Read Northwest Gbaya 2 KALATA NYƐRƐ 19 Bible Online

2 KALATA NYƐRƐ 19 - Northwest Gbaya bible

2 KALATA NYƐRƐ 19

¹Josafat wannu Juda sii ɗoŋ nɛ de-a si tɛ kɔ‘i Jerusalɛm.

²Ŋma wi-zɔk-mɔ nɛ̀ nin-a'e Jɛhu bem ko Hanani wee ti wannu, ɓɛɛ tɔ̧ ha̧ a̧: «Wen ge mɛ gbak o wi-ɗaŋ in mɛ kɔ̧ɔ̧ o wisɛn ko GASA WAN ge? Nyimsea ko GASA WAN tɛ tik zu mɛ tɛ mɔ‘i.

³Mɔ kpɔk, wi kpaa so kànà ŋma demɔ sɛn tɛ-mɛ, wen mɛ dɔɔ so o te nɛ̀‘i gasi gasi yinɛ sɛn zaŋnu. Mɛ ee see-mɛ wen kia Sɔ̧.»

⁴Fara-duk ko Josafat mɛ̀ nɛ́ sɛn Jerusalɛm. Tɛ ŋma ŋgimbi, a̧ yara tɛ nù mgbara dukbíí, ku̧u̧naŋ-a nɛ̀ Bɛrseba hegɔ hɔ nɛnɛ zu kaya Efraim, ɓɛɛ a̧ tɔ̧ ha̧ o be Israɛl mɛ pii ɗoŋ tɛ GASA WAN Sɔ̧ ko o dáà kɔ-wa.

⁵A̧ aa o wi-gɔn-kita zu nù kɔ̧-a̧ in sɛn tɛ o ye-ŋgárá kpɔk kpɔk nù Juda lɛŋ.

⁶Wen n'aa tɔ̧ɔ̧ ha̧ o wi-gɔn-kita nɛ́ mɔ'ɔ: «Ɛ̀nɛ̀ zɔ́k mɔ n’ɛnɛ tɛ de nɛ̀ de-a, wen bo nɛ wen yí bíí ɛ̀nɛ̀ tɛ gɔn nɛ̀ kita na, ɓɛɛ mɛ̀ nɛ́ nɛ̀ nin GASA WAN nɛ̀ tɛ duk in'nɛ̀ɛ́ sɛn tɛ tom-gɔna-kita'i.

⁷Hegɔ, ɛ̀nɛ̀ tú̧ tɛ GASA WAN, ɓɛɛ ɛ̀nɛ̀ dé nɛ́ tom nɛ̀ yuwar-a wen GASA WAN Sɔ̧ k’ɛɛ kpɛk ɗaŋ gɔna-kita, yee-ŋmaa in zɔka-ŋmaa-nɛ-ɗoŋ nɛ̀ ha̧a̧mɔ na.»

⁸Kóó sɛn Jerusalɛm mbɛt, Josafat ee o ŋma be Levii in o ŋma wi-ɗafi-sɔ̧ bá nɛ̀ o ŋma gasawi nutua Israɛl wen gɔna kita hee mɔ'ɔ nɛ̀ GASA WAN kɔ̧ɔ̧ ga, in wen kɛ̧ɛ̧ mgbara mɔ ha̧ o bíí saaye.

⁹A̧ hee mbéá ha̧ wa tɔ̧ nɛnɛ: «Mɔ n’ɛnɛ tɛ de nɛ́ mɔ'ɔ: ɛ̀nɛ̀ yú GASA WAN, ɛ̀nɛ̀ yór ɗoŋ wen k’ɛ́nɛ́ ɓɛɛ ɛ̀nɛ̀ dé mɔ nɛ̀ sa̧a̧-see.

¹⁰Ŋgimbi lɛŋ nɛ̀ o nya'nɛ́ nɛ̀ a̧a̧ ye kɔ-wa tɛ ba ŋma wen tɛnɛ sɛn ti'nɛ́ hee wen gbɛɛ-zu, wen zu heembea, wen zu ha̧a̧nú, wen zu geŋa, kóó wen see zu yuwar duka-a, ɛ̀nɛ̀ úsí mɔ ha̧ wa nɛ̀ sa̧a̧-a̧, wen ká wa tɛɛ tik sɛn ɗɔɔ ɓaa-wen ko GASA WAN, ɓɛɛ ká gasa nyimsea tɛɛ tik zu'nɛ́ in zu o nya'nɛ́. Ɛ̀nɛ̀ dé hegɔ, ɓɛɛ wen beka tik zu'nɛ́ na.

¹¹Wan-ɗafi-sɔ̧ Amaria tɛ duk zu'nɛ́ wen o wen nɛ̀ zɔk nɛ́ GASA WAN lɛŋ, ɓɛɛ war ko Zɛbadia bem ko Ismaɛl gasawi zu nutua ko Juda, a̧ tɛ duk kɔ̧-a̧ zu o wen nɛ̀ zɔk nɛ́ mɔɔ-wan. Ko o be Levii, wa tɛ ya nɛ́ o wi-yɔr-mɔ sɛn mgbara'nɛ́. Ɛ̀nɛ̀ dé tom nɛ nɔɔ-ŋgiɗi, ɓɛɛ GASA WAN a̧ dúk in wi nɛ̀ tɛ de demɔ!»