Read Northwest Gbaya 2 KALATA NYƐRƐ 35 Bible Online

2 KALATA NYƐRƐ 35 - Northwest Gbaya bible

2 KALATA NYƐRƐ 35

¹Josias dee gbaŋa Paska sɛn Jerusalɛm ha̧ GASA WAN tɛ ɓu-zua-naar ɔɔ-zɛ tɛ kuti fio-zɛ.

²A̧ ee tom ko o wi-ɗafi-sɔ̧ er-wa ha̧ nɛ̀ nɔɔ-ŋgiɗi ha̧ wa mɛ de tom kɔ̧ Tua ko Sɔ̧ nɛ̀ de-a.

³A̧ tɔ̧ɔ̧ ha̧ o be Levii nɛ̀ ya so wen usa mɔ ha̧ o be Israɛl in nɛ̀ duk nɛtɛ wen dee tom ha̧ GASA WAN mɛ ba Kuɓa nɔɔ-tɔk ko Sɔ̧ nɛ̀ Salomɔŋ bem ko wannu David dee e sɛn kɔ̧ Tua ko Sɔ̧; wa beka gɔ yar nɛnɛ ɓɔna. Kinii'i, wa a̧ dé tom ha̧ GASA WAN Sɔ̧ kɔ-wa in ha̧ Israɛl dukbíí kɔ̧-a̧.

⁴Wa a̧ mɔ́í̧ ŋmaa nɛ̀ nú-gara in nɛ̀ dùk tom nɛ̀ wa de, nyɛm nɛ̀ ɗoŋ yɔramɔ ko David wannu Israɛl in bem kɔ̧-a̧ Salomɔŋ.

⁵O be Levii a̧ nɛ́k sɛn ká̧ sa̧a̧-fara nyɛm nɛ̀ o bíí nú-gara ko o be Levii.

⁶Wa a̧ dé gbaŋa Paska, wa a̧ ɗáfí war-tɛ-wa, ɓɛɛ wa a̧ gbák o nya-wa wen dee mɔ nyɛm nɛ̀ ɗoŋ mɔ nɛ̀ GASA WAN usa ha̧ Moisɛ.

⁷Josias ha̧a̧ o mɔ-dai, o be-sami in o be gbadua lɛŋ ha̧ dukbíí. O mɔ-dai lɛŋ wen gbaŋa Paska nɛ́ o mɔ-dai booro-ɓu-taar in o ndai booro-taar nɛ̀ wannu ha̧a̧ a zu o be mɔ-dai.

⁸O dita-bíí nɛ̀ ya katɛ wannu ha̧a̧ mɔ ha̧ dukbíí, ha̧ o wi-ɗafi-sɔ̧ in o be Levii nɛ̀ desee: Hilkia, Zakarii in Yehiɛl nɛ̀ yaa so nɛ o gasawi kɔ̧ Tua ko Sɔ̧ ha̧a̧ o be-sami booro-yiitoo-nɛ-gɔmŋmaa-mɔɔrɔ-ɗoŋ-kpɔk in o ndai gɔmŋmaa-taar ha̧ o wi-ɗafi-sɔ̧ wen gbaŋa Paska.

⁹Kɔnania in o nya-a̧ Sɛmaya bá nɛ̀ Nɛtaneɛl sɛka Hasabia, Yehiɛl in Yozabad, o gasawi zu o be Levii ha̧a̧ kɔ-wa nɛ́ o be sami booro-mɔɔrɔ in o ndai gɔmŋmaa-mɔɔrɔ ha̧ o be Levii wen gbaŋa Paska.

¹⁰Yuwar ɗafa gbaŋa'i nɛ mɔ'ɔ: o wi-ɗafi-sɔ̧ ya kɔ‘i fara kɔ‘i, ɓɛɛ o be Levii yaa nɛ̀ dùk-aa nyɛm nɛ̀ ɗoŋ tɔ̧ɔ̧-wen ko wannu.

¹¹Oi o dɔka bíí gɔna o saɗi gbaŋa, ɓɛɛ o wi-ɗafi-sɔ̧ ba kɔ‘i nɛ́ tɔk gbai a zu fara-ɗafi-sɔ̧; ɓɛɛ nɛ̀ war ko o be Levii, kɔ-wa nɛ́ ɓaa o saɗi a̧k nɛnɛ.

¹²Ŋgimbi nɛ̀ wa ha̧ war ko o zuduk be Israɛl ha̧ wa nyɛm nɛ̀ ɗoŋ o nú-gara, ɓɛɛ wa ee war ko GASA WAN nɛ̀ wa tɛ dɔ nɛ̀ kpoo-sɔ̧ nɛtɛ hee mɔ'ɔ nɛ̀ yɔra zaŋ kalata ko Moisɛ ga. Nɛ́ kpɔk kalemɔ a̧ wa de nɛ̀ kpoo-sɔ̧.

¹³Wa gii kpoo be-sami Paska nyɛm nɛ̀ yuwar dea-a, ɓɛɛ wa gi o dɔka nyɔŋmɔ gii nɛ̀ o kpánà in o ɓii ká bá nɛ̀ o yèè; ɓɛɛ wa kɛ̧ nɛ̀ haya-a ha̧ o be Israɛl.

¹⁴Wa gii war kɔ-wa in ko o wi-ɗafi-sɔ̧ nɛ̀ ɗoŋ, wen o wi-ɗafi-sɔ̧ o bezaŋ Arɔŋ ɓɔna so kɔ-wa tɛ dɔɔ kpoo-sɔ̧ in o nɔ̧́-a̧ hegɔ zɛ de nɛnɛ, ɓɛɛ o be Levii gi nyɔŋmɔ kɔ‘i in ko o wi-ɗafi-sɔ̧, bem ko Arɔŋ.

¹⁵O wi-bii-gima, o bezaŋ Asaf yaa so kɔ-wa fara kɔ-wa, nyɛm nɛ̀ ɗoŋ geŋa ko David in Asaf ká bá nɛ̀ Heman in Yedutun, o wi-tɔ̧-mbɔrɔ ha̧ wannu. O wi-pɛm-tua yaa so kànà fara kɔ-wa dam lɛŋ. O ndé yu fara tom kɔ‘i yak si ŋma fara na, wen o nya-wa, o be Levii gii so nyɔŋmɔ kɔ-wa lɛŋ ha̧ wa mbɛt.

¹⁶Wa ɗafa yuwar tom ko GASA WAN ha̧ wa mɛ de gbaŋa Paska wese'i in dɔɔ kpoo-sɔ̧ zu fara-ɗafi GASA WAN nyɛm nɛ̀ ɗoŋ geŋa ko Wannu Josias.

¹⁷Hegɔ o be Israɛl nɛ̀ yaa hi̧i̧ ŋgimbi'i dee gbaŋa Paska wese'i, ɓɛɛ wa de gbaŋa brɛt nɛ̀ hao bo sɛnɛ na tɛ zɛ mɔɔrɔ-ɗoŋ-yiitoo.

¹⁸Wa de so ŋma gbaŋa Paska sɛn Israɛl tɛ ŋgimbi ko Samuɛl wi-tɔ̧-wen oi nú Sɔ̧ hegɔ na. Ŋma wannu Israɛl nɛ̀ dee gbaŋa Paska hee mɔ'ɔ nɛ Josias in o wi-ɗafi-sɔ̧ ká bá nɛ̀ o be Levii gú nɛ̀ o be Juda in o be Israɛl bá nɛ̀ o bíí Jerusalɛm dea'i ga, bo na.

¹⁹Nɛ́ tɛ ɓu-zua-mɔɔrɔ ɗoŋ-taar pɛ-wan ko Josias a̧ gbaŋa'i dee nɛnɛ.

²⁰Ɗoŋ nɛ̀ wannu Josias ɗafa ɗoŋ Tua ko Sɔ̧ kaɗi, Nɛko wannu Egiptɛ kura biro si Karkɛmis, ku nɛ̀ Efrat in o wi-biro kɔ‘i, ɓɛɛ Josias we ti a̧ mɛ bi a̧.

²¹Nɛko toma o betom mɛ nɛ̀ɛ́ tɔ̧ ha̧ Josias hee mɔ'ɔ ga: «Ŋma mɔ a̧a̧ mgbara yɛ sa mɛ gɔn nú‘m’ɛ nde, wannu Juda? Bó nɛ́ mi tɛ mɛ́ bi nɛ́ mɛ sɔsɔɔ‘i na, mi tɛ mɛ́ bi nɛ́ ŋma wisɛn kɔ‘m nɛtɛ. Nɛ́ mɔ‘i a̧ Sɔ̧ tɔ̧ɔ̧ ha̧‘m ndé, a̧‘m dé mɔ nɛ̀ haya-a. Ká mɛ we zu mɛ nɛ̀ Sɔ̧ nɛ duk in am na, ká a̧ tɛɛ gbɛ mɛ.»

²²Ɓɛɛ Josias kɔ̧ so mɛ e war ha̧ a̧ na. A̧ kii so nɛ́ ŋma war mɛ bi ŋmaa in a̧. A̧ kɔ̧ so mɛ zii wen ko Sɔ̧ nɛ̀ Nɛko tɔ̧‘i na, ɓɛɛ a̧ ba biro dúk nɛ̀ a̧ ká̧ ta-mbar-nyaŋa sɛn Mɛgido.

²³O wi-pi̧-góò pi̧i̧ Josias, ɓɛɛ Josias tɔ̧ ha̧ baka-nyaŋa kɔ‘i: «Mɛ̀ bá‘m yaknɛ, mi baa da̧i̧ nyɛmna.»

²⁴Ɓɛɛ o wi-de-tom ko Josias ba a̧ kɔ̧ keekee-nyaŋa-biro kɔ̧-a̧ yinɛ e sɛn kɔ̧ ŋma keekee kɔ̧-a̧ nɛtɛ, ɓɛɛ wa ba a̧ yaknɛ si Jerusalɛm. Nɛ́ hi̧i̧ a̧ Josias nɛɛ fe sɛnɛ, ɓɛɛ wa gun a̧ sɛn fara nɛ̀ wa guna so o dáà kɔ̧-a̧. O bíí Juda in Jerusalɛm gara hi̧i̧ nɛ̀ fio kɔ̧-a̧.

²⁵Wi-tɔ̧-wen oi nú Sɔ̧ Jeremii dee gima-fio zu Josias. Ɗoŋ ŋgimbi'i, o gíí wi-de-gima, wiwii kóó okoo tɔ̧ nɛ́ wen fio ko Josias tɛ gima-fio kɔ-wa; mɔ‘i kifa nɛ́ ŋma mɔ nɛ̀ o be Israɛl de ɓɔnsɛnɛ. O gima-fio nɔ‘i a̧a̧ zaŋ Kalata Aia-nú.

²⁶Oi o nyɛrɛ mɔ nɛ̀ Josias dea in o ŋma demɔ n'aa dea so a̧a̧ zaŋ Kalata Heembea ko GASA WAN.

²⁷O mɔ n'aa dee so tɛ ku̧u̧naŋ-a mɛ hɔ nɛnɛ tɛ sɔŋkur-aa yɔra zaŋ Kalata ko o wannu Israɛl in Juda.