Read Northwest Gbaya ƐSTƐR 7 Bible Online

ƐSTƐR 7 - Northwest Gbaya bible

ƐSTƐR 7

¹Wannu in Haman nɛ̀ɛ̀ tɛ gbaŋa ko kó-wan Ɛstɛr

²war yiitoo-aa, ɓɛɛ ŋgimbi nɛ̀ wa nɔ nɛ̀ dɔ̧ɔ̧ ɗoŋ nyɔŋmɔ, wannu tɔ̧ɔ̧ ha̧ Ɛstɛr woyo: «Ko-wan Ɛstɛr, mɔ nɛ̀ mɛ́ kɔ̧ɔ̧ mɛ́ ak'i, mɛ tɛ kpa. Mɛ̀ tɔ̧́ mɔ nɛ̀ mɛ́ kɔ̧a̧; kóó bòò só nɛ́ reeta mɔɔ-wan kɔ‘m, mí tɛ́ ha̧ mɛ.»

³Ko-wan Ɛstɛr kifa nú: «Wannu, k’ɛ̀nɛ̀ nɛ́ zɔka'm nɛ̀ de yí, ɛ̀nɛ̀ kpás'am in dukbíí kɔ‘m. Mɔ n'am kɔ̧ɔ̧ nɛ́ mɔ‘i.

⁴Wa ɗɔra yɛ ha̧ fio, mi in dukbíí kɔ‘m, ha̧ wa mɛ gɔn ger yɛ, ha̧ wa mɛ kum yɛ yinɛ. Wa á̧ kaia so nɛ́ yɛ ɗɔr hee bara ga bɛɛ, mi tɛ̀ɛ́ duk nɛ oi nú‘m, bó nɛ́ mɔ‘i tɛ̀ɛ́ de so ha̧‘m mɛ ndekeli so ɛnɛ na.»

⁵Ɓɛɛ wannu Zɛrzɛs ak ko-wan Ɛstɛr: «Wi nɛ̀ ta mɛ de pɛrti mɔ‘i nɛ́ o? Wi’ɛi a̧a̧ de?»

⁶Ɛstɛr kifa nú: «Wisɛn k’ɛɛ nɛ̀ de bɔnɛ in yɛɛ‘i nɛ́ Haman, ɗaŋ wi’ɛ nɛ̀ a̧a̧ nɛ̀ see yiitoo nɛ̀ duk’ɛ!» Zɔm kíì baa Haman ti wannu in ko-wan.

⁷Wannu ee gbaŋa duk, ɓɛɛ gbo yak nɛ̀ tu̧u̧-see si bee-gara tua-wan kɔ‘i. Haman ɓɔna kɔ‘i fara aia nú ha̧ ko-wan Ɛstɛr, ha̧ a̧ mɛ kpasi, wen a̧ iŋa'e taamɔ ko wannu zu wi nɛ́ fio kɔ‘i ɓɛɛ.

⁸Ŋgimbi nɛ̀ wannu pia ɗoŋ nɛ̀ bee-gara tua-wan kɔ‘i pii fara gbaŋa, a̧ zɔka Haman tika zu gado nɛ̀ Ɛstɛr duk sɛnɛ‘i. Soɓee ká wannu tɔ̧ɔ̧: «Mɛ́ kɔ̧ɔ̧ mɛ ɔ in ko-wan sɛn fara kɔ‘m ɓɔ?» Tɔ̧a̧-a̧ nɛ̀ wannu tɔ̧ɔ̧ hegɔ, ɓɛɛ ká wa bàà so Haman hɛr yí-a kaɗi.

⁹Ɓɛɛ Harbona, ŋma kpàná tɔ̧ɔ̧ wen ɓɛɛ a zer wannu: «Haman nɛ̀ tɛ-wi ɗafa so te mɛ ga̧i̧ Mardochee, wi nɛ̀ tɔ̧ɔ̧ so wen kpasi nɛ̀ wannu. Te'i duk nú tua ko Haman, ɓɛɛ kusa-a nɛ́ mɛɛtrɛ ɓu-yiitoo-zua-mɔɔrɔ.» Ɓɛɛ wannu tɔ̧: «Ɛ̀nɛ̀ bá Haman gá̧í̧ sɛnɛ!»

¹⁰Nɛ́ mɔ'ɔ nɛ̀ wa baa Haman ga̧i̧ tɛ te n'aa ɗafa so wen Mardochee'i, ɓɛɛ see wannu ga̧.