Read Northwest Gbaya 1 KALATA NYƐRƐ 26 Bible Online

1 KALATA NYƐRƐ 26 - Northwest Gbaya bible

1 KALATA NYƐRƐ 26

¹Yuwar kɛ̧́ɛ̧́ tom ha̧ o bezaŋ Levii nɛ̀ de tom-pɛma-nú tua nɛ́ mɔ'ɔ. Bíí nú-gara ko Kore duka nɛ́ Mɛsɛlɛmia, bem ko Kore, be-koo Abiasaf.

²O bem ko Mɛsɛlɛmia nɛ́ kaya-wi Zakarii, hɔ-ɗoŋ-aa Yɛdiaɛl, Zɛbadia nɛ́ taar-a; Yatniɛl nɛ́ naar-a,

³Elam nɛ́ mɔɔrɔ-a, Yehohanaŋ nɛ́ mɔɔrɔ-ɗoŋ-kpɔk-a; Ɛlyɔnai nɛ́ mɔɔrɔ-ɗoŋ-yiitoo-aa.

⁴O bem ko Obɛd-Edɔm nɛ́ Sɛmaya kaya-bem, Yehozabad be-ɗoŋ; Yɔa nɛ́ taar-a, Sakar nɛ́ naar-a, Nɛtanɛl nɛ́ mɔɔrɔ-a;

⁵Amiɛl nɛ́ mɔɔrɔ-ɗoŋ-kpɔk-a; Isakar nɛ́ mɔɔrɔ-ɗoŋ-yiitoo-aa; Pɛulɛtai nɛ́ mɔɔrɔ-ɗoŋ-taar-a, wen Sɔ̧ toka so de yoŋgo zu a̧.

⁶Sɛmaya kaya-bem ko Obɛd-Edɔm koo o be-wiwii nɛ̀ yaa o gasawi nutua kɔ-wa, wen wa yaa so nɛ́ o kpasa-bíí.

⁷O bem ko Sɛmaya nɛ́ Otni, Rɛfaɛl, Obɛd, Ɛlzabad in o nya-wa, Elihu in Sɛmakia nɛ̀ yaa so nɛ́ o kpasa-bíí.

⁸O wi nɔ‘i lɛŋ nɛ́ o bezaŋ Obɛd-Edɔm; wa in o bem kɔ-wa in o nya-wa yaa so nɛ́ o kpasa-bíí wen ŋgai nɛ̀ wa ha̧ so tɛ tom kɔ-wa. O bíí ko Obɛd-Edɔm nɛ́ ɓu-mɔɔrɔ-ɗoŋ-kpɔk-zua-yiitoo.

⁹Mɛsɛlɛmia a̧a̧ so nɛ̀ o nya in o bem ɓu-zua-mɔɔrɔ-ɗoŋ-taar; wa lɛŋ nɛ́ o kpasa-bíí.

¹⁰Hɔsa, ŋma bezaŋ Mɛrari a̧a̧ so nɛ̀ bem. Kuti-a nɛ́ Simri nɛ̀ duka nɛ́ gasawi; a̧ bó só nɛ́ kaya-bem na, ɓɛɛ dáà kɔ̧-a̧ de kànà ha̧ a̧ mɛ duk nɛ́ gasawi zu o nya-a̧.

¹¹Hɔ-ɗoŋ-aa nɛ́ Hilkia, taar-a nɛ́ Tɛbalia, naar-a nɛ́ Zakarii: o bem ko Hɔsa in o nya-a̧ lɛŋ nɛ́ ɓu-zua-taar.

¹²O wi nɔ‘i dee nɛ́ tom-pɛma-nú Tua ko Sɔ̧. Wa in o gasawi kɔ-wa a̧a̧ so nɛ̀ o tom nyɛm ŋmaa in ko o nya-wa kɔ̧ Tua ko GASA WAN.

¹³Wa pi̧i̧ tani ku̧u̧naŋ-a tɛ o geɗek-wi hɔ tɛ o gasawi nyɛm nɛ̀ ɗoŋ nutua kɔ-wa wen pɛma o nú garo Tua ko Sɔ̧ kpɔk kpɔk.

¹⁴Nɛ̀ war daŋa-wese, tani baa nɛ́ Sɛlɛmia wen pɛma mɔ. War ko bem kɔ̧-a̧ Zakarii nɛ̀ duka nɛ́ de wi-tɔ̧-mbɔrɔ, tani baa nɛ́ ká̧-zan-mɛ́-ŋgɔn ha̧ a̧.

¹⁵War ko Obɛd-Edɔm duka nɛ̀ ká̧-zan-mɛ́-ɗɔɔ; o bem kɔ̧-a̧ duka nɛ́ o wi-pɛm tua-a-mɔ.

¹⁶Ko Supim in Hɔsa duka nɛ́ nú garo mɛ si yee-wese in nú tua ko Salɛkɛt nɛ̀ zɔk mɔ si fara-daŋ-nɛnɛ. Zuduk tom nɛtɛ nɛtɛ duka so hee mɔ'ɔ ga:

¹⁷mɛ daŋa-wese, o be Levii mɔɔrɔ-ɗoŋ-kpɔk tɛ ya nú garo nɛ̀ war daŋa-wese dam ɗoŋ wese kpɔk kpɔk; nɛ̀ ká̧-zan-mɛ́-ŋgɔn nɛ́ bíí naar dam ɗoŋ wese kpɔk kpɔk; nɛ̀ ká̧-zan-mɛ́-ɗɔɔ nɛ́ bíí naar dam ɗoŋ wese kpɔk kpɔk mbɛt; ɓɛɛ nɛ̀ ko o wi-pɛm tua-a-mɔ nɛ́ bíí yiitoo yiitoo.

¹⁸Nɛ̀ war Parbar mɛ si yee-wese nɛ́ bíí naar wen fara-daŋ-nɛnɛ, in bíí yiitoo wen kiitɛ Parbar.

¹⁹O duk wi-pɛm-nú tua mgbara o bezaŋ Kore in o bezaŋ Mɛrari nɛ́ mɔɔ nɔ‘i.

²⁰O ŋma be Levii, nya-wi nɔ‘i, duka nɛ́ wi-zɔk-mbɔi kɔ̧ Tua ko Sɔ̧ in wan nɛ‘i ee nɛtɛ ha̧ Sɔ̧.

²¹O bezaŋ Ladaŋ, tɛ nú-gara ko Gɛrsɔŋ nɛ̀ yaa so nɛ́ o gasawi nutua kɔ-wa kpɔk kpɔk nɛ́ Yehiɛl,

²²in o bem kɔ̧-a̧, bá nɛ̀ o nya-a̧ Zɛtam in Jɔɛl. Tom kɔ-wa so nɛ́ zɔka mbɔi kɔ̧ Tua ko GASA WAN.

²³War ko o bezaŋ Amram, o bezaŋ Yisɛhar, o bezaŋ Hebrɔŋ in o bezaŋ Uziɛl,

²⁴nɛ́ Sɛbuɛl, bezaŋ Gɛrsɔŋ, nɛ̀ duka so nɛ́ bem ko Moisɛ, a̧ duk so zu mbɔi.

²⁵Nya Sɛbuɛl nɛ́ Sɛlɔmit nɛ̀ ɗoŋ Eliɛzɛr nya Gɛrsɔŋ, wen Eliɛzɛr koo so Rɛhabia, Rɛhabia koo Yɛsaya, Yɛsaya koo Yoram, Yoram koo Zikri, ɓɛɛ Zikri ko Sɛlɔmit.

²⁶Mɛ̀ nɛ́ Sɛlɔmit in o nya-wi a̧ duka so nɛ́ o wi-pɛm-mbɔi in mɔ nɛ̀ wannu David, o gasawi nú tua, o wi-duk-zu o wi-biro booro in gɔmŋmaa bá nɛ̀ o gasawi zu o wi-biro ee so ha̧ Sɔ̧.

²⁷Wa kaia so o mɔɔ nɔ‘i mgbara mɔɔ-oi-biro e nɛtɛ wen ɗafa-a nɛ̀ Tua ko GASA WAN.

²⁸Wa kaia o mɔ lɛŋ nɛ̀ Samuɛl wi-zɔk-mɔ, Saul bem ko Kis, Abnɛr bem ko Nɛr in Jɔab bem ko Sɛruya ee so nɛtɛ ha̧ Sɛlɔmit in o nya-a̧ wen zɔka-a.

²⁹War ko o bezaŋ Yisɛhar, Kɛnania in o bem kɔ‘i yaa so kɔ‘i tɛ tom-zɔka-nù in kita sɛn Israɛl. Wa so nɛ o wi-yɔr-mɔ in o wi-gɔn-kita.

³⁰War ko o bezaŋ Hebrɔŋ nɛ́ Hasabia in o nya-a̧. Wa nɛ́ o kpasa-bíí, wa lɛŋ yaa so nɛ́ bíí booro-nɛ-gɔmŋmaa-mɔɔrɔ-ɗoŋ-yiitoo; wa yaa so kɔ-wa wen zɔka tom ko o be Israɛl nɛ̀ kur Jurdɛn mɛ si yee-wese; tom kɔ-wa'i nɛ́ zɔka o tom ko GASA WAN lɛŋ in tom ko wannu mbɛt.

³¹War ko o bezaŋ Hebrɔŋ, Yɛria duka so nɛ́ gasawi kɔ-wa; wa kia so tugun-wa tɛ ŋgimbi nɛ̀ David kpaa nɛ̀ pɛ ɓu-taar tɛ wan, ɓɛɛ wa kpa o kpasa-bíí mgbara wa sɛn Yazɛr nú Galad.

³²Yɛria in o nya-wi lɛŋ nɛ́ o kpasa-bíí in o gasawi nutua; dɔka wa lɛŋ nɛ́ booro-yiitoo-nɛ-gɔmŋmaa-mɔɔrɔ-ɗoŋ-yiitoo. Wannu David ee so wa zu o bezaŋ Rubɛn, o bezaŋ Gad in reeta zuduk ko Manase, wen zɔka o tom ko Sɔ̧ lɛŋ, in ko wannu mbɛt.