Read Northwest Gbaya 2 KALATA NYƐRƐ 12 Bible Online

2 KALATA NYƐRƐ 12 - Northwest Gbaya bible

2 KALATA NYƐRƐ 12

¹Ŋgimbi nɛ̀ Roboam iŋa'e, er-wi nɔa nɛ̀ de-a, in wi mgbita tɛ wan nɛ̀ de-a kaɗi, a̧ bɛ̧ɛ̧ heembea ko GASA WAN, ɓɛɛ o be Israɛl mbɛt lɛŋ de kale mɔ‘i.

²Zaŋ mɔɔrɔ pɛ ɔɔ-wan ko Roboam, Sisak wannu Egiptɛ tɛɛ bi Jerusalɛm, wen wa tu̧u̧ so see GASA WAN.

³Wannu Egiptɛ tɛɛ bi Jerusalɛm nɛ̀ keekee tɛ booro-nɛ-gɔmŋmaa-yiitoo in o wi-daŋ-nyaŋa booro-ɓu-mɔɔrɔ-ɗoŋ-kpɔk gú nɛ̀ o gíí wi-biro, o be Libii, o be Suki in o be Etiopii nɛ̀‘i nyɛm mɛ tɔr na;

⁴a̧ baa o ye-ŋgárá nù Juda, ɓɛɛ a̧ hɔ Jerusalɛm.

⁵Wi-tɔ̧-wen oi nú Sɔ̧ Sɛmaya tɛ̀ɛ̀ kpa Roboam in o be-wan Juda nɛ̀ mɔi̧a ŋmaa ya sɛn Jerusalɛm pɛm nɛ̀ Sisak, ɓɛɛ tɔ̧ ha̧ wa: «GASA WAN tɔ̧a̧: ‹Ɛnɛ bɛ̧a̧‘m yak e duk; mi mbɛt, mi bɛ̧ɛ̧‘nɛ́ siŋ pi̧ ɗɔɔ ŋgai ko Sisak.› »

⁶O be-wan zu o be Israɛl in wannu mbɛt iŋa ɗaŋmɔ kɔ-wa, ɓɛɛ tɔ̧: «GASA WAN nɛ́ wi-de-mɔ nɛ̀ yuwar-a!»

⁷Ŋgimbi nɛ̀ GASA WAN zɔka'e, wa guu nù ti wi de nɛ̀ ko nɛ̀ tɛ-wa, a̧ kifa nú ha̧ Sɛmaya hee mɔ'ɔ ga: «Wa guu nù ti'm, mi beka bi wa ɓɔna, mi tɛ kpasi wa; ŋga nyimsea kɔ‘m beka kur in Jerusalɛm nɛ̀ er Sisak ɓɔna.

⁸Mɔ kpɔk, wa tɛ kifi wi-de-tom kɔ̧-a̧; hegɔ tɛ mɔ‘i, wa tɛ kɛ̧ mgbara mɔ, kóó mɛ̀ nɛ́ dee tom ha̧‘m, kóó dee tom ha̧ o ŋma gɔni nù a̧ dea nde.»

⁹Sisak wannu Egiptɛ bìí Jerusalɛm, a̧ kaia mbɔi kɔ̧ Tua ko GASA WAN, in ko wannu; a̧ e mɔ kpɔk duk na. A̧ kaia kànà o ŋgee lɔr nɛ̀ wannu Salomɔŋ duia so mbɛt.

¹⁰Wannu Roboam tɛɛ dui nɛ́ o ŋgee ndɛrɛ ha̧ o wi-biro kɔ‘i nɛ̀ yaa so kɔ-wa wen pɛma nú tua-wan a oi o ŋgee nɔ‘i.

¹¹Ŋgimbi nɛ̀ wannu mɔi̧ kɔ̧ Tua ko GASA WAN lɛŋ, o wi-biro tɛɛ kai o ŋgee nɔ‘i nɛnɛ, sɛka wa kaia piinɛ ɗoŋ woyo e fara-pɛm-mɔ.

¹²Hee mɔ'ɔ nɛ̀ Roboam dee ko nɛ̀ tɛ, gɔm nɛ̀ er ga, nyimsea ko GASA WAN kaɗa. Bo nɛ mɔ lɛŋ tɛ ŋgimbi biro nɔ‘i a̧ ɗaŋa na, wen o ŋma demɔ kɔ̧-a̧ ɓɔna kànà sɛn Juda.

¹³Wannu Roboam mgbita tɛ wan sɛn Jerusalɛm ɓɛɛ kpa ŋgai. A̧ a̧a̧ so nɛ̀ pɛ ɓu-naar ŋgimbi n'aa baa nɛ̀ wan sɛn Jerusalɛm. A̧ duka tɛ wan pɛ ɓu-zua-mɔɔrɔ-ɗoŋ-yiitoo sɛn Jerusalɛm, ye nɛ̀ GASA WAN hoka mgbara o zuduk be Israɛl lɛŋ ha̧ nin-a mɛ duk sɛnɛ. Nin nàà kɔ̧-a̧ duka so nɛ́ Nama, zɔŋa Amɔŋ.

¹⁴Roboam dee ɗaŋmɔ wen a̧ e so see-aa tɛ kia GASA WAN na.

¹⁵O tom ko Roboam tɛ ku̧u̧naŋ-a hɔ sɔŋkur-aa yɔra zaŋ Tom ko Sɛmaya wi-tɔ̧-wen oi nú Sɔ̧ in zaŋ kalata ko wi-zɔk-mɔ Ido. Biro duka so mgbara Roboam in Jeroboam ɓɔnsɛnɛ.

¹⁶Roboam fea, ɓɛɛ wa gun a̧ katɛ o dáà kɔ̧-a̧ tɛ ye ko David, ɓɛɛ bem kɔ̧-a̧ Abiya ɔ wan oi-aa.