Read Northwest Gbaya GBOA-A 17 Bible Online

GBOA-A 17 - Northwest Gbaya bible

GBOA-A 17

¹O be Israɛl lɛŋ kura nɛ ŋga-gbárà Sin, nyɛm nɛ ɗoŋ wen ko GASA WAN, wen yaka-a siti, ɓɛɛ wa ɔ sɛn Refidim, ɓɛɛ yí-nɔ bo ha̧ o bíí na.

²O bíí kia nú Moisɛ, ɓɛɛ wa tɔ̧ ha̧ a̧: «Mɛ̀ há̧ yì h’ɛ́ɛ́ nɔ.» Moisɛ kifa nú ha̧ wa: «Nɛ́ ge s’ɛnɛ kii wen in am ge nde? Ɛ́nɛ́ wé GASA WAN wen ge?»

³Wɔ-yì gbɛɛ wa sɛn hi̧i̧, ɓɛɛ wa ku̧i̧ mɔ zu Moisɛ: «Mɛ kaia ɛɛ gbonɛ nɛ Egiptɛ h’ɛ́ɛ́ mɛ fe wɔ-yì in o bem k’ɛɛ gu nɛ o mɔ-dai k’ɛɛ wen ge nde?»

⁴Moisɛ aia nú ha̧ GASA WAN hegɔ: «Nɛ́ ge a̧‘m tɛ de ha̧ o wi nɔ'ɔ nɛ tɛ yo'm nɛ ta gbɛ'ɛ ge nde?»

⁵GASA WAN kifa nú ha̧ Moisɛ: «Mɛ̀ yák ti ha̧ o bíí, in o ŋma kuti-wi Israɛl; mɛ̀ bá dɔra nɛ mɛ gusa so nɛ nana-yì'ɛ nɛ er-mɛ, a̧ mɛ nɛ.

⁶Kɔ‘m, mi tɛ yor ti mɛ sɛn zu go mɛ‘i sɛn Hɔrɛb. Mɛ tɛ gusi ta'i, ɓɛɛ yì tɛ gbo nɛ kɔ̧ a̧, hegɔ o bíí tɛ kpa mɛ nɔ.» Moisɛ dee hegɔ sɛn yì o kuti-wi Israɛl.

⁷A̧ aa nin fara'i: Masa in Mɛriba; mɛ̀ nɛ́ mɔ nɛ tɔ̧, Wee-bia in Kia-wen. A̧ aa nin-wa hegɔ wen zu kia wen nɛ o be Israɛl kia so, in wee Sɔ̧ nɛ wa wee tɔ̧ nɛnɛ‘e, GASA WAN a̧a̧ mgbara wi náà, kóó a̧ bo na nde?

⁸O be Amalɛk kura, ɓɛɛ ba biro duk nɛ̀ o be Israɛl sɛn Refidim.

⁹Moisɛ tɔ̧ɔ̧ ha̧ Josue: «Mɛ̀ hók o bíí, ɓɛɛ mɛ̀ gbó, mɛ̀ dé biro in o be Amalɛk. Kɔ‘m, mɛ sa̧a̧mɔ, mi tɛ duk sɛn zu kaya nɛ dɔra ko Sɔ̧ sɛn er-am.»

¹⁰Josue dee mɔ hee mɔ'ɔ nɛ Moisɛ tɔ̧ɔ̧ ha̧ a̧ ga. A̧ dee biro in o be Amalɛk, ɓɛɛ ká Moisɛ, Arɔŋ in Hur daŋa so ya zu kaya.

¹¹Ŋgimbi nɛ Moisɛ ba er nɛ ŋgɔn, ɓɛɛ Israɛl kpaa ŋgai; kà a̧ e er-a si ɗɔɔ, ɓɛɛ nɛ́ o be Amalɛk a̧ kpa ŋgai.

¹²Hee mɔ'ɔ nɛ er Moisɛ mbɔia so kaɗi ga, wa baa ta e nu. A̧ duka nu zu a̧, ɓɛɛ Arɔŋ in Hur ya katɛ a̧ tɔi nɛ er-a nɛ ŋgɔn. Hegɔ, er Moisɛ ɓɔna ŋgɔn, hɔ nɛnɛ tɛ yee wese.

¹³Josue kuma o be Amalɛk nɛ gba-paa.

¹⁴GASA WAN tɔ̧ɔ̧ ha̧ Moisɛ: «Mɛ̀ yɔ́r mɔ nɛ yaka sɛn zaŋ kalata ha̧ tɛ-wi mɛ mbaŋ ɗoŋ-aa wese ɓɔnsɛnɛ, ɓɛɛ mɛ̀ tɔ̧́ ha̧ Josue nde, mi tɛ bi nin Amalɛk yinɛ ɗɔɔ yiwese’ɛ.»

¹⁵Ɓɛɛ Moisɛ mbo fara-ɗafi-sɔ̧, a̧ aa nin farai'e «GASA WAN nɛ́ kóŋgó-wara[8] kɔ‘m;»

¹⁶ɓɛɛ a̧ tɔ̧: «Hee mɔ'ɔ nɛ o be Amalɛk baa er nɛ ŋgɔn ti damti ko GASA WAN ga, nɛ gasa biro a̧ tɛ de mgbara GASA WAN in o be Amalɛk kpoo nɛ kpoo.»