Read Northwest Gbaya NEHEMII 5 Bible Online

NEHEMII 5 - Northwest Gbaya bible

NEHEMII 5

¹See o be Juda in o kóò kɔ‘i ɗaŋa zu o nya kɔ-wa, o be Juif.

²O ŋma bíí tɔ̧a̧: «O bem k’ɛɛ be-wiwii-a, o bem k’ɛɛ mɛ be-okoo-a in kiitɛ yɛ mbɛt, ɛ́ɛ́ ɔ dɔka. Ɛ́ɛ́ kɔ̧ɔ̧ mɛ kpa alkamaari wen nyɔŋa-a h’ɛ́ɛ́ mɛ ya kpasa.»

³O ŋma tɔ̧ɔ̧ kɔ‘i: «Ɛ́ɛ́ e nɛ o fɔ k’ɛɛ, o fɔ-nyak-dɔ̧ɔ̧ in o tua k’ɛɛ nɛ̀ ziŋina sɛk’ɛɛ kpaa alkamaari ŋgimbi kaɓa.»

⁴O ŋma tɔ̧ɔ̧ kɔ‘i woyo: «Ɛ́ɛ́ e nɛ o fɔ k’ɛɛ in o fɔ-nyak-dɔ̧ɔ̧ k’ɛɛ nɛ̀ ziŋina sɛk’ɛɛ kpaa sede yoɓa garama ko wannu.

⁵Zu-a'i tɔk tɛ yɛ kpɔk in o nya k’ɛɛ nɔ'ɔ, o bem k’ɛɛ nɛ́ kpɔk mɔ in o bem kɔ-wa mbɛt, nɛ mɔ'ɔ n’ɛɛ kaia o bem k’ɛɛ mɛ be-wiwii-a in be-okoo-a ha̧ ha̧ wa nɛ bara; o ŋma boko-bem k’ɛɛ a̧a̧ tɛ bara kaɗi; ŋma mɔ n’ɛɛ tɛ de bo na. Fɔ k’ɛɛ in o fɔ-nyak-dɔ̧ɔ̧ k’ɛɛ duk nɛ́ ko o ŋma bíí.»

⁶Ŋgimbi n'am zia nɛ o aia-nú kɔ-wa in o wen nɔ‘i, see-am ɗaŋa nyɛmna,

⁷ɓɛɛ mí nɛ́ mɛ tɔ̧ ŋga wen a zu o dita-bíí in o gasawi; mi tɔ̧ɔ̧ ha̧ wa: «Ɛ́ɛ́ é nɛ gasa tui zu o ŋmaa!» Ɓɛɛ mi sa wa tɛ gasa mɔi̧a-a.

⁸Mi tɔ̧ɔ̧ ha̧ wa: «Mɛ̀ nɛ́ tɛ ŋgai k’ɛɛ ɛɛ gɔna nɛ zu o nya k’ɛɛ be Juif nɛ ɗɔra so tɛ ha̧ o ŋma gɔni-duk piinɛ ɗoŋ; ɓɛɛ k’ɛ́nɛ́, ɛnɛ ɗɔr nɛ o nya k’ɛ́nɛ́, ɛnɛ ɗɔr nɛ wa h’ɛ́ɛ́ woyo!» Wa kpee nú-wa, wa bó nɛ̀ ŋma wen mɛ tɔ̧ na.

⁹Mi tɔ̧ɔ̧ woyo: «Mɔ n’ɛnɛ de'i de na; bó nɛ́ ɛ́nɛ́ tɛ̀ɛ́ yu kíí Sɔ̧ k’ɛɛ, de nɛ mɔ nɛ yuwar-a, wen ká o gɔni-duk nɛ sɛn yɛ tɛ̀ɛ́ pi̧ foe tɛ yɛ, na nde?

¹⁰Mi in o nya'm in o bíí kɔ‘m mbɛt, ɛɛ ha̧a̧ so sede in alkamaari nɛ nyamandoi ha̧ wa; kinii, ɛ̀ɛ̀ gbɛ́ nyamandoi nɔ‘i lɛŋ ha̧ wa.

¹¹Ɛ̀nɛ̀ há̧ fɔ, o fɔ nyak-dɔ̧ɔ̧, o te-nɔ̧́ in o tua kɔ-wa siɗoŋ ha̧ wa, ɓɛɛ ɛ̀nɛ̀ é sede, alkamaari in nɔ̧́ n’ɛnɛ ha̧a̧ so nɛ nyamandoi ha̧ wa duk sɔsɔɔ!»[5]

¹²Wa kifa nú wa hee mɔ'ɔ ga: «Ɛɛ tɛ e o mɔ kɔ-wa ha̧ wa, ɓɛɛ ɛɛ beka ak ŋma mɔ er-wa ɓɔna, ɛɛ tɛ de mɔ n’ɛnɛ tɔ̧‘i.» Mi saa o wi-ɗafi-sɔ̧ nɛ sedaako ɓɛɛ mi de ha̧ o bíí mɛ kan mɔ wen dee mɔ hee mɔ'ɔ nɛ wa tɔ̧ɔ̧ so ga.

¹³Mi ŋmasa laa kɔ‘m, ɓɛɛ mi tɔ̧: «Nɛ́ hegɔ a̧ Sɔ̧ tɛ ŋmasi nɛ wi nɛ beka kasi wen’ɛ na yinɛ tɛ tua ko wi’ɛi in ká̧ o demɔ kɔ̧-a̧; nɛ́ hegɔ a̧ Sɔ̧ tɛ ŋmasi nɛ a̧ yinɛ, a̧ beka kpa mɔ na.» O bíí lɛŋ tɔ̧a̧: «Mɔ'ɔ dé hegɔ!» Wa zɔna GASA WAN, ɓɛɛ wa de mɔ nɛ wa tɔ̧ɔ̧ so nɛnɛ‘i.

¹⁴Ku̧u̧naŋ-a nɛ wese nɛ wannu Artazɛrzɛs ha̧a̧ nɛ nú ha̧‘m mɛ duk zu zika-nù Juda tɛ ɓu-yiitoo pɛ hɔ nɛnɛ tɛ ɓu-taar-zua-yiitoo pɛ-wan kɔ̧-a̧, lɛŋ dee nɛ́ pɛ ɓu-zua-yiitoo, mi in o bíí kɔ‘m, ɛɛ ba so zu-mɔ nɛ wi-duk-zu nù tɛ̀ɛ́ ba so er bíí na.

¹⁵O be-wan nɛ ɔɔ wan nɛti ha̧‘m usa bɔnɛ ha̧ dukbíí, kai nɛ brɛt in dɔ̧ɔ̧ er wa. Zu-a'i, wa duka ba nɛ sede er wa wese lɛŋ tɛ kɔya-sede ɓu-naar. O wi-de-tom ko o be-wan nɔ‘i mbɛt usa bɔnɛ ha̧ dukbíí. Kɔ‘m, mi de hegɔ na, wen mi yu nɛ kíí Sɔ̧.

¹⁶Mi duka tɛ tom mboo garo nɛ tɛ‘m. Mi hi̧fi fɔ na; o bíí kɔ‘m a̧a̧ so tɛ tom hɛ̧ɛ̧ lɛŋ.

¹⁷O be Juif in o gasawi nɛ kɛr so kam in am nɛ bíí gɔmŋmaa-nɛ-ɓu-mɔɔrɔ in o gɛnɛ nɛ̀ tɛ́ nɛ̀ tɛ̀ o ŋma nù katɛ yɛ.

¹⁸Wese lɛŋ, wa tɛ gɔn ndai kpɔk, de ŋmaŋa sami mɔɔrɔ-ɗoŋ-kpɔk, in o kɔra mbɛt nɛ gbo nɛ er-am, ɓɛɛ ɗoŋ zɛ ɓu lɛŋ, wa tɛ gi dɔ̧ɔ̧ nɛ dɔka-a. Zu mɔɔ nɔ‘i lɛŋ, mi ak war zu-mɔ kɔ‘m er dukbíí na, wen tom garo baa so nú wa nyɛmna.

¹⁹Sɔ̧ kɔ‘m, tɛ‘nɛ́ a̧ mbaŋ ɗoŋ am, wen zu mɔ lɛŋ n'am dea wen o bíí nɔ'ɔ.