Read Northwest Gbaya 2 KALATA NYƐRƐ 20 Bible Online

2 KALATA NYƐRƐ 20 - Northwest Gbaya bible

2 KALATA NYƐRƐ 20

¹Hɔ-ɗoŋ mɔ‘i, o bem ko Mɔab in o bem ko Amɔŋ yaka in o bezaŋ Maɔŋ mɛ nɛ̀ɛ́ bi Josafat.

²Wa tɛ̀ɛ̀ tɔ̧ nyɛrɛ mɔ‘i ha̧ Josafat hee mɔ'ɔ ga: «O ŋma zɔm gíí wi-biro tɛ̀ɛ́ nɛ̀ kur gba-tɔp, nɛ̀ war Edɔm mɛ bi mɛ; kinii wa a̧a̧ sɛn Hasasɔŋ-Tamar, wen nɛ̀ tɔ̧ Ɛn-Gedi.»

³Josafat dee kíì; a̧ taa mɔ mɛ ak mɔ in GASA WAN, ɓɛɛ a̧ tɔ̧ ha̧ o bíí mɛ zim yì sɛn nù Juda lɛŋ.

⁴O bíí gara tɛnɛ nɛ̀ tɛ o ye Juda lɛŋ mɛ kɔfi GASA WAN.

⁵Josafat yora mgbara gíí o be Israɛl nɛ̀ mɔi̧a tɛnɛ nɛ̀ nù Juda in nɛ̀ Jerusalɛm sɛn kɔ̧ Tua ko GASA WAN tan nɛ̀ Nú Mbe Zala ɓɛɛ tɔ̧ hegɔ:

⁶«GASA WAN, Sɔ̧ ko o dáà k’ɛɛ, ɛ́nɛ́ bó nɛ́ Sɔ̧ sɛn yiwese nɛ̀ duk zu nù lɛŋ na nde? Ŋgai in ŋgayamɔ a̧a̧ kɔ̧ er'nɛ́, ŋma bíí nɛ̀ tɛ ba zu dúk nɛ̀ ɛ́nɛ́ bo na.

⁷Ɛ́nɛ́ bó nɛ́ Sɔ̧ k’ɛɛ nɛ̀ gbina gba̧a̧-tɛ bíí nù'ɛ ti dukbíí k’ɛ́nɛ́ Israɛl ha̧ nɛ̀ wa ha̧ o bezaŋ Abraham, sɛm k’ɛ́nɛ́ na nde?

⁸Wa dee ye hɛ̧ɛ̧, ɓɛɛ wa mbo sa̧a̧-fara wen nin'nɛ́, tɔ̧ nɛnɛ:

⁹‹Kà ŋma ɗaŋmɔ tik zu yɛ, kóó nɛ́ gba-paa, kóó nɛ́ bɔnɛ oi dee ɗaŋmɔ, kóó nɛ́ ŋga-zɛɛ-geŋa, kóó nɛ́ kaɓa; k’ɛ̀ɛ̀ yor sɛn nú Tua’ɛ sɛn ti'nɛ́, wen nin'nɛ́ a̧a̧ sɛn kɔ̧ Tua’ɛ, k’ɛ̀ɛ̀ ai nú sitɛ‘nɛ́ tɛ ŋga bɔnɛ k’ɛɛ, ɛnɛ tɛ kifi nú in ɛnɛ tɛ kpasi yɛ.›

¹⁰Ɓɛɛ kinii, zɔ́k o bem ko Amɔŋ in ko Mɔab gú nɛ̀ ko Edɔm nɔ'ɔ nɛ̀ ɔ mgbara kaya Sɛir, n’ɛnɛ ha̧ so yuwar ha̧ o be Israɛl mɛ hɔ tɛ kɔ-wa ɗoŋ gboa-a nɛ̀ Egiptɛ na, ba nɛ biro dúk nɛ̀ ɛɛ!

¹¹Kinii o wi nɔ‘i nɛ́ mɔ'ɔ nɛ̀ tɛ mɛ ba nù k’ɛɛ n’ɛnɛ ha̧a̧ so h’ɛ́ɛ́'ɛ!

¹²Sɔ̧ k’ɛɛ, ɛnɛ beka gɔn kita k’ɛ́nɛ́ zu wa na nde? Ɛɛ bo nɛ̀ ŋgai mɛ yor ti zɔm giiwi nɛ̀ tɛ mɛ bi yɛ'ɛ na, ɛɛ iŋ mɔ n’ɛɛ tɛ de na mbɛt; mɛ̀ nɛ́ wen hegɔ s’ɛɛ zik yí-ɛɛ zɔk mɔ sitɛ‘nɛ́.»

¹³O be Juda lɛŋ in o kóò gú nɛ̀ o bem kɔ-wa yor so nɛ́ ŋgɔn sɛn ti GASA WAN.

¹⁴Sɛn mgbara gíí o be Israɛl nɛ̀ mɔi̧a, Ɔmi ko GASA WAN duka zu Yaziɛl bem ko Zakarii, bem ko Bɛnaya, bem ko Yeiɛl, bem ko Matania, be-koo Levii, ŋma bezaŋ Asaf.

¹⁵Yaziɛl tɔ̧a̧: «Ɛnɛ o be Juda in o bíí Jerusalɛm bá nɛ̀ wannu Josafat, ɛ̀nɛ̀ zíí wen’ɛ nɛ̀ de-a! Wen nɛ̀ GASA WAN tɔ̧ h’ɛ́nɛ́ nɛ mɔ'ɔ: ‹K’ɛ́nɛ́ de kíì na, in k’ɛ́nɛ́ yu mɔ ti zɔm giiwi nɔ'ɔ na, wen biro'i bó nɛ́ k’ɛ́nɛ́ na, ɓɛɛ nɛ́ biro ko Sɔ̧.

¹⁶Mɔɔsa̧, ɛ̀nɛ̀ zír, ɛ̀nɛ̀ bí wa. Wa nɛ́ mɔ'ɔ nɛ̀ daŋ nɛ̀ war Sɔs tɛnɛ'ɛ; ɛnɛ tɛ kpa wa mgbák nú gboŋgo ŋga-gbárà Yɛruɛl.

¹⁷Bo nɛ ɛnɛ a̧ tɛ bi biro na; ɛ̀nɛ̀ nɛ́, ɛ̀nɛ̀ yór, ɓɛɛ ɛ̀nɛ̀ zɔ́k gbina biro nɛ̀ GASA WAN tɛ gbin see zu'nɛ́. Juda in Jerusalɛm, k’ɛ́nɛ́ de kíì na, k’ɛ́nɛ́ yu mɔ na! Mɔɔsa̧, ɛ̀nɛ̀ gbó, ɛ̀nɛ̀ nɛ́ si ti wa, ɓɛɛ GASA WAN tɛ duk in'nɛ̀ɛ́!› »

¹⁸Josafat gbɛɛ zugur nù, ba yí gu nù; Juda nɛ̀ oi gun lɛŋ in o be Jerusalɛm gbɛɛ zugur nù ti GASA WAN gasi nɛ̀ a̧.

¹⁹O be Levii, pɛ́r-nam ko o bem ko Kehat in ko o bem ko Kore kura mɛ gasi GASA WAN Sɔ̧ ko Israɛl nɛ̀ hee ger.

²⁰Mɛ bin, dukbíí kura mɛ tutuyɛ sut mɛ yak si ŋga-gbárà Tɛkɔa. Ŋgimbi yaka-a, Josafat yora ɓɛɛ tɔ̧: «O be Juda in o be Jerusalɛm, ɛ̀nɛ̀ zíí wen kɔ‘m! Ɛ̀nɛ̀ é ta nɛ̀ GASA WAN Sɔ̧ k’ɛ́nɛ́, ɓɛɛ ɛ́nɛ́ tɛ kpa ŋgai! Ɛ̀nɛ̀ é ta mbɛt nɛ̀ o wi-tɔ̧-wen oi nú-a, ɓɛɛ ɛ́nɛ́ tɛ gan zu mɔ.»

²¹Josafat in dukbíí hoka o ŋma bíí nɛ̀ tɛ yak ti ha̧ o wi-biro gasi nɛ̀ GASA WAN, zɔn nɛ̀ gasamɔ kɔ̧-a̧ tɔ̧ nɛnɛ: «Ɛ̀nɛ̀ gásí GASA WAN, wen kɔ̧ɔ̧mɔ kɔ̧-a̧ duk ɓɔnsɛnɛ.»

²²Ŋgimbi nɛ̀ wa ku̧u̧naŋ aa nú-wa tɛ gima zɔnamɔ, GASA WAN dee ha̧ sii-kafɛ mɛ kur mgbara o be Amɔŋ, o be Mɔab in o be mgbara kaya Sɛir nɛ̀ tɛɛ so wen bíí Juda, ɓɛɛ wa ye tɛ bíí ŋmaa.

²³O bem ko Amɔŋ in o bem ko Mɔab duka zù nɛ̀ o be mgbara kaya Sɛir ɓɛɛ kum wa lɛŋ. Ŋgimbi nɛ̀ wa kuma o be Sɛir kaɗi, wa yee tɛ gbɛɛ ŋmaa siɗoŋ woyo.

²⁴O be Juda hɔɔ sɛn zu-tɔ̧́ fara nɛ̀‘i duk sɛnɛ zɔk nɛ̀ ŋga-gbárà; wa zika tɛ-wa zɔk mɔ si zu gíí o wi-biro, ɓɛɛ nɛ́ géé wɔr a̧ gbisi nɛ̀ mbɔɗɔnu sinɛ, ŋma bíí kpɔk duk kpasa na.

²⁵Josafat in o wi-biro kɔ‘i tɛ̀ɛ̀ kai o mɔɔ tɛ-wa, wa kpaa o mɔ-dai nɛ̀ dɔka-a, o mbɔi, o laa in o demɔ nɛtɛ nɛtɛ. Zaŋzɛ taar, wa a̧a̧ tɛ kaia mɔ, wen mɔ dɔka so nyɛmna; hegɔ wa gana oi-aa e duk.

²⁶Zɛ naar ɗoŋ mɔ‘i, wa mɔi̧a ŋmaa sɛn kɔ̧ ɗɔŋgɔ Beraka[9] de nɛ̀ osoko ha̧ GASA WAN sɛn hi̧i̧, ɓɛɛ wa sa nin ɗɔŋgɔ‘i'e Ɗɔŋgɔ Beraka nɛ̀ duk hɔ sɔsɔɔ.

²⁷O be Juda gú nɛ̀ o be Jerusalɛm lɛŋ sii ɗoŋ in Josafat sɛn Jerusalɛm nɛ̀ desee, wen GASA WAN ha̧a̧ desee ha̧ wa sɛn ti o wisɛn kɔ-wa.

²⁸Wa yɔɔ yɔyɛ ye nɛ̀ saaye Jerusalɛm, mbɛr nɛ̀ koloŋ in o kunde, dɔm nɛ̀ mbia hɔ nɛnɛ kɔ̧ Tua ko GASA WAN.

²⁹Kíí GASA WAN dee o nù nɛtɛ nɛtɛ tɛ zia nyɛrɛ biro nɛ̀ GASA WAN dee in o wisɛn ko Israɛl.

³⁰Wan ko Josafat duka zaŋ ga̧a̧mɔ, ɓɛɛ Sɔ̧ kɔ̧-a̧ ha̧ ɔma-tɛ ha̧ a̧ tɛ fara lɛŋ.

³¹Josafat bem ko Asa ɔɔ wan zu Juda; a̧ a̧a̧ so nɛ̀ pɛ ɓu-taar-zua-mɔɔrɔ ŋgimbi n'aa ɔɔ nɛ wan'i, ɓɛɛ a̧ duk tɛ wan pɛ ɓu-yiitoo-zua-mɔɔrɔ sɛn Jerusalɛm. Nin nàà kɔ̧-a̧ nɛ Azuba boko-bem ko Sili.

³²A̧ zɔka ɗoŋ mɔ ko dáà kɔ̧-a̧ Asa, a̧ e ŋma mɔ duk na; a̧ dee mɔ nɛ̀ yuwar-a ti GASA WAN.

³³Mɔ kpɔk, o fara-gasi géé-sɔ̧ mɛ kusa-fara ɓɔna so kànà sɛnɛ; hegɔ o bíí tɛ e so see nɛ̀ kpasa-a tɛ Sɔ̧ ko dáà kɔ-wa na.

³⁴Oi tom ko Josafat nɛ̀ dea, o wan mɛ ti in o wan mɛ ɗoŋ yɔra zaŋ tom ko Jɛhu bem ko Hanani, nɛ̀‘i ee zaŋ Kalata ko o wannu Israɛl.

³⁵Ɗoŋ mɔ‘i, Josafat wannu Juda ee nú in Ahazia wannu Israɛl nɛ̀ deemɔ kɔ̧-a̧ de so na.

³⁶Wa ee nú in ŋmaa mɛ de o kombon wen nɛa-a si Tarsis mɛ. Wa dee o kombon nɔ‘i sɛn Ɛsiɔŋ-Gebɛr.

³⁷Tɛ mɔ‘i, wi-ɗafi-sɔ̧ Eliɛzɛr bem ko Dɔdawa be Marɛsa tɔ̧ɔ̧ ha̧ Josafat hegɔ: «Hee mɔ'ɔ nɛ̀ mɛ ee nú in Ahazia ga, GASA WAN tɛ ɗaŋ tom kɔ-mɛ yinɛ.» Hegɔ o kombon mbaŋa ye yì lɛŋ, wa hɔ sɛn Tarsis na.