Read Northwest Gbaya NEHEMII 9 Bible Online

NEHEMII 9 - Northwest Gbaya bible

NEHEMII 9

¹Tɛ kpɔk fio-zɛ‘i tɛ ɓu-yiitoo-zua-naar ɔɔ-zɛ, o be Israɛl mɔi̧a ŋmaa; wa lɛŋ pi̧i̧ nɛ́ laa-bufu, ɓɛɛ tɛ-wa lɛŋ nɛ́ fuunu, wen ha̧ wa mɛ zim yì.

²O mgbák be Israɛl kɛ̧ɛ̧ tɛ̀ nɛ o gɛnɛ lɛŋ, ɓɛɛ wa gbar ɗaŋmɔ kɔ-wa in o ko o dáà kɔ-wa.

³Wa kura yor ŋgɔn, ɓɛɛ wa zii tɔra mɔ zaŋ kalata Heembea ko GASA WAN Sɔ̧ kɔ-wa ɗoŋ-aa nyɛi̧ tɛ ŋgimbi taar; hɔ-ɗoŋ-aa, wa gbara ɗaŋmɔ kɔ-wa, ɓɛɛ wa gu yí-wa nù sɛn ti GASA WAN Sɔ̧ kɔ-wa tɛ ŋgimbi taar woyo.

⁴Yesua, Bani, Kadmiɛl, Sɛbania, Buni, Sɛrɛbia, Bani in Kɛnani daŋa zu fara-yor ko o be Levii ya sɛnɛ, ɓɛɛ wa sa mɔ nɛ hee ger sitɛ GASA WAN Sɔ̧ kɔ-wa.

⁵Ɓɛɛ o be Levii, Yesua, Kadmiɛl, Bani, Hasabnɛya, Sɛrɛbia, Hɔdia, Sɛbania ká bá nɛ̀ Pɛtahia tɔ̧: «Ɛ̀nɛ̀ kúr, ɛ̀nɛ̀ zɔ́n GASA WAN Sɔ̧ k’ɛ́nɛ́ nɛ duk kpoo nɛ kpoo! GASA WAN, bíí a̧ gásí nin'nɛ́ nɛ ɔ hura, in nɛ ɔ gasa gan de yoŋgo in zɔnamɔ!

⁶«GASA WAN nɛ́ ɛ́nɛ́ kpɔk ɓɛɛ, nɛ́ ɛnɛ'ɛ dee zɔm yiwese in o sɔra lɛŋ, nù in o mɔ nɛ ya sɛnɛ lɛŋ, o gba-tɔp in o mɔ nɛ a̧a̧ ɗɔɔ-aa lɛŋ; ɛ́nɛ́ á̧ ha̧a̧ ɔmi ha̧ o mɔɔ nɔ‘i, ɓɛɛ o mɔ mɛ yiwese gu nɛ́ nù ti'nɛ́.

⁷Mɛ̀ nɛ́ ɛ́nɛ́ GASA WAN Sɔ̧ a̧ hoka Abram, in nɛ dea ha̧ a̧ mɛ gbo saaye Ur nú Kaldee yak, ɓɛɛ nɛ́ ɛnɛ'ɛ aa nin Abraham ha̧ a̧.

⁸Ɛnɛ zɔka see-aa ɔ sa̧a̧ sɛn ti'nɛ́, ɓɛɛ ɛnɛ nɔ tɔk in a̧, ha̧ nɛ nú‘e, wi tɛ ha̧ nù ko o be Kanaŋ in nù ko o be Hit, in ko o be Amɔr, ko o be Periz, ko o be Jebus in ko o be Girgas ha̧ a̧ in o bezaŋ-aa. Ɛ́nɛ́ yora ɗoŋ wen k’ɛ́nɛ́‘i, wen ɛ́nɛ́ nɛ́ wi-de-mɔ nɛ̀ yuwar-a.

⁹«Ɛ́nɛ́ zɔka mɔɔ-ko ko o dáà k’ɛɛ sɛn nú Egiptɛ, ɓɛɛ ɛ́nɛ́ zii hiɗimɔ kɔ-wa ká̧ zaŋ Gbɛ̧ gba-tɔp.

¹⁰Ɛ́nɛ́ dee o mɔɔ-usi-mɔ in o mɔɔ-gɔn-ɗɛɗɛ ha̧ wannu Egiptɛ, ha̧ o wi-de-tom kɔ̧-a̧ in dukbíí nù kɔ̧-a̧ lɛŋ, wen ɛ́nɛ́ iŋa'e o wi nɔ‘i ŋmaŋa tɛ de nɛ ɗaŋmɔ in o dáà k’ɛɛ, ɓɛɛ ɛ́nɛ́ de ha̧ nin'nɛ́ mɛ hu̧r hee mɔ'ɔ nɛ‘i zɔk sɔsɔɔ ga.

¹¹Ɛ́nɛ́ mbaŋa war ɗɔɔ gba-tɔp sɛn ti wa, ɓɛɛ wa ku nɛ kora naŋ; ɛ́nɛ́ ira o wi-ndak-pata wa a ɗɔɔ ɗuka yì hee ŋma géé kii-ta ga.

¹²Mɛ wese, ɛ́nɛ́ duka ti ha̧ wa nɛ̀ tura-zan, ɓɛɛ mɛ zɛ nɛ̀ leɓe-wee usi nɛ̀ yuwar ha̧ wa.

¹³Ɛ́nɛ́ zira sɛn zu kaya Sinai, ɓɛɛ ɛ́nɛ́ tɔ̧ wen ha̧ wa nɛ yiwese mɛ; ɛ́nɛ́ ha̧a̧ o mgbák geŋa, kpasa heembea, in o de ha̧a̧nú in usamɔ ha̧ wa.

¹⁴Ɛ́nɛ́ dea ha̧ wa mɛ iŋ sa̧a̧ wese-ɔm-tɛ k’ɛ́nɛ́, ɓɛɛ ɛ́nɛ́ yɔr o ha̧a̧nú, o geŋa in o heembea k’ɛ́nɛ́ ha̧ wa nɛ ɗoŋ Moisɛ wi-de-tom k’ɛ́nɛ́.

¹⁵Ɛ́nɛ́ ha̧a̧ nyɔŋmɔ ha̧ wa nɛ yiwese mɛ ŋgimbi nɛ wɔ gbɛ wa, in ɛ́nɛ́ dee ha̧ yì mɛ gbo nɛ kɔ̧ ta ha̧ wa ŋgimbi nɛ wɔ-yì gbɛɛ nɛ wa, ɓɛɛ ɛ́nɛ́ tɔ̧ ha̧ wa mɛ ba nù n’ɛnɛ kànà so mɔ‘e, wi tɛ ha̧ ha̧ wa,

¹⁶ɓɛɛ wa in o dáà k’ɛɛ, wa ŋmaŋa tɛ-wa, wa dee ŋgazu, wa mbo zu tɛ o heembea k’ɛ́nɛ́ na.

¹⁷«Wa bɛ̧ɛ̧ mboo zu in tɛ-wa bíí ɗoŋ mɔ n’ɛnɛ dee so in wa. Wa dee ŋgazu, ɓɛɛ zaŋ dee ŋgazu kɔ-wa'i, wa kɔ̧ɔ̧ so mɛ si ɗoŋ tɛ bara sɛn Egiptɛ. Ɓɛɛ ɛ́nɛ́ nɛ́ Sɔ̧, wan-e-ɗaŋmɔ, Sɔ̧ wan-kɔ̧ɔ̧mɔ wan-de-ko ha̧ bíí, nɛ̀ de nyimsea nɛ haya-a na, in nɛ̀ de dɔka demɔ ha̧ bíí; tɛ́ mɔ‘i ɛ́nɛ́ e wa duk na.

¹⁸Ŋgimbi nɛ wa mboo nɛ ŋma be ndai nɛ lɔr, tɔ̧ nɛnɛ‘e: ‹Sɔ̧ nɛ gboo yɛ nɛ Egiptɛ nɛ́ mɔ'ɔ,› de nɛ gasa ɗaŋmɔ hegɔ,

¹⁹ɛ́nɛ́ e wa duk sɛn ŋga-gbárà na, wen deako k’ɛ́nɛ́ ɔ gasa; tura-zan nɛ duk so ti wa usi nɛ yuwar ha̧ wa mɛ wese, kaɗi na, in wee nɛ duk so ti ha̧ wa usi nɛ yuwar ha̧ wa mɛ zɛ, bi na mbɛt.

²⁰Ɛ́nɛ́ ha̧a̧ Ɔmi k’ɛ́nɛ́ ha̧ wa, wen ha̧ wa mɛ iŋ kɛ̧ɛ̧ mgbara mɔ; ɛ́nɛ́ dor man nú-wa na mbɛt, ɓɛɛ ɛ́nɛ́ ha̧ yì ha̧ wa wen wɔ-yì nɛ gbɛ wa.

²¹Ɛ́nɛ́ daia wa tɛ pɛ ɓu-naar sɛn ŋga-gbárà: ŋma mɔ ɓan wa na; o laa kɔ-wa a̧k na, naŋ-wa ha̧ na mbɛt.

²²Ɛ́nɛ́ ee o mɔɔ-wan in o dukbíí ɗɔɔ ŋgai kɔ-wa, ɛ́nɛ́ kɛ̧ɛ̧ nù nɛ ya zik wa ha̧ wa; nɛ́ hegɔ a̧ wa baa nɛ nù ko Sihɔŋ wannu Hɛsbɔŋ, in ko Og wannu Basaŋ.

²³Ɛ́nɛ́ dee ha̧ o bem kɔ-wa mɛ dɔk hee sɔra mɛ yiwese ga, ɓɛɛ ɛ́nɛ́ kai wa ye nɛ nù n’ɛnɛ tɔ̧ɔ̧ so ha̧ o dáà kɔ-wa mɛ ba.

²⁴Hegɔ, o bem kɔ-wa yee tɛ nù‘i, ɓɛɛ wa ba; ɛ́nɛ́ dee ha̧ o be Kanaŋ nɛ̀ duk nɛ́ o be-nù‘i mɛ duk ɗɔɔ ŋgai kɔ-wa; ɓɛɛ ɛ́nɛ́ kai o wannu kɔ-wa gú nɛ̀ o bíí nù‘i lɛŋ a er o bíí k’ɛ́nɛ́ wen ha̧ wa mɛ de mɔ nɛ wa kɔ̧ɔ̧ in wa.

²⁵Wa baa o ye ŋgárá in o de nú-dɛm-nyɔnɔ, wa baa o tua nɛ duna nɛ demɔ nɛtɛ nɛtɛ, o gɔna-yì, o fɔ-nyak-dɔ̧ɔ̧, o te-nɔ̧́, in o te wai wai nɛ dɔka-a. Wa nyɔŋa mɔ, zaŋ-wa sura, wa ŋmaŋa, ɓɛɛ wa duk zaŋ bɔtɛ wen zu dee demɔ k’ɛ́nɛ́ ha̧ wa:

²⁶«Wa ku̧u̧ naŋ baa zu-wa nɛ ŋgɔn de nɛ ŋgazu in'nɛ̀ɛ́; wa ee Heembea k’ɛ́nɛ́ duk, wa gbɛɛ o wi-tɔ̧-wen oi nú‘nɛ́ nɛ gai so wa wen pia ɗoŋ tɛ‘nɛ́, ɓɛɛ wa de o gasa ɗaŋmɔ ti'nɛ́.

²⁷Hegɔ, ɛ́nɛ́ siŋa wa a sɛn er o wisɛn kɔ-wa nɛ̀ bíí wa. Ŋgimbi bɔnɛ kɔ-wa, wa saa so mɔ sitɛ‘nɛ́, ɓɛɛ k’ɛ́nɛ́, ɛ́nɛ́ duka yiwese zii nɛ ger-wa; ɓɛɛ hee mɔ'ɔ nɛ ɛ́nɛ́ a̧a̧ nɛ ko nyɛmna ga, ɛ́nɛ́ toma o bíí nɛnɛ mɛ gbo wa er o wisɛn kɔ-wa.

²⁸Ɓɛɛ ɗoŋ nɛ wa kpasi kaɗi, wa ku̧u̧ naŋ dee ɗaŋmɔ sɛn ti'nɛ́ woyo; ɓɛɛ ɛ́nɛ́ siŋa wa a sɛn kɔ̧ er o wi-kur-zu-wa; hegɔ o wi nɔ‘i usa bɔnɛ ha̧ wa. Sɛka wa hiɗa mɔ sitɛ‘nɛ́ woyo; ɛ́nɛ́ duka yiwese zii nɛ ger-wa, ɓɛɛ hee mɔ'ɔ nɛ ɛ́nɛ́ a̧a̧ nɛ ko nyɛmna ga, ɛ́nɛ́ gboo wa tɛ bɔnɛ yinɛ.

²⁹Ɛ́nɛ́ tɔ̧ɔ̧ ha̧ wa mɛ pii ɗoŋ tɛ Heembea k’ɛ́nɛ́, ɓɛɛ kɔ-wa, wa de so nɛ́ ŋgazu, wa mbo zu-wa sɛn tɛ o usamɔ k’ɛ́nɛ́ na; wa gbina o geŋa k’ɛ́nɛ́ nɛ̀ bíí tɛ̀ɛ́ ba de nɛ tom wen duka kpasa. Wa kaia ɓaa-wa nɛ ŋgɔn, wa dee ŋgazu, ɓɛɛ wa zii wen na.

³⁰«Ɛ́nɛ́ nɔɔ ŋgiɗi tɛ dee ɗaŋmɔ kɔ-wa pɛ nɛ dɔka-a; ɛ́nɛ́ mbaŋa tɛ-wa nɛ ɔmi k’ɛ́nɛ́ nɛ ɗoŋ o wi-tɔ̧-wen oi nú‘nɛ́, ɓɛɛ wa kɔ̧ mɛ zii na; hegɔ ɛ́nɛ́ siŋa wa a kɔ̧ er o gɔni-duk,

³¹ɓɛɛ tɛ gasa kɔ̧ɔ̧mɔ k’ɛ́nɛ́, ɛ́nɛ́ e ha̧ wa mɛ kum wa na, ɛ́nɛ́ e wa duk na, wen ɛ́nɛ́ nɛ́ Sɔ̧ nɛ a̧a̧ nɛ ko, ɛ́nɛ́ duna nɛ kɔ̧ɔ̧mɔ mbɛt.

³²«Kinii, Sɔ̧ k’ɛɛ, Sɔ̧ nɛ ɔ gasa, nɛ‘i yu yuu, ɛ́nɛ́ nɛ́ wi-kasi-nɔɔ-tɔk in wi-yor-ɗoŋ ha̧a̧nú k’ɛ́nɛ́; k’ɛ́nɛ́ zɔk o bɔnɛ nɛ tika zu yɛ, ɛɛ in o wannu k’ɛɛ, o gasawi k’ɛɛ, o wi-ɗafi-sɔ̧ k’ɛɛ, o wi-tɔ̧-wen oi nú Sɔ̧ k’ɛɛ, o dáà k’ɛɛ gú nɛ̀ dukbíí k’ɛɛ lɛŋ, ku̧u̧naŋ-a ŋgimbi ko o wannu Asirii hɔ nɛnɛ sɔsɔɔ hee geɗek mɔ ga na.

³³Ŋma ɗaŋmɔ k’ɛ́nɛ́ bo tɛ o mɔ lɛŋ nɛ hɔɔ zu yɛ na, wen ɛ́nɛ́ dee mɔ nɛ yuwar-a, ɓɛɛ k’ɛɛ, ɛɛ mbo zu na.

³⁴Nɛ̀ war ko o wannu k’ɛɛ, o gasawi k’ɛɛ in o wi-ɗafi-sɔ̧ k’ɛɛ, gú nɛ̀ o dáà k’ɛɛ, wa ba Heembea k’ɛ́nɛ́ de nɛ tom na, wa mbo zu tɛ o ha̧a̧nú in o mbaŋa tɛ-wa n’ɛnɛ mbaŋ so ɓɔnsɛnɛ na.

³⁵Tɛ ŋgimbi-wan kɔ-wa, in tɛ ŋgimbi kpaa o dɔka mɔ n’ɛnɛ ha̧a̧ ha̧ wa tɛ gasa nú-dɛm-nyɔnɔ n’ɛnɛ ee ti wa, wa de tom k’ɛ́nɛ́ na, in wa e ɗaŋ deemɔ kɔ-wa duk na mbɛt.

³⁶Ɓɛɛ zɔ́k, sɔsɔɔ ɛɛ nɛ́ bara; ɛɛ nɛ́ bara sɛn tɛ nù n’ɛnɛ ha̧a̧ ha̧ o dáà k’ɛɛ, ha̧ wa mɛ nyɔŋ waya-mɔ-a in demɔ-a.

³⁷Ɓɛɛ o demɔ nù‘i lɛŋ yaka si er o gɔni wannu n’ɛnɛ ee zu yɛ wen zu o ɗaŋmɔ k’ɛɛ. Wa duk zu yɛ in o mɔ-dai k’ɛɛ hee mɔ'ɔ nɛ see-wa kɔ̧ɔ̧ ga, ɓɛɛ ɛɛ a̧a̧ tɛ ŋga bɔnɛ nyɛmna.»