Read Northwest Gbaya NEHEMII 4 Bible Online

NEHEMII 4 - Northwest Gbaya bible

NEHEMII 4

¹Ŋgimbi nɛ Sanbalat, Tobia, o be Arab, o be Amɔŋ in o be Asdod zia'e, mboo garo Jerusalɛm nɛ́ nɛ̀ɛ́ siti, in n’ɛɛ ku̧u̧naŋ kpee o woi-aa mbɛt, wa kpaa ɗaŋsee nyɛmna.

²Wa tɔ̧ɔ̧ a nú ŋmaa ha̧ wa mɛ tɛ mɛ bi Jerusalɛm ha̧ wa mɛ ɗaŋ mɔ.

³Ɛɛ kɔfa Sɔ̧ k’ɛɛ, ɓɛɛ ɛɛ a o wi-pɛm-mɔ nɛ wese in zɛ wen wa.

⁴Mɔ nɛ o be Juda tɔ̧ so nɛ́ mɔ'ɔ: «Ŋgai ko wi-de-tom bo ɓɔna, fuunu dɔka nyɛmna! Ɛɛ nyɛm mɛ mbo garo na!»

⁵Taamo ko o wisɛn k’ɛɛ‘e, ɛɛ beka iŋ ŋgimbi nɛ‘i tɛ tɛ na, in ɛɛ beka zɔk wi na hɔ ŋgimbi nɛ‘i tɛ ye mgbara yɛ; wi tɛ gbɛ yɛ, ɓɛɛ wi gɔna nú tom k’ɛɛ.

⁶O be Juif nɛ ɔ sɛn katɛ wa tɛɛ tɛ yɛ mɛ de war ɓu mbaŋ nɛ tɛ yɛ zu o ɗaŋ taamɔ ko o wi-sɛn-ɛɛ.

⁷Mi ɗafa ŋma fara nɛ̀ ɗɔɔ[4] kɔ̧ garo, ɓɛɛ mi nɛk o bíí sɛnɛ nyɛm nɛ ɗoŋ o nú-gara kɔ-wa; boi kɔ-wa nɛ́ gba-paa, sɛ́ɛ̀ in góò.

⁸Ŋgimbi n'am yara zɔk mɔ lɛŋ kaɗi, mi tɔ̧ɔ̧ ha̧ o dita-bíí, ha̧ o gasawi in oi dukbíí lɛŋ: «K’ɛ́nɛ́ yu wa na! Tɛ‘nɛ́'ɛ mbáŋ ɗoŋ GASA WAN nɛ ɔ gasa, nɛ‘i yu yuu, ɓɛɛ ɛ̀nɛ̀ bí biro wen zu o nya'nɛ́, o bem k’ɛ́nɛ́, o boko-bem k’ɛ́nɛ́, o kóò k’ɛ́nɛ́ in wen zu o tua k’ɛ́nɛ́.»

⁹Ŋgimbi'i, o wisɛn k’ɛɛ zia'e, wen'i aa zer yɛ, ɓɛɛ wa zɔk'e Sɔ̧ ɗaŋa ee-zu-mɔ kɔ-wa kaɗi. Hegɔ, ɛɛ sii ɗoŋ lɛŋ sitɛ tom garo, o ndé si fara kɔ‘i.

¹⁰Ku̧u̧naŋ-a nɛ̀ wese'i, ŋma reeta bíí kɔ‘m de so nɛ tom, ɓɛɛ ɓii-aa a̧a̧ so nɛ̀ o sɛ́ɛ̀, o ŋgéé, o góò in o laa-biro. O gasawi a̧a̧ so ɗoŋ o be Juda lɛŋ.

¹¹O wi nɛ mbo kɔ‘i nɛ́ garo in o wi nɛ tui kɔ‘i nɛ́ o dita tui de tom nɛ̀ ɓii er, ɓɛɛ kasa boi-biro nɛ̀ ɓii-aa.

¹²O wi-mbo-garo lɛŋ hɛra so kànà gba-paa kɔ-wa guntir de nɛ tom; ŋma wi-dɔm-zak yora so katɛ‘m.

¹³Mi tɔ̧ɔ̧ ha̧ o dita-bíí, o gasawi in oi dukbíí lɛŋ: «Tom’ɛ nɛ́ kpasa tom in ɔ gasa nyɛmna. Ɛ́ɛ́ ɔ nyɛi̧a nɛ̀ ŋmaa kpɔk kpɔk dam zu garo lɛŋ.

¹⁴Ŋgimbi nɛ wa tɛ dɔm zak, ɛ̀nɛ̀ mɔ́í̧ pii katɛ yɛ, ɓɛɛ Sɔ̧ k’ɛɛ tɛ bi biro wen zu yɛ.»

¹⁵Ɛɛ dee tom siti; reeta bíí k’ɛɛ kasa so kɔ‘i nɛ́ sɛ́ɛ̀ er nɛ tutuyɛ zɛ de nɛnɛ.

¹⁶Nɛ tɛ kpɔk kale ŋgimbi'i a̧‘m tɔ̧ɔ̧ nɛnɛ ha̧ dukbíí ndé: «O ndé a̧ ɔ́ sɛn Jerusalɛm in wi-de-tom kɔ‘i; ɛ̀ɛ̀ pɛ́m mɔ mɛ zɛ, ɓɛɛ ɛ̀ɛ̀ dé tom nɛ wese.»

¹⁷Kóó mi, kóó o nya'm, kóó o bíí kɔ‘m, kóó o wi-pɛm-mɔ nɛ duk in am, ɛ́ɛ́ kpɔ̧i̧ laa k’ɛɛ yinɛ na. O ndé a̧a̧ so nɛ boi-biro kɔ‘i kɔ̧ er mɛ wiiko.