Read Northwest Gbaya ƐSDRAS 9 Bible Online

ƐSDRAS 9 - Northwest Gbaya bible

ƐSDRAS 9

¹Ŋgimbi nɛ mɔɔ nɔ‘i kaɗa, o gasawi tɛɛ tɛ‘m ɓɛɛ tɔ̧ ha̧‘m ndé: «O be Israɛl gú nɛ̀ o wi-ɗafi-sɔ̧ in o be Levii zaŋa ŋmaa in bíí nù'ɛ tɛ dee o ndiŋmɔ ko o wi nɔ‘i. Mɛ̀ nɛ́ o be Kanaŋ, o be Hit, o be Periz, o be Jebus, o be Amɔŋ, o be Mɔab in o be Egiptɛ, ká bá nɛ̀ o be Amɔr.

²O be Israɛl, o dáà in o bem, kai nɛ o boko-bem ko o duk nɔ‘i nɛ kóò; hegɔ sa̧a̧ dukbíí zaŋa ŋmaa in o bíí nɔ‘i. Nɛ́ be-wan in o gasawi a̧ usa ɗoŋ dee ŋgazu'i ha̧ o dɔka bíí.»

³Zia wen'i n'am zia hegɔ, mi a̧ka̧ gba-laa kɔ‘m in geɗek-a mɛ ɗɔɔ mbɛt. Mi zuɗa mui̧-zu'm in zera kɔ‘m a nù, ɓɛɛ mi duk nù tɔkɔrɔ.

⁴Tɛ mɔ nɛ o wi nɛ pia nɛ Babilɔŋ dea'i, o wi nɛ dee kíí wen ko Sɔ̧ ko Israɛl mɔi̧a pii katɛ‘m. Nɛ̀ kɔ‘m, ɗaŋsee tuia so'm pi nù, ɓɛɛ mi ɓɔn kànà mbɔɗɔnu hi̧i̧ hɔ ga̧a̧mɔ tɛ ŋgimbi ha̧a̧mɔ.

⁵Tɛ ŋgimbi ha̧a̧mɔ mɛ ga̧a̧mɔ, mi kura oi deako kɔ‘m nɛ tɛ‘m, mi gbɛɛ zugur-am nù nɛ oi a̧ka̧ gba-laa kɔ‘m in geɗek-a mɛ ɗɔɔ; mi nyɛi̧a er-am sitɛ GASA WAN Sɔ̧ kɔ‘m,

⁶ɓɛɛ mi tɔ̧ ha̧ a̧: «Sɔ̧ kɔ‘m, foe de'm dee nyɛmna, ziimɔ baa'm mbɛt. Hegɔ, mi nyɛm mɛ ba yí‘m sitɛ‘nɛ́ na, wen ɗaŋmɔ k’ɛɛ dɔka zu yɛ batɛ, ɓɛɛ ŋgazu k’ɛɛ hɔɔ yiwese mɛ mbɛt.

⁷Ku̧u̧naŋ-a tɛ ŋgimbi ko o dáà k’ɛɛ hɔ sɔsɔɔ, ŋgazu k’ɛɛ gasa nyɛmna; ɛɛ, o wannu k’ɛɛ in o wi-ɗafi-sɔ̧ k’ɛɛ, ɛɛ a̧a̧ ɗɔɔ ŋgai ko o ŋma wannu, gba-paa a̧a̧ ndaa yɛ, ɛɛ a̧a̧ tɛ bara, ɛɛ a̧a̧ kɔ̧ er o wi-ɓar-mɔ er-wi, in ɗɔɔ foe mbɛt, hee mɔ'ɔ nɛ de sɔsɔɔ ga, wen zu ɗaŋmɔ k’ɛɛ.

⁸Ɓɛɛ kinii, kɔ̧ɔ̧mɔ ko GASA WAN Sɔ̧ k’ɛɛ ee be oi ŋma bíí h’ɛ́ɛ́, ɓɛɛ ha̧ ŋma fara h’ɛ́ɛ́ tɛ sa̧a̧ fara kɔ̧-a̧; Sɔ̧ k’ɛɛ dee h’ɛ́ɛ́ mɛ kpasi, ɓɛɛ a̧ e duka-kpasa h’ɛ́ɛ́ sɛn tɛ bara k’ɛɛ‘i.

⁹Ɛɛ nɛ bara nɛ mbetɛ; ɓɛɛ tɛ tom-bara k’ɛɛ‘i, Sɔ̧ k’ɛɛ e yɛ duk na. Sɛn ti wannu Pɛrsɛ, a̧ zika tɛ-a pii tɛ yɛ wen zu yora ɗoŋ wen kɔ̧-a̧, de nɛnɛ h’ɛ́ɛ́ mɛ ya kpasa wen baa Tua ko Sɔ̧ k’ɛɛ e ŋgɔn woyo, in o gbina-a, ɓɛɛ a̧ ha̧ garo h’ɛ́ɛ́ sɛn Jerusalɛm nù Juda mbɛt.

¹⁰«Ɓɛɛ kinii, Sɔ̧ k’ɛɛ, nɛ́ ge ɛ̀ɛ̀ tɛ tɔ̧ oi mɔ nɛ hɔa'i ge? Ɛɛ gbina o geŋa k’ɛ́nɛ́

¹¹n’ɛnɛ ha̧a̧ so nɛ nú o wi-de-tom k’ɛ́nɛ́, o wi-tɔ̧-wen oi nú‘nɛ́, tɔ̧ nɛnɛ‘e: ‹Nù n’ɛnɛ tɛ ye sɛnɛ mɛ ba'i nɛ́ nù nɛ mɔɔ-ndiŋ a̧a̧ sɛnɛ. Mɔɔ-ndiŋ‘i, mɛ̀ nɛ́ o bíí nù‘i a̧ dee a sɛnɛ; nɛ́ o ɗaŋ ndiŋ deemɔ kɔ-wa nɛ dama zu nù‘i lɛŋ.

¹²Kinii, k’ɛ́nɛ́ ha̧ o boko-bem k’ɛ́nɛ́ ha̧ o bem kɔ-wa nɛ kóò na; k’ɛ́nɛ́ ba o boko-bem kɔ-wa ha̧ o bem k’ɛ́nɛ́ nɛ kóò na mbɛt. K’ɛ́nɛ́ kii mɛ kpa ga̧a̧mɔ in de duka-a ko o wi nɔ‘i na. Hegɔ, ɛnɛ tɛ kpa ŋgai, ɛnɛ tɛ nyɔŋ o demɔ tɛ nù‘i, ɓɛɛ ɛnɛ ee o mɔɔ nɔ‘i nɛ mɔɔ-oi ha̧ o bem k’ɛ́nɛ́ kpoo nɛ kpoo.›

¹³Ɗoŋ o mɔ nɛ̀ hɔɔ zu yɛ oi ɗaŋ tom k’ɛɛ in gasa ɗaŋmɔ k’ɛɛ, nɛ̀ ɛ́nɛ́, Sɔ̧ k’ɛɛ, èè o ŋma yɔɔ-kaya k’ɛɛ dúk, é nɛ̀ oi o ŋma bíí h’ɛ́ɛ́ mbɛt kaɗi'i,

¹⁴ɛ́ɛ́ tɛ̀ɛ́ si so ɗoŋ tɛ̀ gbina o geŋa k’ɛ́nɛ́ in tɛ̀ yéé ŋmaa in o ɗaŋwi nɔ‘i nɛ̀ yuwar-báá-ŋmaa nde? Bó nɛ́ see'nɛ́ tɛ ŋgai zu yɛ, ɓɛɛ ɛnɛ kuma be oi yɛ yinɛ lɛŋ na nde?

¹⁵GASA WAN, Sɔ̧ ko Israɛl; ɛ́nɛ́ nɛ́ wi-de-mɔ nɛ yuwar-a;[2] sɔsɔɔ, ɛ́ɛ́ yá hee oi wi nɛ mɔ hɔɔ yɔɔ zu wa ga. Ɛɛ a̧a̧ ti'nɛ́ nɛ oi o ɗaŋmɔ k’ɛɛ, ɓɛɛ bó nɛ́ nɛ̀ oi o ɗaŋmɔ hegɔ à̧ bíí nyɛma mɛ yor nɛnɛ ti'nɛ́ na.»