Read Northwest Gbaya ƐSTƐR 2 Bible Online

ƐSTƐR 2 - Northwest Gbaya bible

ƐSTƐR 2

¹Ɗoŋ nɛ̀ nyimsea ko wannu Zɛrzɛs ga̧a̧ kaɗi, tɛ-a mbaŋa ɗoŋ Vasti in mɔ nɛ̀ Vasti dea, in keta nɛ̀ wa baa wen a̧.

²O wi-de-tom ko wannu tɔ̧a̧: «Ɛ̀ɛ̀ kíí nɛ́ o gba de be-zɔŋa nɛ̀ tɛ iŋ wiwii nɛti na ha̧ wannu.

³Wannu a̧ hók o bíí dam ɗoŋ o zika-nù tɛ wan kɔ‘i lɛŋ, mɛ kii o be-zɔŋa nɛ̀ tɛ iŋ wiwii na, ɓɛɛ nɛ̀ yora zɔŋa nyɛmna, ha̧ mgbɔ wa si fara-yaa ko o kóò ko wannu. Wa a̧ yá ɗɔɔ ŋgai ko Ege, kpàná-pɛm o kóò ko wannu sɛn ŋgárá Suzɛ; ɓɛɛ a'i há̧ gba de nɔ̧́-sɔ̧-tɛ ha̧ wa.

⁴Ɓɛɛ be-zɔŋa nɛ̀ tɛ de tɛ wannu nyɛmna'i tɛ duk ko-wan oi Vasti.» Taamɔ‘i dee tɛ wannu nyɛmna, ɓɛɛ a̧ de hegɔ.

⁵Ŋma be Juif a̧a̧ so sɛn ŋgárá Suzɛ‘i, nin-a nɛ̀ Mardochee. A̧ so nɛ́ bem ko Yair, be-koo Simɛi, bem ko Kis, bezaŋ Bɛnjamin. A̧ a̧a̧ so mgbara o bíí Jerusalɛm nɛ̀ Nabukɔdɔnɔsɔr, wannu Babilɔŋ, baa kai so nɛ̀ bara-biro yaknɛ in Jɔakim wannu Juda.

⁷Nɛ́ Mardochee a̧ duka so dai Adasa nɛ̀ wa sa'e Ɛstɛr, bem ko nya dáà kɔ̧-a̧. Dáà in nàà ko Ɛstɛr fee so kɔ‘i kaɗi, ɓɛɛ nɛ́ ɗoŋ fio kɔ-wa a̧ Mardochee baa nɛ̀ a̧ hee bem kɔ‘i ga. Boko-bem’ɛi yora so zɔŋa nyɛmna, saŋa-yí-a dee so nyɛmna mbɛt.

⁸Ɗoŋ nɛ̀ wa toma heembea ko wannu dam fara lɛŋ kaɗi, wa mɔi̧a o gba dùk be-zɔŋa si ŋgárá Suzɛ, ɓɛɛ wa e Ege zu wa. Hegɔ, wa mgbɔɔ Ɛstɛr si kɔ̧̀ kira ko wannu hee o dɔka-a ga ha̧ Ege, wi-pɛm-okoo mɛ zɔk a̧ mbɛt.

⁹Boko-bem’ɛi dee tɛ Ege nyɛmna, a̧ baa see-aa mbɛt. Ege ha̧a̧ o nɔ̧́-sɔ̧-tɛ in o nyɔŋmɔ ha̧ a̧ nɛ̀ dɔka-a. A̧ ha̧a̧ o boko-bem mɔɔrɔ-ɗoŋ-yiitoo nɛ̀ be-tua ha̧ Ɛstɛr mbɛt, ɓɛɛ a̧ ha̧ de gɔna-bɛr-tua tɛ tua ko o okoo ha̧ a̧.

¹⁰Ɛstɛr sa so nin dùk kɔ‘i in tugun nàm kɔ‘i ha̧ ŋma bíí na, wen Mardochee dora so a̧ tɛ tɔ̧a̧-a̧.

¹¹Wese lɛŋ, Mardochee yara zik fara-yaa ko o kóò ko wannu mɛ iŋ mgbara haya-tɛ in duka-a ko Ɛstɛr.

¹²Ŋgimbi nɛ̀ be-zɔŋa dee mɔ nyɛm nɛ̀ ɗoŋ yuwar-mɔ nɛ̀ yɔra wen o kóò ko wannu tɛ fio-zɛ ɓu-zua-yiitoo kaɗi, ɓɛɛ wa mgbɔa a̧ si ɗoŋ wannu. Tɛ́ kuti fio-zɛ mɔɔrɔ-ɗoŋ-kpɔk, a̧ tɛ sɔ̧ nɛ́ nɔ̧́-nyama, ɓɛɛ tɛ fio-zɛ mɔɔrɔ-ɗoŋ-kpɔk mɛ siti woyo, a̧ tɛ sɔ̧ nɛ́ o ŋma gba de nɔ̧́ nɛ̀ pɛr-aa ɔ dee in o nɔ̧́-yɔk-tɛ ko okoo mbɛt.

¹³Ɓɛɛ yuwar mɔ nɛ tɛ de tɛ nɛa-a ko be-zɔŋa sitɛ wannu nɛ́ mɔ'ɔ: wa tɛ ha̧ o mɔ lɛŋ n'aa tɛ kɔ̧ mɛ ba nɛnɛ nɛ̀ kɔ̧́ tua-yaa ko o okoo si fara ko wannu.

¹⁴Kóò‘i tɛ si ɗoŋ wannu mɛ ga̧a̧mɔ, ɓɛɛ mɛ tutuyɛ a̧ gboo pii ɗoŋ ye nɛ́ ŋma ɓii tua nɛtɛ nɛ̀ zíí nɛ̀ Sasgaz, kpàná nɛ̀ wa hoka e zu o zɔŋa-kóò ko wannu. A̧ beka si ɗoŋ, ɗoŋ wannu woyo ɓɔna, kà á bòò nɛ́ wannu nɛ̀ tɛ-wi a̧ kɔ̧ɔ̧ a̧, ɓɛɛ sa a̧ nɛ̀ nin-a sɛ́.

¹⁵Nɛ̀ ŋgimbi ko Ɛstɛr boko-bem ko Abihayil nɛ̀ Mardochee baa so gasi nɛnɛ hɔa mɛ si tua ɗoŋ wannu, a̧ ba kɔ̧-a̧ ŋma mɔ yak zu mɔ nɛ̀ Ege, wan-duk-zu o okoo usa ha̧ a̧ na. Mɔ ko Ɛstɛr dee tɛ o bíí lɛŋ nɛ̀ zɔka a̧.

¹⁶Wa mgbɔɔ Ɛstɛr nɛnɛ si fara-duk ko wannu Zɛrzɛs tɛ ɓu fio-zɛ; mɛ̀ nɛ́ wen nɛ̀ tɔ̧ zɛ ko «Tebɛt», tɛ mɔɔrɔ-ɗoŋ-yiitoo pɛ ɔɔ-wan ko wannu Zɛrzɛs.

¹⁷See wannu baa Ɛstɛr gan o dɔka okoo; Ɛstɛr dee tɛ-a nyɛmna, ɓɛɛ a̧ ha̧ mɔɔ-gu-zu ko ko-wan ha̧ a̧, ɓɛɛ e a̧ nɛ̀ ko-wan oi Vasti.

¹⁸Wannu dee gasa gbaŋa wen Ɛstɛr ha̧ o gasawi in o wi-de-tom kɔ‘i, ɓɛɛ a̧ ha̧ ŋma wese-ɔm-tɛ kpɔk ha̧ o zika-nù kɔ̧-a̧,[2] ha̧ nɛ̀ mɔ ha̧ o bíí nyɛm nɛ̀ ɗoŋ yuwar deemɔ ko wannu.

¹⁹Ŋgimbi mɔi̧a o be-zɔŋa hɔɔ woyo, ɓɛɛ tom ko Mardochee so nɛ́ duka nù kɔ̧̀ kira ko wannu.

²⁰Ɛstɛr sa nin dùk kɔ‘i in tugun nàm kɔ‘i ha̧ ŋma bíí na, wen Mardochee baa dor so a̧ tɛ tɔ̧a̧-a̧. Ɛstɛr duka tɛ mboo zu ha̧ Mardochee siti hee ŋgimbi n'aa ɓɔna so nɛnɛ kɔ̧́ tua kɔ̧-a̧ ga.

²¹Tɛ́ ŋgimbi nɛ̀ Mardochee duk nɛnɛ nú tua ko wannu'i, o ŋma kpàná-pɛm-nú tua ko wannu yiitoo, Bigtaŋ in Tɛrɛs kpaa ɗaŋsee zu wannu Zɛrzɛs, ɓɛɛ wa e nú in ŋmaa mɛ gbɛ a̧ yinɛ.

²²Wen'i aa zer Mardochee, ɓɛɛ a̧ nɛ́ɛ̀ we ɗoŋ-aa ha̧ ko-wan Ɛstɛr, ɓɛɛ Ɛstɛr ba kɔ‘i wen-aa nɛ́ɛ̀ tɔ̧ ha̧ wannu.

²³Wa kia mgbara mɔ‘i, ɓɛɛ wa zɔk'e nɛ́ kpasawen; nɛ́ mɔ'ɔ nɛ̀ wa ga̧i̧a o kpàná nɔ‘i yiitoo'i tɛ te, gbɛ wa yinɛ, ɓɛɛ wa yɔr nyɛrɛ mɔ‘i zaŋ Kalata Nyɛrɛmɔ ko o wannu, nyɛm nɛ̀ ɗoŋ wen ko wannu.