Read Northwest Gbaya GBOA-A 14 Bible Online

GBOA-A 14 - Northwest Gbaya bible

GBOA-A 14

¹GASA WAN tɔ̧ɔ̧ ha̧ Moisɛ hee mɔ'ɔ ga:

²«Mɛ̀ tɔ̧́ ha̧ o be Israɛl ha̧ wa mɛ pii ɗoŋ ɔ sɛn Pi-Ahirot, sɛn mgbara Migdɔl in gba-tɔp, nɛ zɔk ŋmaa in Bal-Sefɔŋ. Ɛnɛ tɛ ɔ kana sɛn nú gba-tɔp'i,

³ɓɛɛ wannu Egiptɛ tɛ tɔ̧ zu o be Israɛl‘e: Ɛ̀nɛ̀ zɔ́k wa fara yambala-a nɛnɛ nɛ ŋga-gbárà! Ŋga-gbárà kpee zu wa kaɗi.

⁴Mi tɛ ŋgai see wannu Egiptɛ, ɓɛɛ a̧ tɛ ndak pata wa. Mi tɛ zɔn tɛ‘m, gan nɛ zu wannu Egiptɛ in o wi-biro kɔ̧-a̧. Hegɔ o be Egiptɛ tɛ iŋ‘e mi nɛ GASA WAN.» Ɓɛɛ o be Israɛl de hegɔ.

⁵Ŋgimbi nɛ wa mbaŋa tɛ wannu Egiptɛ tɛ yuu mɔ ko o be Israɛl, see-aa in o wi-de-tom kɔ̧-a̧ kpaia zu wa, ɓɛɛ wa tɔ̧: «Nɛ ge ɛɛ dee’ɛ ge? Ɛɛ dee ha̧ o be Israɛl mɛ e tom k’ɛɛ duk!»

⁶Wannu Egiptɛ hɛra nyaŋa tɛ keekee, ɓɛɛ kai o bíí kɔ‘i a ɗoŋ.

⁷A̧ kaia o ŋga keekee-nyaŋa gɔmŋmaa-mɔɔrɔ-ɗoŋ-kpɔk in o wan mɛ nú Egiptɛ lɛŋ; a̧ kaia o ŋga wi-biro a zu wa kpɔk kpɔk.

⁸GASA WAN ŋgaia see wannu Egiptɛ, ɓɛɛ wannu Egiptɛ ha̧ nú ha̧ wa mɛ ndak pata o be Israɛl nɛ gboo sɛn nu kɔ̧-a̧ nɛ yɔli.

⁹O be Egiptɛ ndaka pata wa, nɛ́ɛ̀ kpa wa kɔ̧ gbagari kɔ-wa sɛn nú gba-tɔp. O nyaŋa, o keekee-nyaŋa ko wannu Egiptɛ, o wi-daŋ-nyaŋa in o wi-biro lɛŋ nɛ̀ɛ́ kpa wa sɛn ká̧ Pi-Ahirot nɛ zɔk ŋmaa in Bal-Sefɔŋ.

¹⁰Nɛ̀ wannu Egiptɛ hɛɗa nɛ wa kaɗi, o be Israɛl baa yí nɛ ŋgɔn, ɓɛɛ zɔk o be Egiptɛ fara ndaka pata wa tɛnɛ. Gasa kíì baa wa nyɛmna. Wa aia nú sitɛ GASA WAN;

¹¹ɓɛɛ wa tɔ̧ ha̧ Moisɛ: «Nɛ́ kɔ̧-fio a̧ bo sɛn Egiptɛ na, sa mɛ kaia yɛ tɛnɛ mɛ gun ŋga-gbárà hɛ̧ɛ̧ nde? Mɔ nɛ mɛ taa kai nɛ ɛɛ gbonɛ sɛn nú Egiptɛ nɛ ge?

¹²Bo nɛ ɛɛ tɔ̧ɔ̧ so ha̧ mɛ sɛn Egiptɛ‘e, mɛ̀ é h’ɛ́ɛ́ mɛ de tom ha̧ o be Egiptɛ na nde? Gana so ɛ̀ɛ̀ dé tom ha̧ wa gan fea-a ŋga-gbárà!»

¹³Moisɛ tɔ̧ɔ̧ ha̧ o bíí: «K’ɛ́nɛ́ de kíì na! Ɛ̀nɛ̀ yór nɛ nɔa-a, ɓɛɛ ɛnɛ tɛ zɔk mɔ nɛ Gasa Wan tɛ de mɛ kpasi nɛ ɛnɛ sɔsɔɔ, wen o be Egiptɛ n’ɛnɛ zɔk sɔsɔɔ'ɛ, ɛnɛ beka zɔk wa ɓɔna hegɔ ɓɔnsɛnɛ.

¹⁴Nɛ́ GASA WAN a̧ tɛ bi biro zu'nɛ́, ɓɛɛ k’ɛ́nɛ́, ɛnɛ beka de k’ɛ́nɛ́ ŋma mɔ na.»

¹⁵GASA WAN tɔ̧ɔ̧ ha̧ Moisɛ: «Wen ge mɛ ai nú mɛ pii tɛ‘m ge? Mɛ̀ tɔ̧́ ha̧ o be Israɛl mɛ yak,

¹⁶ɓɛɛ mɛ̀ nyɛ́í̧ dɔra kɔ-mɛ si zu gba-tɔp ha̧ yì kɛ̧́, wen ha̧ o be Israɛl mɛ ku tɛ kora mɔ.

¹⁷Kɔ‘m, mi tɛ ŋgai see o be Egiptɛ ha̧ wa mɛ ndak pata'nɛ́, ɓɛɛ mi tɛ zɔn tɛ‘m gan nɛ zu wannu Egiptɛ nɛ o ŋgai kɔ̧-a̧ lɛŋ, nɛ o keekee-nyaŋa kɔ̧-a̧ in o wi-daŋ-nyaŋa kɔ̧-a̧.

¹⁸Hegɔ o be Egiptɛ tɛ iŋ‘e, mi nɛ GASA WAN ŋgimbi n'am tɛ zɔn tɛ‘m gan nɛ zu wannu Egiptɛ in o keekee-nyaŋa gu nɛ o wi-daŋ-nyaŋa kɔ̧-a̧.»

¹⁹Betom ko Sɔ̧ nɛ̀ duka so ti ha̧ o be Israɛl‘i pia ɗoŋ duk nɛ̀ ɗoŋ wa, ɓɛɛ tura-zan nɛ̀ yaka so ti ha̧ wa pii ɗoŋ duk nɛ ɗoŋ wa mbɛt.

²⁰Tura-zan'i tɛ̀ɛ́ duk mgbara o be Egiptɛ in o be Israɛl; tura-zan a̧a̧ sɛnɛ in tum mbɛt, tura-zan nyɛka mɛ zɛ, ɓɛɛ mɛ zɛ‘i, o be Israɛl in o be Egiptɛ nɛ sitɛ ŋmaa na.

²¹Moisɛ nyɛi̧a er si zu gba-tɔp, ɓɛɛ GASA WAN fo ŋma ŋga-búk tɛnɛ nɛ daŋa-wese nɛ dee ha̧ tɔp'i mɛ kor kpaa-kpaa. Yì kɛ̧ɛ̧ yiitoo,

²²ɓɛɛ o be Israɛl gbo wir-wir nɛ kora yuwar see yì yak nɛnɛ, ɓɛɛ yì yor hee ŋgeŋ yiitoo ga, nɛ war gale in nɛ war wiiko.

²³O be Egiptɛ ndaka pata wa zir nɛnɛ si ɗoŋ-wa, nɛ oi nyaŋa in o keekee ká bá nɛ̀ o wi-daŋ-nyaŋa ko wannu Egiptɛ lɛŋ, hɔ see gba-tɔp mɛ.

²⁴Ŋgimbi gbɛ̧ŋa-ti-ɗɛɗɛ, GASA WAN duka zaŋ leɓe-wee in zaŋ tura-zan zɔk nɛ o wi-biro ko o be Egiptɛ, ɓɛɛ a̧ sakali wa.

²⁵A̧ dee ha̧ naŋ keekee kɔ-wa mɛ mbar mɔ, ɓɛɛ wa kimii nɛɛ nɔ takaɗi, ɓɛɛ o be Egiptɛ tɔ̧: «Ɛ̀ɛ̀ yú mɔ nɛ nyɛi̧a-a ti o be Israɛl, wen mɛ nɛ GASA WAN a̧ de biro in yɛɛ oi nú wa!»

²⁶GASA WAN tɔ̧ɔ̧ ha̧ Moisɛ: «Mɛ̀ nyɛ́í̧ er-mɛ si zu gba-tɔp wen ha̧ yì mɛ hur o be Egiptɛ, o keekee-nyaŋa gu nɛ o wi-daŋ-nyaŋa kɔ-wa.»

²⁷Moisɛ nyɛi̧a er si zu gba-tɔp, ɓɛɛ mɛ gɔna mɔ, gba-tɔp timgba kpa ŋmaa woyo liŋgɔm; ɓɛɛ hee mɔ'ɔ nɛ o be Egiptɛ yu nɛ mɔ ga, GASA WAN timgba wa a ɗɔɔ gba-tɔp woyo.

²⁸Yì pia ɗoŋ kpe zu o keekee-nyaŋa in o wi-daŋ-nyaŋa gu nɛ o wi-biro ko wannu Egiptɛ nɛ yee so ɗɔɔ yì ndak nɛ pata o be Israɛl. Ŋma bíí kpɔk mgbara wa ɓɔn na.

²⁹War ko o be Israɛl, wa nɛ̀ɛ̀ so nɔ tɛ kɔra nu sɛn see gba-tɔp'i ku nɛnɛ yak, wen yì kɛ̧ɛ̧ yiitoo hee ŋgeŋ ga nɛ war gale in wiiko.

³⁰Wese'i, GASA WAN kpasa o be Israɛl er o be Egiptɛ, ɓɛɛ o be Israɛl ya kɔ-wa zɔk nɛ wɔr o be Egiptɛ nɛ ká̧ ŋgere nɛnɛ.

³¹Israɛl zɔka hee mɔ'ɔ nɛ GASA WAN dee nɛ ŋmaa in Egiptɛ ga. Wa yuu GASA WAN, ɓɛɛ wa e ta nɛ a̧ in wi-de-tom kɔ̧-a̧ Moisɛ.