Read Northwest Gbaya 2 KALATA NYƐRƐ 36 Bible Online

2 KALATA NYƐRƐ 36 - Northwest Gbaya bible

2 KALATA NYƐRƐ 36

¹O giiwi saaye lɛŋ baa Jɔakas bem ko Josias e tɛ wan. Wa dee wan ha̧ a̧ oi dáà kɔ̧-a̧ sɛn Jerusalɛm.

²Ŋgimbi yee wan ko Jɔakas, a̧ a̧a̧ so nɛ̀ pɛ ɓu-yiitoo-zua-taar, ɓɛɛ a̧ ɔ wan fio-zɛ taar sɛn Jerusalɛm.

³Nɛko wannu Egiptɛ ndaka a̧ tɛ wan yinɛ sɛn Jerusalɛm, ɓɛɛ tɔ̧ ha̧ wa mɛ gbo garama ha'i tɛ kilo bu-mbɔi booro-taar in kilo lɔr ɓu-taar.

⁴Wannu Egiptɛ dee wan Juda in wan Jerusalɛm ha̧ Eliakim nya Jɔakas, ɓɛɛ gɔn mbe nin Eliakim nɛ́ Jɔakim. War ko Jɔakas nya Jɔakim, Nɛko wannu Egiptɛ baa a̧ yaknɛ si sɛn nú Egiptɛ.

⁵Jɔakim yee wan ká̧ a̧ a̧a̧ so nɛ̀ pɛ ɓu-yiitoo-zua-mɔɔrɔ, ɓɛɛ a̧ ɔ wan pɛ ɓu-zua-kpɔk sɛn Jerusalɛm. A̧ yɔɔ kaya ti GASA WAN Sɔ̧ kɔ̧-a̧,

⁶ɓɛɛ Nabukɔdɔnɔsɔr, wannu Babilɔŋ ba biro dúk nɛ̀ a̧; a̧ baa a̧ hɛr nɛ̀ nyak-ndɛrɛ, ɓɛɛ ba a̧ yaknɛ si Babilɔŋ,

⁷Nabukɔdɔnɔsɔr kaia o nyɛk kɔ̧ Tua ko GASA WAN si Babilɔŋ wen ɗafa tua-wan kɔ̧-a̧.

⁸Oi o tom ko Jɔakim, o ɗaŋmɔ n'aa dea in o mɔ nɛ̀ kpaa a̧ yɔra zaŋ Kalata ko o wannu Israɛl in Juda, ɓɛɛ bem kɔ̧-a̧ Jɔakin ɔ wan oi-aa.

⁹Jɔakin yee wan ká̧ a̧ a̧a̧ nɛ̀ pɛ ɓu-zua-mɔɔrɔ-ɗoŋ-taar, ɓɛɛ a̧ ɔ wan fio-zɛ taar nɛ̀ ɔɔ-zɛ ɓu sɛn Jerusalɛm. A̧ yɔɔ kaya ti GASA WAN.

¹⁰Tɛ mbe pɛ, wannu Nabukɔdɔnɔsɔr tɛ̀ɛ̀ ba a̧ yaknɛ si Babilɔŋ, gú nɛ̀ o mɔɔ kɔ̧ Tua ko Sɔ̧ lɛŋ. Ɓɛɛ Nabukɔdɔnɔsɔr de wan Juda in Jerusalɛm ha̧ Sedekias, nya Jɔakin.

¹¹Sedekias yee wan ká̧ a̧ a̧a̧ so nɛ̀ pɛ ɓu-yiitoo-zua-kpɔk. A̧ ɔɔ wan Jerusalɛm pɛ ɓu-zua-kpɔk.

¹²A̧ yɔɔ kaya ti GASA WAN Sɔ̧ kɔ̧-a̧, ɓɛɛ a̧ bɛ̧ nɛa-a mɛ gɔm er ti wi-tɔ̧-wen oi nú Sɔ̧ Jeremii nɛ̀ duka so gai nɛ̀ a̧ oi nú GASA WAN.

¹³A̧ dee so ŋgazu in wannu Nabukɔdɔnɔsɔr nɛ̀ dee so ha̧ a̧ mɛ kan mɔ ti GASA WAN. A̧ mbo zu na, see-aa ŋgaia, ɓɛɛ a̧ kɔ̧ so mɛ kpai see-aa wen ndaka pata GASA WAN Sɔ̧ ko Israɛl na.

¹⁴Kale-a mbɛt, o geɗek wanye Juda lɛŋ, o wi-ɗafi-sɔ̧ gú nɛ̀ dukbíí lɛŋ yaa so de nɛ̀ kale ɗaŋmɔ‘i sɛn ti GASA WAN, ɓɛɛ wa de ndiŋ a tɛ Tua nɛ̀ GASA WAN ee so nɛtɛ wen tɛ-wi sɛn Jerusalɛm.

¹⁵GASA WAN Sɔ̧ ko o zɔmdáa kɔ-wa ee so tom nú o wi-tɔ̧-wen oi nú Sɔ̧ ha̧ wa, wen zu dukbíí kɔ̧-a̧ in Tua kɔ̧-a̧ n'aa kɔ̧ɔ̧ nyɛmna,

¹⁶ɓɛɛ wa zɛkɛɗi o wi-tɔ̧-wen oi nú Sɔ̧ e nɛ̀ wen kɔ-wa tɛ geemɔ; hegɔ nyimsea ko GASA WAN kura zu wa nɛ̀ nú-wi nyɛm mɛ tɔ̧ na.

¹⁷GASA WAN dee ha̧ wannu Babilɔŋ mɛ ba biro dúk nɛ̀ wa; a̧ kuma o daŋa ŋgaiwi hegɔ hɔ sɛn kɔ̧ sa̧a̧-fara; a̧ de ko ha̧ o be-ŋgaiwi in o be-zɔŋa, ha̧ o gbɛ́rɛ́ in o gasawi na. A̧ kaia mɔ lɛŋ kɔ̧ er wannu'i.

¹⁸Nabukɔdɔnɔsɔr kaia o mɔɔ kɔ̧ Tua ko Sɔ̧ lɛŋ, in mbɔi-tua ko GASA WAN sɛn Jerusalɛm mbɛt; a̧ kaia o mbɔi kɔ̧ tua ko wannu gú nɛ̀ o dita-bíí lɛŋ. Nabukɔdɔnɔsɔr di̧i̧ mɔ lɛŋ kai si Babilɔŋ.

¹⁹Wa dɔɔ Tua ko Sɔ̧, gbin garo Jerusalɛm, pi̧ wee tɛ o tua-wan, ɓɛɛ wa ɗaŋ o demɔ nɛ̀ a̧a̧ so saaye lɛŋ yinɛ.

²⁰Nabukɔdɔnɔsɔr kaia o wi nɛ̀ ɓɔna kpasa lɛŋ si Babilɔŋ nɛ̀ bara-biro, ɓɛɛ wa ya nɛ́ bara kɔ̧-a̧ in o bem kɔ̧-a̧ hɔ nɛnɛ tɛ kaɗa wan ko o bíí Pɛrsɛ.

²¹Hegɔ, mɔ nɛ̀ GASA WAN tɔ̧ɔ̧ so nɛ̀ nú wi-tɔ̧-wen oi nú Sɔ̧ Jeremii'e: «Wa tɛ yu mɔ e nù duk tɛ pɛ ɓu-mɔɔrɔ-ɗoŋ-yiitoo, hɔ ŋgimbi nɛ̀ nù‘i tɛ kpa ɔma-tɛ nyɛm nɛ̀ ɗoŋ ŋgimbi-a, wen nɛ̀ wa mbo so zu na,» hɔɔ gba̧a̧.

²²Tɛ kuti pɛ-wan ko Sirus wannu Pɛrsɛ, GASA WAN hu̧i̧a̧ taamɔ ko Sirus ha̧ wen’ɛ nɛ̀ GASA WAN tɔ̧ɔ̧ so nɛ̀ nú wi-tɔ̧-wen oi nú Sɔ̧ Jeremii mɛ hɔ gba̧a̧. A̧ tɔ̧ɔ̧ ha̧ wa mɛ he mbéá yɔr nɛ̀ kalata dam nù kɔ̧-a̧ lɛŋ ndé:

²³«Sirus wannu Pɛrsɛ tɔ̧a̧: ‹GASA WAN Sɔ̧ nɛ̀ a̧a̧ yiwese ha̧a̧ o mɔɔ-wan zu nù'ɛ lɛŋ ha̧‘m, ɓɛɛ a̧ tɔ̧ ha̧‘m mɛ de Tua ha̧ a̧ sɛn Jerusalɛm sɛn nù Juda. Kóó o ndé mgbara'nɛ́ nɛ̀ duk nɛ́ dukbíí kɔ̧-a̧, GASA WAN Sɔ̧ kɔ̧-a̧ a̧ dúk in a̧, ɓɛɛ a̧ a̧ sí ɗoŋ si Jerusalɛm.› »