Read Northwest Gbaya ƐSTƐR 5 Bible Online

ƐSTƐR 5 - Northwest Gbaya bible

ƐSTƐR 5

¹Ɗoŋ zɛ taar'i, Ɛstɛr aa laa ko ko-wan tɛ-wi, ɓɛɛ gbo si bee-gara nɛ̀ duk mgbák nú fara-duk ko wannu. Wannu duka so zu damti kɔ‘i sɛn kɔ̧́ tua-wan, zɔk nɛ̀ mɔ si nú tua mɛ.

²Ŋgimbi nɛ̀ wannu zɔka ko-wan Ɛstɛr fara yora-a zan, a̧ zɔka a̧ nɛ̀ de yí, ɓɛɛ a̧ nyɛi̧ dɔra-lɔr er-a'i sitɛ Ɛstɛr. Ɓɛɛ Ɛstɛr ɗɔŋ siti, tam nú dɔra'i.

³Nɛ́ mɔ'ɔ nɛ̀ wannu aka a̧: «Nɛ́ ge á̧ mɛ́ kɔ̧a̧ ge, ko-wan Ɛstɛr? Mɛ̀ tɔ̧́ mɔ nɛ̀ a̧a̧ sɛnɛ ha̧‘m. Kóó nɛ́ reeta mɔɔ-wan kɔ‘m a̧ mɛ aka, mi tɛ ha̧ mɛ!»

⁴Ɛstɛr kifa nú: «Mi kɔ̧ɔ̧ nyɛmna h’ɛ́nɛ́ mɛ tɛ sɔsɔɔ‘i in Haman tɛ gbaŋa n'am ɗafa h’ɛ́nɛ́.»

⁵Nɛ́ mɔ'ɔ nɛ̀ wannu toma bíí mɛ sa Haman nɛ̀ haya-a nyɛm nɛ̀ ɗoŋ mɔ nɛ̀ Ɛstɛr aka, ɓɛɛ wa yiitoo mbɛt nɛ́ in ŋmaa tɛ gbaŋa nɛ̀ Ɛstɛr ɗafa'i.

⁶Ŋgimbi nɛ̀ wa nɔ nɛ̀ dɔ̧ɔ̧ ɗoŋ nyɔŋmɔ, wannu tɔ̧ɔ̧ ha̧ Ɛstɛr: «Mɔ nɛ̀ mɛ́ kɔ̧ɔ̧ mɛ́ ak'i, mɛ́ tɛ́ kpa. Mɛ̀ tɔ̧́ mɔ nɛ̀ mɛ́ kɔ̧a̧; kóó bòò só nɛ́ reeta mɔɔ-wan kɔ‘m, mi tɛ ha̧ mɛ!»

⁷Ɛstɛr kifa nú: «Mɔ n'am kɔfi n'am kɔ̧ɔ̧ mɛ kpa nɛ́ mɔ'ɔ:

⁸K’ɛ̀nɛ̀ nɛ́ zɔka'm nɛ̀ de yí, ɓɛɛ k’ɛ̀nɛ̀ nɛ́ kpɛka kɔfamɔ kɔ‘m mɛ ha̧ mɔ n'am kɔ̧ɔ̧ ha̧‘m, ɛ̀nɛ̀ tɛ́ in Haman tɛ gbaŋa n'am tɛ de wen'nɛ́ mɛ mɔɔsa̧‘i. Ɓɛɛ nɛ́ tɛ́ ŋgimbi'i a̧‘m tɛ tɔ̧ nɛ̀ mɔ n'am kɔ̧ɔ̧ h’ɛ́nɛ́.»

⁹Wese'i Haman gboo nɛ̀ desee; ɓɛɛ ŋgimbi n'aa zɔka nɛ̀ Mardochee fara duk nù nú tua-wan, nɛ̀ kɔ̧ mɛ kur ŋgɔn na, in nɛ̀ tu̧ géé tu̧u̧ tɛ-a na mbɛt, see-aa kura zu Mardochee.

¹⁰Haman nyɔŋa kànà nin hegɔ, si nɛ̀ ɗoŋ sɛn tɛ̀ kɔ‘i, ɓɛɛ a̧ tom o bíí nɛ́ɛ̀ sá o sɛm kɔ̧-a̧ in Zɛrɛs kóò kɔ̧-a̧ tɛnɛ!

¹¹A̧ wee ɗoŋ dɔka mbɔi kɔ̧-a̧, in dɔka o bem mbɛt, in mɔ nɛ̀ wannu dee e nɛ̀ a̧ siti tɛ mɔɔ-wan kɔ‘i, e nɛ̀ a̧ zu o dɔka gasawi in oi o wi-de-tom kɔ‘i lɛŋ.

¹²Haman tɔ̧ɔ̧ siti: «Tɛ gbaŋa nɛ̀ Ɛstɛr ko-wan dea, nɛ́ mí in wannu a̧ a̧ saa ɓɛɛ. Mɔɔsa̧'ɛ, kànà nɛ́ wannu in am a̧ a̧ tɛ sa woyo ɓɛɛ.

¹³Mɔ kpɔk, ŋgimbi n'am zɔk Mardochee be Juif fara duka nú tua-wan, ɓɛɛ gasamɔ n'am kpaa'i lɛŋ de ŋma mɔ ha̧‘m na.»

¹⁴Ɓɛɛ Zɛrɛs kóò kɔ̧-a̧ in o sɛm kɔ̧-a̧ lɛŋ tɔ̧ ha̧ a̧: «A'i ɗáfí te nɛ̀ kusa-a mɛtrɛ ɓu-yiitoo-zua-mɔɔrɔ, ɓɛɛ sa̧a̧mɔ mɛ tutuyɛ, mɛ̀ tɔ̧́ ha̧ wannu ha'i mɛ ba Mardochee ga̧i̧ sɛnɛ, ɓɛɛ mɛ̀ nɛ́ɛ̀ dé gbaŋa in wannu nɛ̀ desee.» Wen'i dee tɛ Haman, ɓɛɛ a̧ tɔ̧ ha̧ wa mɛ ɗafi te'i.