Read Northwest Gbaya ƐSTƐR 6 Bible Online

ƐSTƐR 6 - Northwest Gbaya bible

ƐSTƐR 6

¹Mɛ zɛ‘i, yá hɔ yí wannu na. A̧ aka ha̧ wa mɛ ba Kalata Nyɛrɛmɔ ko o wannu tɛnɛ; ɓɛɛ wa tɔr ti wannu.

²Wa kpaa yɔramɔ zu Mardochee nɛ̀ tɔ̧ɔ̧ so wen mɔ ko Bigtaŋ in Tɛrɛs, o kpàná-pɛm-nú tua ko wannu yiitoo nɛ̀ kɔ̧ɔ̧ so mɛ gbɛ wannu Zɛrzɛs.

³Wannu aka mɔ: «Ɓɛɛ tɛ mɔ‘i nɛ̀ Mardochee dea'i, ge demɔ ge a̧ wa dee ha̧ a̧ ge? Nɛ́ ge zɔnamɔ ge a̧ a̧ kpaa oi-aa ge?» Ɓɛɛ o wi-de-tom kɔ̧-a̧ kifi nú: «A̧ kpa ŋma mɔ na.»

⁴Wannu aka mɔ: «Mɛ̀ nɛ́ o a̧ a̧a̧ bee-gara mɛ‘i o?» Ŋgimbi'i, Haman hɔɔ so kɔ‘i bee-gara mɛ zan wen tɔ̧a̧-a̧ ha̧ wannu mɛ ba Mardochee ga̧i̧ tɛ te nɛ̀ wa ɗafa so wen a̧‘i,

⁵ɓɛɛ o wi-de-tom ko wannu kifi nú ha̧ a̧: «Nɛ́ Haman a̧ a̧a̧ bee-gara. Haman a̧a̧ hɛ̧ɛ̧ pɛm nɛ̀ ɛ́nɛ́ mɛ zɔk'nɛ́.» Ɓɛɛ wannu tɔ̧: «A̧ a̧ yé mɔ!»

⁶Aman yee mɔ, ɓɛɛ wannu tɔ̧ ha̧ a̧: «Nɛ́ ge a̧‘i tɛ de ha̧ bíí nɛ̀ wannu kɔ̧ɔ̧ mɛ zɔn ge?» Taamɔ ko Haman'e, nɛ́ ge bíí ge a̧ wannu tɛ zɔn yak zu wi ge?

⁷Ɓɛɛ Haman kifi nú: «Wi nɛ̀ wannu kɔ̧ɔ̧ mɛ zɔn,

⁸wi tɛ ba nɛ́ laa-wan nɛ̀ wannu pi̧i̧ so tɛ kaɗi'i, in nyaŋa nɛ̀ wannu daŋ nɛ̀ wa baa kara-mɔɔ-wan gu zu a̧.

⁹Wi tɛ ba laa, in nyaŋa'i e er ŋma gasawi ko wannu, ɓɛɛ wi pi̧i̧ laa'i tɛ wi nɛ̀ wannu kɔ̧ɔ̧ mɛ zɔn'i. A̧ tɛ daŋ nyaŋa'i, ɓɛɛ wi mgbɔɔ a̧ yar nɛnɛ ɓir nɛ o gasa yuwar saaye, hiɗi nɛ̀ mɔ nɛ̀ ti a̧ nɛnɛ‘e: ‹Nɛ́ hegɔ a̧‘i de nɛ̀ mɔ ha̧ bíí nɛ̀ wannu kɔ̧ɔ̧ mɛ zɔn!› »

¹⁰Ɓɛɛ wannu tɔ̧ ha̧ Haman: «Mɛ̀ bá laa in nyaŋa tɛnɛ nɛ̀ haya-a hee mɔ'ɔ nɛ̀ mɛ tɔ̧ɔ̧ ga, á̧ mɛ̀ dé hegɔ ha̧ Mardochee, be Juif nɛ̀ duk nù nú tua-wan'i; ká mɛ́ er ŋma mɔ kpɔk sɛn tɛ mɔ nɛ̀ mɛ tɔ̧a̧‘i na.»

¹¹Haman baa laa in nyaŋa, ɓɛɛ pi̧ laa'i tɛ Mardochee, ba a̧ e zu nyaŋa, mgbɔ a̧ yar nɛnɛ, ɓir nɛ̀ o gasa yuwar saaye, hiɗi nɛ̀ mɔ nɛ̀ ti a̧: «Nɛ́ hegɔ a̧‘i dé nɛ̀ mɔ ha̧ bíí nɛ̀ wannu kɔ̧ɔ̧ mɛ zɔn!»

¹²Ɗoŋ mɔ‘i, Mardochee sii ɗoŋ si nú tua-wan, ɓɛɛ Haman kpan kɔ‘i nɔ̀ si tɛ̀ kɔ‘i nɛ̀ zuma zu nɛ̀ foe.

¹³Haman wee ɗoŋ mɔ nɛ̀ yaka lɛŋ ha̧ Zɛrɛs kóò kɔ‘i in ha̧ o sɛm kɔ‘i, ɓɛɛ o wi-iŋ-mgbara-mɔ nɔ‘i in kóò kɔ̧-a̧ tɔ̧ ha̧ a̧: «Kà Mardochee nɛ̀ mɛ́ ku̧u̧naŋ tika-a ti a̧‘i nɛ́ bòò nɛ́ be Juif, ŋma mɔ nɛ̀ mɛ tɛ de in a̧ kpɔk bo ɓɔna. Takaɗi, mɛ tɛ tik nù ti a̧.»

¹⁴Wa ɓɔna so fara tɔ̧ɔ̧ wen in Haman, ɓɛɛ o kpàná ko wannu hɔ, mgbɔ a̧ nɛnɛ tɛ gbaŋa nɛ̀ Ɛstɛr ɗafa.