Read Northwest Gbaya 2 KALATA NYƐRƐ 17 Bible Online

2 KALATA NYƐRƐ 17 - Northwest Gbaya bible

2 KALATA NYƐRƐ 17

¹Josafat bem ko Asa ɔɔ wan oi-aa. Josafat ɗafa wan kɔ‘i wen baa zu dúk nɛ̀ Israɛl.

²A̧ aa o dùk wi-biro dam tɛ o ye-ŋgárá Juda lɛŋ, ɓɛɛ a̧ a o gasawi zu zika-nù sɛn nù Juda in tɛ o ye Efraim nɛ dáà kɔ̧-a̧ Asa baa so.

³GASA WAN duka so in Josafat wen a̧ ndaka so nɛ́ ɗoŋ kuti naŋanɔ ko zɔmdáa kɔ̧-a̧ David. A̧ ɗafi o sɔ̧ Bal na;

⁴a̧ kia nɛ́ GASA WAN Sɔ̧ ko dáà kɔ̧-a̧ nyɛm nɛ̀ ɗoŋ geŋa ko GASA WAN, ɓɛɛ bo nɛ a̧ ndaka ɗoŋ deemɔ ko o be Israɛl mɛ si ká̧-zan-mɛ́-ŋgɔn na.

⁵GASA WAN dee ha̧ wan mɛ nɔ er-a, ɓɛɛ nù Juda lɛŋ mɔi̧ zu-ye tɛnɛ ha̧ a̧; hegɔ, a̧ duka nɛ̀ mbɔi in tu̧u̧-tɛ nɛ̀ dɔka-a.

⁶A̧ ee see-aa tɛ baa yuwar ko GASA WAN, ɓɛɛ a̧ ɗaŋ o kusa-fara in o te nɛ̀‘i gasi gasi yinɛ sɛn zu nù Juda.

⁷Sɛn tɛ taar pɛ-wan kɔ̧-a̧, a̧ toma o gasawi nɔ'ɔ: Bɛn-Hail, Obadia, Zakarii, Nɛtaneɛl in Mikaya wen usa mɔ tɛ o gasa ye Juda.

⁸O be Levii nɛ̀ ee wa nɛ́ Sɛmaya, Nɛtania, Zɛbadia, Asahɛl, Sɛmiramɔt, Yonataŋ, Adɔnia in Tob-Adonia bá nɛ̀ o wi-ɗafi-sɔ̧ Elisama in Yoram.

⁹Wa kaia o kalata heembea ko GASA WAN usi nɛ̀ mɔ yaknɛ si nù Juda. Wa nɛ̀ɛ́ dam saaye lɛŋ usi nɛ̀ mɔ ha̧ o bíí.

¹⁰Gasa mɔɔ-kíì nɛ̀ tɛ̀ɛ́ nɛ̀ tɛ GASA WAN tika tɛ o mɔɔ-wan ká̧ Juda lɛŋ; ŋma bíí kpɔk bi biro in Josafat na.

¹¹O be Filistii kaia bu-mbɔi, ha̧a̧mɔ in zu-mɔ tɛnɛ ha̧ Josafat. War ko o be Arab, wa kaia o mɔ-dai tɛnɛ ha̧ a̧ mbɛt: o vala sami booro-mɔɔrɔ-ɗoŋ-yiitoo-nɛ-gɔmŋmaa-mɔɔrɔ-ɗoŋ-yiitoo in o vala gbadua booro-mɔɔrɔ-ɗoŋ-yiitoo-nɛ-gɔmŋmaa-mɔɔrɔ-ɗoŋ-yiitoo.

¹²Mɔɔ-wan ko Josafat gasi gasi siti, ɓɛɛ a̧ mbo garo zik nɛ̀ o ye in o ŋga tua-a-mɔ sɛnɛ sɛn Juda mbɛt.

¹³A̧ a̧a̧ so nɛ̀ o nyɔŋmɔ nɛ̀ dɔka-a sɛn saaye nɛtɛ nɛtɛ nù Juda in o ŋgaŋa wi-biro saaye Jerusalɛm.

¹⁴Kɛ̧ɛ̧ mɔ tɛ nutua kpɔk kpɔk nɛ́ mɔ'ɔ: nutua ko Juda, gasawi zu o wi-biro booro nɛ́ Adna, nɛ̀ duka so zu o ŋga wi-biro booro-gɔmŋmaa-taar.

¹⁵Hɔ-ɗoŋ-aa nɛ́ Jɛhohanaŋ wi-duk-zu o wi-biro booro-gɔmŋmaa-yiitoo-nɛ-booro-ɓu-mɔɔrɔ-ɗoŋ-taar,

¹⁶sɛka Amasia bem ko Zikri nɛ̀ yee tom nɛ̀ ta-tɛ wen zu GASA WAN; a̧ duka kɔ̧-a̧ zu o ŋga wi-biro booro-gɔmŋmaa-yiitoo.

¹⁷Ko Bɛnjamin nɛ́ Eliada ŋga wi-biro nɛ̀ duka zu o wi-kai-góò in o ŋgee; wa lɛŋ nɛ́ booro-gɔmŋmaa-yiitoo.

¹⁸Hɔ-ɗoŋ-aa nɛ́ Yozabad nɛ̀ duka zu o bíí booro-gɔmŋmaa-nɛ-booro-ɓu-mɔɔrɔ-ɗoŋ-taar nɛ̀ iŋa bíí biro.

¹⁹O wi nɛ̀ dee so tom ha̧ wannu nɛ́ mɔɔ nɔ‘i. Wi tɔr o wan nɛ̀ wannu aa so tɛ o ye-ŋgárá nù Juda lɛŋ na.