Read Northwest Gbaya ƐSDRAS 6 Bible Online

ƐSDRAS 6 - Northwest Gbaya bible

ƐSDRAS 6

¹Wannu Darius tɔ̧ɔ̧ ha̧ wa mɛ kii mɔ zaŋ o gba̧‘a̧ kalata kɔ̧ o tua-a-mbɔi sɛn Babilɔŋ mɛ;

²ɓɛɛ ŋma ye-ŋgárá a̧a̧ so sɛn zika-nù Mɛdii; nin ye'i nɛ́ Ekbataŋ. Nɛ́ hi̧i̧ a̧ wa kpaa nɛ ŋma kara-kalata nɛ yɔramɔ zaŋ-aa hee ndé: «Mɔɔ-mbaŋ-tɛ-wi:

³«Tɛ kuti pɛ-wan ko Sirus, a̧ ha̧a̧ nú hee mɔ'ɔ ga: Wa a̧ mbó Tua ko Sɔ̧ sɛn Jerusalɛm woyo ha̧ mɛ duk nɛ́ fara nɛ‘i ɗafi sɔ̧ sɛnɛ. Kusa-a nɛ́ mɛtrɛ ɓu-taar; pɛsa-a nɛ́ mɛtrɛ ɓu-taar mbɛt.

⁴Sɛka-ta tɛ nɛk katɛ ŋmaa fara-a taar, ɓɛɛ nɛka gbaŋ-te-a kpɔk. Ɓɛɛ nɛ́ wannu a̧ tɛ yoɓi sede tom'i lɛŋ.

⁵Wa a̧ káí mɔ lɛŋ á oi-aa sɛn kɔ̧ Tua ko Sɔ̧ sɛn Jerusalɛm woyo; wa a̧ káí o nyɛk nɛ‘i dee nɛ lɔr in bu-mbɔi nɛ Nabukɔdɔnɔsɔr baa kai so si Babilɔŋ ha̧ wa mɛ nɛ̀ɛ́ e fara kɔ-wa woyo.»

⁶«Kinii, Tatenai wi-duk-zu nù kur Efrat nɛ war yee-wese in Sɛtar-Boznai, ká bá nɛ̀ ɛ́nɛ́ o gbama wi-de-tom in wa, ɛ́nɛ́ o gasawi kur Efrat nɛ war yee-wese, ɛ̀nɛ̀ é wen'i duk.

⁷«Ɛ̀nɛ̀ é ha̧ gasa wi-duk-zu nù Juda in o gasawi ko o Juif mɛ de tom Tua'i. Wa a̧ dé Tua'i sɛn oi gba̧‘a̧ fara-a.

⁸O ha̧a̧nú kɔ‘m wen mɔ n’ɛnɛ tɛ de in o gasawi ko o be Juif tɛ tom Tua ko Sɔ̧‘i nɛ́ mɔ'ɔ: mɔ nɛ wa tɛ ɗaŋ lɛŋ, ɛ̀nɛ̀ yóɓí ha̧ wa. Ɛ̀nɛ̀ bá nɛ sede-wan kɔ‘m, mɛ̀ nɛ́ wen nɛ tɔ̧, ɛ̀nɛ̀ bá nɛ́ sede garama kur Efrat nɛ war yee-wese yoɓi nɛnɛ, ɓɛɛ k’ɛ́nɛ́ mbosi yoɓa-a ha̧ wa na.

⁹O mɔ nɛ o wi-ɗafi-sɔ̧ sɛn Jerusalɛm tɛ ak wese kpɔk kpɔk mɛ dɔ nɛ kpoo-sɔ̧ ha̧ Sɔ̧ mɛ yiwese, ɛ̀nɛ̀ há̧ ha̧ wa; ɛ̀nɛ̀ há̧ o be-wiwii ndai in o vala sami ká bá nɛ̀ o be-sami ha̧ wa; ɛ̀nɛ̀ há̧ alkamaari, tɔŋ, dɔ̧ɔ̧ bá nɛ̀ nɔ̧́, ɓɛɛ k’ɛ́nɛ́ mbosi na,

¹⁰kà de ká wa ha̧a̧ nɛ ha̧a̧mɔ-gaŋmɔ ha̧ Sɔ̧ mɛ yiwese in ha̧ wa mɛ kɔfi Sɔ̧ wen duka-a ko wannu in o bem kɔ‘i.

¹¹O ha̧a̧nú kɔ‘m zu wi nɛ tɛ yak zu geŋa'i nɛ mɔ'ɔ: wa a̧ zúɗí ŋma gaŋgala ger tua kɔ̧-a̧, ɓɛɛ wa a̧ sɔ́k a̧ sɛnɛ; wa a̧ dé tua kɔ̧-a̧ nɛ zuku-paa.

¹²Sɔ̧ nɛ de ha̧ nin-wi mɛ duk sɛn hi̧i̧ a̧ ɗáŋ ŋma wannu, kóó ŋma dukbíí nɛ tɛ si kafɛ tɛ wen kɔ‘m’ɛ, nɛ kɔ̧ɔ̧ mɛ nɛɛ ɗaŋ Tua ko Sɔ̧ sɛn Jerusalɛm. Mɛ̀ nɛ́ mi Darius a̧ gɔn geŋa. Mɔ a̧ dé kànà hee mɔ‘i ga.»

¹³Tatenai wannu kur Efrat nɛ war yee-wese, in Sɛtar-Boznai, ká bá nɛ̀ o gbama wi-de-tom in wa dee kànà mɔ nyɛm nɛ ɗoŋ wen nɛ wannu Darius tɔ̧a̧.

¹⁴O gasawi ko o be Juif dee tom mboo Tua'i nɛ̀ de-a nyɛm nɛ ɗoŋ tɔ̧ɔ̧ wen oi nú Sɔ̧ ko Agee in Zakarii bem ko Ido. Wa mboo Tua'i kaɗi nyɛm nɛ ɗoŋ wen ko Sɔ̧ ko Israɛl in Sirus, in Darius ká bá nɛ̀ Artazɛrzɛs wannu Pɛrsɛ.

¹⁵Tom tua'i kaɗa tɛ zɛ Adar, tɛ taar ɔɔ-zɛ, ká Darius ɔɔ wan dee pɛ mɔɔrɔ-ɗoŋ-kpɔk kaɗi.

¹⁶O be Israɛl, o wi-ɗafi-sɔ̧ in o be Levii ká bá nɛ̀ oi bíí nɛ pia nɛ tɛ bara dee gbaŋa Tua ko Sɔ̧ nɛ desee.

¹⁷Wa ha̧a̧ wiwii ndai gɔmŋmaa, vala sami gɔmŋmaa-yiitoo in o be-sami gɔmŋmaa-naar, ɓɛɛ nɛ war ko ha̧a̧mɔ ea-ɗaŋmɔ wen Israɛl, wa ha̧a̧ vala gbadua ɓu-zua-yiitoo nyɛm nɛ ɗoŋ dùk be Israɛl wen dee gbaŋa Tua ko Sɔ̧.

¹⁸Wa aa o wi-ɗafi-sɔ̧ in o be Levii nyɛm nɛ ɗoŋ tom kɔ-wa wen dee tom ko Sɔ̧ sɛn Jerusalɛm hee mɔ'ɔ nɛ yɔra zaŋ kalata ko Moisɛ ga.

¹⁹O bíí nɛ pia nɛ tɛ bara dee gbaŋa Paska tɛ ɓu-zua-naar ɔɔ-zɛ tɛ kuti fio-zɛ.

²⁰Hee mɔ'ɔ nɛ o wi-ɗafi-sɔ̧ in o be Levii lɛŋ dafa so war-tɛ ga, war tɛ-wa sa̧a̧. Wa gɔna saɗi Paska wen o wi nɛ pia nɛ tɛ bara lɛŋ, wen o nya-wa o wi-ɗafi-sɔ̧ in wen tɛ-wa nɛ̀ tɛ-wa.

²¹O be Israɛl lɛŋ nɛ pia nɛ tɛ bara, in o bíí lɛŋ nɛ ɗafa so war-tɛ bɛ̧ nɛ ɗaŋmɔ ko o wi nɛ iŋ Sɔ̧ na tɛ nù‘i duk, ye nɛ̀ zaŋ wa wen kia GASA WAN Sɔ̧ ko Israɛl, dee gbaŋa Paska.

²²Wa dee gbaŋa brɛt nɛ̀ hao bo sɛnɛ na nɛ̀ desee tɛ zɛ mɔɔrɔ-ɗoŋ-yiitoo, wen GASA WAN ha̧a̧ gasa desee ha̧ wa, wen n'aa dee ha̧ see wannu Asirii mɛ kpai pii tɛ wa yor nɛnɛ ɗoŋ wa, wen mboo Tua ko Sɔ̧ ko Israɛl woyo.