Read Northwest Gbaya 2 KALATA NYƐRƐ 27 Bible Online

2 KALATA NYƐRƐ 27 - Northwest Gbaya bible

2 KALATA NYƐRƐ 27

¹Yotam a̧a̧ so nɛ̀ pɛ ɓu-yiitoo-zua-mɔɔrɔ ŋgimbi n'aa ɔɔ nɛ̀ wan, ɓɛɛ a̧ de pɛ ɓu-zua-mɔɔrɔ-ɗoŋ-kpɔk tɛ wan sɛn Jerusalɛm. Nin nàà kɔ̧-a̧ nɛ Yɛrusa, boko-bem ko Sadɔk.

²Yotam dee mɔ nɛ̀ yuwar-a ti GASA WAN, kànà hee mɔ'ɔ nɛ̀ dáà kɔ̧-a̧ Ozias dee so ga; a̧ yɔ kaya mɛ ye Tua ko Sɔ̧ na. Mɔ kpɔk, dukbíí nɛ̀ oi-aa lɛŋ yaa kànà tɛ dee ɗaŋmɔ siti.

³Mɛ̀ nɛ́ Yotam a̧ mboo nú Tua ko Sɔ̧ mɛ ŋgɔn. A̧ ɗafa ɗoŋ garo nɛ̀ dɔka-a tɛ fara nɛ̀ wa sa'e garo Ofɛl.

⁴A̧ dee o gasa ye sɛn zu kaya ko Juda in o be ŋga tua gú nɛ̀ o fara-pɛm-mɔ sɛn kɔ̧ o kombo.

⁵Yotam bìì o wannu ko o be Amɔŋ, ɓɛɛ a̧ gan wa; wa ha̧a̧ kilo bu-mbɔi booro-taar, kilo alkamaari miliɔŋ taar in kilo be-fon miliɔŋ taar mbɛt ha̧ a̧. Mɛ̀ nɛ́ kale mɔ a̧ wa ha̧a̧ tɛ yiitoo in taar pɛ mbɛt.

⁶Yotam kpaa ŋgai siti, wen n'aa e so see-aa tɛ GASA WAN Sɔ̧ kɔ̧-a̧.

⁷Oi mɔ nɛ̀ Yotam dea, o biro kɔ̧-a̧ in o mɔ nɛtɛ nɛtɛ n'aa dea yɔra zaŋ Kalata ko o wannu Israɛl in ko Juda mbɛt.

⁸A̧ a̧a̧ so nɛ̀ pɛ ɓu-yiitoo-zua-mɔɔrɔ ŋgimbi n'aa ɔɔ nɛ̀ wan, ɓɛɛ a̧ ɔ wan tɛ pɛ ɓu-zua-mɔɔrɔ-ɗoŋ-kpɔk sɛn Jerusalɛm.

⁹Yotam fea si ɗoŋ o dáà kɔ‘i, ɓɛɛ wa gun a̧ sɛn ye ko David. Bem kɔ̧-a̧ Ahaz ɔɔ wan oi-aa.