Read Northwest Gbaya ƐSTƐR 3 Bible Online

ƐSTƐR 3 - Northwest Gbaya bible

ƐSTƐR 3

¹Ɗoŋ mɔɔ nɔ‘i, wannu Zɛrzɛs ha̧a̧ gasa fara tom ha̧ Haman, bem ko Hamdata, bezaŋ Agag. A̧ baa a̧ e nɛ́ gasawi zu o gasawi kɔ̧-a̧ lɛŋ.

²O wi-de-tom ko wannu lɛŋ nɛ̀ yaa so nutua-wan kɔ̧-a̧ gbɛɛ zugur nù, gú nɛ̀ nù ti Haman, nyɛm nɛ̀ ɗoŋ heembea nɛ̀ wannu ha̧a̧ so zu mɔ ko Haman. Ɓɛɛ Mardochee de kɔ‘i hegɔ na.

³O wi-de-tom ko wannu nɛ̀ yaa so nú tua-wan'i tɔ̧ɔ̧ ha̧ Mardochee: «Wen ge sa mɛ gbin heembea ko wannu ge?»

⁴Wa duka mɛ tɔ̧ ha̧ a̧ hegɔ wese lɛŋ, ɓɛɛ a̧ zii wen nú wa na. Ɓɛɛ wa we ɗoŋ mɔ nɛ̀ yak'i ha̧ Haman ha̧ a̧ mɛ zɔk mgbara taamɔ ko Mardochee, wen Mardochee baa tɔ̧ so ha̧ wa'e, wi nɛ́ be Juif.

⁵Haman zɔka'e Mardochee gbɛ zugur nù na, gú nù ti a̧ na mbɛt, ɓɛɛ see-aa nyim nɛ̀ ŋgaya-a,

⁶ɓɛɛ a̧ kɔ̧ so mɛ gbɛ Mardochee ɛ̀nɛ̀ kpɔk ɓɛɛ na, wen wa baa tɔ̧ so dùk ko Mardochee ha̧ a̧. Hegɔ, a̧ kia yuwar mɛ kum dukbíí ko Mardochee, mɔ nɛ̀ tɔ̧‘e o be Juif lɛŋ nɛ̀ a̧a̧ sɛn zaŋnu ko wannu Zɛrzɛs.

⁷Sɛn tɛ kuti fio-zɛ, nɛ̀ duk nɛ́ fio-zɛ «Nisaŋ», tɛ ɓu-zua-yiitoo pɛ-wan ko Zɛrzɛs, wa pi̧i̧ tani nɛ̀ wa sa'e «Purim» ti Haman, sa nɛ̀ nin wese kpɔk kpɔk in fio-zɛ kpɔk kpɔk mbɛt, hegɔ hɔ nɛnɛ tɛ ɓu-zua-yiitoo fio-zɛ, nɛ̀ duk nɛ́ fio-zɛ «Adar», ɓɛɛ nɛ́ zu Adar a̧ tani baa.

⁸Haman nɛɛ tɔ̧ ha̧ wannu Zɛrzɛs: «Ŋma dukbíí a̧a̧ sɛnɛ nɛtɛ, nɛ̀ de mɔ hee ko o dɔka-a ga na, ɓɛɛ nɛ̀ pɛsa dam tɛ o zika-nù k’ɛ́nɛ́ lɛŋ. O heembea kɔ-wa duk nɛtɛ mgbara o dɔka heembea ko o dukbíí, ɓɛɛ wa de mɔ nyɛm nɛ̀ ɗoŋ o heembea ko wannu na. Ká wannu é wa géè na.

⁹K’ɛ̀nɛ̀ nɛ́ kɔ̧a̧, ɛ̀nɛ̀ yɔ́r mɔ tɔ̧ nɛnɛ ha'i mɛ kum wa, ɓɛɛ mi tɛ mɔi̧ kilo bu-mbɔi booro-gɔmŋmaa-taar-nɛ-booro-ɓu-naar a er o wi-kasi-sede wen tom-nù.»

¹⁰Wannu kpɔ̧i̧a̧ wele kɔ‘i mɛ er, ɓɛɛ ba ha̧ Haman bem ko Hamdata, bezaŋ Agag wi-kur-zu o be Juif.

¹¹Wannu tɔ̧ɔ̧ ha̧ Haman: «O wi nɔ‘i in mbɔi kɔ-wa a̧a̧ er-mɛ. Mɛ̀ dé mɔ nɛ̀ mɛ́ kɔ̧a̧ mɛ́ de in wa.»

¹²Nɛ̀ kuti fio-zɛ hɔɔ zɛ ɓu-zua-taar, wa saa o wi-yɔr-mɔ ko wannu tɛnɛ, ɓɛɛ wa yɔr mɔ lɛŋ nyɛm nɛ̀ ɗoŋ tɔ̧ɔ̧-wen ko Haman, ha̧ o be-wan in o gasawi zu nù tɛ zika-nu-wan kɔ̧-a̧ lɛŋ, ká bá nɛ̀ o gasawi zu dukbíí kpɔk kpɔk. Wa yɔra mɔ ha̧ zika-nù kpɔk kpɔk nyɛm nɛ̀ ɗoŋ nú kɔ-wa. Wa yɔra mɔ‘i nɛ̀ nin wannu Zɛrzɛs, ɓɛɛ wa e dap-wele kɔ̧-a̧ nɛ tumbal sɛnɛ.

¹³Nɛ́ mɔ'ɔ nɛ̀ o betom kaia o kalata nɔ‘i, pɛsi dam tɛ o zika-nù lɛŋ, ha̧ wa mɛ kum o be Juif, o be-ŋgaiwi gú nɛ̀ o sɔkawi, o obem in o okoo, kpɔk kale wese lɛŋ, sɛn tɛ ɓu-zua-taar ɔɔ-zɛ ko ɓu-zua-yiitoo fio-zɛ nɛ̀ wa sa'e «Adar», in wen kaia o mbɔi kɔ-wa lɛŋ mbɛt.

¹⁴Kalata'i tɛ duk nɛ́ heembea nɛ̀‘i tɛ tɔr ha̧ o bíí dam tɛ zika-nu-wan ko Zɛrzɛs lɛŋ, wen ha̧ kóó o ndé mɛ ɗafi mɔ pɛm nɛ̀ wese'i.

¹⁵Sɛn tɛ ha̧a̧nú ko wannu, o kalata nɔ‘i yaka nɛ̀ haya-a, ɓɛɛ wa tɔr heembea'i dam sɛn ŋgárá Suzɛ mbɛt. Ɓɛɛ ŋgimbi nɛ̀ wannu Zɛrzɛs in Haman biti ya kɔ‘i nɔ nɛ̀ mɔ in ŋmaa, o bíí saaye Suzɛ sakala tɛ taamɔ kɔ-wa lɛŋ.