Read Northwest Gbaya 1 KALATA NYƐRƐ 20 Bible Online

1 KALATA NYƐRƐ 20 - Northwest Gbaya bible

1 KALATA NYƐRƐ 20

¹Mɛ nú kórò, ŋgimbi nɛ̀ o wannu bi nɛ̀ biro, Jɔab kaia o gíí wi-biro nɛ́ɛ̀ ɗaŋ nɛ mɔ sɛn nù ko o be Amɔŋ, ɓɛɛ a̧ tɛ́ɛ̀ ba gbagari sɛn ká̧ Raba, ká David ɓɔna so kɔ‘i sɛn Jerusalɛm. Jɔab bìí Raba, ɓɛɛ ɗaŋ ye a nù lɛŋ.

²David kpɔ̧i̧a̧ mɛtɛwol nɛ̀ duka zu Milkɔm[14] yinɛ. Dita-a duka hee kilo lɔr ɓu-taar ga. Ŋma de toka-ta duka sɛnɛ mbɛt. Wa hɛra mɛtɛwol'i zu David, ɓɛɛ a̧ kai o mɔ nɛ̀ dɔka-a sɛn tɛ ye'i yaknɛ.

³A̧ foo o bíí saaye'i yaknɛ, ɓɛɛ a̧ kai wa a tɛ tom-gbaa-te, tom-gbaa-ta in mbaŋa-gua. David dee pɛrti mɔ‘i dam sɛn ye ko o be Amɔŋ lɛŋ, ɓɛɛ a̧ pii ɗoŋ in dukbíí kɔ̧-a̧ lɛŋ pii Jerusalɛm.

⁴Hɔ-ɗoŋ mɔ‘i, ŋma biro tika nù sɛn Gezɛr mgbara o be Israɛl in o be Filistii. Mɛ̀ nɛ́ ŋgimbi'i á̧ Sibɛkai be Husa gbina nɛ̀ biro ti Sipai, ŋma bem ko o be Refaim, ɓɛɛ wa duk bara.

⁵Ŋma biro tika nù woyo in o be Filistii, ɓɛɛ Ɛlhanaŋ bem ko Yair gbɛ Lami, nya Gɔliat be Gat. Te-sɛ́ɛ̀ ko Lami duka so hee gasa mboɗa te ko wi-de-laa nduu ga.

⁶Ŋma mbe biro tika nù woyo mgbara Israɛl in o be Filistii sɛn Gat. Ŋma kusa bíí duka so hi̧i̧, waza er-a mɔɔrɔ-ɗoŋ-kpɔk; er-a in naŋ-a lɛŋ, waza-a ɓu-yiitoo-zua-naar. A̧ duka so nɛ́ ŋma bezaŋ Harafa mbɛt.

⁷A̧ kɔna ŋguɗi ti o be Israɛl, ɓɛɛ Yɔnataŋ, bem ko Simɛa nya David gbɛ a̧.

⁸O wi nɛ̀ wa gbɛa'i lɛŋ yaa so nɛ́ o bezaŋ Harafa sɛn Gat; ɓɛɛ David in o wi-biro kɔ‘i gbɛ wa lɛŋ.