Read Northwest Gbaya GBOA-A 16 Bible Online

GBOA-A 16 - Northwest Gbaya bible

GBOA-A 16

¹[7] Wa kura sɛn Elim, ɓɛɛ o be Israɛl lɛŋ hɔ sɛn ŋga-gbárà Sin nɛ duk sɛn mgbara Elim in Sinai tɛ ɓu-zua-mɔɔrɔ ɔɔ-zɛ tɛ yiitoo fio-zɛ ɗoŋ gboa-a kɔ-wa nú Egiptɛ.

²O be Israɛl lɛŋ ku̧i̧a mɔ sɛn zu Moisɛ in Arɔŋ sɛn ŋga-gbárà.

³O be Israɛl tɔ̧ɔ̧ ha̧ wa: «Ha̧! Gana so ɛ́nɛ́ tɛ̀ɛ́ e so ha̧ GASA WAN gbɛ yɛ sɛn Egiptɛ, ŋgimbi n’ɛɛ yaa so nɛnɛ sɛn ká̧ kpáná-kpoo, nyɔŋ nɛ mɔ zaŋ yɛ sur. Ɛnɛ kaia yɛ tɛnɛ a sɛn ŋga-gbárà ha̧ zɔm giiwi mɛ fe wɔ.»

⁴GASA WAN tɔ̧ɔ̧ ha̧ Moisɛ: «Mi tɛ de ha̧ nyɔŋmɔ mɛ ai nɛ yiwese a nu h’ɛ́nɛ́. Bíí tɛ gbo mɛ kai nyɔŋmɔ kɔ-wa wese lɛŋ. Hegɔ mi tɛ we wa, mɛ zɔk kà wa nɛ́ nɛ̀ɛ́ nɔ nyɛm nɛ ɗoŋ heembea kɔ‘m, kóó weyaa.

⁵Tɛ mɔɔrɔ-ɗoŋ-kpɔk ɔɔ-zɛ nyɛm nɛ ɗoŋ ŋgimbi nɛ wa tɛ gi mɔ nɛ wa kaia, mɔ‘i tɛ dɔk war yiitoo gan mɔi̧a-a tɛ wese kpɔk.»

⁶Moisɛ in Arɔŋ tɔ̧ɔ̧ ha̧ o be Israɛl lɛŋ: «Ga̧a̧mɔ hɛ̧ɛ̧, ɛnɛ tɛ iŋ‘e nde, mɛ̀ nɛ́ GASA WAN a̧ gboo'nɛ́ sɛn nú Egiptɛ.

⁷Mɛ tutuyɛ, ɛnɛ tɛ zɔk gasamɔ ko GASA WAN nɛ yí‘nɛ́, wen a̧ zia ku̧i̧amɔ n’ɛnɛ ku̧i̧a zu a̧. K’ɛ́ɛ́, ɛɛ so nɛ o, k’ɛ̀nɛ̀ ku̧i̧ mɔ zu yɛ o?»

⁸Moisɛ kɔ̧ɔ̧ so mɛ tɔ̧‘e, wa tɛ zɔk gasamɔ‘i, ŋgimbi nɛ GASA WAN tɛ ha̧ nɛ kpoo ha̧ wa mɛ ga̧a̧mɔ in nyɔŋmɔ nɛ dɔka-a ha̧ wa mɛ tutuyɛ mbɛt, wen GASA WAN zia ku̧i̧amɔ nɛ wa ku̧i̧a zu a̧‘i. War kɔ‘i in Arɔŋ, wi so nɛ o? Bo nɛ wa ku̧i̧a nɛ wi na, ɓɛɛ wa ku̧i̧ nɛ GASA WAN.

⁹Moisɛ tɔ̧ɔ̧ ha̧ Arɔŋ: «Mɛ̀ tɔ̧́ ha̧ o be Israɛl lɛŋ, wa a̧ ɗɔŋ pii katɛ GASA WAN wen a̧ zia ku̧i̧amɔ kɔ-wa.»

¹⁰Ŋgimbi nɛ Arɔŋ ɓɔna fara tɔ̧ɔ̧ wen ha̧ o be Israɛl, wa zika tɛ-wa si war ŋga-gbárà, ɓɛɛ gasamɔ ko GASA WAN usi tɛ sɛn tɛ tura-zan.

¹¹GASA WAN tɔ̧ɔ̧ ha̧ Moisɛ:

¹²«Mi zia ku̧i̧amɔ ko o be Israɛl, ɓɛɛ mɛ̀ tɔ̧́ ha̧ wa: Mɛ ga̧a̧mɔ, ɛnɛ tɛ nyɔŋ nɛ kpoo, ɓɛɛ mɛ tutuyɛ, ɛnɛ nyɔŋa nɛ brɛt zaŋ‘nɛ́ súr. Hegɔ ɛnɛ tɛ iŋ‘e nde, mi nɛ GASA WAN Sɔ̧ k’ɛ́nɛ́.»

¹³Mɛ ga̧a̧mɔ‘i, o kpaŋanaŋa hɔɔ kpe kɔ̧ gbagari, ɓɛɛ mɛ tutuyɛ, mbɛŋ kpee ká̧ fara'i lɛŋ.

¹⁴Yi mbɛŋ hee ɓɔrɔ ga a̧a̧ mbɔɗɔnu sɛn ŋga-gbárà.

¹⁵Zɔka mɔ‘i nɛ wa zɔka hegɔ, ɓɛɛ o be Israɛl ak mɔ: «Mɔ'ɔ nɛ ge?» Wen wa iŋ mɔ‘i na. Moisɛ tɔ̧ɔ̧ ha̧ wa: «Nɛ́ nyɔŋmɔ a̧ GASA WAN ha̧ h’ɛ́nɛ́ mɛ nyɔŋ.

¹⁶«Zɔk ha̧a̧nú ko GASA WAN hɛ̧ɛ̧: Ɛ̀nɛ̀ káí mɔ‘i nyɛm nɛ mɔ nɛ kóó o nde tɛ nyɔŋ. Litrɛ naar nɛ reeta wen bíí kpɔk kpɔk; ɛnɛ kpɔk kpɔk tɛ kai nyɛm nɛ o bíí nutua k’ɛ́nɛ́.»

¹⁷O be Israɛl dee hee mɔ‘i ga; o ŋma kaia nɛ dɔka-a, o ŋma kaia kɔ‘i tikiɗi ɓɛɛ.

¹⁸Wa wee nɛ litrɛ naar nɛ reeta, naar nɛ reeta, ŋma mɔ dɔk gan zu ko wi nɛ kaia kɔ‘i nɛ dɔka-a na. Wi nɛ kaia so kɔ‘i tikiɗi, kɔ̧-a̧ nyɛma kana nɛ a̧ mbɛt, bíí kpɔk kpɔk kpaa nyɛm nɛ mɔ n'aa tɛ nyɔŋ.

¹⁹Moisɛ tɔ̧ɔ̧ ha̧ wa: «Ká ŋma bíí e ŋma ɓɔn ŋgɔn wen sa̧a̧mɔ na.»

²⁰Zu-a'i, o ŋma bíí zii wen ko Moisɛ na, ɓɛɛ wa ee ŋma ɓɔn ŋgɔn wen sa̧a̧mɔ: hegɔ, dɔk aa sɛnɛ, ɓɛɛ pɛr-aa nun nɛ ɗaŋa, ɓɛɛ see Moisɛ nyim in wa.

²¹Wa kaia nyɔŋmɔ mɛ tutuyɛ lɛŋ, kóó o nde nyɛm nɛ mɔ n'aa tɛ nyɔŋ. Kà wese ba, ɓɛɛ yela lɛŋ.

²²Ɓɛɛ tɛ mɔɔrɔ-ɗoŋ-kpɔk ɔɔ-zɛ, wa kaia nyɔŋmɔ war yiitoo, litrɛ mɔɔrɔ-ɗoŋ-naar wen bíí kpɔk. O gasawi mgbara o be Israɛl tɛɛ tɔ̧ wen mɔ‘i ha̧ Moisɛ, ɓɛɛ a̧ kifi nú ha̧ wa:

²³«Wen nɛ GASA WAN tɔ̧ɔ̧ nɛ mɔ'ɔ: ‹Sa̧a̧mɔ nɛ́ Sabat nɛ̀ duk nɛ wese-ɔm-tɛ nɛ‘i ee ha̧ GASA WAN. Ɛ̀nɛ̀ gí mɔ nɛ‘i tɛ gbɛŋ gbɛŋ. O mɔ nɛ dɔka yak zu-a, ɛ̀nɛ̀ é ŋgɔn wen sa̧a̧mɔ.› »

²⁴Wa ee mɔɔ nɔ‘i wen sa̧a̧mɔ hee mɔ'ɔ nɛ Moisɛ tɔ̧ɔ̧ so ga, ɓɛɛ pɛr-aa nun na, o dɔk a sɛnɛ na mbɛt.

²⁵Hegɔ Moisɛ tɔ̧a̧: «Ɛ̀nɛ̀ nyɔ́ŋ sɔsɔɔ, wen wese’ɛ nɛ wese-ɔm-tɛ ko GASA WAN; sɔsɔɔ ɛnɛ beka kpa ŋma mɔ zan na.

²⁶Tɛ zɛ mɔɔrɔ-ɗoŋ-kpɔk ɛnɛ tɛ kai kana nɛ kaia nyɔŋmɔ‘i, ɓɛɛ mɔɔrɔ-ɗoŋ-yiitoo ɔɔ-zɛ, nɛ wese-ɔm-tɛ. Nyɔŋmɔ‘i beka ai a nù wese'i na.»

²⁷Zu-a'i, tɛ mɔɔrɔ-ɗoŋ-yiitoo ɔɔ-zɛ, o ŋma bíí gboo mɛ nɛ̀ɛ́ kai nyɔŋmɔ nɛ aia a nu nɛ yiwese, ɓɛɛ wa kpa na.

²⁸GASA WAN tɔ̧ɔ̧ ha̧ Moisɛ: «Mɛ gese ge ɛ̀nɛ̀ tɛ kasi nɛ o geŋa in heembea kɔ‘m ge nde?

²⁹Ɛnɛ zɔk! Kà GASA WAN nɛ́ gɔna wese-ɔm-tɛ h’ɛ́nɛ́, mɛ̀ nɛ́ mɔ nɛ tɔ̧, tɛ mɔɔrɔ-ɗoŋ-kpɔk ɔɔ-zɛ, a̧ ha̧ nɛ nyɔŋmɔ wen zɛ yiitoo h’ɛ́nɛ́. Kóó o nde a̧ duk fara kɔ‘i. Ká ŋma bíí kpɔk gbo nɛ tɛ kɔ‘i tɛ mɔɔrɔ-ɗoŋ-yiitoo ɔɔ-zɛ na.»

³⁰Dukbíí ɔma tɛ tɛ́ mɔɔrɔ-ɗoŋ-yiitoo ɔɔ-zɛ.

³¹O be nutua ko Israɛl saa nin nyɔŋmɔ‘i nde: man. Mɛ̀ nɛ́ be bu gba̧a̧-mɔ nɛ ɔ nɛ nyɔ̧ɔ̧ hee kam-gɔrɔ ga.

³²Moisɛ tɔ̧a̧: «Wen nɛ GASA WAN tɔ̧ nɛ mɔ'ɔ: Ɛ̀nɛ̀ á ŋma dun litrɛ naar nɛ reeta, é wen o bezaŋ‘nɛ́ ha̧ wa mɛ zɔk mɔ n'am daia nɛ ɛnɛ sɛn ŋga-gbárà, ŋgimbi n'am kaia nɛ ɛnɛ gbonɛ nú Egiptɛ.»

³³Moisɛ tɔ̧ɔ̧ ha̧ Arɔŋ: «Mɛ̀ bá ŋma kpánà mɛ a man dun litrɛ naar nɛ reeta, mɛ̀ é ti GASA WAN ha̧ duk wen o bezaŋ‘nɛ́.»

³⁴Arɔŋ aa man dun litrɛ naar nɛ reeta hee mɔ'ɔ nɛ GASA WAN baa tɔ̧ so ha̧ Moisɛ ga, ɓɛɛ a̧ ba kpánà‘i e ti Kuɓa-Ha̧a̧nú nɛ mɔɔ-sedaako.

³⁵O be Israɛl nyɔŋa man tɛ pɛ ɓu-naar hɔ nɛnɛ tɛ nu nɛ wa nɛ si sɛnɛ. Wa nyɔŋa man hɔ nɛnɛ sɛn nduti nú Kanaŋ.

³⁶Litrɛ naar nɛ reeta nɛ omɛr kpɔk, ɓɛɛ omɛr ɓu nɛ efa kpɔk.