Read Northwest Gbaya GBOA-A 18 Bible Online

GBOA-A 18 - Northwest Gbaya bible

GBOA-A 18

¹Jetro, wi-ɗafi-sɔ̧ Madiaŋ, for Moisɛ zia nyɛrɛ mɔ lɛŋ nɛ Sɔ̧ dee so in Moisɛ in dukbíí kɔ̧-a̧ Israɛl. A̧ zia'e GASA WAN gboo so Israɛl sɛn nú Egiptɛ,

²ɓɛɛ a̧ mgbɔ boko-bem kɔ̧-a̧ Sipɔra, kóò nɛ Moisɛ toma so siɗoŋ ha̧ a̧,

³in o bem kɔ̧-a̧ yiitoo nɛnɛ ha̧ a̧. Nin kuti-a duka nɛ Gɛrsɔŋ wen Moisɛ tɔ̧a̧ so'e, wi nɛ wi nɛ gbina ye si gɔni nu.

⁴Nin ɓii-aa duka nɛ Eliɛzɛr; nɛ́ mɔ nɛ tɔ̧: «Sɔ̧ kɔ‘m nɛ́ wi-gbak-am.» Wen Moisɛ tɔ̧a̧: Nɛ́ Sɔ̧ ko dáà kɔ‘i a̧ yee ɗoŋ wi, ɓɛɛ fo wi yinɛ nú gba-paa ko wannu Egiptɛ.

⁵Jetro, for Moisɛ, in kóò ko Moisɛ gu nɛ o bem nɛɛ ɗoŋ-aa sɛn ŋga-gbárà, fara n'aa dee gbagari ká̧ naŋ kaya ko Sɔ̧.

⁶A̧ pi̧i̧ tom ha̧ Moisɛ: «Nɛ́ mi, for mɛ Jetro, a̧ tɛ ɗoŋ mɛ in kóò kɔ-mɛ in o bem kɔ-mɛ yiitoo.»

⁷Moisɛ gboo sitɛ for, a̧ gbɛɛ zugur-aa nu ti a̧, wa hɛra ŋmaa, wa fana ŋmaa ɓɛɛ wa ye kɔ̧ tua-laa.

⁸Moisɛ wee ɗoŋ mɔ nɛ GASA WAN dee in wannu Egiptɛ in o be Egiptɛ wen zu Israɛl in o ŋga bɔnɛ lɛŋ nɛ kpaa wa sɛn yuwar, ɓɛɛ nɛ̀ GASA WAN gboo wa sɛnɛ, ha̧ for.

⁹Jetro dee nyɛŋɛ demɔ nɛ GASA WAN dee ha̧ Israɛl tɛ gboo wa n'aa gboo er o be Egiptɛ.

¹⁰Jetro tɔ̧a̧: «Zɔnamɔ a̧ duk nɛ ko GASA WAN nɛ gboo'nɛ́ er o be Egiptɛ yinɛ, in er wannu Egiptɛ, nɛ gboo o bíí er o be Egiptɛ yinɛ.

¹¹Kinii, mi iŋa nde, GASA WAN ŋgaia gan o sɔ̧ lɛŋ, wen n'aa usa ŋgai kɔ̧-a̧ ŋgimbi nɛ o be Egiptɛ nasa nɛ o be Israɛl!»

¹²Ɓɛɛ Jetro, for Moisɛ, dɔ kpoo-sɔ̧, ɓɛɛ ɗafi Sɔ̧ mbɛt. Arɔŋ in o kuti-wi Israɛl lɛŋ tɛɛ nyɔŋ mɔ in for Moisɛ gasi nɛ Sɔ̧.

¹³Mɔ sa̧a̧, Moisɛ duka nù mɛ gɔn kita mgbara o bíí, ɓɛɛ o bíí yaa katɛ a̧ mɛ tutuyɛ hɔ ga̧a̧mɔ.

¹⁴For Moisɛ zɔka mɔ lɛŋ nɛ Moisɛ de wen zu dukbíí, ɓɛɛ ak mɔ: «Nɛ́ ge a̧ mɛ de in dukbíí ge? Wen ge mɛ duk ɛ̀nɛ̀ mɛ, ɓɛɛ o bíí yora ti mɛ tutuyɛ hegɔ mɔ ga̧ nɛnɛ'ɛ ge?»

¹⁵Moisɛ kifa nú ha̧ for: «Wen o bíí tɛ tɛɛ sɛn tɛ‘m mɛ ak mɔ in Sɔ̧.

¹⁶Kà wa á̧ bòó nɛ̀ be wen, ɓɛɛ wa tɛɛ sɛn tɛ‘m; ɓɛɛ mi kɛ̧ɛ̧ mgbara mɔ nɛ a̧a̧ mgbara wa, ɓɛɛ mi usa geŋa ko Sɔ̧ in o heembea kɔ̧-a̧ ha̧ wa.»

¹⁷For Moisɛ tɔ̧ɔ̧ ha̧ a̧: «Yuwar dee tom kɔ-mɛ de na!

¹⁸Mɛ tɛ mbɔi in dukbíí nɔ‘i nɛ ya in mɛɛ‘i mbɛt. Tom'i ɔ dita gan mɛ, mɛ nyɛm mɛ de ɛ̀nɛ̀ mɛ na.

¹⁹Kinii, mɛ̀ zíí wen kɔ‘m, mi tɔ̧ nɛ mbɔrɔ ha̧ mɛ, ɓɛɛ Sɔ̧'ɔ̧ duk in mɛɛ: Mɛ́ dúk oi nu dukbíí sɛn ti Sɔ̧; nɛ́ mɛ'ɛ tɛ we ɗoŋ wen ko o bíí ha̧ Sɔ̧.

²⁰Nɛ́ mɛ'ɛ tɛ mbaŋ tɛ o bíí zu o geŋa in o heembea ko Sɔ̧; mɛ tɛ usi yuwar nɛ wa tɛ ba in naŋanɔ kɔ-wa ha̧ wa.

²¹Ɓɛɛ mɛ̀ hók o kpasa bíí nɛ yu nɛ Sɔ̧, o bíí nɛ tɔ̧ nɛ kpasawen, nɛ ba mɔ er bíí na, ɓɛɛ mɛ̀ é wa nɛ̀ wan zu o bíí, wan zu bíí booro, zu bíí gɔmŋmaa, wan zu bíí ɓu-mɔɔrɔ, wan zu bíí ɓu mbɛt.

²²Wa tɛ gɔn kita zu bíí ɓɔnsɛnɛ. Kita nɛ̀ duk nɛ ŋgaya-a, ɓɛɛ wa ee ti mɛ; wan nɛ ŋgai na, ɓɛɛ wa gɔna. Hegɔ tom kɔ-mɛ beka diti ɓɔna, wen wa tɛ gbak mɛ sɛnɛ.

²³Kà mɛ de hegɔ, Sɔ̧ tɛ ha̧ o heembea kɔ‘i ha̧ mɛ, mɛ beka mbɔi na, ɓɛɛ mɛ tɛ de ha̧ dukbíí lɛŋ mɛ si tɛ kɔ‘i nɛ ga̧a̧-see.»

²⁴Moisɛ zia mbɔrɔ ko for, ɓɛɛ a̧ de mɔ n'aa tɔ̧ɔ̧ lɛŋ.

²⁵A̧ hoka o kpasa bíí sɛn mgbara o be Israɛl lɛŋ, ɓɛɛ a̧ e wa nɛ wan zu o bíí, wa zu bíí booro, wan zu bíí gɔmŋmaa, wan zu bíí ɓu-mɔɔrɔ, wan zu o bíí ɓu.

²⁶Wa yaa gɔn nɛ kita zu o bíí ɓɔnsɛnɛ; o wan nɛ ɔ ŋgaia, wa baa sitɛ Moisɛ; o wan nɛ ŋgai na, ɓɛɛ wa gɔna nɛ tɛ-wa.

²⁷Ɓɛɛ Moisɛ e ha̧ for-aa mɛ si ɗoŋ nu kɔ̧-a̧.