Read Northwest Gbaya 2 KALATA NYƐRƐ 2 Bible Online

2 KALATA NYƐRƐ 2 - Northwest Gbaya bible

2 KALATA NYƐRƐ 2

¹Salomɔŋ hoka o wi-tui-mɔ booro-ɓu-mɔɔrɔ-ɗoŋ-yiitoo, o wi-gba-ta booro-ɓu-mɔɔrɔ-ɗoŋ-taar mɛ de tom zu kaya in o wi-zɔk-tom booro-taar-nɛ-gɔmŋmaa-mɔɔrɔ-ɗoŋ-kpɔk.

²Salomɔŋ toma tɔ̧ ha̧ Hiram wannu Tir hee mɔ'ɔ ga: «Mɛ dee so tom in dáà kɔ‘m David, tom nɛ̀ o te-gbatui ha̧ a̧ mɛ de nɛ̀ tua-ɔɔ kɔ̧-a̧.

³Kɔ‘m, mi tɛ de Tua wen nin GASA WAN Sɔ̧ kɔ‘m, ha̧‘m mɛ e ha̧ a̧, ha̧‘m mɛ dɔ fuu-nyama mɛ tur sɛn ti a̧; ha̧‘m mɛ ɗafi sɔ̧ ha̧ a̧ ɓɔnsɛnɛ dɔ nɛ̀ kpoo-sɔ̧ ha̧ a̧ mɛ tutuyɛ, mɛ ga̧a̧mɔ, mɛ wese Sabat, o wese gbaŋa, hɔɔ-yí-zɛ in o wese gbaŋa ko GASA WAN Sɔ̧ k’ɛɛ lɛŋ; mɔ‘i tɛ de ɓɔnsɛnɛ sɛn Israɛl.

⁴Ɓɛɛ Tua n'am kɔ̧ɔ̧ mɛ de'i ɔ gasa nyɛmna wen Sɔ̧ k’ɛɛ gasa gan o sɔ̧ lɛŋ.

⁵Mɛ̀ nɛ́ o a̧ tɛ kpa ŋgai mɛ de ŋma Tua ha̧ a̧, nɛ̀ yiwese’ɛ in o wan mɛ ɗoŋ-aa nyɛm a̧ na’ɛ o? Ɓɛɛ mi so nɛ́ o sɛ́kà‘m de Tua ha̧ a̧ o? Tɛ́ duk nɛ́ géé fara-dɔ-fuu-nyama ha̧ a̧ géè.

⁶Kinii, mɛ̀ tóm ŋma bíí nɛ̀ iŋa tom-lɔr, bu-mbɔi, ndɛrɛ, boi, tu̧ zɔ̧-laa, gbɛ̧-a̧, in gbɛ̧-a̧ zóŋ-zóŋ, nɛ̀ iŋa sɛka mɔ mbɛt; a̧ tɛ de tom in o wi-iŋ-tom nɛ̀ a̧a̧ katɛ‘m sɛn nú Juda in sɛn Jerusalɛm, ɓɛɛ nɛ̀ dáà kɔ‘m David mɔi̧a so a.

⁷Mɛ̀ tóm o te-gbatui, zawaya in te-nyama[2] tɛnɛ ha̧‘m nɛ̀ Libaŋ wen mi iŋa'e ndé, o wi-de-tom kɔ-mɛ iŋa gɔma te Libaŋ, ɓɛɛ o wi-de-tom kɔ‘m tɛ nɛ̀ in o bíí kɔ-mɛ,

⁸ha̧ wa mɛ ɗafi o te ha̧‘m nɛ̀ dɔka-a, wen Tua n'am tɛ de ɔ gasa in tɛ de nyɛmna.

⁹Ɓɛɛ wi-de-tom kɔ-mɛ nɛ̀ tɛ gɔm o te nɔ‘i, nyɔŋmɔ n'am ha̧a̧ ha̧ wa nɛ́ fuu-alkamaari tɛ kilo miliɔŋ mɔɔrɔ-ɗoŋ-kpɔk, be-fon[3] nɛ́ kpɔk mɔ mbɛt, litrɛ dɔ̧ɔ̧ booro-gɔmŋmaa-mɔɔrɔ-ɗoŋ-taar in litrɛ nɔ̧́ booro-gɔmŋmaa-mɔɔrɔ-ɗoŋ-taar mbɛt.»

¹⁰Hiram wannu Tir yɔra mɔ tom si ɗoŋ ha̧ Salomɔŋ hee mɔ'ɔ ga: «Mɛ̀ nɛ́ wen nɛ̀ GASA WAN kɔ̧ɔ̧ dukbíí kɔ‘i, nɛ́ mɔ'ɔ n'aa ee nɛ̀ mɛ zu wa nɛ̀ wan.»

¹¹A̧ tɔ̧ɔ̧ woyo: «Zɔnamɔ a̧ dúk nɛ́ ko GASA WAN Sɔ̧ ko Israɛl nɛ̀ dee yiwese in nù, nɛ̀ ha̧a̧ bem nɛ̀ iŋa mgbara mɔ ha̧ wannu David, nɛ̀ nɛ́ nɔ̀ nɛ̀ yuwar-a in nɛ̀ a̧a̧ nɛ̀ taamɔ, nɛ̀ tɛ de Tua ha̧ GASA WAN in tua-wan kɔ‘i mbɛt.

¹²Kinii, mi toma ŋma bíí-iŋ-tom nɛ̀ a̧a̧ nɛ̀ iŋamɔ ha̧ mɛ; nin-a nɛ́ Hiram-Abi,

¹³bem ko ŋma zɔŋa Dan; dáà kɔ̧-a̧ nɛ́ be Tir. A̧ iŋa dee tom lɔr, bu-mbɔi, ndɛrɛ, boi, ta, te, tu̧ zɔ̧-laa, gbɛ̧-a̧, gbɛ̧-a̧ zóŋ-zóŋ in yɛ́m-yɛ́m zɔ̧-laa. A̧ iŋa sɛka mɔ lɛŋ in dee tom lɛŋ nɛ̀‘i tɛ e er-a; a̧ tɛ de tom'i in o wi-iŋ-tom kɔ-mɛ, bá nɛ̀ o wi-iŋ-tom ko dáà kɔ-mɛ, Nyaa David.

¹⁴Alkamaari in be-fon, nɔ̧́ in dɔ̧ɔ̧ nɛ̀ Nyaa tɔ̧ nɛnɛ‘i, a̧ a̧ tóm tɛnɛ kinii ha̧ o wi-de-tom kɔ̧-a̧.

¹⁵K’ɛɛ, ɛɛ tɛ gɔm o te Libaŋ nyɛm nɛ̀ ɗoŋ o mɔ n’ɛnɛ kɔ̧a̧; ɛɛ tɛ kai wa a ɗɔɔ gba-tɔp, ɓɛɛ ɛɛ hɛra wa ba nɛ̀ yì hɔ Jafa, sɛk’ɛnɛ kaia wa daŋnɛ si Jerusalɛm.»

¹⁶Salomɔŋ tɔra o gɛnɛ nɛ̀ yaa so tɛ nú Israɛl ɗoŋ tɔra o bíí nɛ̀ dáà kɔ̧-a̧ David tɔra so nɛti kaɗi; a̧ kpaa wa lɛŋ nɛ́ booro-gɔmŋmaa-nɛ-booro-ɓu-mɔɔrɔ-zua-taar-nɛ-gɔmŋmaa-mɔɔrɔ-ɗoŋ-kpɔk.

¹⁷A̧ hoka o wi-tui-mɔ booro-ɓu-mɔɔrɔ-ɗoŋ-yiitoo, o wi-gba-ta booro-ɓu-mɔɔrɔ-ɗoŋ-taar mɛ de tom si zu kaya, in o wi-zɔk-tom booro-taar-nɛ-gɔmŋmaa-mɔɔrɔ-ɗoŋ-kpɔk ha̧ wa mɛ duk zu o gíí wi-de-tom.