Read Northwest Gbaya 2 KALATA NYƐRƐ 13 Bible Online

2 KALATA NYƐRƐ 13 - Northwest Gbaya bible

2 KALATA NYƐRƐ 13

¹Tɛ ɓu-zua-mɔɔrɔ-ɗoŋ-taar pɛ ɔɔ wan ko Jeroboam, Abiya ɔɔ wan Juda.

²A̧ ɔɔ wan pɛ taar sɛn Jerusalɛm. Nin naa kɔ̧-a̧ nɛ Mikaya boko-bem ko Uriɛl be Gibea. Abiya in Jeroboam bìí ŋmaa.

³O ŋga wi-biro nɛ yaa ɗoŋ Abiya nɛ booro-gɔmŋmaa-naar, ɓɛɛ ko Jeroboam nɛ o ŋgaŋa wi-biro booro-gɔmŋmaa-mɔɔrɔ-ɗoŋ-taar nɛ iŋa biro nyɛmna.

⁴Abiya daŋa yor zu kaya Sɛmaraim mgbara kaya Efraim ɓɛɛ tɔ̧: «Jeroboam in o be Israɛl lɛŋ, ɛnɛ zii wen kɔ‘m!

⁵Ɛ́nɛ́ iŋ‘e nde, GASA WAN Sɔ̧ ko Israɛl ha̧a̧ mɔɔ-wan ha̧ David in o bem kɔ‘i zu Israɛl ɓɔnsɛnɛ na? Ɛ́nɛ́ iŋ‘e, nɛ nɔɔ-tɔk nɛ beka kaɗi na ɓɔnsɛnɛ na nde?

⁶Ɓɛɛ Jeroboam bem ko Nɛbat wi-de-tom ko Salomɔŋ bem ko David kur de ŋgazu in wan kɔ‘i.

⁷Wi-de-gba̧a̧-mɔ na in o wi-zuzu mɔi̧a yor ɗoŋ Abiya, ɓɛɛ wa de ŋgazu in Roboam bem ko Salomɔŋ nɛ duka so nɛ be-ŋgaiwi nɛ taamɔ ɗuk so na; Roboam nyɛm mɛ yor ti wa na.

⁸Hegɔ kinii, ɛ́nɛ́ ba nɛ zu duk nɛ mɔɔ-wan nɛ GASA WAN ee er bezaŋ David. Ɛnɛ nɛ o gba gii wi-biro, ɓɛɛ ɛnɛ a̧a̧ nɛ o mboo be ndai nɛ Jeroboam dee nɛ lɔr h’ɛ́nɛ́ mɛ gasi hee Sɔ̧ ga.

⁹Ɛ́nɛ́ ndaka o kpasa wi-ɗafi-sɔ̧, o bem ko Arɔŋ, o be Levii, ɓɛɛ ɛnɛ hok nɛ wi-ɗafi-sɔ̧ hee o ŋma nu de ga. Bíí nɛ̀ ha̧a̧ be ndai in vala sami mɔɔrɔ-ɗoŋ-yiitoo, ɓɛɛ ɛnɛ hoka a̧ nɛ wi-ɗafi-sɔ̧, nɛ̀ bó nɛ́ kpasa sɔ̧ na.

¹⁰«War k’ɛɛ, GASA WAN nɛ Sɔ̧ k’ɛɛ, ɓɛɛ ɛɛ e a̧ duk na. O wi-ɗafi-sɔ̧ nɛ de tom ha̧ GASA WAN nɛ o bezaŋ Arɔŋ in o be Levii nɛ ya tɛ tom kɔ-wa.

¹¹Mɛ tutuyɛ in mɛ ga̧a̧mɔ lɛŋ, wa ha̧ nɛ kpoo-sɔ̧ nɛ oi-aa lɛŋ in fuu-nyama, wan mɛ dɔa-a ha̧ GASA WAN; o brɛt wan mɛ ha̧ ha̧ GASA WAN nɛ ya zu fara-e-nyɔŋmɔ; ɓɛɛ mɛ ga̧a̧mɔ lɛŋ, wa e nɛ wee tɛ o lamba nɛ‘i dee nɛ lɔr. Ɛɛ ndak k’ɛɛ nɛ ɗoŋ o usamɔ ko GASA WAN Sɔ̧ k’ɛɛ; ɓɛɛ k’ɛ́nɛ́, ɛnɛ ee a̧ duk.

¹²Ɛɛ a̧a̧ nɛ Sɔ̧ nɛ duk nɛ wan k’ɛɛ, o wi-ɗaf'aa a̧a̧ sɛnɛ nɛ duk zu naŋ mɛ dɔm mɔ wen bíí‘nɛ́. O be Israɛl, k’ɛ́nɛ́ bi biro in GASA WAN Sɔ̧ ko o dáà k’ɛ́nɛ́ na, wen ɛnɛ beka nyɛm mɛ gbin biro na.»

¹³Tɛ ŋgimbi'i, Jeroboam aa so o ŋma wi-biro nɛ gbaa mbaŋtol zik wa, o be Juda nɛ ɗoŋ, ɓɛɛ o be Israɛl nɛ ti.

¹⁴O be Juda kpee naŋ mɔ ɓɛɛ zɔk'e biro a̧a̧ sɛnɛ nɛ ti in nɛ ɗoŋ mbɛt. Wa aia nu ha̧ GASA WAN, ɓɛɛ ka o wi-ɗafi-sɔ̧ dɔma o mbia kaɗi.

¹⁵O be Juda gaia mɔ-biro; ŋgimbi nɛ wa hiɗi nɛ mɔ, Sɔ̧ gusa Jeroboam in o be Israɛl lɛŋ ti Abiya in Juda.

¹⁶O be Israɛl yuu mɔ ti Juda, ɓɛɛ Sɔ̧ a wa kɔ̧ er-a.

¹⁷Abiya in o bíí kɔ‘i gbɛɛ o be Israɛl nɛ dɔka-a, o ŋga wi-biro fea tɛ booro-gɔmŋmaa-mɔɔrɔ.

¹⁸Tɛ o be Israɛl ga̧a̧ tɛ mɔ‘i nɛ kpaa wa'i. O be Juda gbina biro wen nɛ wa ɛka tɛ-wa nɛ GASA WAN Sɔ̧ ko dáà kɔ-wa.

¹⁹Abiya ndaka ɗoŋ Jeroboam, ɓɛɛ kai o gasa ye kɔ̧-a̧: Bɛtɛl, Yesana bá nɛ̀ Efrɔŋ gú nɛ̀ o be ye nɛ zii nɛ wa.

²⁰Jeroboam kpa ŋgai woyo hee kuti-a ga tɛ ŋgimbi ko Abiya na. Mɛ ɗoŋ, GASA WAN gusa a̧ gbɛ.

²¹Nɛ war ko Abiya, ŋgai kɔ̧-a̧ dɔk dɔk siti. A̧ kaia okoo ɓu-zua-naar ko nɛ o be-wiwii ɓu-yiitoo-zua-yiitoo in o be-okoo ɓu-zua-mɔɔrɔ-ɗoŋ-kpɔk.

²²Oi o tom ko Abiya, o mɔ n'aa dea, o yuwar deemɔ kɔ̧-a̧ in o tom kɔ̧-a̧ yɔra zaŋ kalata ko Ido wi-tɔ̧-wen oi nu Sɔ̧.

²³A̧ fea ɓɛɛ wa gun a̧ tɛ ye ko David, ɓɛɛ bem kɔ̧-a̧ Asa ba wan oi-aa.