Read Northwest Gbaya GBOA-A 13 Bible Online

GBOA-A 13 - Northwest Gbaya bible

GBOA-A 13

¹GASA WAN tɔ̧ɔ̧ ha̧ Moisɛ:

²«Mɛ̀ é o kaya-bem lɛŋ mgbara o be Israɛl nɛ am nɛ ber naa kɔ-wa ha̧‘m, kóó nɛ kaya-bem, kóó nɛ kaya mɔ-dai mbɛt.»

³Moisɛ tɔ̧ɔ̧ ha̧ dukbíí: «Tɛ‘nɛ́'ɛ mbaŋ ɗoŋ wese’ɛ n’ɛnɛ gboo nɛnɛ nú Egiptɛ, n’ɛnɛ gboo nɛnɛ tɛ bara, wen GASA WAN kaia'nɛ́ gbonɛ nɛ ŋgai. Wese’ɛ, bíí beka nyɔŋ brɛt nɛ hao a̧a̧ sɛnɛ na.

⁴Nɛ́ sɔsɔɔ ɛnɛ gboo nɛnɛ tɛ zɛ́ sɔi-woo.

⁵Ŋgimbi nɛ GASA WAN be tɛ̀ɛ́ mgbɔ‘nɛ́ ye nɛ nu ko o be Kanaŋ, ko o be Hit, ko o be Amɔr, ko o be Hiv in ko o be Jebus, nu n'aa baa kan mɔ ha̧ nɛnɛ ha̧ o zɔmdáa k’ɛ́nɛ́, nu nɛ gɔrɔ in yibere fok fok sɛnɛ, ɛnɛ tɛ de kana do-a sɛn tɛ zɛ‘i.

⁶Tɛ zɛ mɔɔrɔ-ɗoŋ-yiitoo, wi tɛ nyɔŋ nɛ brɛt nɛ̀ hao bó sɛnɛ na, ɓɛɛ mɔɔrɔ-ɗoŋ-yiitoo ɔɔ-zɛ tɛ duk nɛ gbaŋa ko GASA WAN.

⁷Sɛn tɛ zɛ mɔɔrɔ-ɗoŋ-yiitoo, wi tɛ nyɔŋ nɛ́ brɛt nɛ̀ hao bó sɛnɛ na. Wi beka zɔk brɛt nɛ hao a̧a̧ sɛnɛ na. Wi beka zɔk hao tɛ nu k’ɛ́nɛ́ lɛŋ na.

⁸Wese'i, ɛnɛ tɛ usi mgbara mɔ'ɛ ha̧ o bem k’ɛ́nɛ́: Ɛɛ de hegɔ wen zu mɔ nɛ GASA WAN dee in yɛɛ ŋgimbi n’ɛɛ gboo nɛnɛ nú Egiptɛ.

⁹Mɛ̀ nɛ́ sɛn tɛ ŋgai ko GASA WAN a̧ a̧ gboo nɛ ɛɛ sɛn nú Egiptɛ. Mɛ nɛ mɔ nɛ tɛ duk te-er'nɛ́ hee mɔɔ-usi-mɔ ga, in sɛn sɔnti'nɛ́ hee mɔɔ-mbaŋ tɛ‘nɛ́ ga, wen ha̧ heembea ko GASA WAN mɛ duk nú‘nɛ́.

¹⁰Ɛnɛ tɛ kasi heembea'i tɛ ŋgimbi-a pɛ nɛ pɛ.

¹¹Ŋgimbi nɛ GASA WAN tɛ mgbɔ‘nɛ́ ye nɛ nú Kanaŋ hee mɔ'ɔ n'aa ha̧a̧ so nú kan nɛ mɔ h’ɛ́nɛ́ in ha̧ o zɔmdáa k’ɛ́nɛ́‘e, wi tɛ ha̧‘nɛ́ kaɗi ga,

¹²ɛnɛ tɛ e kaya-bem in o kaya mɔ-dai k’ɛ́nɛ́ mɛ wii-a ha̧ GASA WAN.

¹³Ɛnɛ tɛ gɔn zu o kaya be-tuifuu lɛŋ nɛ sami. K’ɛ̀nɛ̀ gɔn zu-wa na, ɓɛɛ ɛnɛ gbina ger-wa. O kaya be-wiwii lɛŋ mgbara o bem k’ɛ́nɛ́, ɛ́nɛ́ tɛ gɔn zu wa.

¹⁴Mɛ sa̧a̧mɔ, kaya-bem k’ɛ́nɛ́ nɛ aka'nɛ́‘e: Wi de mɔ‘i wen ge, nde? Ɓɛɛ ɛnɛ tɛ kifi nú ha̧ a̧: Nɛ́ GASA WAN a̧ gboo yɛ nú Egiptɛ nɛ ŋgai kɔ̧-a̧, nɛ kɔ̧ tua-bara.

¹⁵Hee mɔ'ɔ nɛ wannu Egiptɛ dee so ŋgazu wen k’ɛɛ tɛɛ gbo sɛn nú Egiptɛ ga, GASA WAN kuma o kaya be-wiwii in o kaya mɔ-dai sɛn Egiptɛ lɛŋ. Mɛ̀ nɛ́ hegɔ s’ɛɛ gbɛ o kaya mɔ-dai mɛ wiwii-a ɗafi nɛ̀ GASA WAN, gɔn nɛ̀ zu o kaya be-wiwii k’ɛɛ.

¹⁶Mɔ‘i tɛ duk nɛ ŋma mɔɔ-usi-mɔ sɛn te er-mɛ in sɛn sɔnti-mɛ, wen mɛ nɛ sɛn tɛ ŋgai a̧ GASA WAN foo nɛ yɛ gbonɛ nú Egiptɛ.»

¹⁷Ŋgimbi nɛ wannu Egiptɛ ee dukbíí Israɛl yak kaɗi, bo nɛ Sɔ̧ mgbɔɔ wa nɛ̀ yuwar ko o be Filistii na, kóó oi-aa nɛ̀ yuwar'i duka so nɛ tana-a mbɛt'i. Sɔ̧ taa mɔ: «O bíí tɛ zɔk biro ɓɛɛ wa kpaia taamɔ mɛ pii ɗoŋ pii nú Egiptɛ!»

¹⁸Nɛ mɔ'ɔ nɛ Sɔ̧ mgbɔɔ wa gbo yak nɛ ŋga-gbárà nɛ war Gbɛ̧ gba-tɔp. O be Israɛl gboo yak nú Egiptɛ nɛ yuwar-a.

¹⁹Moisɛ kaia so gba̧a̧ Jozɛf yak nɛnɛ wen Jozɛf baa kan so mɔ ha̧ o be Israɛl tɔ̧ nɛnɛ‘e: «Sɔ̧ tɛ ye ɗoŋ‘nɛ́, ɓɛɛ tɛ yaka-a k’ɛ́nɛ́, ɛ̀nɛ̀ káí gba̧a̧‘m yak nɛnɛ.»

²⁰Wa kura Sukot yaknɛ nɛ́ɛ̀ ɔ sɛn Etam nú ŋga-gbárà mɛ.

²¹GASA WAN nɛ ta-tɛ duka ti ha̧ wa, mɛ wese nɛ̀ tura-zan, mɛ usi yuwar ha̧ wa, ɓɛɛ mɛ zɛ, nɛ̀ leɓe-wee, wen nyɛka-a ti wa. Ɓɛɛ hegɔ wa nyɛma nɛɛ nɔ mɛ zɛ in wese mbɛt.

²²Mɛ wese tura-zan yu wa na, mɛ zɛ, leɓe-wee yu wa na mbɛt.