Read Northwest Gbaya 2 KALATA NYƐRƐ 31 Bible Online

2 KALATA NYƐRƐ 31 - Northwest Gbaya bible

2 KALATA NYƐRƐ 31

¹Ŋgimbi nɛ̀ gbaŋa kaɗa lɛŋ, o be Israɛl nɛ̀ a̧a̧ so hi̧i̧ lɛŋ pɛsa dam tɛ o ye nù Juda mɛ gbin o ta-zu-nù, ɓir nɛ̀ o te nɛ̀‘i gasi gasi, ɗaŋ nɛ̀ o kusa-fara in o fara-ɗafi géé-sɔ̧ yinɛ sɛn nù Juda in nú Bɛnjamin ká bá nɛ̀ Efraim in Manase lɛŋ. Ɗoŋ mɔ‘i, o be Israɛl sii ɗoŋ, kóó o ndé sitɛ ye kɔ‘i.

²Ezɛkias kɛ̧ɛ̧ o wi-ɗafi-sɔ̧ in o be Levii nɛ̀ dùk-aa, ɓɛɛ usi yuwar tom kɔ-wa ha̧ wa. War ko o wi-ɗafi-sɔ̧ in o be Levii, kɔ-wa nɛ́ dɔɔ kpoo-sɔ̧ in ha̧a̧ mɔ-gaŋmɔ, tom-ɗafa-sɔ̧ sɛn tɛ zɔnamɔ in tu̧u̧ tɛ GASA WAN sɛn kɔ̧ sa̧a̧-fara.

³Wannu mbɛt baa ŋma mbɔi kɔ‘i e wen ɗafa sɔ̧ wan mɛ tuyɛ in mɛ ga̧a̧mɔ sɛka wan mɛ wese-ɔm-tɛ in wan mɛ gbaŋa mbe-yi-zɛ bá nɛ̀ o géé gbaŋa hee mɔ'ɔ nɛ̀ yɔra so zaŋ Heembea ko GASA WAN ga.

⁴Wannu tɔ̧ɔ̧ ha̧ o be Jerusalɛm mɛ ha̧ war mɔ ko o wi-ɗafi-sɔ̧ in o be Levii ha̧ wa, wen ha̧ wa mɛ kpa war mɛ ha̧ ŋgai tɛ-wa tɛ tom nɛ̀ oi-aa lɛŋ, nyɛm nɛ̀ ɗoŋ Heembea ko GASA WAN.

⁵Ɗoŋ nɛ̀ o be Israɛl zia wen'i kaɗi, wa ŋmara zu-nyɔnɔ, zu alkamaari, dɔ̧ɔ̧, nɔ̧́, gɔrɔ in zu o mɔ nɛ̀ a̧a̧ kpɛɛfɔ lɛŋ, ɓɛɛ wa kai zu mɔɔ nɔ‘i nɛnɛ wen ha̧a̧-a̧ ha̧ Sɔ̧.

⁶O bíí tɛ geɗek ye Juda in o be Israɛl mɛ ká̧-zan-mɛ́-ŋgɔn kaia ha̧a̧mɔ, o sami in o ndai gú nɛ̀ o ha̧a̧mɔ kɔ-wa nɛtɛ nɛtɛ tɛnɛ ha̧ GASA WAN Sɔ̧ kɔ-wa. Wa mɔi̧a dùk-aa gbisi gbol-gbol.

⁷Sɛn tɛ taar fio-zɛ, wa ku̧u̧ naŋ mɔi̧a dùk-aa a nɛ̀ war-a, ɓɛɛ wa kaɗi tom-aa tɛ mɔɔrɔ-ɗoŋ-yiitoo fio-zɛ.

⁸Ŋgimbi nɛ̀ Ezɛkias in o gasawi tɛɛ zɔk mɔɔ nɔ‘i nɛ̀ wa kaia tɛnɛ‘i, wa zɔna GASA WAN in dukbíí kɔ̧-a̧ Israɛl.

⁹Ezɛkias aka o wi-ɗafi-sɔ̧ in o be Levii zu mɔi̧a o ha̧a̧mɔ nɔ‘i,

¹⁰ɓɛɛ gasa wan-ɗafi-sɔ̧ Azaria, tɛ nutua ko Sadɔk kifi nú ha̧ a̧ hee mɔ'ɔ ga: «Tɛ ku̧u̧naŋ ndɛma zu-nyɔnɔ pii kɔ̧ Tua ko GASA WAN, ɛɛ nyɔŋ mɔ zaŋ yɛ sur nɛ̀ de-a, ɓɛɛ oi-aa ɓɔna nɛ̀ dɔka-a mbɛt, wen GASA WAN toka de yoŋgo zu dukbíí kɔ‘i. O wan nɛ̀ ya mbɔɗɔnu’ɛ, nɛ́ oi-aa nɛ̀ ɓɔna.»

¹¹Ezɛkias tɔ̧ɔ̧ ha̧ wa mɛ ɗafi de fara-a-nyɔŋmɔ sɛn ká̧ Tua ko GASA WAN. Ɗoŋ nɛ̀ wa ɗafa fara kaɗi,

¹²wa kaia o zu-nyɔnɔ in o ŋma dɔka ha̧a̧mɔ nɛ̀ ɔ sa̧a̧ nɛnɛ a hi̧i̧ nɛ̀ yuwar-a. Nɛ́ Kɔnania ŋma be Levii á̧ duka zu mɔɔ nɔ‘i in nya kɔ̧-a̧ Simɛi, gbama wi-de-tom in a̧ zu mɔ‘i.

¹³Wannu Ezɛkias in gasa wan-ɗafi-sɔ̧ Azaria wi-duk-zu Tua ko Sɔ̧ hoka Kɔnania in Simɛi mɛ duk zu Yehiɛl, Azaria, Nahat, Asahɛl, Yɛrimɔt, Yozabad, Eliɛl, Ismakia, Mahat in Bɛnaya.

¹⁴Kore ŋma be Levii, bem ko Imna wi-pɛm-nú garo nɛ̀ war daŋa-wese duk so kɔ‘i zu o ha̧a̧mɔ ha̧ Sɔ̧, kɛ̧ nɛ̀ mɔ nɛ̀‘i ha̧a̧ ha̧ GASA WAN in o mɔ nɛ̀ ɔ sa̧a̧ nyɛmna.

¹⁵Mɛ̀ nɛ́ sɛn tɛ tɔ̧ɔ̧-wen kɔ̧-a̧ a̧ Edɛn, Miniamin, Yesua, Sɛmaya, Amaria in Sɛkania duka kɛ̧ nɛ̀ mɔ ha̧ o nya-wa nɛ̀ see kpɔk, nyɛm nɛ̀ ɗoŋ duka-a kɔ-wa. Kɛ̧ɛ̧-mgbara-mɔ bo na, kóó nɛ́ gasawi, kóó nɛ́ obem.

¹⁶Bo nɛ wa duka kɛ̧ nyɔŋmɔ ha̧ o wi nɛ̀ nɛ́ kɔ̧ Tua ko GASA WAN, in o wi nɛ̀‘i yɔra nin-wa ɓɛɛ na, ɓɛɛ ha̧ o wan nɛ̀ a̧a̧ nɛ pɛ taar in o wan nɛ̀ de tom-ɗafa-sɔ̧ dam ɗoŋ wese kpɔk kpɔk lɛŋ sɛn kɔ̧ Tua ko Sɔ̧.

¹⁷Wi yɔr so nin o wi-ɗafi-sɔ̧ nyɛm nɛ̀ ɗoŋ nutua kɔ-wa; war ko o be Levii, o wan nɛ̀ a̧a̧ nɛ̀ pɛ ɓu-yiitoo yaknɛ siti, wi yɔra nin-wa nyɛm nɛ̀ ɗoŋ gíí-wa in dùk-wa.

¹⁸Yɔra nin bíí duka so nɛ́ mɔ wen bíí nutua nɛ̀ oi-aa: okoo, be-wiwii in be-okoo gú nɛ̀ o bíí nɛ̀ a̧a̧ in wa nɛ̀ war-tɛ ɔ sa̧a̧ nyɛma mɛ nyɔŋ sa̧a̧ ha̧a̧mɔ in wa mbɛt.

¹⁹Ɓɛɛ nɛ̀ war ko o wi-ɗafi-sɔ̧ o bezaŋ Arɔŋ nɛ̀ ɔ kɔ-wa nɛ̀ zaŋbɛɛ sɛn ká̧ o ye-ɗafi-sɔ̧, wa hoka so o ŋma bíí wen tom kɛ̧ɛ̧ nyɔŋmɔ ha̧ wa, in ha̧ o be Levii lɛŋ nɛ̀‘i yɔra nin-wa kaɗi mbɛt.

²⁰Ezɛkias dee mɔ hegɔ dam nù Juda lɛŋ, ɓɛɛ deemɔ kɔ̧-a̧ duk nɛ̀ de-a, in nɛ̀ yuwar-a, ɓɛɛ GASA WAN Sɔ̧ kɔ̧-a̧ kpɛk.

²¹Ŋgimbi n'aa ku̧u̧ naŋ ɗafa Tua ko GASA WAN, a̧ kia mɛ de nɛ́ mɔ nɛ̀ Sɔ̧ kɔ̧a̧. Hegɔ, a̧ kia Sɔ̧ kɔ̧-a̧ nɛ̀ see kpɔk, ɓɛɛ mɔ kɔ̧-a̧ hɔ gba̧a̧.