Read Northwest Gbaya GBOA-A 1 Bible Online

GBOA-A 1 - Northwest Gbaya bible

GBOA-A 1

¹Nin o bezaŋ Jakob nɛ‘i sa'e Israɛl nɛ nɛɛ in a̧ si sɛn nú Egiptɛ nɛ mɔɔ nɔ'ɔ:

²Rubɛn, Simɛɔŋ, Levii in Juda;

³Isakar, Zabulɔŋ in Bɛnjamin;

⁴Dan in Nɛftalii, Gat in Asɛr. Kóó o nde nɛɛ in o bíí nutua kɔ‘i.

⁵O bezaŋ Jakob yaa so lɛŋ nɛ bíí ɓu-mɔɔrɔ-ɗoŋ-yiitoo. Ŋgimbi'i Jozɛf a̧a̧ so kɔ‘i sɛn Egiptɛ mɛ.

⁶Jozɛf fea so in o nya-wi gu nɛ o gbama-yari kɔ‘i lɛŋ.

⁷O bezaŋ Israɛl duka so ko nɛnɛ nyɛmna, wa dɔka siti, wa kpaa ŋgai siti gan kuti-a woyo, ɓɛɛ wa dun nu.

⁸Nɛ mɔ'ɔ nɛ ŋma mbe wannu nɛ iŋ kɔ‘i Jozɛf na baa wan sɛn nú Egiptɛ.

⁹A̧ tɔ̧ɔ̧ ha̧ o bíí kɔ̧-a̧: «Ɛ̀nɛ̀ zɔ́k kinii, o be Israɛl dɔka nyɛmna, in wa a̧a̧ nɛ ŋgai nyɛmna mbɛt.

¹⁰Wen hegɔ ɛ̀ɛ̀ kíí yuwar mɔ n’ɛɛ tɛ de in wa, ká wa tɛɛ dɔk siti. Sɛn tɛ ŋgimbi biro wen ka wa tɛɛ ndaɗi in o wisɛn k’ɛɛ bi nɛ ɛɛ, ɓɛɛ wa gboo tɛ nu k’ɛɛ yak.»

¹¹Wa ee o ŋga wi-zɔk-tom zu o be Israɛl, wen baa ŋgai kɔ-wa. Nɛ́ hegɔ a̧ wa mboo nɛ o gasa ye-a-mɔ wen wannu Egiptɛ. Nin o ye nɔ‘i nɛ Pitɔm in Ramsɛs.

¹²Wa a̧ usi bɔnɛ ha̧ o bezaŋ Israɛl‘i, ɓɛɛ wa a̧ dɔk siti gan kuti-a'i. Nɛ́ mɔ‘i a̧ dee ha̧ wa mɛ yu o be Israɛl gan siti.

¹³O be Egiptɛ ee o bezaŋ Israɛl tɛ bara;

¹⁴wa usa ŋga tom ha̧ wa de nɛ bɔnɛ in wa: mɛ̀ nɛ́ kaia gìì, mbɛra brik, in dee o tom kpɛɛfɔ lɛŋ. Wa kaia wa nɛ ŋgai wen dee o tom nɔ‘i.

¹⁵Wannu Egiptɛ saa Sifra in Pua, o kó-bà-kɔra Hebreu tɛnɛ,

¹⁶ɓɛɛ tɔ̧ ha̧ wa: «Ŋgimbi n’ɛnɛ be tɛ̀ɛ́ ba kɔra ko okoo Hebreu, ɛ̀nɛ̀ zɔ́k bem’ɛi nɛ de-a; kà a̧ bòò nɛ́ be-wiwii, ɛ̀nɛ̀ gbɛ́ a̧, ɓɛɛ kà bó nɛ́ be-okoo, ɛ̀nɛ̀ é a̧.»

¹⁷O okoo nɔ‘i yuu so kíí Sɔ̧, wen hegɔ wa bɛ̧ɛ̧ ha̧a̧nú ko wannu Egiptɛ, ɓɛɛ wa gbɛ o be-wiwii na.

¹⁸Wannu saa wa piinɛ ɗoŋ, ɓɛɛ tɔ̧ ha̧ wa: «Wen ge ɛnɛ dee hegɔ e nɛ o be-wiwii duk ge?»

¹⁹Wa kifa nú ha̧ a̧: «O okoo Hebreu hɔ ŋmaa in o okoo Egiptɛ na. Kpoo tɛ-wa ɔ nɔa, ɓɛɛ ŋgimbi n’ɛɛ nɛ́ mɛ́ ba kɔra, ɛɛ tɛ hɔ gee hɔa-a na, ɓɛɛ wa koo mɔ kɔ-wa kaɗi.»

²⁰Sɔ̧ dee demɔ in o kó-bà-kɔra nɔ‘i, ɓɛɛ o bíí dɔk siti kpa nɛ ŋgai mbɛt.

²¹Sɔ̧ ha̧a̧ bem ha̧ o kó-bà-kɔra nɔ‘i wen wa yuu kíí a̧.

²²Ɓɛɛ wannu ha̧ nú ha̧ o bíí kɔ‘i: «O be-wiwii nɛ̀ o be Hebreu tɛ ko lɛŋ, ɛ̀nɛ̀ káí wa a ɗɔɔ nana-yì[1] ha̧ wa mɛ fe yinɛ, ɓɛɛ ɛ̀nɛ̀ é nɛ o be-okoo!»