Read Northwest Gbaya GBOA-A 10 Bible Online

GBOA-A 10 - Northwest Gbaya bible

GBOA-A 10

¹GASA WAN tɔ̧ɔ̧ ha̧ Moisɛ: «Mɛ̀ nɛ́ tɛ́ wannu Egiptɛ, nɛ́ mi a̧‘m dee ha̧ zu-a in o wi-de-tom kɔ̧-a̧ mɛ ŋgai, ha̧ mɔɔ-kifi kɔ‘m mɛ de mgbara wa,

²in ha̧ mɛ mɛ tɔ̧ mɔ n'am dee in o be Egiptɛ ha̧ o bem kɔ-mɛ in o be-koo mɛ zu o mɔɔ-kifi n'am de mgbara wa, in h’ɛ́nɛ́ mɛ iŋ‘e, mi nɛ GASA WAN.»

³Moisɛ in Arɔŋ nɛɛ kpa wannu Egiptɛ, ɓɛɛ wa tɔ̧ ha̧ a̧: «GASA WAN Sɔ̧ ko o be Hebreu tɔ̧a̧: ‹Nɛ ge wese ge a̧ mɛ tɛ mɔk nɛ see-mɛ sɛn ti'm ge nde? Mɛ̀ é ha̧ dukbíí kɔ‘m mɛ yak ha̧ wa mɛ gas'am.

⁴Kà mɛ kɔ̧ ea-a ha̧ dukbíí kɔ‘m mɛ yak na, mi tɛ fo o gba-dɔya tɛnɛ pii zu nu kɔ-mɛ mɛ sa̧a̧mɔ.

⁵Wa tɛ kpe zu nu nɛ‘i beka zɔk nu na. Wa tɛ nyɔŋ mɔ nɛ ɓɔrɔ gbina a nu lɛŋ, wa tɛ nyɔŋ o wa̧a̧-te k’ɛ́nɛ́ lɛŋ, ŋma mɔ beka ɓɔn na.

⁶Wa tɛ dun o tua kɔ-mɛ in o tua ko o wi-de-tom kɔ-mɛ lɛŋ, gu nɛ ko o be Egiptɛ lɛŋ. Mɛ̀ nɛ́ mɔ nɛ o dáà kɔ-mɛ kóó o zɔmdáa kɔ-mɛ zɔk na ku̧u̧naŋ-a nɛ wa yaa nɛnɛ zaŋnu hɔ sɔsɔɔ.› » Moisɛ zika tɛ, ɓɛɛ gbo tɛ ko wannu Egiptɛ yak.

⁷O wi-de-tom ko wannu Egiptɛ tɔ̧ɔ̧ ha̧ a̧: «Ho! Nɛ́ ge wese ge a̧ wi’ɛ tɛ kaɗi nɛ foo bɔnɛ pi̧ zu yɛ ge nde? Ɛ̀nɛ̀ é ha̧ o wi nɔ'ɔ yak, ha̧ wa nɛ́ɛ̀ gasi GASA WAN Sɔ̧ kɔ-wa! Ɛ́nɛ́ zɔ́k'e Egiptɛ a̧ ɗaŋ‘i na nde?»

⁸Hegɔ wa foo Moisɛ in Arɔŋ pii ɗoŋ tɛ wannu Egiptɛ, ɓɛɛ a̧ tɔ̧ ha̧ wa: «Ɛnɛ nyɛma mɛ nɛɛ gasi GASA WAN Sɔ̧ k’ɛ́nɛ́! Ɓɛɛ nɛ́ o mgbara'nɛ́ a̧ tɛ nɛ o?»

⁹Moisɛ kifa nu: «Ɛɛ tɛ mgbɔ o be-ŋgaiwi k’ɛɛ in o sɔkawi k’ɛɛ, o bem k’ɛɛ mɛ be-wiwii-a in o be okoo-a, o sami in o gbadua k’ɛɛ ká bá nɛ̀ o ndai k’ɛɛ, wen nɛ́ ŋgimbi nɛa-a mɛ de gbaŋa tú̧ nɛ̀ tɛ GASA WAN.»

¹⁰Wannu Egiptɛ mama tɔ̧ nɛnɛ: «Sɔ̧ a̧ mgbɔ‘nɛ́ nɛnɛ hee mɔ'ɔ n'am tɛ e'nɛ́ mɛ yak in o bem k’ɛ́nɛ́ ga; ɛ̧ɛ̧ kia ɗaŋmɔ n’ɛnɛ kii’ɛ ho!

¹¹Mɔ beka de hegɔ na. Nɛ́ o wiwii a̧ tɛ nɛ mɛ gasi GASA WAN ɓɛɛ, wen nɛ mɔ‘i a̧ ɛnɛ kii!» Ɓɛɛ wa ndak wa yinɛ tɛ ko wannu Egiptɛ.

¹²GASA WAN tɔ̧ɔ̧ ha̧ Moisɛ: «Mɛ̀ nyɛ́í̧ er-mɛ si nú Egiptɛ wen saa o gba-dɔya tɛnɛ. O gba-dɔya a̧ kur pii nú Egiptɛ; wa a̧ nyɔŋ o nyɔnɔ lɛŋ nɛ ɓɔrɔ ee nu’ɛ.»

¹³Moisɛ nyɛi̧a dɔra kɔ‘i si zu Egiptɛ, ɓɛɛ GASA WAN tom gasa búk mɛ daŋa-wese pii zu nu, ɓɛɛ búk'i yu zɛ nɛ wese mbɛt. Mɛ tutuyɛ, ɓɛɛ ká búk-daŋa-wese kaia so o gba-dɔya hɔ kaɗi.

¹⁴O gba-dɔya tika Egiptɛ, dam fara lɛŋ; wi tɛ zɔk pɛrti dɔka-a hegɔ nɛti na, in wi beka zɔk woyo na mbɛt.

¹⁵Wa kpee zu nu lɛŋ, ɓɛɛ tum ba nu. Wa nyɔŋa o zɔ̧ in o waya-te tɛ nu'i nɛ ɓɔrɔ ee so'i lɛŋ, ɓɛɛ ŋma mbɔɗi wa̧a̧ ɓɔn kɔ̧ te na, kóó nɛ zɔ̧ zaŋbɛɛ sɛn nú Egiptɛ lɛŋ ɓɔn na mbɛt.

¹⁶Wannu Egiptɛ saa Moisɛ in Arɔŋ nɛ haya-a, ɓɛɛ tɔ̧: «Mi dee ɗaŋmɔ in GASA WAN Sɔ̧ k’ɛ́nɛ́, in'nɛ̀ɛ́ mbɛt.

¹⁷Ɓɛɛ kinii, mi gɔma er h’ɛ́nɛ́ mɛ e ɗaŋmɔ kɔ‘m ha̧‘m woyo war kpɔk; ɛ̀nɛ̀ áí nú ha̧ GASA WAN Sɔ̧ k’ɛ́nɛ́ ha̧ a̧ mɛ fo ɗaŋ ŋgimbi fio’ɛ yinɛ zu'm.»

¹⁸Moisɛ gboo nɛ tɛ ko wannu Egiptɛ, ɓɛɛ a̧ ai nú ha̧ GASA WAN.

¹⁹GASA WAN toma gba-búk nɛ yee-wese mɛ tɛnɛ, kai nɛ o gba-dɔya si ɗɔɔ Gbɛ̧ gba-tɔp, ɓɛɛ ŋma gba-dɔya kpɔk ɓɔn sɛn nú Egiptɛ na.

²⁰Hegɔ GASA WAN ŋgaia see wannu Egiptɛ, ɓɛɛ a̧ e ha̧ o be Israɛl mɛ yak na.

²¹GASA WAN tɔ̧ɔ̧ ha̧ Moisɛ: «Mɛ̀ nyɛ́í̧ er mɛ si yiwese ha̧ gasa tum ba nu zu Egiptɛ nɛ‘i tɛ tam mɔ tam.»

²²Moisɛ nyɛi̧a er si yiwese, ɓɛɛ ŋma gasa tum tik nu zu Egiptɛ lɛŋ tɛ zɛ taar.

²³O be Egiptɛ zɔk ŋmaa na, wa yar na mbɛt tɛ zɛ taar, ɓɛɛ o be Israɛl lɛŋ ya kɔ-wa tɛ sa̧a̧mɔ sɛn fara nɛ wa ɔ sɛnɛ.

²⁴Wannu Egiptɛ saa Moisɛ, ɓɛɛ tɔ̧ ha̧ a̧: «Ɛ̀nɛ̀ nɛ́ɛ̀ gasi GASA WAN, ɓɛɛ o mɔ-dai k’ɛ́nɛ́, kóó nɛ geɗek-a in o gasa-a tɛ ɓɔn hɛ̧ɛ̧. Ɓɛɛ o bem k’ɛ́nɛ́ nyɛma mɛ nɛ in'nɛ̀ɛ́.»

²⁵Moisɛ kifa nú: «Nɛ mbetɛ, nɛ́ mɛ́ a̧ tɛ ɗafi sɔ̧ ha̧ nɛ̀ dɔɔ-kpoo-sɔ̧ ha̧ GASA WAN Sɔ̧ k’ɛɛ nde?

²⁶O gii mɔ-dai k’ɛɛ mbɛt tɛ nɛ in yɛɛ, kóó nɛ ŋma kpɔk beka ɓɔn hɛ̧ɛ̧ na. Wen, mɛ̀ nɛ́ sɛn mgbara o gii mɔ-dai nɔ‘i ɛ̀ɛ̀ tɛ ba ŋma sɛnɛ ɗafi nɛ GASA WAN Sɔ̧ k’ɛɛ. Ɛɛ mbɛt, nɛti hɔa-a k’ɛɛ sɛn hi̧i̧, ɛɛ iŋ mɔ n’ɛɛ tɛ ha̧ ha̧ GASA WAN na.»

²⁷Ɓɛɛ GASA WAN ŋgai see wannu Egiptɛ, ɓɛɛ a̧ kɔ̧ ee wa mɛ yak na.

²⁸Wannu Egiptɛ tɔ̧ɔ̧ ha̧ Moisɛ: «Mɛ yak! Ká mɛ́ hɔ ti'm hɛ̧ɛ̧ na. Wese n'am tɛ zɔk mɛ, mɛ tɛ fe!»

²⁹Moisɛ kifa nú: «Hee mɛ tɔ̧ɔ̧ nɛ nú mɛ ga, mi beka pii ɗoŋ sɛn ti mɛ ɓɔna!»