Read Northwest Gbaya 2 KALATA NYƐRƐ 24 Bible Online

2 KALATA NYƐRƐ 24 - Northwest Gbaya bible

2 KALATA NYƐRƐ 24

¹Jɔas a̧a̧ so nɛ̀ pɛ mɔɔrɔ-ɗoŋ-yiitoo, ŋgimbi n'aa ɔɔ nɛ̀ wan; ɓɛɛ a̧ ɔ wan sɛn Jerusalɛm pɛ ɓu-naar. Nin nàà kɔ̧-a̧ so nɛ́ Sibia zɔŋa Bɛrseba.

²Jɔas dee mɔ nɛ̀ yuwar-a ti GASA WAN ŋgimbi nɛ̀ wi-ɗafi-sɔ̧ Yoyada ɓɔna nɛ̀ yí.

³Yoyada baa kóò yiitoo ha̧ Jɔas, ɓɛɛ wa ko o be-wiwii in o be-okoo ha̧ a̧.

⁴Ɗoŋ mɔ‘i, Jɔas taa mɔ mɛ ɗafi Tua ko GASA WAN.

⁵A̧ mɔi̧a o wi-ɗafi-sɔ̧ in o be Levii, ɓɛɛ a̧ tɔ̧ ha̧ wa: «Ɛ̀nɛ̀ nɛ́ dam ye nù Juda, ɛ̀nɛ̀ káí mbɔi sɛn er o be Israɛl wen ɗafa Tua ko Sɔ̧ k’ɛɛ ti pɛ lɛŋ; ɛ̀nɛ̀ dé mɔ‘i nɛ haya-a!» O be Levii de mɔ‘i nɛ̀ haya-a na;

⁶hegɔ, wannu saa gasa wan-ɗafi-sɔ̧ Yoyada, ɓɛɛ tɔ̧ ha̧ a̧: «Wen ge mɛ yor ɗoŋ o be Levii nɛ̀ ŋgaya-a ha̧ wa mɛ kai garama nɛ̀ Moisɛ wi-de-tom ko Sɔ̧ in o be Israɛl baa ha̧ so nú zu-a tɛnɛ nɛ̀ Juda in Jerusalɛm, wen Tua ko GASA WAN na ge?»

⁷Wi-ɗaŋ-mɔ Atalii in o bíí kɔ‘i ee so Tua ko Sɔ̧ ɗaŋ lɛŋ. Wa kaia so o sa̧a̧ nyɛk lɛŋ kɔ̧ Tua ko GASA WAN ɗafi nɛ̀ sɔ̧ Bal mbɛt.

⁸Wannu tɔ̧ɔ̧ ha̧ wa mɛ de ŋma kuɓa-a-mɔ e sɛn ká̧ nú Tua ko GASA WAN nɛ zan,

⁹in ha̧ wa mɛ he mbéá dam nù Juda in Jerusalɛm wen ha̧ o bíí mɛ kai garama nɛ̀ Moisɛ, wi-de-tom ko Sɔ̧ baa tɔ̧ so nɛnɛ zu Israɛl sɛn ŋga-gbárà tɛnɛ ha̧ GASA WAN.

¹⁰O be-wan in o bíí lɛŋ kpaa desee, ɓɛɛ wa kai mbɔi tɛnɛ dun kɔ̧ kuɓa-a-mɔ.

¹¹Ŋgimbi nɛ̀ o be Levii tɛ̀ɛ́ ba nɛ̀ kuɓa-a-mbɔ‘i nɛnɛ ha̧ wannu mɛ hu̧i̧, wa kpaa mbɔi kɔ̧ a̧ nɛ̀ dɔka-a; wi-duk katɛ wannu in wi-tɔr-sede ko gasa wan-ɗafi-sɔ̧ tɛ̀ɛ̀ gbai mbɔi'i, ɓɛɛ ba kuɓa-a-mbɔi'i piinɛ ɗoŋ e oi-aa. Wa dee hegɔ wese lɛŋ, ɓɛɛ wa kpa mbɔi nɛ̀ dɔka-a.

¹²Wannu in Yoyada ha̧a̧ mbɔi'i ha̧ wi-duk-zu tom Tua ko GASA WAN, ɓɛɛ wa yoɓi nɛ̀ o wi-gbɛr-te, o wi-sɛk-ta in o wi-de-tom ɗafa Tua ko GASA WAN gú nɛ̀ o wi-iŋ-tom-boi in tom-ndɛrɛ wen ɗafa ɗoŋ Tua'i mbɛt.

¹³O wi-de-tom nɔ‘i ku̧u̧ naŋ dee tom kɔ‘i, ɓɛɛ tom'i nɛ́ nɛ̀ haya-a kɔ̧ er-wa. Wa ɗafa Tua ko Sɔ̧, ɓɛɛ tɛ́ɛ̀ duk nɛ ŋgaya-a woyo.

¹⁴Ŋgimbi nɛ̀ wa kaɗa tom'i kaɗi, wa kaia oi sede piinɛ a ti wannu in wi-ɗafi-sɔ̧ Yoyada, ɓɛɛ wa de nɛ̀ o nyɛk wen Tua ko GASA WAN: o nyɛk wen aa mɔ in wen dɔɔ kpoo-sɔ̧; o nyɛk nɛtɛ nɛtɛ in o wan nɛ‘i dee nɛ̀ lɔr in bu-mbɔi mbɛt. Hegɔ wa dɔɔ kpoo-sɔ̧ wese ɓɔnsɛnɛ ŋgimbi ko Yoyada hɔ wese fio kɔ̧-a̧.

¹⁵Yoyada sɔka, ɓɛɛ wɔ duka-a zaŋnu gbɛ a̧ ɓɔna, hegɔ a̧ fea, ɓɛɛ ká a̧ a̧a̧ nɛ̀ pɛ gɔmŋmaa-nɛ-ɓu-taar.

¹⁶Wa guna a̧ sɛn ye ko David katɛ o wannu wen a̧ dee demɔ nyɛmna sɛn Israɛl in ha̧ Sɔ̧, ká bá nɛ̀ Tua ko Sɔ̧.

¹⁷Ɗoŋ fio ko Yoyada, o wanye sɛn nù Juda lɛŋ gara tɛ́ɛ̀ fan wannu Jɔas zɔn nɛ̀ a̧, ɓɛɛ a̧ kpɛk wen kɔ-wa.

¹⁸Duka, ɓɛɛ o be Israɛl e Tua ko GASA WAN Sɔ̧ ko dáà kɔ-wa duk, ɓɛɛ wa ku̧naŋ gasa o te in o géé-sɔ̧. Hegɔ, nyimsea ko Sɔ̧ tika zu nù Juda in Jerusalɛm, wen zu dee ɗaŋmɔ‘i.

¹⁹GASA WAN toma o wi-tɔ̧-wen oi nú-wi pii mgbara wa, wen ha̧ wa mɛ kii yuwar wen mgbɔɔ wa siɗoŋ tɛ a̧, ɓɛɛ wa kɔ̧ mɛ zii wen nú-wa na.

²⁰Ɔmi ko Sɔ̧ yee tɛ wi-ɗafi-sɔ̧ Zakarii bem ko Yoyada; see-aa kura zu dukbíí, ɓɛɛ a̧ tɔ̧ ha̧ wa: «Sɔ̧‘e ndé, wen ge ɛnɛ ee heembea kɔ‘m duk ge? Ɛnɛ beka kpa mɔɔ-oi na. Hee mɔ'ɔ n’ɛnɛ ea'm duk ga, mi mbɛt, mi ee'nɛ́ duk!»

²¹Wa baa ɗaŋ keta zu Zakarii, ɓɛɛ wannu tɔ̧ ha̧ wa mɛ yo a̧ nɛ̀ ta gbɛ, ɓɛɛ wa gbɛ a̧ sɛn nú zala Tua ko GASA WAN.

²²Tɛ wannu Jɔas bìí ɗoŋ dee demɔ nɛ̀ Yoyada dáà ko Zakarii dee so in a̧; hegɔ, a̧ gbɛɛ bem kɔ̧-a̧. Nɛti ha̧ Zakarii mɛ fe, a̧ tɔ̧a̧: «GASA WAN a̧ zɔ́k mɔ'ɔ, ɓɛɛ a̧ a̧ kífí er ha̧ mɛ.»

²³Tɛ ku̧u̧ naŋ pɛ, gíí wi-biro Aram dee ŋgazu in Jɔas; wa tɛ̀ɛ̀ hur nù Juda in saaye Jerusalɛm. Wa gbɛɛ o wanye fara nɔ‘i lɛŋ, ɓɛɛ wa tom o mɔ nɛ̀ wa kaia lɛŋ nɛnɛ ha̧ wannu kɔ-wa sɛn Damas.

²⁴Zu-a nɛ̀ o wi-biro Aram nɛ̀ tɛ̀ɛ̀ so dɔk na'i, GASA WAN foo o gíí wi-biro ko Juda a kɔ̧ er-wa, wen o be Juda ee war ko GASA WAN Sɔ̧ ko dáà kɔ-wa duk. War ko Jɔas, wa usa bɔnɛ ha̧ a̧,

²⁵ɓɛɛ wa yak e a̧ nɛ̀ oi gasa nyimmɔ. O wi-de-tom kɔ̧-a̧ baa ɗaŋ keta zu a̧, wen kifa er oi tɔk tɛ bem ko wi-ɗafi-sɔ̧ Yoyada nɛ̀ aa nu, ɓɛɛ wa gbɛ a̧ sɛn gɔn gado kɔ̧-a̧. Wa guna a̧ sɛn ye ko David, ɓɛɛ bó nɛ́ sɛn fara nɛ̀ wa gun o wannu sɛnɛ na.

²⁶O wi nɛ̀ baa ɗaŋ keta zu a̧ nɛ́ Zabad bem ko Simɛat zɔŋa Amɔŋ in Yozabad bem ko Simrit zɔŋa Mɔab.

²⁷Nin o bem kɔ̧-a̧, yɔramɔ zu tom nɛ̀ yaa er-a, nyɛrɛ mɔ zu tɔ̧ɔ̧-wen ko o wi-tɔ̧-wen oi nú Sɔ̧ zu a̧ in nyɛrɛ zu ɗafa Tua ko Sɔ̧ n'aa ɗafa yɔra zaŋ kalata ko o Wannu. Bem ko Amasia ɔɔ wan oi-aa.