Read Northwest Gbaya 2 KALATA NYƐRƐ 18 Bible Online

2 KALATA NYƐRƐ 18 - Northwest Gbaya bible

2 KALATA NYƐRƐ 18

¹Josafat kpaa mbɔi nɛ̀ dɔka-a in hura-nin mbɛt. A̧ kpaa nam in wannu Akab nɛ̀ ɗoŋ kóò.

²Ɗoŋ pɛ tikiɗi, a̧ zira mɛ nɛ̀ɛ́ zɔk Akab sɛn Samarii ɓɛɛ Akab gbɛ o sami in o ndai nɛ̀ dɔka-a ha̧ a̧ in o bíí nɛ̀ yaa in a̧. Akab yee ɗɛɗɛ-a wen ha̧ a̧ mɛ nɛ̀ɛ́ e a̧ wen bíí Ramot nú Galad.

³Akab wannu Israɛl aka Josafat wannu Juda hee mɔ'ɔ ga: «Mɛ kɔ̧ɔ̧ mɛ nɛ in am mɛ bi Ramot nú Galad nde?» Ɓɛɛ a̧ kifi nú tɔ̧ nɛnɛ: «Mɔ nɛ tɛ kpa mɛ, tɛ kpa'm; mɔ nɛ tɛ kpa o bíí kɔ-mɛ, tɛ kpa o bíí kɔ‘m mbɛt. Ɛɛ tɛ nɛ in mɛɛ si yí biro.»

⁴Josafat tɔ̧ɔ̧ ha̧ wannu Israɛl woyo: «Mɛ̀ kíí mgbara wen ko GASA WAN sɛ!»

⁵Wannu Israɛl mɔi̧a o wi-tɔ̧-wen oi nú Sɔ̧ kɔ‘i tɛ gɔmŋmaa-naar, ɓɛɛ ak wa: «A̧‘m nɛ́ɛ̀ bi Ramot nú Galad náà, kóó ká‘m nɛ na nde?» Wa kifa nú: «Ɛ̀nɛ̀ nɛ̀, Sɔ̧ aa wa er wannu kaɗi!»

⁶Josafat tɔ̧a̧: «Ŋma wi-tɔ̧-wen oi nú Sɔ̧ bo hɛ̧ɛ̧ ha̧ a̧ mɛ ak GASA WAN h’ɛ́ɛ́ na nde?»

⁷Wannu Israɛl tɔ̧ɔ̧ ha̧ Josafat: «Ŋma bíí kpɔk a̧a̧ sɛnɛ n’ɛɛ nyɛma mɛ ak mgbara taamɔ ko GASA WAN nɛ̀ ɗoŋ-aa, ɓɛɛ kɔ‘m, mi kɔ̧ a̧ na, wen a̧ tɔ̧ wen tɛ‘m de na; kànà nɛ́ ɗaŋ wen. Wi’ɛi nɛ́ Michee bem ko Yimla.» Josafat tɔ̧a̧: «Wannu, k’ɛ́nɛ́ tɔ̧ wen hegɔ na!»

⁸Wannu Israɛl saa ŋma gasawi tɛnɛ, ɓɛɛ tɔ̧ ha̧ a̧: «Mɛ̀ sá Michee bem ko Yimla tɛnɛ nɛ̀ haya-a.»

⁹Wannu Israɛl in Josafat wannu Juda aa so nɛ́ laa-wan tɛ, ɓɛɛ wa ya zu damti sɛn bee-gara nú ye Samarii. O wi-tɔ̧-wen oi nú Sɔ̧ lɛŋ tɔ̧ nɛ wen oi nú Sɔ̧ sɛn ti wa.

¹⁰Sidekia bem ko Kɛnana ɗafa ŋma zak nɛ̀ boi e zu ɓɛɛ tɔ̧: «GASA WAN'e ndé, ɛnɛ tɛ gɔm Aram gbɛ nɛ̀ o zak nɔ'ɔ.»

¹¹Ɓɛɛ o wi-tɔ̧-wen oi nú Sɔ̧ tɔ̧ nɛ kpɔk wen'e ndé: «Ɛ̀nɛ̀ dáŋ si Ramot nú Galad; ɛ́nɛ́ tɛ gbin biro! GASA WAN tɛ e ye'i er'nɛ́!»

¹²Betom nɛ̀ nɛ̀ɛ̀ so mɛ sa Michee tɔ̧ɔ̧ ha̧ a̧: «O wi-tɔ̧-wen oi nú Sɔ̧ ko wannu lɛŋ tɔ̧ nɛ de wen tɛ-a; hegɔ, wen kɔ-mɛ a̧ nɛ́ kana nɛ́ ɗoŋ kɔ-wa mbɛt! Mɛ̀ tɔ̧́ nɛ́ de wen.»

¹³Michee tɔ̧a̧: «Hee GASA WAN duk kpasa ga, nɛ́ wen n'aa tɛ tɔ̧ a̧‘m tɛ tɔ̧ mbɛt.»

¹⁴A̧ hɔɔ katɛ wannu, ɓɛɛ wannu ak a̧: «Michee, ɛ̀ɛ̀ nɛ́ɛ̀ bí Ramot nú Galad náà, kóó k’ɛɛ nɛ na nde?» A̧ kifa nú: «Ɛ̀nɛ̀ nɛ́! Ɛ́nɛ́ tɛ gbin biro, GASA WAN tɛ e ye'i kɔ̧ er wannu.»

¹⁵Wannu tɔ̧ɔ̧ ha̧ a̧. «Mɛ̀ nɛ́ war géè a̧‘m tɛ de nɛnɛ ha̧ mɛ mɛ kan mɔ tɔ̧ nɛ́ kpasawen nɛ̀ nin GASA WAN ha̧‘m ge?»

¹⁶Michee kifa nú: «Mi zɔka o be Israɛl nɛ̀ pɛsa dam zu kaya hee o sami nɛ̀ wi-dai-a bo na ga; GASA WAN tɔ̧a̧: ‹O wi nɔ'ɔ bó nɛ̀ wan-dai-wa ɓɔna! Kóó o ndé a̧ sí ɗoŋ tɛ kɔ‘i zaŋ ga̧a̧mɔ.› »

¹⁷Wannu Israɛl tɔ̧ɔ̧ ha̧ Josafat: «Bo nɛ mi baa tɔ̧ so ha̧ mɛ na nde? A̧ tɔ̧ ŋma de wen-tɛ‘m na, kànà nɛ́ ɗaŋ wen ɓɛɛ!»

¹⁸Michee tɔ̧a̧: «Ɛ̀nɛ̀ zíí wen ko GASA WAN: ‹Mi zɔka GASA WAN fara duk zu damti kɔ‘i, ɓɛɛ o gíí wi-biro mɛ yiwese ya ŋgɔn katɛ a̧ nɛ̀ war gale in nɛ̀ war wiiko mbɛt,›

¹⁹ɓɛɛ GASA WAN ak wa: ‹Mɛ̀ nɛ́ o'o tɛ ɔr Akab wannu Israɛl mɛ nɛ̀ biro sɛn Ramot nú Galad ha̧ a̧ mɛ fe o?› Ɓɛɛ ger wen kɔ-wa ye ŋmaa na.

²⁰Ɓɛɛ ŋma ɔmi gbo pii ti yor ti GASA WAN, ɓɛɛ tɔ̧: ‹Nɛ́ mi'i tɛ ɔr a̧.› GASA WAN aka a̧: ‹Mɛ tɛ ɔr a̧ hee ge?›

²¹A̧ kifa nú: ‹Mi tɛ nɛ ɓɛɛ mi duka nɛ́ ɔmi ndela kɔ̧ nú o wi-tɔ̧-wen oi nú Sɔ̧ kɔ̧-a̧ lɛŋ.› GASA WAN tɔ̧ɔ̧ ha̧ a̧: ‹Mɛ tɛ ɔr a̧; mɛ a̧a̧ nɛ̀ ŋgai mɛ de hegɔ. Mɛ̀ nɛ̀, ɓɛɛ mɛ̀ dé hegɔ.›

²²«Kà GASA WAN a̧ ee ɔmi ndela kɔ̧ nú o wi-tɔ̧-wen oi nú Sɔ̧ kɔ-mɛ lɛŋ, mɛ̀ nɛ́ wen nɛ̀ tɔ̧, a̧ nɛ̀ tɛ-a tɔ̧ nɛ́ wen ɗaŋmɔ zu mɛ.»

²³Sidekia bem ko Kɛnana ɗɔŋa siti, mbɛr ká̧ yí Michee, ɓɛɛ tɔ̧: «Ɔmi ko GASA WAN gboo tɛ‘m nɛ̀ déè, sa tɔ̧ nɛ̀ wen ha̧ mɛ ge?»

²⁴Michee tɔ̧a̧: «Mɛ tɛ zɔk, wese nɛ̀ mɛ tɛ hu̧si nɛnɛ nɛ̀ kɔ̧ gɔna-bɛr-tua nɛnɛ.»

²⁵Wannu Israɛl tɔ̧a̧: «Ɛ̀nɛ̀ bá Michee, ɛ̀nɛ̀ mgbɔ́ a̧ siɗoŋ ha̧ wanye Amɔŋ in ha̧ Jɔas bem ko wannu,

²⁶ɓɛɛ ɛ̀nɛ̀ tɔ̧́ ha̧ wa'e, wen ko wannu nɛ́ mɔ'ɔ: ‹Ɛ̀nɛ̀ pí̧ wi’ɛ kɔ̧ zɔɓɔ, ɓɛɛ ɛ̀nɛ̀ há̧ nɛ́ be brɛt in yì kɛ̧́ɛ̧́ ha̧ a̧ hɔ ŋgimbi n'am tɛ pii, ŋma mɔ kpa'm na.› »

²⁷Michee tɔ̧a̧: «Kà mɛ nɛ́ pia nɛ̀ mbetɛ, ŋma mɔ kpa mɛ na, ɓɛɛ GASA WAN tɔ̧ wen nɛ̀ nú‘m na.» Ɓɛɛ a̧ tɔ̧ woyo: «Ɛ̀nɛ̀ zíí wen'i, ɛ́nɛ́ o bíí lɛŋ!»

²⁸Wannu Israɛl in Josafat wannu Juda kura mɛ nɛ̀ɛ́ bi Ramot nú Galad mɛ.

²⁹Wannu Israɛl tɔ̧ɔ̧ ha̧ Josafat: «Mi tɛ kpai laa ha̧‘m mɛ ye biro; ɓɛɛ nɛ̀ kɔ-mɛ, mɛ̀ dúk nɛ̀ laa kɔ-mɛ.» Wannu Israɛl kpaia laa, ɓɛɛ wa yiitoo ye biro.

³⁰Wannu Aram ha̧a̧ so nú ha̧ o wi-duk-zu o wan keekee-nyaŋa kɔ‘i'e, ká wa gbɛ o bem, kóó gasawi na; ɓɛɛ kànà nɛ́ wannu Israɛl kpɔk ɓɛɛ.

³¹Hegɔ o wan ko o wi-daŋ keekee-nyaŋa zɔka Josafat, ɓɛɛ tɔ̧: «Wannu Israɛl nɛ́ mɔ'ɔ mɛ‘i!» Ɓɛɛ wa zik a̧ e see-a mɛ bi a̧. Josafat ŋmaa nú tɛ hiɗi mɔ; GASA WAN gbaka a̧, ɓɛɛ fo wi nɔ‘i yinɛ zu a̧.

³²Ŋgimbi nɛ̀ o wan ko o wi-daŋ keekee zɔka a̧ bo nɛ́ wannu Israɛl na, wa ee a̧ duk.

³³Ŋma bíí pi̧i̧ kɔ‘i góò nɛ̀ nú tum, ɓɛɛ tok wannu Israɛl nɛ̀ woi laa-biro kɔ̧-a̧. Wannu tɔ̧ɔ̧ ha̧ baka-nyaŋa kɔ‘i: «Mɛ̀ zík nú nyaŋa, a̧ mɛ̀ mgbɔ́‘m gbonɛ yí-biro, wen mi baa da̧i̧.»

³⁴Wese'i biro ŋgaia batɛ, ɓɛɛ wannu Israɛl yor ɓɔn kɔ̧ keekee-nyaŋa sɛn nú ye Aram, ɓɛɛ a̧ fe mɛ ga̧a̧mɔ.