Read Northwest Gbaya 2 KALATA NYƐRƐ 14 Bible Online

2 KALATA NYƐRƐ 14 - Northwest Gbaya bible

2 KALATA NYƐRƐ 14

¹Sɛn tɛ ŋgimbi-wan ko Asa, ga̧a̧mɔ duka tɛ nù tɛ pɛ ɓu. Asa dee mɔ nɛ̀ de-a in nɛ̀ yuwar-a ti GASA WAN Sɔ̧ kɔ‘i.

²A̧ dee ha̧ gasa gɔni sɔ̧ mɛ kaɗi; a̧ gbina o kusa fara-ɗafi-sɔ̧ yinɛ. A̧ ɗaŋa o ta-zu-nù, ɓɛɛ a̧ gɔm o te nɛ̀‘i gasi gasi a nù.

³A̧ tɔ̧ɔ̧ ha̧ o be Juda mɛ kii GASA WAN Sɔ̧ ko zɔmdáa kɔ-wa, ɓɛɛ wa a̧ bá o heembea in o geŋa de nɛ̀ tom.

⁴Asa ɗaŋa o fara gasi géé-sɔ̧ in o fara-dɔ-fuu-nyama yinɛ tɛ o ye Juda lɛŋ; hegɔ nù duka tɛ ga̧a̧mɔ ŋgimbi-wan kɔ̧-a̧.

⁵Tɛ ŋgimbi-wan kɔ̧-a̧‘i, ŋma bíí ba biro dúk nɛ̀ a̧ na, wen GASA WAN nɛ̀ ta-tɛ a̧ ha̧a̧ so ga̧a̧mɔ ha̧ a̧.

⁶A̧ tɔ̧ɔ̧ ha̧ o be Juda: «Ɛ̀ɛ̀ ɗáfí ye-ŋgárá nɔ'ɔ, ɛ̀ɛ̀ mbó o garo zik nɛ̀ wa kpa in o gasa tua-pɛm-mɔ, ɛ̀ɛ̀ dé o nú-a in o mɔɔ-mana-a wen nù a̧a̧ tɛ ga̧a̧mɔ sɛn ti yɛ, wen ɛɛ mboo zu ha̧ GASA WAN Sɔ̧ k’ɛɛ; tɛ mboozu k’ɛɛ‘i, ɛɛ kpaa ga̧a̧mɔ tɛ fara lɛŋ.» Hegɔ wa dee tom'i hɔ gba̧a̧.

⁷Asa a̧a̧ so nɛ̀ o wi-biro kɔ̧-a̧ o be Juda tɛ booro-gɔmŋmaa-taar nɛ̀ kai nɛ́ o gasa ŋgee in o sɛ́ɛ̀, in o wi-biro be Bɛnjamin booro-gɔmŋmaa-yiitoo-nɛ-ɓu-mɔɔrɔ-ɗoŋ-taar; wa yaa nɛ́ o ŋga wi-biro nɛ̀ boi-biro kɔ-wa nɛ́ geɗek ŋgee in o góò. Wa lɛŋ so nɛ́ o ŋga wi-biro.

⁸Zɛra be Etiopii baa biro dúk nɛ̀ wa; a̧ a̧a̧ so nɛ̀ bíí miliɔŋ kpɔk in o keekee-biro gɔmŋmaa-taar, ɓɛɛ wa nɛ́ hegɔ hɔ sɛn Marɛsa.

⁹Asa gboo yor ti a̧, ɓɛɛ wa ba biro dúk nɛ̀ ŋmaa sɛn kɔ̧ ɗɔŋgɔ Sefata sɛn ká̧ Marɛsa.

¹⁰Asa aia nú ha̧ GASA WAN Sɔ̧ kɔ‘i, ɓɛɛ tɔ̧: «GASA WAN, ŋma bíí nɛ̀ tɛ kɛ̧ mgbara ɓɔsa bíí in ŋga bíí yak zu'nɛ́, bo na. Ɛ̀nɛ̀ gbák yɛ, GASA WAN Sɔ̧ k’ɛɛ; wen ɛɛ ɛk tɛ yɛ nɛ̀ ɛnɛ. Mɛ̀ nɛ́ nɛ̀ nin'nɛ́ ɛ̀ɛ̀ tɛ nɛnɛ mɛ bi gíí wi-biro nɔ'ɔ. Ɛ́nɛ́ nɛ́ GASA WAN Sɔ̧ k’ɛɛ, k’ɛ́nɛ́ e ha̧ ŋma bíí mɛ gan'nɛ na.»

¹¹GASA WAN dee ha̧ biro mɛ ba o be Etiopii ti Asa in ti o be Juda, ɓɛɛ wa yu mɔ.

¹²Asa in o bíí kɔ‘i ndaka wa hɔ Gerar; wa kuma lɛŋ, ŋma kpɔk mgbara wa kpasi na, wen ŋgai biro kɔ-wa gbina so ti GASA WAN in ti o wi-biro kɔ̧-a̧. O bíí ko Asa pia nɛ̀ mɔɔ-oi-biro nɛ̀ dɔka-a.

¹³Wa bìì o ye lɛŋ nɛ̀ ya zik Gerar wen GASA WAN pi̧i̧ so gasa kíì tɛ o bíí ye nɔ‘i; wa kaia o mɔ saaye nɔ‘i lɛŋ wen mbɔi a̧a̧ so sɛnɛ ɔ dɔka.

¹⁴Wa gbina o ɓoramɔ mbɛt, kai nɛ̀ o ndai, o sami in o ŋgeloba nɛ̀ dɔka-a, ɓɛɛ wa si ɗoŋ si sɛn Jerusalɛm.