Read Northwest Gbaya NEHEMII 8 Bible Online

NEHEMII 8 - Northwest Gbaya bible

NEHEMII 8

¹O be Israɛl mɔi̧a ŋmaa lɛŋ sɛn Jerusalɛm, mgbák ká̧ Nu Garo Yi. Wa aka Ɛsdras wi-yɔr-kalata mɛ ba kalata Heembea ko Moisɛ nɛ GASA WAN ha̧a̧ so ha̧ o be Israɛl tɛnɛ.

²Ɛsdras wi-ɗafi-sɔ̧ baa Heembea e ti gii o be Israɛl nɛ mɔi̧a so: mɛ nɛ o wiwii, o okoo in o bíí lɛŋ nɛ nyɛma mɛ zii gba̧a̧-a̧. Mɔ‘i dee tɛ kuti wese, tɛ mɔɔrɔ-ɗoŋ-yiitoo fio-zɛ.

³Ɛsdras tɔra mɔ sɛn zaŋ kalata Heembea'i sɛn fara nɛ duk ká̧ Nú Garo Yì, ku̧u̧naŋ-a mɛ tutuyɛ hɔ nɛnɛ wese see zu. A̧ tɔra ha̧ o wiwii in o okoo, in o bíí lɛŋ nɛ nyɛma mɛ zii gba̧a̧ Heembea'i, ɓɛɛ dukbíí lɛŋ yeŋ zer mɛ zii wen'i.

⁴Ɛsdras wi-yɔr-kalata daŋa so nɛ́ zu taŋaɗa nɛ wa dee so wen mɔ‘i, yor sɛnɛ. Matitia, Sɛma, Anania, Uria, Hilkia in Masɛya yora katɛ a nɛ war wiiko, ɓɛɛ nɛ war gale nɛ́ Pɛdaya, Misaɛl, Malkia, Hasum, Hasbadana, Zakarii in Mɛsulam.

⁵Ɛsdras hu̧i̧a̧ kalata nɛ yí dukbíí nɛ oi-aa lɛŋ, wen a̧ yor nɛ́ zu kusa fara see zu dukbíí nɛ oi-aa lɛŋ. Ŋgimbi n'aa hu̧i̧a̧ kaɗi, o bíí kura yor ŋgɔn lɛŋ.

⁶Ɛsdras zɔna GASA WAN Sɔ̧ nɛ ɔ gasa, ɓɛɛ dukbíí nɛ oi-aa lɛŋ nyɛi̧ er si ŋgɔn tɔ̧ nɛnɛ: «Aamɛn! Aamɛn!» Wa guu nù, ɓɛɛ wa gbɛ zugur-wa mbɔɗɔnu sɛn ti GASA WAN, ba yí-wa hikiɗi nɛ nù.

⁷Wa kura yor ŋgɔn woyo, ɓɛɛ Yesua, Bani, Sɛrɛbia, Yamin, Akub, Sabetai, Hɔdia, Masɛya, Kɛlita, Azaria, Yɔzabad, Hanaŋ in Pɛlaya nɛ yaa so nɛ́ o be Levii we ɗoŋ Heembea ha̧ wa.

⁸Wa tɔr so nɛ́ mɔ zaŋ kalata Heembea ko Sɔ̧ nɛ sa̧a̧‘a̧, we nɛ ɗoŋ-aa ha̧ o bíí mɛ zii gba̧a̧-a̧.

⁹Nɛ mɔ'ɔ nɛ Nehemii, wi-duk-zu nù in Ɛsdras wi-ɗafi-sɔ̧ nɛ duka nɛ́ wi-yɔr-mɔ ká bá nɛ̀ o be Levii nɛ usi mɔ ha̧ dukbíí tɔ̧ɔ̧ ha̧ wa: «Wese’ɛ nɛ́ ko GASA WAN Sɔ̧ k’ɛɛ. K’ɛ́nɛ́ zim mɔ na, in k’ɛ́nɛ́ hi̧i̧ kɔ̧a̧ na mbɛt!» Dukbíí nɛ oi-aa lɛŋ hi̧i̧ so nɛ́ kɔ̧a̧, ŋgimbi nɛ wa zii nɛ o gba̧a̧ Heembea'i. Nɛ mɔ'ɔ nɛ Ɛsdras tɔ̧ɔ̧ ha̧ wa woyo:

¹⁰«Ɛ̀nɛ̀ sí ɗoŋ, ɛ̀nɛ̀ nyɔ́ŋ nɛ́ de nyɔŋmɔ, ɛ̀nɛ̀ nɔ́ o de mɔ in ɛ̀nɛ̀ tóm ŋma nɛnɛ ha̧ o bíí nɛ bo nɛnɛ na, wen sɔsɔɔ'ɛ nɛ́ wese ko GASA WAN k’ɛɛ; ká see'nɛ́ ɗaŋ na, wen desee ko GASA WAN nɛ́ ŋgai k’ɛ́nɛ́.»

¹¹O be Levii gaia dukbíí nɛ oi-aa lɛŋ tɔ̧ nɛnɛ‘e: «Ɛ̀nɛ̀ kàɗì, wen wese’ɛ ɔ sa̧a̧, ká see'nɛ́ ɗaŋ na.»

¹²Nɛ mɔ'ɔ nɛ dukbíí nɛ oi-aa lɛŋ yaka mɛ nyɔŋ mɔ in mɛ nɔ mɔ, in ha̧ wa mɛ tom mɔ ha̧ o ŋmaa, de nɛ gasa gbaŋa wen wa zia wen nɛ wa tɔ̧a̧ ha̧ wa.

¹³Tɛ yiitoo ɔɔ-zɛ, o gasawi nutua ko dukbíí, o wi-ɗafi-sɔ̧ in o be Levii mɔi̧a ŋmaa sɛn katɛ Ɛsdras wi-yɔr-mɔ, ha̧ wa mɛ kii mɔ tɛ Heembea wen zia gba̧a̧-a̧,

¹⁴ɓɛɛ wa kpa zaŋ kalata Heembea nɛ Sɔ̧ ha̧a̧ so ha̧ Moisɛ‘e: «O be Israɛl a̧ ɔ́ nɛ́ kɔ̧ tua-ŋgui wese gbaŋa mɔɔrɔ-ɗoŋ-yiitoo fio-zɛ,

¹⁵in wa a̧ tɔ̧́ wen-aa ha̧ bíí lɛŋ sɛn saaye kɔ-wa in sɛn Jerusalɛm hee mɔ'ɔ ga: ‹Ɛ̀nɛ̀ dáŋ zu kaya, ɛ̀nɛ̀ kíí o wa̧a̧-te-nɔ̧́ nɛ‘i guna in o wan nɛ hɔ nɛ ta-tɛ, wa̧a̧ be-te nɛ pɛr-aa ɔ dee,[7] wa̧a̧ ndɛŋgɛ in o ŋma da̧a̧ wa̧a̧-te wen dea-a nɛ o tua-ŋgui[8] hee mɔ'ɔ nɛ Sɔ̧ tɔ̧ɔ̧ so ga.› »

¹⁶Dukbíí lɛŋ nɛ̀ɛ́ mɛ kii o mɔɔ-de-tua, ɓɛɛ wa de o tua-ŋgui kɔ-wa, o ŋma sɛn zu tua kɔ‘i, o ŋma sɛn bee-gara kɔ‘i, o ŋma sɛn bee-gara Tua ko Sɔ̧, o ŋma sɛn bee-gara nɛ duk Nú Garo Yì in o ŋma sɛn bee-gara Nú Garo ko Efraim.

¹⁷Giiwi lɛŋ nɛ mɔi̧a, o wi nɛ pia nɛ tɛ bara dee tua-ŋgui, ɓɛɛ wa ɔ sɛnɛ. Tɛ ŋgimbi ko Josue bem ko Nun hɔ sɔsɔɔ, o be Israɛl de mɔ hegɔ na. Duka nɛ́ mɔɔ gasa desee nyɛmna.

¹⁸Wa tɔra mɔ zaŋ Kalata Heembea ko Sɔ̧ dam ɗoŋ wese gbaŋa'i lɛŋ, hɔ nɛnɛ sɔŋkur-aa. Gbaŋa'i duka tɛ zɛ mɔɔrɔ-ɗoŋ-yiitoo, ɓɛɛ wa mɔi̧ kaɗi nɛnɛ tɛ mɔɔrɔ-ɗoŋ-taar ɔɔ-zɛ nyɛm nɛ ɗoŋ mɔ nɛ yɔra so.