Read Northwest Gbaya 2 KALATA NYƐRƐ 11 Bible Online

2 KALATA NYƐRƐ 11 - Northwest Gbaya bible

2 KALATA NYƐRƐ 11

¹Roboam hɔɔ Jerusalɛm, ɓɛɛ a̧ mɔi̧ o bíí nutua ko Juda in ko Bɛnjamin; o ŋga wi-biro nɛ́ booro-gɔmŋmaa-nɛ-booro-ɓu-mɔɔrɔ-ɗoŋ-taar wen bíí o be Israɛl mɛ ha̧ mɔɔ-wan siɗoŋ ha̧ Roboam.

²Ɓɛɛ GASA WAN tɔ̧ wen ha̧ bíí kɔ‘i Sɛmaya hee mɔ'ɔ ga:

³«Mɛ̀ tɔ̧́ ha̧ Roboam bem ko Salomɔŋ, wannu Juda, ha̧ o bíí Juda in o bíí nutua ko Bɛnjamin bá nɛ̀ o gíí be Israɛl lɛŋ‘e ndé,

⁴tɔ̧ɔ̧-wen ko GASA WAN nɛ́ mɔ'ɔ: ‹K’ɛ́nɛ́ ba biro dúk nɛ̀ o nya'nɛ́ o be Israɛl na. O ndé a̧ sí ɗoŋ tɛ kɔ‘i wen nɛ́ mi a̧ dee ha̧ mɔ'ɔ mɛ hɔ.› » Wa zia wen ko GASA WAN, ɓɛɛ wa ba biro dúk nɛ̀ Jeroboam na hee mɔ'ɔ nɛ̀ GASA WAN tɔ̧ɔ̧ ga.

⁵Roboam duka sɛn Jerusalɛm, ɓɛɛ a̧ mbo o ye-ŋgárá sɛn nù Juda.

⁶A̧ ɗafa o ye nɔ'ɔ nɛ̀ de-a: Bɛtlɛhɛm, Etam, Tɛkɔa,

⁷Bɛt-Sur, Soko, Adulam,

⁸Gat, Marɛsa, Zif,

⁹Adɔrayim, Lakis, Azɛka,

¹⁰Sɔrɛa, Ayalɔŋ in Hebrɔŋ nɛ̀ yaa so nɛ́ o ye-ŋgárá sɛn nù Juda in Bɛnjamin.

¹¹A̧ dee ha̧ o ye nɔ‘i mɛ ŋgai nɛ̀ de-a, ɓɛɛ a̧ a o gasawi zu wa. A̧ mɔi̧a o nyɔnɔ, o nɔ̧́ in o dɔ̧ɔ̧ a sɛnɛ.

¹²Ye nɔ‘i kpɔk kpɔk a̧a̧ so nɛ̀ o ŋgee in o sɛ́ɛ̀. Mɛ̀ nɛ́ wen zu o ye-ŋgárá nɔ‘i a̧ Juda in Bɛnjamin duka nɛnɛ ɗɔɔ ŋgai kɔ̧-a̧.

¹³O wi-ɗafi-sɔ̧ in o be Levii lɛŋ nɛ̀ yaa sɛn Israɛl pia ye pii zu Roboam.

¹⁴O be Levii kura e o mɔ-dai kɔ-wa in o nù kɔ-wa lɛŋ duk, kur pii sɛn Juda de ye Jerusalɛm, wen Jeroboam in o bem kɔ‘i lɛŋ dora wa tɛ tom ɗafa GASA WAN.

¹⁵Jeroboam hoka so o ŋma wi-ɗafi-sɔ̧ kɔ‘i mɛ ɗafi sɔ̧ tɛ o kusa-fara; sɔ̧ nɔ‘i nɛ́ o gbadua in o be ndai a̧ wa mboa.

¹⁶O wi nɛ̀ ndaka pata o wi-ɗafi-sɔ̧ in o be Levii nɛ́ o be Israɛl lɛŋ nɛ̀ kpɛka mɛ ndak ɗoŋ GASA WAN Sɔ̧ ko Israɛl. Wa yaka si Jerusalɛm wen ɗafa GASA WAN Sɔ̧ ko zɔmdáa kɔ-wa.

¹⁷Wa dee ha̧ nù Juda mɛ kpa ŋgai ɓɛɛ wa yor ɗoŋ Roboam bem ko Salomɔŋ tɛ pɛ taar, wen a̧ ndaka so ɗoŋ tom ko David in Salomɔŋ tɛ pɛ taar nɔ‘i.

¹⁸Kóò nɛ̀ Roboam baa nɛ́ Mahalat boko-bem ko Yɛrimɔt, bem ko David. Nàà kɔ̧-a̧ so nɛ́ Abihayil, boko-bem ko Eliab, bezaŋ Jɛse.

¹⁹Mahalat koo o bem taar ha̧ a̧; nin-wa nɛ́ Yɛus, Sɛmaria in Zaham.

²⁰Hɔ-ɗoŋ Mahalat, a̧ baa nɛ́ Maka boko-bem ko Absalɔm ko nɛ̀ Abiya, Atai, Ziza in Sɛlɔmit.

²¹Maka boko-bem ko Absalɔm baa so see Roboam nyɛmna gan oi o dɔka kóò kɔ̧-a̧ lɛŋ n'aa baa, gú nɛ̀ o kóò-mɛ-zan mbɛt. A̧ a̧a̧ so nɛ̀ kóò ɓu-zua-mɔɔrɔ-ɗoŋ-taar, o kóò-mɛ-zan ɓu-mɔɔrɔ-ɗoŋ-kpɔk, ɓɛɛ a̧ ko be-wiwii ɓu-yiitoo-zua-mɔɔrɔ-ɗoŋ-taar, in be-okoo ɓu-mɔɔrɔ-ɗoŋ-kpɔk.

²²Roboam ee Abiya bem ko Maka zu o bem kɔ̧-a̧ lɛŋ, wen a̧ kɔ̧ɔ̧ so ha̧ bem’ɛi mɛ ɔ wan.

²³Roboam a̧a̧ so nɛ̀ taamɔ mɛ a o bem kɔ‘i dam zu nù Juda, in zu nú Bɛnjamin gú nɛ̀ o ye-ŋgárá lɛŋ. A̧ ha̧a̧ nyɔŋmɔ nɛ̀ dɔka-a ha̧ wa, ɓɛɛ a̧ kai okoo ha̧ wa nɛ̀ dɔka-a mbɛt.