Read Northwest Gbaya ƐSDRAS 1 Bible Online

ƐSDRAS 1 - Northwest Gbaya bible

ƐSDRAS 1

¹Sirus ɔɔ so nɛ wan Pɛrsɛ, ɓɛɛ nɛ mɔ'ɔ nɛ Sɔ̧ ha̧a̧ taamɔ ha̧ a̧ mɛ yɔr wen’ɛ tɛ kuti pɛ ɔɔ-wan kɔ̧-a̧‘i ha̧ o bíí nù lɛŋ mɛ tɔr, ha̧ wen nɛ GASA WAN tɔ̧ɔ̧ so nɛ nú wi-tɔ̧-wen oi nú Sɔ̧ Jeremii mɛ hɔ gba̧a̧.

²Wen ko Sirus wannu Pɛrsɛ nɛ mɔ'ɔ: «GASA WAN Sɔ̧ nɛ a̧a̧ yiwese ha̧a̧ mɔɔ-wan zu nù lɛŋ ha̧‘m. A̧ tɔ̧ɔ̧ a̧‘m mbó Tua ha'i sɛn Jerusalɛm, nù Juda.

³GASA WAN a̧ dúk in'nɛ̀ɛ́ lɛŋ nɛ ya nɛ́ dukbíí kɔ̧-a̧. Ɛ̀nɛ̀ dáŋ si Jerusalɛm nù Juda, ɓɛɛ ɛ̀nɛ̀ mbó Tua ko GASA WAN Sɔ̧ ko Israɛl, Sɔ̧ nɛ duk sɛn Jerusalɛm.

⁴Fara nɛ oi dukbíí ko GASA WAN a̧a̧ sɛnɛ lɛŋ, o bíí fara nɔ‘i a̧ há̧ kànà bu-mbɔi, lɔr, o de mɔ, o mɔ-dai, in ha̧a̧mɔ nɛ ta-tɛ wen Tua ko Sɔ̧ nɛ a̧a̧ Jerusalɛm.»

⁵O gasawi nutua ko Juda in o gasawi nù ko Bɛnjamin gú nɛ̀ o wi-ɗafi-sɔ̧ ká bá nɛ̀ o be Levii, ge bíí ge ndé nɛ Sɔ̧ ha̧a̧ taamɔ ha̧ a̧ kura yak mɛ nɛ̀ɛ́ mbo Tua ko GASA WAN nɛ duk sɛn Jerusalɛm.

⁶O bíí nɛ a̧a̧ katɛ wa lɛŋ gbaka wa nɛ o mɔ nɛ‘i dee nɛ bu-mbɔi, lɔr, o demɔ, o mɔ-dai, ká bá nɛ̀ o mɔ nɛ gɛnɛ-a ɔ ŋgaya; wi tɔr o mɔ nɛ wa ha̧a̧ ha̧ wa nɛ ta-tɛ e zu-a na.

⁷Wannu Sirus kaia o nyɛk Tua ko GASA WAN nɛ Nabukɔdɔnɔsɔr kaia so yaknɛ Jerusalɛm a kɔ̧ tua ko o sɔ̧ kɔ‘i gbonɛ.

⁸Sirus wannu Pɛrsɛ ha̧a̧ nú ha̧ Mitredat wi-zɔk-mbɔi mɛ kai wa, ɓɛɛ Mitredat tɔ̧ ha̧ Sɛsbasar be-wan Juda mɛ tɔr tɔra-a.

⁹Mɔ nɛ wa tɔra nɛ mɔ'ɔ: nyɛk nɛ‘i dee nɛ lɔr ɓu-taar; nyɛk nɛ‘i dee nɛ bu-mbɔi booro; paa ɓu-yiitoo-zua-mɔɔrɔ-ɗoŋ-naar;

¹⁰mɔɔ-nɔ-mɔ nɛ‘i dee nɛ lɔr ɓu-taar; mɔɔ-nɔ-mɔ nɛ‘i dee nɛ bu-mbɔi gɔmŋmaa-naar-nɛ-ɓu; in o ŋma géé nyɛk booro.

¹¹O mɔ nɛ‘i dee nɛ lɔr in bu-mbɔi nɔ‘i lɛŋ nɛ́ booro-mɔɔrɔ-nɛ-gɔmŋmaa-naar. Sɛsbasar kaia o nyɛk nɔ‘i lɛŋ sinɛ ŋgimbi nɛ o bara-biro daŋa nɛnɛ nɛ Babilɔŋ si Jerusalɛm.