Read Northwest Gbaya GBOA-A 15 Bible Online

GBOA-A 15 - Northwest Gbaya bible

GBOA-A 15

¹Ɓɛɛ Moisɛ in o be Israɛl bìí gima ha̧ GASA WAN hee mɔ'ɔ ga: «Mi tɛ bii gima ha̧ GASA WAN; a̧ dee ŋgamɔ, a̧ pi̧i̧ nyaŋa in wan kɔ‘i, sɛn ɗɔɔ gba-tɔp.

²«GASA WAN nɛ́ ŋgai in gima kɔ‘m, nɛ́ a̧ a̧ kpasa'm, a̧ nɛ Sɔ̧ kɔ‘m, ɓɛɛ mi tɛ gas'aa. A̧ nɛ Sɔ̧ ko dáà kɔ‘m; ɓɛɛ mi tɛ zɔn nɛ́ a̧.

³«GASA WAN nɛ́ ŋga wi-biro. Nin-a nɛ GASA WAN.

⁴A̧ kaia o keekee-nyaŋa in o wi-biro ko wannu Egiptɛ a ɗɔɔ gba-tɔp. Gbɛ̧ gba-tɔp kpee zu o ŋgaŋa wi-biro kɔ̧-a̧ lɛŋ.

⁵Gba dir-yì kpee zu wa, wa zira hɔ ndaa lembe hee ta ga.

⁶«GASA WAN, wii er'nɛ́ usa ŋgai k’ɛ́nɛ́, wii er'nɛ́ ɗaŋa wisɛn k’ɛ́nɛ́.

⁷Gasamɔ k’ɛ́nɛ́ nyɛma dea-a h’ɛ́nɛ́ mɛ gan zu o wi-we-zu nɛ ɛnɛ; ɛnɛ dɔɔ wa nɛ ŋga nyimsea k’ɛ́nɛ́, hee kora zɔ̧ ga.

⁸«Ŋga búk mɛ kɔ̧ zɔ̧ɔ̧‘nɛ́ dee ha̧ yì mɛ mɔi̧ duk kpɔk fara, yì daŋa si ŋgɔn hee gba-zu ga, ɓɛɛ o gasa kɔ̧ ya sɛn see gba-tɔp.

⁹Wisɛn taa so tɔ̧ nɛnɛ‘e: ‹Mi tɛ ndak pata wa, mi tɛ kpa wa, mi tɛ kɛ̧ mɔ n'am tɛ kpa, ɓɛɛ mi tɛ nyɔŋ war kɔ‘m. Mi tɛ dak gba-paa kɔ‘m, ɓɛɛ mi ɓara mɔ er-wa.›

¹⁰Ɛnɛ dee ha̧ búk k’ɛ́nɛ́ mɛ ɓoɓi, ɓɛɛ gba-tɔp timgbi kpe zu wa. Wa zira si ndaa lembe hee gba̧a̧-kpi̧i̧ ga.

¹¹«Nɛ́ ge Sɔ̧ ge a̧ hɔɔ ŋmaa in'nɛ̀ɛ́ ge, GASA WAN? Nɛ́ o'o dúk nɛ sa̧a̧-a̧ hee ɛnɛ ga o? Nɛ́ o a'i nyɛma mɛ zɔn tɛ ŋgayamɔ hee ɛnɛ ga o? Nɛ́ o'o nyɛma mɛ de mɔɔ-gɔn-ɗɛɗɛ, hee ɛnɛ ga o?

¹²«Ɛ́nɛ́ nyɛi̧a so er'nɛ́ mɛ wiiko, ɓɛɛ nu gur o wi nɛ ndak pata yɛ.

¹³Ɛ́nɛ́ gboo o bíí n’ɛnɛ kpasa nyɛm nɛ ɗoŋ ha̧a̧nú k’ɛ́nɛ́; ɛ́nɛ́ mgbɔɔ wa sitɛ sa̧a̧-fara nɛ ŋgai k’ɛ́nɛ́.

¹⁴O dukbíí nɛ ya zik wa, zia wen'i, ɓɛɛ tɛ-wa nak. Kíì dee o be Filistii mbɛt.

¹⁵Ɗɛɗɛ o wanye Edɔm gɔna mbɛt. Tɛ o be-wan Mɔab naka, o be Kanaŋ lɛŋ sakala.

¹⁶Kíì in bele tika zu wa. Sɛn ɗɔɔ ŋgai k’ɛ́nɛ́, GASA WAN, ŋgimbi nɛ o dukbíí k’ɛ́nɛ́ ɓɔna fara yaka-a, ŋgimbi nɛ o dukbíí n’ɛnɛ gɔna zu wa ɓɔna fara yaka-a, bele zara o wi nɔ‘i, ɓɛɛ wa tɔ̧ wen na.

¹⁷GASA WAN! Ɛnɛ tɛ kai wa nɛnɛ, ɓɛɛ ɛnɛ ee wa sɛn zu kaya nɛ dúk nɛ́ k’ɛ́nɛ́! Ɛnɛ ɗafa fara wen duka-a sɛnɛ, GASA WAN, ɛnɛ dee sa̧a̧-fara nɛ er'nɛ́.

¹⁸«GASA WAN nɛ́ wan-ɔ-wan kpoo nɛ kpoo!»

¹⁹O wi-daŋ-nyaŋa in o keekee ká bá nɛ̀ o nyaŋa ko wannu Egiptɛ yee ɗɔɔ gba-tɔp, ɓɛɛ GASA WAN timgbi yì a zu wa. War ko o be Israɛl, wa kuu yì nɛ kora nu sɛn see gba-tɔp.

²⁰Ɓɛɛ Mariama boko-nya Arɔŋ nɛ duk nɛ ko-tɔ̧-wen oi nú Sɔ̧ mbɛt baa kuŋge, ɓɛɛ o dɔka okoo yɔ nɛ yɔyɛ nɛ kuŋge, bíí nɛ gima in o ŋmaa.

²¹Mariama baa gima ɓɛɛ wa kɔ̧ nú-a: «Ɛ̀nɛ̀ bíí gima zɔn nɛ GASA WAN, a̧ gbina biro. A̧ ndura nyaŋa in o wan kɔ‘i a ɗɔɔ gba-tɔp.»

²²[6] Moisɛ kura in o be Israɛl ká̧ zaŋ Gbɛ̧ gba-tɔp, ɓɛɛ wa yak si ŋga-gbárà Sur; wa nɛɛ nɔ hegɔɔ zɛ taar, wa kpa yí-nɔ na.

²³Wa hɔɔ sɛn Mara, ɓɛɛ wa nɔ yi Mara na, wen yì‘i paŋ paŋ. (Nɛ́ wen hegɔ wa aa nɛ nin yì‘i nde, Mara.)

²⁴Dukbíí ku̧i̧a mɔ zu Moisɛ, ɓɛɛ wa tɔ̧: «Nɛ́ ge ɛɛ tɛ nɔ ge nde?»

²⁵Moisɛ aia nú ha̧ GASA WAN, ɓɛɛ GASA WAN usi ŋma te ha̧ a̧. Moisɛ baa ŋma be gbaa-te'i pi̧ ɗɔɔ paŋ yì‘i, ɓɛɛ yì‘i kifi dúk nɛ́ de gɛɗa yí-nɔ. Nɛ́ hi̧i̧ a̧ GASA WAN ha̧a̧ nɛ heembea, ɓɛɛ a̧ usi yuwar deemɔ kɔ-wa ha̧ wa, ɓɛɛ a̧ we wa mbɛt.

²⁶A̧ tɔ̧a̧: «K’ɛ̀nɛ̀ zii tiger-am, GASA WAN Sɔ̧ k’ɛ́nɛ́, k’ɛ̀nɛ̀ de mɔ nɛ nyɛma yí‘m, k’ɛ̀nɛ̀ yeŋ zer'nɛ́ tɛ o heembea kɔ‘m in k’ɛ̀nɛ̀ nɛ kasa o geŋa nɔ‘i lɛŋ, mi beka pi̧ ŋma ŋga-zɛɛ tɛ‘nɛ́ hee ko o be Egiptɛ ga na, wen mi nɛ́ GASA WAN wan-kpasi'nɛ́.»

²⁷Wa hɔɔ sɛn Elim, fara nɛ wa kpaa zu-zer ɓu-zua-yiitoo sɛnɛ, in gun ndɛŋgɛ ɓu-mɔɔrɔ-ɗoŋ-yiitoo, ɓɛɛ wa ba gbagari hi̧i̧, sɛn ká̧ yì.