Read Northwest Gbaya ƐSDRAS 7 Bible Online

ƐSDRAS 7 - Northwest Gbaya bible

ƐSDRAS 7

¹Hɔ-ɗoŋ o mɔɔ nɔ‘i, ŋgimbi ɔɔ-wan ko Artazɛrzɛs sɛn Pɛrsɛ, ŋma bíí a̧a̧ sɛnɛ nin-a nɛ́ Ɛsdras. A̧ n bem ko Sɛraya, bem ko Azaria, bem ko Hilkia,

²bem ko Salum, bem ko Sadɔk, bem ko Ahitub,

³bem ko Amaria, bem ko Azaria, bem ko Mɛrayot,

⁴bem ko Zɛraya, bem ko Uzi, bem ko Buki,

⁵bem ko Abisua, bem ko Pinas, bem ko Eleazar, bem ko gasa wan-ɗafi-sɔ̧ Arɔŋ.

⁶Ɛsdras daŋa nɛ̀ Babilɔŋ; a̧ nɛ́ ŋma wi-yɔr-kalata nɛ iŋa Heembea ko Moisɛ nɛ GASA WAN Sɔ̧ ko Israɛl ha̧a̧ so; a̧ iŋa so mɔ tɛ Heembea'i nyɛmna. Hee mɔ'ɔ nɛ GASA WAN Sɔ̧ kɔ̧-a̧ guu er zu a̧ ga, mɔ n'aa ak er wannu lɛŋ, wannu há̧ hà̧à̧ há̧ a̧.

⁷Wannu Artazɛrzɛs ɔɔ wan tɛ pɛ mɔɔrɔ-ɗoŋ-yiitoo, ɓɛɛ nɛ mɔ'ɔ nɛ o ŋma be Israɛl, in o ŋma wi-ɗafi-sɔ̧, o ŋma be Levii, in o ŋma wi-bii-gima in o ŋma wi-pɛm-tua ká bá nɛ̀ o ŋma wi-de-tom kɔ̧ Tua ko Sɔ̧ daŋa si Jerusalɛm.

⁸Ɛsdras hɔɔ Jerusalɛm tɛ mɔɔrɔ fio-zɛ; ká nɛ́ mɔɔrɔ-ɗoŋ-yiitoo pɛ-wan ko Artazɛrzɛs,

⁹wen Ɛsdras gɔna so nɛ́ kuti wese tɛ kuti zɛ ha̧ wa mɛ kur nɛnɛ Babilɔŋ, ɓɛɛ nɛ́ tɛ́ kuti zɛ tɛ mɔɔrɔ fio-zɛ a̧ a̧ hɔɔ nɛnɛ Jerusalɛm mbɛt, wen Sɔ̧ kɔ̧-a̧ guu so er zu a̧ nɛ mbetɛ.

¹⁰Ɛsdras ee so see tɛ yamba Heembea ko GASA WAN, ba nɛnɛ de nɛ̀ tom, usi nɛ̀ o heembea in yuwar duka-a ha̧ o be Israɛl.

¹¹Gba̧a̧ kalata nɛ wannu Artazɛrzɛs ha̧a̧ ha̧ Ɛsdras nɛ duka so nɛ́ wi-ɗafi-sɔ̧ in wi-yɔr-kalata nɛ iŋa o ha̧a̧nú in o heembea ko GASA WAN wen zu o be Israɛl nɛ́ mɔ'ɔ:

¹²«Nɛ́ mi Artazɛrzɛs, wannu zu o wannu a̧ yɔr kalata’ɛ ha̧ wi-ɗafi-sɔ̧ Ɛsdras nɛ iŋa o Heembea ko Sɔ̧ mɛ yiwese. Mi fana mɛ!

¹³«Ha̧a̧nú kɔ‘m nɛ́ mɔ'ɔ: kóó o ndé mgbara o be Israɛl nɛ a̧a̧ nù kɔ‘m hɛ̧ɛ̧, kóó nɛ́ wi-ɗafi-sɔ̧, kóó nɛ́ be Levii mbɛt, kà a̧ nɛ́ kɔ̧ɔ̧ mɛ nɛ Jerusalɛm ndé, a̧ a̧ nɛ́ in mɛɛ.

¹⁴Wen nɛ́ wannu in o wi-tɔ̧-mbɔrɔ kɔ̧-a̧ mɔɔrɔ-ɗoŋ-yiitoo a̧ tom mɛ wen zɔka mɔ nɛ yak sɛn Juda in sɛn Jerusalɛm nyɛm ɗoŋ Heembea nɛ Sɔ̧ kɔ-mɛ ha̧a̧ ha̧ mɛ.

¹⁵Mɛ̀ káí bu-mbɔi in lɔr nɛ wannu in o wi-tɔ̧-mbɔrɔ kɔ‘i ha̧a̧ nɛ ta-tɛ nɛnɛ ha̧ Sɔ̧ ko Israɛl nɛ fara-duk kɔ̧-a̧ a̧a̧ sɛn Jerusalɛm.

¹⁶Mɛ̀ káí bu-mbɔi in lɔr nɛ mɛ tɛ kpa sɛn nú Babilɔŋ lɛŋ in o ha̧a̧mɔ nɛ dukbíí in o wi-ɗafi-sɔ̧ tɛ ha̧ nɛ ta-tɛ wen Tua ko Sɔ̧ kɔ-wa sɛn Jerusalɛm.

¹⁷«Sede nɛ mɛ tɛ ba'i, mɛ̀ bá hí̧fí nɛ̀ o wiwii ndai in o vala sami in o be-sami ká bá nɛ̀ o ha̧a̧mɔ nyɔnɔ in o mɔɔ-a-zɛzɛ, mɛ̀ wɛ́k zu fara-ɗafi-sɔ̧ k’ɛ́nɛ́ sɛn Jerusalɛm.

¹⁸Nɛ̀ ko bu-mbɔi in lɔr nɛ tɛ ɓɔn'i, ɛ̀nɛ̀ dé nɛ mɔ n’ɛnɛ kɔ̧ɔ̧ lɛŋ, mɛ in o nya-mɛ, nyɛm nɛ ɗoŋ mɔ nɛ Sɔ̧ k’ɛ́nɛ́ kɔ̧a̧.

¹⁹Ko o nyɛk nɛ wa tɛ kai ha̧ mɛ wen Tua ko Sɔ̧ kɔ-mɛ‘i, mɛ tɛ kai wa a ti Sɔ̧ mɛ Jerusalɛm.

²⁰Nɛ̀ ko o ŋma mɔ lɛŋ n’ɛnɛ tɛ kɔ̧ wen Tua ko Sɔ̧ k’ɛ́nɛ́‘i, ɛ̀nɛ̀ nɛ́ɛ̀ bá sede-a sɛn fara-a-sede ko wannu.

²¹«Mi, wannu Artazɛrzɛs, mi ha̧a̧ heembea ha̧ o wi-pɛm-mbɔi sɛn kur Efrat nɛ war yee-wese lɛŋ‘e mɔ nɛ wi-ɗafi-sɔ̧ Ɛsdras wi-iŋ Heembea ko Sɔ̧ mɛ yiwese tɛ ak lɛŋ, ɛ̀nɛ̀ há̧ ha̧ a̧:

²²kóó hɔ tɛ kilo bu-mbɔi booro-taar, kóó tɛ kilo alkamaari booro-ɓu-taar, litrɛ dɔ̧ɔ̧ booro-naar, litrɛ nɔ̧́ booro-naar in tɔŋ hee wi kɔ̧ɔ̧ ga.

²³Mɔ nɛ Sɔ̧ mɛ yiwese tɛ tɔ̧ lɛŋ, ɛ̀nɛ̀ dé nɛ̀ mboozu wen Tua ko Sɔ̧ mɛ yiwese, wen ká nyimsea kɔ̧-a̧ tɛ̀ɛ́ tik zu mɔɔ-wan ko wannu in zu o bem kɔ‘i.

²⁴Mi mbaŋ tɛ‘nɛ́ nde, wi beka ak ha̧a̧mɔ na, wi beka ba garama na, wi beka ba sede-yuwar er o wi-ɗafi-sɔ̧, o be Levii, o wi-bii-gima, o wi-pɛm-tua ká bá nɛ̀ o wi-de-tom kɔ̧ Tua ko Sɔ̧ na mbɛt.

²⁵«Ɓɛɛ nɛ kɔ-mɛ Ɛsdras, nɛ̀ Sɔ̧ ha̧a̧ iŋamɔ kɔ‘i ha̧ mɛ, mɛ̀ é o gasawi in o wi-gɔn-kita nɛ tɛ gɔn kita ha̧ o bíí kur Efrat, nɛ war yee-wese lɛŋ zu o wi nɛ iŋa o heembea ko Sɔ̧ kɔ-mɛ. Nɛ̀ ko o wi nɛ iŋ heembea nɔ‘i na, mɛ̀ úsí ha̧ wa.

²⁶Wi nɛ beka mbo zu tɛ Heembea ko Sɔ̧ kɔ-mɛ in heembea ko wannu na, wa a̧ gɔ́n kita zu a̧: kóó wa gbɛɛ a̧, kóó wa foo a̧ yinɛ mgbara o dɔka bíí, kóó wa dee ha̧ a̧ mɛ yoɓi mɔ, kóó pi̧i̧ a̧ zɔɓɔ.»

²⁷Ɓɛɛ Ɛsdras tɔ̧: «Zɔnamɔ a̧ dúk nɛ́ ko GASA WAN Sɔ̧ ko o zɔmdáa k’ɛɛ, wen a̧ ha̧a̧ taamɔ ha̧ wannu mɛ tu̧ tɛ Tua ko GASA WAN sɛn Jerusalɛm!

²⁸GASA WAN zika tɛ pii tɛ‘m sɛn yí wannu, yí o gasawi kɔ̧-a̧ in o gasa wi-de-tom kɔ̧-a̧ lɛŋ wen zu yora ɗoŋ wen kɔ̧-a̧; hegɔ, mi nɔɔ ŋgiɗi wen er GASA WAN Sɔ̧ kɔ‘m duka zu'm, ɓɛɛ mi mɔi̧ o ŋma gasawi Israɛl ha̧ wa mɛ yak in am.»