Read Northwest Gbaya NEHEMII 2 Bible Online

NEHEMII 2 - Northwest Gbaya bible

NEHEMII 2

¹Tɛ zɛ Nisaŋ,[2] ŋgimbi nɛ wannu Artazɛrzɛs dee pɛ ɓu-yiitoo tɛ wan kaɗi, hee mɔ'ɔ nɛ dɔ̧ɔ̧ duka so sɛn ti'm ga, mi baa dɔ̧ɔ̧‘i ha̧ ha̧ a̧.

²Hee mɔ'ɔ n'am kai so sɔnti'm ti a̧ nɛti ga na, a̧ aka'm: «Wen ge sa mɛ kai sɔnti-mɛ ge? Nɛ́ tɛ-mɛ'ɛ nyim nde? Nɛ́ ŋma mɔ náà, kóó nɛ́ see-mɛ a̧ ɗaŋ nde?» Gasa kíì dea'm,

³ɓɛɛ mi tɔ̧ ha̧ a̧: «Wannu a̧ dúk ɓɔnsɛnɛ! Mi beka kai bɔɔ sɔnti'm na hee ge? Ye nɛ̀ o pɛsi ko o dáà kɔ‘m a̧a̧ sɛnɛ ɗaŋa; o kpar-nú garo ye'i bia wee lɛŋ.»

⁴Ɓɛɛ wannu ak am: «Nɛ́ ge a̧ mɛ kɔ̧ɔ̧ ge?» Mi kɔfa Sɔ̧ mɛ yiwese nɛ kɔ̧ see-am,

⁵ɓɛɛ mi kifi nú: «Kà nɛ́ dee tɛ wannu, kà wannu nɛ́ kɔ̧ɔ̧ wi-de-tom kɔ‘i, ɓɛɛ a̧ a̧ tóm am si Juda, sɛn saaye nɛ o pɛsi ko o dáà kɔ‘m a̧a̧ sɛnɛ‘i, ha̧‘m mɛ mbo ye'i woyo.»

⁶Kóò ko wannu duk so katɛ a̧, ɓɛɛ wannu tɔ̧ ha̧‘m: «Zɛ nɔ̀ kɔ-mɛ‘i tɛ de gee? Mɛ tɛ pii ɗoŋ mɛ gese ge?» Wannu kpɛka mɛ ha̧ yuwar ha̧‘m, ɓɛɛ mi gɔn ŋgimbi n'am tɛ pii nɛ ɗoŋ ha̧ a̧.

⁷Mi tɔ̧ɔ̧ ha̧ wannu woyo: «Kà wannu nɛ́ zɔka'e ɔ dee, wannu a̧ há̧ o kalata ha̧‘m wen ha̧a̧-a̧ ha̧ o wi-duk-zu o zika-nù nɛ a̧a̧ nɛ kur Efrat nɛ war yee-wese ha̧ wa mɛ e yuwar ha̧‘m mɛ ɓir yak si nú Juda,

⁸in ŋma kalata ha̧ Asaf, wi-pɛm-kombo ko wannu, wen ha̧ a̧ mɛ ha̧ o te ha̧‘m wen ɗafa-a nɛ nú-ŋgárá mgbák ká̧ Tua ko Sɔ̧ in nú-garo ye, ká bá nɛ̀ nú tua n'am tɛ ɔ sɛnɛ mbɛt.» Ɓɛɛ wannu ha̧ o kalata nɔ‘i ha̧‘m wen nɛ Sɔ̧ kɔ‘m guu so er zu'm.

⁹Mi hɔɔ sɛn ti o wi-duk-zu o zika-nù mɛ kur Efrat nɛ war yee-wese, ɓɛɛ mi ha̧ o kalata ko wannu ha̧ wa. Wannu toma so o gasa wi-biro in o wi-daŋ-nyaŋa mɛ mgbɔ‘m nɛnɛ.

¹⁰Sanbalat be Hɔrɔŋ in Tobia be Amɔŋ wi-de-tom kɔ̧-a̧ zia nyɛrɛ mɔ‘i, ɓɛɛ wa kpa ɗaŋsee nyɛmna, tɛ zia-a'e, ŋma bíí tɛa wen ɗafa mɔ ha̧ o be Israɛl mɛ ya nɛ de-a.

¹¹Mi hɔɔ Jerusalɛm, ɓɛɛ mi duk hi̧i̧ zɛ taar.

¹²Mi kura mɛ zɛ in o ŋma bíí, ɓɛɛ bó nɛ́ mi tɔ̧ɔ̧ so mɔ nɛ Sɔ̧ ee kɔ̧ see-am wen dea-a sɛn Jerusalɛm ha̧ ŋma bíí kpɔk na. Saɗi n'am baa nɛnɛ, kànà nɛ́ tuifuu kɔ‘m n'am daŋ ɓɛɛ.

¹³Mɛ zɛ, mi gboo nɛ̀ nú garo nɛ zɔk mɔ si kɔ̧ Gboŋgo, ɓɛɛ mi nɛɛ hɔ sɛn nú yì ko Ndiɓa in nú Garo-a-yɔsɛ. Sɛn hi̧i̧, mi duka zɔk nɛ o garo Jerusalɛm nɛ gbina in o kpar-nú-wa nɛ bia so wee lɛŋ nɛ sa̧a̧-a̧.

¹⁴Mi ɓira si nú garo zu-zer hɔ nɛnɛ ka gɔna-yì ko wannu, ɓɛɛ tuifuu n'am daŋ so'i kpa yuwar yaka-a na.

¹⁵Kpɔk zaŋ zɛ‘i, mi daŋa nɛ̀ kɔ̧ gboŋgo Sɛdrɔŋ zɔk nɛ o garo nɛnɛ, ɓɛɛ mi si ɗoŋ nɛ nú garo nɛ zɔk mɔ si kɔ̧ gboŋgo, ɓɛɛ mi pii ɗoŋ oi-am.

¹⁶O gasawi iŋ fara n'am nɛɛ sɛnɛ na, in mɔ n'am nɛɛ mɛ de na mbɛt. Ŋgimbi'i, mi tɛ tɔ̧ ŋma wen kpɔk ha̧ o be Juif na, kóó ha̧ o wi-ɗafi-sɔ̧, kóó ha̧ o dita-bíí, kóó ha̧ o gasawi, kóó ha̧ o wi-duk-zu tom na mbɛt.

¹⁷Ɓɛɛ mi tɔ̧ ha̧ wa: «Ɛ́nɛ́ zɔka bɔnɛ n’ɛɛ ya sɛnɛ'ɛ: Jerusalɛm gbina a nù lɛŋ, o kpar-nú-a bia wee mbɛt. Ɛ̀ɛ̀ nɛ́ɛ̀ mbó garo Jerusalɛm woyo, ba nɛ foe yinɛ zu yɛ.»

¹⁸Mi wee ɗoŋ guu er nɛ GASA WAN guu so zu'm, we nɛ ɗoŋ wen nɛ wannu tɔ̧ɔ̧ so ha̧‘m ha̧ wa mbɛt, ɓɛɛ wa tɔ̧: «Ɛ̀ɛ̀ de!» Hegɔ, wen dee tom'i, wa ɗafa mɔ wen dea-a.

¹⁹Nɛ̀ Sanbalat be Hɔrɔŋ, Tobia be Amɔŋ wi-de-tom kɔ̧-a̧ in Gesɛm be Arab zia nyɛrɛ mɔ‘i, wa mama yɛ, ba nɛ yɛ e tɛ geemɔ, tɔ̧ nɛnɛ‘e: «Nɛ́ ge ɛ́nɛ́ kɔ̧ɔ̧ mɛ de ge? Ɛ́nɛ́ kɔ̧ɔ̧ mɛ de nɛ́ ŋgazu in wannu nde?»

²⁰Ɓɛɛ mi kifi nú ha̧ wa hee mɔ'ɔ ga: «Mɛ̀ nɛ́ Sɔ̧ mɛ yiwese a̧ tɛ de ha̧ tom k’ɛɛ mɛ hɔ gba̧a̧, ɛɛ wi-de-tom kɔ̧-a̧, ɛɛ tɛ de kànà. Ɓɛɛ k’ɛ́nɛ́, ɛ́nɛ́ bó nɛ̀ ŋma mɔ sɛnɛ na, kóó ŋma ŋgai zu ye'i na; tɛ-wi a̧ bí ɗoŋ‘nɛ́ tɛ mɔ ko Jerusalɛm!»