Read Northwest Gbaya 2 KALATA NYƐRƐ 7 Bible Online

2 KALATA NYƐRƐ 7 - Northwest Gbaya bible

2 KALATA NYƐRƐ 7

¹Ɗoŋ nɛ̀ Salomɔŋ kɔfa sɔ̧ kaɗi, ŋma wee tika nù nɛ̀ yiwese tɛ́ɛ̀ dɔ kpoo-sɔ̧ in o ha̧a̧mɔ-ɗafi-sɔ̧, ɓɛɛ gasamɔ ko GASA WAN dun Tua.

²O wi-ɗafi-sɔ̧ nyɛm so mɛ ye Tua ko GASA WAN na, wen gasamɔ ko GASA WAN duna Tua'i.

³O be Israɛl lɛŋ zɔka wee fara tika nù in gasamɔ ko GASA WAN fara duka-a zu Tua; ɓɛɛ wa gbɛ zugur-wa nù, gu yí-wa nù, zɔn nɛ̀ GASA WAN hee mɔ'ɔ ga: «A̧ ɔ dee, kɔ̧ɔ̧mɔ kɔ̧-a̧ duk ɓɔnsɛnɛ.»

⁴Wannu in o be Israɛl lɛŋ ɗafa sɔ̧ ti GASA WAN.

⁵Wannu Salomɔŋ ɗafa sɔ̧ nɛ̀ ndai booro-ɓu-yiitoo-zua-yiitoo, o sami in o gbadua booro-gɔmŋmaa-nɛ-booro-ɓu-yiitoo. Nɛ́ hegɔ a̧ wannu in o be Israɛl dee nɛ̀ gbaŋa Tua ko Sɔ̧.

⁶O wi-ɗafi-sɔ̧ yaa so fara-tom kɔ-wa. O be Levii a̧a̧ so nɛ̀ o mɔɔ-mbɛr ha̧ GASA WAN nɛ̀ wannu David ɗafa so, usi nɛ̀ gima wen zɔna-a nɛ̀ a̧‘e: «Kɔ̧ɔ̧mɔ kɔ̧-a̧ duk ɓɔnsɛnɛ.» O wi-ɗafi-sɔ̧ yaa so kɔ-wa ti wa dɔm nɛ̀ mbia, ɓɛɛ o be Israɛl lɛŋ yor nɛ́ ŋgɔn.

⁷Salomɔŋ ee bee-gara nɛ̀ duk ti Tua ko GASA WAN nɛtɛ ha̧ Sɔ̧; nɛ́ hi̧i̧ á̧ à̧ dɔɔ-kpoo-sɔ̧ in o nɔ̧́-kpoo ha̧a̧mɔ-gaŋmɔ sɛnɛ, wen fara-ɗafi-sɔ̧ n'aa dee nɛ̀ ndɛrɛ nyɛm so wen dɔɔ kpoo-sɔ̧, aa-zɛzɛ, in o nɔ̧́-kpoo na.

⁸Salomɔŋ dee gbaŋa tɛ ŋgimbi'i. O be Israɛl lɛŋ mɔi̧a so tɛnɛ ku̧u̧naŋ-a nɛ̀ Lɛbo-Hamat hɔ nɛnɛ nú be-zer Egiptɛ mɛ. Wa dee gbaŋa hegɔɔ tɛ zɛ mɔɔrɔ-ɗoŋ-yiitoo.

⁹Tɛ mɔɔrɔ-ɗoŋ-taar ɔɔ-zɛ a̧ wa dee nɛ̀ gasa yɔyɛ káɗá gbaŋa, wen nɛ̀ wa dee so gbaŋa fara-ɗafi-sɔ̧ tɛ zɛ mɔɔrɔ-ɗoŋ-yiitoo in ɓii gbaŋa'i mbɛt tɛ zɛ mɔɔrɔ-ɗoŋ-yiitoo.

¹⁰Ɓɛɛ nɛ̀ zɛ ɓu-yiitoo-zua-taar yaka tɛ mɔɔrɔ-ɗoŋ-yiitoo fio-zɛ, Salomɔŋ foo dukbíí lɛŋ si ɗoŋ fara kɔ-wa; kóó o ndé sii ɗoŋ tɛ kɔ‘i nɛ̀ ga̧a̧-see, wa lɛŋ duka nɛ̀ desee wen demɔ nɛ̀ GASA WAN dee so in David, in Salomɔŋ, gú nɛ̀ dukbíí kɔ‘i, Israɛl.

¹¹Ŋgimbi nɛ̀ Salomɔŋ kaɗa nɛ̀ Tua ko GASA WAN in tua-wan, in mɔ n'aa taa so mɛ de sɛn kɔ̧ o tua nɔ‘i yiitoo'i kaɗi,

¹²mɛ zaŋzɛ, GASA WAN hɔɔ zu ha̧ Salomɔŋ, ɓɛɛ tɔ̧: «Mi zia kɔfamɔ kɔ-mɛ, ɓɛɛ mi hok fara’ɛ ha̧ mɛ duk nɛ́ tua-ɗafi-sɔ̧.

¹³Kà‘m kpe yiwese, ɓɛɛ kà kórò hɔ na, kà‘m ha̧ nú‘m ha̧ o gba-dɔya mɛ ɗaŋ nù, kà‘m tom ŋga-zɛɛ-geŋa pi̧ zu dukbíí kɔ‘m,

¹⁴kà o bíí kɔ‘m n'am saa nin-am zu wa mɔk see, kà wa kɔfi sɔ̧, kà wa kii sɔnti'm, e nɛ̀ o ɗaŋ deemɔ kɔ-wa duk, kɔ‘m, mi tɛ duk yiwese mɛ zii nɛnɛ, mi tɛ e ɗaŋmɔ kɔ-wa ha̧ wa, ɓɛɛ mi kpasa nù kɔ-wa.

¹⁵Kinii, yí‘m beka yu tɛ-wa na, ɓɛɛ mi tɛ yeŋ zer-am tɛ kɔfa'm nɛ̀ wa kɔfi fara’ɛ.

¹⁶Kinii, mi hoka Tua’ɛ, mi ea a̧ nɛtɛ mbɛt ha̧ nin-am mɛ duk sɛnɛ kpoo nɛ kpoo; yí‘m in see-am tɛ duk sɛnɛ ɓɔnsɛnɛ.

¹⁷Ɓɛɛ nɛ̀ kɔ-mɛ, kà mɛ nɛ́ nɛ̀ɛ́ nɔ̀ ti'm hee mɔ'ɔ nɛ̀ dáà kɔ-mɛ David nɛ̀ɛ̀ so ga, kà mɛ nɛ́ nɔ̀ nɛ̀ mboozu in nɛ̀ yuwar-a, kà mɛ kasi o heembea in o yuwar duka-a kɔ‘m,

¹⁸mi tɛ de ha̧ damti kɔ-mɛ mɛ yor hee mɔ'ɔ n'am tɔ̧ɔ̧ so nɛnɛ ha̧ dáà kɔ-mɛ David'e, ŋma bíí kɔ̧-a̧ tɛ duk zu damti Israɛl ɓɔnsɛnɛ, ga.

¹⁹Ɓɛɛ k’ɛ̀nɛ̀ zik tɛ‘nɛ́, k’ɛ̀nɛ̀ e o geŋa in o heembea kɔ‘m n'am ha̧a̧ h’ɛ́nɛ́ duk, k’ɛ̀nɛ̀ gasi o ŋma sɔ̧ gbɛ nɛ̀ zugur'nɛ́ nù ti wa,

²⁰mi tɛ zuɗi'nɛ́ yinɛ tɛ nù n'am ha̧a̧ h’ɛ́nɛ́; mi tɛ ba yí‘m yinɛ zu Tua n'am hoka mɛ e nin-am sɛnɛ‘i, ɓɛɛ mi dea a̧ nɛ̀ mɔɔ-zɛŋ in mɔɔ-zɛkɛɗi ko o dukbíí lɛŋ.

²¹«Ɗɛɗɛ o bíí lɛŋ nɛ̀ tɛ ɓir ká̧ kusa Tua’ɛ tɛ gɔn, ɓɛɛ wa tɛ tɔ̧: ‹Wen ge sa GASA WAN dee mɔ nɛ̀ nù'ɛ in Tua’ɛ hegɔ ge?›

²²Bíí tɛ kifi nú ha̧ wa'e: ‹Nɛ́ wen nɛ̀ wa ee GASA WAN Sɔ̧ ko dáà kɔ-wa nɛ̀ kaia wa gbonɛ nɛ̀ Egiptɛ duk; wa ndaɗa in o ŋma sɔ̧, wa gbɛɛ zugur-wa nù ti wa, gasi nɛ̀ wa mbɛt; nɛ́ wen mɔ‘i sa GASA WAN fo ŋgamɔ pi̧ zu wa.› »