ 17

¹Ŋgimbi nɛ̀ David duk sɛn kɔ̧ tua kɔ‘i, a̧ tɔ̧ɔ̧ ha̧ Nataŋ wi-tɔ̧-wen oi nú Sɔ̧: «Mɛ̀ zɔ̀k, mi ɔ kɔ̧ tua nɛ̀‘i dee nɛ̀ te gbatui, ɓɛɛ Kuɓa nɔɔ-tɔk ko GASA WAN duk kɔ̧ tua nɛ̀‘i dee nɛ̀ laa. Taamɔ kɔ-mɛ zu mɔ‘i hee ge?»

²Nataŋ kifa nú ha̧ David: «Mɔ n’ɛnɛ ta mɛ de lɛŋ, ɛ̀nɛ̀ dé nɛ́ dea-a, wen Sɔ̧ a̧a̧ in'nɛ̀ɛ́.»

³Ɓɛɛ mɛ zɛ‘i, GASA WAN tɔ̧ɔ̧ ha̧ Nataŋ hee mɔ'ɔ ga:

⁴«Mɛ̀ nɛ́ɛ̀ tɔ̧ ha̧ David wi-de-tom kɔ‘m'e, nɛ́ GASA WAN a̧ tɔ̧ wen’ɛ: ‹Bo nɛ́ mɛ́ a̧ tɛ de Tua ha̧‘m sɛka'm ɔɔ kɔ̧ a̧ na.

⁵Ŋgimbi n'am gboo nɛ̀ o be Israɛl nú Egiptɛ, mi ɔ nɛ kɔ̧ tua-laa in o ŋma fara nɛnɛ.

⁶Zɛ ɔ dɔka n'am yar nɛnɛ in o be Israɛl lɛŋ, mɛ zia'e mi tɔ̧ɔ̧ ŋma wese ha̧ o wannu n'am hoka mɛ dai Israɛl dukbíí kɔ‘m'e wen ge s’ɛnɛ de tua-te-gbatui ha̧‘m na, ge nde?›

⁷«Kinii mɛ̀ tɔ̧́ hegɔ ha̧ wi-de-tom kɔ‘m David: ‹Tɔ̧ɔ̧-wen ko GASA WAN, Sɔ̧ nɛ̀ a̧a̧ nɛ̀ ŋgayamɔ lɛŋ nɛ́ mɔ'ɔ: Mɛ̀ nɛ́ mi a̧‘m baa mɛ nɛ̀ poo zɔ̧, ɗoŋ o mɔ-dai ha̧ mɛ mɛ ɔ wan zu Israɛl dukbíí kɔ‘m.

⁸Mi duka in mɛɛ fara lɛŋ nɛ̀ mɛ nɛɛ sɛnɛ; mi gbɛɛ o wisɛn kɔ-mɛ yinɛ ti mɛ lɛŋ; mi tɛ de ha̧ nin-mɛ mɛ hur, hee mɔ'ɔ nɛ̀ nin o gasawi hur nɛnɛ zu nù'ɛ ga.

⁹Mi tɛ ha̧ ŋma fara ha̧ Israɛl dukbíí kɔ‘m; mi tɛ e wa fara'i, ɓɛɛ wa tɛ ya hi̧i̧; tɛ-wa beka nak ɓɔna, ɓɛɛ o wi-gbɛ-zu beka de ŋgamɔ in wa hee nɛti ga ɓɔna.

¹⁰Ku̧u̧naŋ-a nɛ̀ ŋgimbi n'am ee nɛ̀ o wi-gɔn-kita zu Israɛl dukbíí kɔ‘m, mi foo o wisɛn kɔ-mɛ e si ɗɔɔ, ɓɛɛ mi tɔ̧ ha̧ mɛ ndé, mi tɛ ha̧ o bezaŋ ha̧ mɛ.

¹¹Ɓɛɛ ŋgimbi nɛ̀ wese kɔ-mɛ tɛ dam, ha̧ mɛ mɛ si ɗoŋ kpa o dáà kɔ-mɛ, mi tɛ ba ŋma bezaŋ-mɛ e ŋgɔn oi mɛ. Wi’ɛi tɛ duk nɛ́ ŋma bíí mgbara o bem kɔ-mɛ, ɓɛɛ mi tɛ de ha̧ damti kɔ̧-a̧ mɛ yor nɛ̀ nɔa-a.

¹²Mɛ̀ nɛ́ a̧ a̧ tɛ de Tua ha̧‘m; ɓɛɛ mi tɛ e damti kɔ̧-a̧ nɛ̀ nɔa-a ɓɔnsɛnɛ.

¹³Mi tɛ duk nɛ́ dáà kɔ̧-a̧, ɓɛɛ a̧ tɛ duk nɛ́ bem kɔ‘m. Mi beka e ha̧a̧nú kɔ‘m ha̧ a̧ duk, hee mɔ'ɔ n'am ee nɛnɛ duk in wi nɛ̀ duka nɛ̀ ti ha̧ mɛ‘i ga na.

¹⁴Mi tɛ de ha̧ a̧ mɛ duk ɓɔnsɛnɛ kɔ̧ Tua kɔ‘m in tɛ wan kɔ‘m, ɓɛɛ damti kɔ̧-a̧ tɛ yor nɛ̀ nɔa-a ɓɔnsɛnɛ.› »

¹⁵Nataŋ tɔ̧ɔ̧ wen ha̧ David nyɛm nɛ̀ ɗoŋ o mɔ n'aa zia tɛ hɔɔ-zu'i.

¹⁶Wannu David tɛ̀ɛ̀ duk nù ti GASA WAN ɓɛɛ tɔ̧: «GASA WAN Sɔ̧, mi nɛ o, mi nɛ bíí nutua ko o, k’ɛ̀nɛ̀ bá nɛ̀‘m hɔ fara’ɛ o?

¹⁷Zu-a'i, mɔ‘i duka nɛ́ geɗek mɔ yí‘nɛ́, Sɔ̧ kɔ‘m; ɓɛɛ ɛ́nɛ́ tɔ̧ɔ̧ wen zu o bezaŋ wi-de-tom k’ɛ́nɛ́ ɗoŋ-aa nyɛi̧ nɛti kaɗi. Ɛ́nɛ́ zɔka'm hee gasa bíí ga, GASA WAN Sɔ̧!

¹⁸Mɛ̀ nɛ́ ge a̧ David tɛ tɔ̧ zu gasamɔ n’ɛnɛ dee ha̧ a̧ ge? K’ɛ́nɛ́, ɛ́nɛ́ iŋa wi-de-tom k’ɛ́nɛ́.

¹⁹Mɛ̀ nɛ́ wen zu wi-de-tom k’ɛ́nɛ́ in tɛ taamɔ k’ɛ́nɛ́, GASA WAN, ɛ́nɛ́ dee nɛ̀ gasa tom’ɛ lɛŋ ha̧ o bíí mɛ iŋ o gasamɔ k’ɛ́nɛ́.

²⁰GASA WAN, ŋma bíí nɛ̀ nyɛma ŋmaa in'nɛ̀ɛ́ bo na; tɛ mɔ lɛŋ n’ɛɛ zia nɛ̀ zer yɛ, Sɔ̧ nɛ́ ɛ́nɛ́ ɓɛɛ.

²¹Ŋma tugun bíí zu nù'ɛ nɛ̀ nyɛma ŋmaa in dukbíí k’ɛ́nɛ́ Israɛl bo na. Israɛl nɛ́ dukbíí k’ɛ́nɛ́ n’ɛnɛ gɔna zu-a, ha̧ nin'nɛ́ mɛ gasi in ha'i mɛ yu kíí‘nɛ́; ɛ́nɛ́ ndaka o tugun bíí yinɛ ti dukbíí k’ɛ́nɛ́ n’ɛnɛ gɔna zu wa pii ɗoŋ nɛ̀ Egiptɛ.

²²Ɛ́nɛ́ dora Israɛl e nɛ̀ dukbíí k’ɛ́nɛ́ kpoo nɛ kpoo, ɓɛɛ ɛ́nɛ́ kifi duk nɛ́ Sɔ̧ kɔ-wa.

²³«Kinii, GASA WAN, ɛ̀nɛ̀ dé mɔ n’ɛnɛ tɔ̧a̧! Wen n’ɛnɛ tɔ̧ɔ̧ zu wi-de-tom k’ɛ́nɛ́ in zu o bezaŋ-aa a̧ dúk nɛ́ kpasawen ɓɔnsɛnɛ.

²⁴Wen'i a̧ dúk kpasa; nin'nɛ́ a̧ húr ɓɔnsɛnɛ, ha̧ o bíí mɛ tɔ̧: GASA WAN Sɔ̧ nɛ̀ a̧a̧ nɛ̀ ŋgayamɔ lɛŋ nɛ́ Sɔ̧ ko Israɛl, ɓɛɛ nutua ko wi-de-tom k’ɛ́nɛ́ David a̧ yór nɛ̀ nɔa-a ti'nɛ́!

²⁵Nɛ́ ɛ́nɛ́ nɛ̀ tɛ‘nɛ́, Sɔ̧ kɔ‘m, a̧ tɔ̧ɔ̧ so ha̧ wi-de-tom k’ɛ́nɛ́‘e, o bezaŋ-aa tɛ ɔ wan oi-aa; nɛ́ mɔ‘i sa wi-de-tom k’ɛ́nɛ́ kpa nɔɔ-ŋgiɗi mɛ kɔfi mɔ in'nɛ̀ɛ́.

²⁶Ɓɛɛ kinii, GASA WAN, ɛ́nɛ́ nɛ́ Sɔ̧, ɓɛɛ ɛ́nɛ́ tɔ̧ɔ̧ wen gasa demɔ'ɛ ha̧ wi-de-tom k’ɛ́nɛ́!

²⁷Kinii, ɛ̀nɛ̀ tók de yoŋgo zu o bíí nutua ko wi-de-tom k’ɛ́nɛ́, wen ha̧ bezaŋ-aa mɛ duk yí‘nɛ́ ɓɔnsɛnɛ! Wen ɛ́nɛ́ GASA WAN, ɛ́nɛ́ tok nɛ́ de yoŋgo, ɓɛɛ zɔnamɔ duk nɛ́ k’ɛ́nɛ́ ɓɔnsɛnɛ.»