Read Northwest Gbaya ƐSTƐR 4 Bible Online

ƐSTƐR 4 - Northwest Gbaya bible

ƐSTƐR 4

¹Mardochee zia mɔ nɛ̀ yaka lɛŋ, ɓɛɛ a̧k o laa tɛ yinɛ, pi̧ laa-bufu, a bùk zu, gɔm ye saaye, hiɗi nɛ̀ mɔ nɛ̀ bee-gara yaknɛ nɛ̀ ɗaŋsee.

²Ɓɛɛ a̧ nɛ́ɛ̀ hɔ nú garo ko wannu fara nɛ̀ bíí nyɛm so mɛ ye sɛnɛ nɛ̀ laa-bufu tɛ̀ na.

³Tɛ zika-nù lɛŋ, fara nɛ̀ ha̧a̧nú in geŋa ko wannu hɔ sɛnɛ, gɛ̧ɛ̧mɔ baa o be Juif lɛŋ; ɓɛɛ wa zim yì, hí̧í̧ nɛ̀ kɔ̧a̧, ai nɛ̀ nú, ɓɛɛ o ŋma nɛ̀ dɔka-a ɔ kɔ‘i nù nɛ̀ bufu zu bùk.

⁴O boko-be-tua in o kpàná ko Ɛstɛr baa wen'i nɛ́ɛ̀ tɔ̧ ha̧ a̧. Ko-wan zia wen'i, ɓɛɛ gba̧a̧-tɛ gbin, ɓɛɛ a̧ tom o laa nɛnɛ ha̧ Mardochee mɛ a tɛ, wen ha̧ a̧ mɛ kpɔ̧i̧ laa-bufu yinɛ, ɓɛɛ a̧ bɛ̧.

⁵Ɛstɛr saa Hatak, kpɔk mgbara o kpàná nɛ̀ wannu ha̧a̧ so ha̧ a̧ wen dee tom ha̧ a̧, ɓɛɛ a̧ tom a̧ sitɛ Mardochee, mɛ ak gba̧a̧ mɔ nɛ̀ yaka in mɔ nɛ̀ dea.

⁶Hatak nɛɛ tɛ Mardochee bee-gara nú garo ko wannu.

⁷Mardochee tɔ̧ɔ̧ mgbara mɔ nɛ̀ yaka lɛŋ ha̧ a̧; ɓɛɛ a̧ we ɗoŋ sede nɛ̀ Haman tɛ̀ɛ́ a fara-a-mbɔi ko wannu oi kuma o be Juif.

⁸A̧ ha̧a̧ ŋma kalata heembea nɛ̀ wa pɛsa dam saaye Suzɛ, wen kuma wa'i ha̧ a̧ mbɛt, wen ha̧ a̧ mɛ usi ha̧ Ɛstɛr, tɔ̧ nɛ̀ mgbara-a ha̧ a̧, in ha̧ Ɛstɛr mɛ nɛ si katɛ wannu, mɛ ak deako kɔ̧-a̧, kɔfi nɛ̀ a̧ wen zu dukbíí kɔ‘i.

⁹Hatak baa wen ko Mardochee nɛ́ɛ̀ tɔ̧ ha̧ Ɛstɛr;

¹⁰ɓɛɛ Ɛstɛr e wen nú Hatak mɛ nɛ̀ɛ́ tɔ̧ ha̧ Mardochee ndé:

¹¹«O wi-de-tom ko wannu lɛŋ in dukbíí tɛ o zika-nù kɔ̧-a̧ lɛŋ iŋa nɛ̀ de-a'e, kóó o ndé, kóó nɛ́ wiwii, kóó nɛ́ okoo, nɛ̀ tɛ ye si tɛ wannu fara-duk kɔ̧-a̧, nɛ̀ bó nɛ́ à̧ á̧ saa wi’ɛi na, heembea zu wi’ɛi nɛ́ gbɛa a̧ gbɛɛ yinɛ ɓɛɛ. Ɓɛɛ kà wannu nɛ́ nyɛi̧a dɔ́rá-lɔr kɔ‘i sitɛ wi’ɛi, ɓɛɛ a̧ kpasa. Ɓɛɛ kɔ‘m, nɛ́ zɛ ɓu-taar kinii nɛ̀ wa sa'm si katɛ wannu na.»

¹²Wa baa wen ko Ɛstɛr nɛ́ɛ̀ tɔ̧ ha̧ Mardochee,

¹³ɓɛɛ kifa-nú ko Mardochee ha̧ Ɛstɛr nɛ́ mɔ'ɔ: «Ká mɛ ta'e wen nɛ̀ mɛ́ a̧a̧ kɔ-mɛ kɔ̧̀ kira-wan'i, nɛ́ mɛ́ kpɔk mgbara o be Juif a̧ tɛ kpasi ɓɛɛ na.

¹⁴Kà mɛ̀ kpé yí-mɛ́ tɛ mɔ nɛ̀ de kinii’ɛ ha̧ mɛ mɛ kpe nú-mɛ́, gbakamɔ tɛ tɛ nɛ ŋma fara mɛ kpasi o be Juif, ɓɛɛ kɔ-mɛ in o bíí nutua ko dáà kɔ-mɛ, ɛ́nɛ́ tɛ kum lɛŋ; ŋma fara, nɛ́ wen kpasa yɛ a̧ mɛ yèé nɛnɛ fara-wan'i ndé, o'o iŋa o?»

¹⁵Ɓɛɛ Ɛstɛr kifi nú ha̧ Mardochee:

¹⁶«Mɛ̀ nɛ́ɛ̀ mɔi̧ o be Juif sɛn Suzɛ'ɛ lɛŋ, ɛ̀nɛ̀ zím yì wen am zɛ nɛ wese, k’ɛ́nɛ́ nyɔŋ mɔ na, k’ɛ́nɛ́ nɔ yì na zaŋ zɛ taar. Mi tɛ zim yì in o boko-be-tua kɔ‘m mbɛt. Ɓɛɛ kóó nɛ̀ heembea a̧a̧ sɛnɛ‘i, mi tɛ́ nɛ̀ kànà ti wannu; kà bó nɛ́ fio, ha̧‘m fe ɓɛɛ.»

¹⁷Mardochee yaka, ɓɛɛ de mɔ nɛ̀ Ɛstɛr tɔ̧ɔ̧ ha̧ a̧‘i lɛŋ.