Read Northwest Gbaya 2 KALATA NYƐRƐ 28 Bible Online

2 KALATA NYƐRƐ 28 - Northwest Gbaya bible

2 KALATA NYƐRƐ 28

¹Ahaz a̧a̧ so nɛ̀ pɛ ɓu-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan pɛ ɓu-zua-mɔɔrɔ-ɗoŋ-kpɔk sɛn Jerusalɛm. A̧ de mɔ nɛ̀ yuwar-a ti GASA WAN hee mɔ'ɔ nɛ̀ dáà kɔ̧-a̧ David dee so ga na.

²A̧ zɔka nɛ́ ɗoŋ deemɔ ko o wannu Israɛl, ɓɛɛ a̧ mbo bu-mbɔi dui nɛ̀ o sɔ̧ Bal.

³A̧ nɛ̀ tɛ-a dɔɔ fuu-nyama kɔ̧ ɗɔŋgɔ Hinɔm, dɔ nɛ̀ o bem kɔ̧-a̧ nyɛm nɛ̀ ɗoŋ o ɗaŋmɔ ko o tugun bíí nɛ̀ GASA WAN ndaka so yinɛ ti o be Israɛl.

⁴A̧ dɔɔ o kpoo-sɔ̧, ha̧ nɛ̀ fuu-nyama zu o fara-ɗafi géé-sɔ̧, zu o kusa-fara in sɛn ti ɗɔɔ o da̧a̧ wa̧a̧-te mbɛt.

⁵GASA WAN Sɔ̧ kɔ̧-a̧ ee a̧ er wannu Aram; wa bìí a̧, ɓɛɛ wa kai o wi-biro kɔ̧-a̧ nɛ̀ bara-biro nɛ̀ dɔka-a yaknɛ si Damas. Wannu Israɛl baa kiitɛ Ahaz nɛ̀ see zu mbɛt, ɓɛɛ ɗaŋ mɔ tɛ nù kɔ̧-a̧ nɛ̀ dɔka-a.

⁶Pɛka bem ko Rɛmalia nduka o bíí booro-gɔmŋmaa-nɛ-booro-ɓu-yiitoo kpɔk kale wese. O wi nɔ‘i nɛ́ o be Juda; wa lɛŋ nɛ́ o gasa wi-biro. Mɔ‘i dee hegɔ wen nɛ̀ wa ee so GASA WAN Sɔ̧ ko o dáà kɔ-wa duk.

⁷Ɓɛɛ nɛ̀ ko Zikri ŋga wi-biro Efraim, kɔ̧-a̧, a̧ gbɛɛ Masɛya bem ko wannu Azrikam, gasa wi-duk-zu tua ko wannu in Ɛlkana mgbák wi nɛ̀ ndaɗi in wannu.

⁸O be Israɛl kaia o okoo booro-gɔmŋmaa-yiitoo gú nɛ̀ o obem sɛn nù Juda yaknɛ. Wa kaia o mɔɔ-oi-biro nɛ̀ dɔka-a nyɛmna sinɛ ɗoŋ si Samarii.

⁹Ŋma wi-tɔ̧-wen oi nú Sɔ̧ a̧a̧ so sɛn Samarii, nin-a nɛ́ Odɛd. A̧ wee ti o wi-biro Israɛl nɛ̀ pii nɛ̀ Samarii, ɓɛɛ a̧ tɔ̧: «Ɛ̀nɛ̀ zɔ̀k, tɛ tu̧u̧-see ko GASA WAN Sɔ̧ ko o dáà k’ɛ́nɛ́ zu Juda, a̧ aa wa er'nɛ́, ɓɛɛ ɛ́nɛ́ kum wa hegɔ nyɛrɛ-a hur hɔ yiwese mɛ.

¹⁰Nɛ́ mɔ'ɔ nɛ̀ kinii, ɛnɛ kɔ̧ɔ̧ mɛ e o wiwii in o okoo Juda in Jerusalɛm nɛ bara! K’ɛ̀nɛ̀ de hegɔ, bo nɛ́ ɛ́nɛ́ dak nɛ ɗaŋmɔ pi̧ zu'nɛ́ sɛn ti GASA WAN Sɔ̧ k’ɛ́nɛ́ na nde?

¹¹Ɛ̀nɛ̀ zíí wen nú‘m, ɓɛɛ ɛ̀nɛ̀ tóm o bara-biro n’ɛnɛ kaia sinɛ ɗoŋ, wen ká gasa nyimsea ko GASA WAN tɛ́ɛ̀ tik zu'nɛ́.»

¹²O ŋma gasawi zu o bezaŋ Efraim kɔ̧ɔ̧ ɗɔɔ wen'i; duka nɛ́ Azaria bem ko Yohanaŋ, Berekia bem ko Mɛsilɛmɔt, Yɛhiskia bem ko Salum in Amasa bem ko Hadlai; wa tɔ̧ɔ̧ ha̧ o wi nɛ̀ pia nɛ̀ fara-biro hee mɔ'ɔ ga:

¹³«K’ɛ́nɛ́ kai o bara-biro piinɛ hɛ̧ɛ̧ na, wen k’ɛɛ tɛɛ ya nɛ́ o wi de gasa ɗaŋmɔ ti GASA WAN. K’ɛ́nɛ́ pi̧ ŋma mbe ɗaŋmɔ zu o wan mɛ ti na, wen ɗaŋmɔ k’ɛɛ ɔ dita, ɓɛɛ nyimsea ko GASA WAN a̧a̧ see zu Israɛl.»

¹⁴O wi-biro ee o bara-biro in o mɔɔ-oi-biro nɛ̀ wa kaia so duk ɓɔn yí o gasawi in gíí o be Israɛl nɛ̀ mɔi̧a lɛŋ.

¹⁵Hegɔ, o bíí nɛ̀ wa hoka wen mɔ‘i, ha̧a̧ nɔɔ-ŋgiɗi ha̧ o bara-biro. Wa kaia o laa nɛ̀ wa kpaa mgbara mɔɔ-oi-biro in o ndárà a tɛ o bara-biro nɛ̀ ya so nɛ̀ géé tɛ in géé naŋ; wa nyɔŋa mɔ, nɔ nɛ̀ mɔ, wa dee nyina ha̧ o bíí nɛ̀ baa so da̧i̧, wa kaia o wi-kum a zu o tuifuu, ɓɛɛ wa mgbɔ wa sinɛ e Jeriko, ye-ndɛŋgɛ katɛ o nya-wa, ɓɛɛ o wi nɔ‘i si ɗoŋ Samarii.

¹⁶Ŋgimbi'i, wannu Ahaz pi̧i̧ tom ha̧ o be Asirii mɛ tɛ̀ɛ́ gbak wi

¹⁷wen nɛ̀ o be Edɔm pia so ɗoŋ, tɛ́ɛ̀ bi Juda woyo, ɓɛɛ kai o bara-biro yaknɛ.

¹⁸O be Filistii mbɛt tɛɛ hur o ye mɛ Hira-nù in o ye mɛ si ká̧-zan-mɛ́-ɗɔɔ tɛ nù Juda. Wa baa so Bɛt-Sɛmɛs, Ayalɔŋ, Gederot, Soko, Timna, Gimzo gú nɛ̀ o be ye nɛ̀ zíí nɛ̀ wa lɛŋ, ɓɛɛ wa ɔ sɛnɛ.

¹⁹GASA WAN pi̧i̧ búù zu nù Juda wen zu Ahaz wannu Israɛl nɛ ira o bíí kɔ‘i mɛ e GASA WAN duk de nɛnɛ ha̧ wa mɛ de ɗaŋmɔ ti a̧.

²⁰Wannu Asirii Tilgat-Pilnɛzɛr, wi nɛ̀ tɛɛ so pii tɛ a̧ mɛ gbak a̧, tɛ̀ɛ̀ kpé nɛ́ a̧ e nù.

²¹Ahaz kaia so ŋma o mbɔi Tua ko GASA WAN in ko wannu bá nɛ̀ ko o gasawi sí nɛ̀ mɔɔ-ha̧ wannu Asirii, ɓɛɛ ha̧a̧mɔ‘i gbak a̧ na.

²²Zu-a nɛ̀ wa kpee nɛ̀ Ahaz e nù‘i, a̧ e dee ɗaŋmɔ ti GASA WAN duk na.

²³A̧ duka tɛ ɗafa o géé-sɔ̧ Damas nɛ̀ dea ha̧ wa mɛ gan so a̧ tɛ biro, ɓɛɛ a̧ tɔ̧: «O sɔ̧ ko o wannu Aram gbaka wa ɓɛɛ wa gbin biro; hegɔ mi tɛ ɗafi sɔ̧ ha̧ wa, wen ha̧ wa mɛ tɛ̀ɛ́ gbak am.»

²⁴Ahaz mɔi̧a o sa̧a̧ nyɛk kɔ̧ Tua ko Sɔ̧, ɓɛɛ a̧ to ɗaŋ lɛŋ; a̧ mana o nutua sa̧a̧-fara kɔ̧ Tua ko GASA WAN, ɓɛɛ a̧ mbo o fara-ɗafi-sɔ̧ sɛn o sasa-war Jerusalɛm lɛŋ.

²⁵A̧ mboo o fara-ɗafi-sɔ̧ dam saaye nù Juda lɛŋ, wen dɔɔ fuu-nyama ha̧ o gɔni sɔ̧. Tɛ mɔ‘i, a̧ tu̧u̧ see GASA WAN Sɔ̧ ko o dáà kɔ̧-a̧.

²⁶Oi o nyɛrɛ tom in o oi deemɔ ko Ahaz lɛŋ, tɛ ku̧u̧naŋ-a hɔ sɔŋkur-aa yɔra zaŋ Kalata ko o wannu Juda in Israɛl.

²⁷Ahaz fea si ɗoŋ o dáà kɔ‘i, ɓɛɛ wa gun a̧ sɛn saaye Jerusalɛm; mɔ kpɔk, wa gun a̧ kɔ̧ fio ko o wannu Israɛl na. Bem kɔ̧-a̧ Ezɛkias ɔɔ wan oi-aa.