Read Northwest Gbaya GBOA-A 19 Bible Online

GBOA-A 19 - Northwest Gbaya bible

GBOA-A 19

¹Tɛ kuti wese, tɛ taar fio-zɛ ɗoŋ gboa-a kɔ-wa nɛ nú Egiptɛ, o be Israɛl hɔɔ sɛn ŋga-gbárà Sinai, ɓɛɛ wa de gbagari hi̧i̧ tan nɛ kaya Sinai,

²Wa kura sɛn Refidim, ɓɛɛ wa hɔ ŋga-gbárà Sinai; wa dee gbagari hi̧i̧, tan nɛ kaya Sinai.

³Ɓɛɛ Moisɛ daŋ sitɛ Sɔ̧. GASA WAN saa mɔ nɛ zu kaya, ɓɛɛ tɔ̧: «Mɛ̀ tɔ̧́ ha̧ o bezaŋ Jakob, ha̧ o be Israɛl‘e,

⁴ɛ́nɛ́ nɛ̀ tɛ‘nɛ́ zɔka mɔ n'am dee in Egiptɛ, hee mɔ'ɔ n'am kaia nɛ̀ ɛ́nɛ́ nɛ̀ ɓaa zua pii tɛ‘m ga.

⁵Kinii, k’ɛ̀nɛ̀ zii tiger-am, ɓɛɛ k’ɛ̀nɛ̀ mbo zu tɛ nɔɔ-tɔk kɔ‘m, ɛ́nɛ́ tɛ duk nɛ mgbák dukbíí kɔ‘m mgbara o dukbíí lɛŋ, wen zaŋnu lɛŋ nɛ́ kɔ‘m.

⁶Ɛnɛ tɛ ya nɛ zuduk wi-ɗafi-sɔ̧ kɔ‘m, nɛ duk nɛ sa̧a̧ tugun bíí. Wen nɛ mɛ tɛ tɔ̧ ha̧ o be Israɛl nɛ mɔ‘i.»

⁷Moisɛ pia ɗoŋ, ɓɛɛ sa o kuti-wi mgbara o be Israɛl, a̧ wee ɗoŋ wen nɛ GASA WAN tɔ̧ɔ̧ lɛŋ ha̧ wa.

⁸Dukbíí nɛ oi-aa lɛŋ kifa nú nyɛm ŋmaa: «Mɔ nɛ GASA WAN tɔ̧ɔ̧ lɛŋ, ɛ́ɛ́ tɛ́ de!» Ɓɛɛ Moisɛ nɛ́ɛ̀ we ɗoŋ kifa-nú kɔ-wa ha̧ GASA WAN.

⁹GASA WAN tɔ̧ɔ̧ ha̧ Moisɛ: «Mí tɛ́ nɛ̀ sɛn tɛ mɛ nɛ tura-zan ha̧ o bíí mɛ zii wen n'am tɛ tɔ̧ in mɛɛ in ha̧ wa mɛ e ta nɛ mɛ ɓɔnsɛnɛ.» Ɓɛɛ Moisɛ we ɗoŋ kifa-nú ko dukbíí ha̧ GASA WAN.

¹⁰GASA WAN tɔ̧ɔ̧ ha̧ Moisɛ: «Mɛ̀ nɛ́ sitɛ dukbíí, ɓɛɛ mɛ̀ ɗáfí war-tɛ-wa sɔsɔɔ in sa̧a̧mɔ. Wa a̧ fɔr gasa laa kɔ-wa,

¹¹ɓɛɛ wa a̧ duk zu naŋ-wa tɛ taar zɛ, wen sɛn tɛ taar zɛ, GASA WAN tɛ zir sɛn zu kaya Sinai nɛ gbaayí bíí lɛŋ.

¹²Ɓɛɛ mɛ̀ gɔ́n mgbara zík nɛ̀ kaya, a̧ mɛ̀ mbáŋ tɛ o bíí hegɔ: ká wa daŋ si zu kaya na, ká wa fo gee foo kaya na! Wi nɛ tɛ fo kaya'i, wa tɛ gbɛ a̧.

¹³Kóó nɛ bíí, kóó nɛ saɗi, wi beka e a̧ duk na, wi beka fo a̧ nɛ̀ er-wi na; wi tɛ yo a̧ nɛ ta gbɛ, kóó pi̧i̧ a̧ nɛ góò mbɛt. Ŋgimbi nɛ‘i tɛ dɔm nɛ mbia, o ŋma bíí tɛ daŋ si zu kaya.»

¹⁴Moisɛ zira nɛ zu kaya sitɛ dukbíí, ɓɛɛ a̧ ɗafi war-tɛ-wa. Wa fɔra o gasa laa kɔ-wa.

¹⁵Ɓɛɛ a̧ tɔ̧ ha̧ wa: «Ɛ̀nɛ̀ dúk zu naŋ‘nɛ́ tɛ zɛ taar, ɓɛɛ k’ɛ́nɛ́ hɔ ká̧ tɛ o kóò k’ɛ́nɛ́ na.»

¹⁶Tɛ taar-zɛ mɛ tutuyɛ sut, mbaŋa-kórò in pi̧i̧-kórò dee mɔ zu kaya mɛ, gasa tura-zan kpee zu kaya, ɓɛɛ ŋga dɔma mbia de mɔ, ɓɛɛ tɛ bíí lɛŋ nak sɛn fara nɛ wa duka so ɔ sɛnɛ.

¹⁷Moisɛ mɔi̧a bíí gbonɛ kɔ̧ gbagari we nɛ ti Sɔ̧, ɓɛɛ wa ya ká̧ naŋ kaya.

¹⁸Kaya Sinai kpee nɛ̀ zi-wee lɛŋ wen GASA WAN zira pii sɛnɛ nɛ wee. Zi-wee tura sɛnɛ hee mɛ nɛ wee kɔ̧ lɔk ga, ɓɛɛ kaya nak nɛ ŋgaya-a nyɛmna.

¹⁹Ger mbia wora nɛ ŋgaya-a siti woyo. Moisɛ tɔ̧ɔ̧ wen, ɓɛɛ Sɔ̧ kifi nú ha̧ a̧ nɛ dika-kórò.

²⁰GASA WAN zira zu kaya Sinai, sɛn mgbák ɓɛ̧i̧a zu kaya mɛ; a̧ duka hi̧i̧ sa nɛ Moisɛ, ɓɛɛ Moisɛ daŋ sitɛ a̧.

²¹GASA WAN tɔ̧ɔ̧ ha̧ Moisɛ: «Mɛ zir, mɛ̀ mbáŋ tɛ dukbíí, ká wà tɛ́ɛ̀ nak tɛ-wa mɛ nɛ̀ɛ́ zɔk GASA WAN, wen ká wa tɛɛ fe nɛ̀ dɔka-a.

²²Kóó nɛ́ o wi-ɗafi-sɔ̧ nɛ̀ ɗɔŋ pii katɛ GASA WAN, wa a̧ de ha̧ yuwar tɛ-wa mɛ sa̧, wen ká see GASA WAN tɛɛ kur zu wa.»

²³Moisɛ kifa nú ha̧ GASA WAN: «Dukbíí nyɛm mɛ daŋ pii zu kaya Sinai na, wen nɛ̀ ɛnɛ baa mbaŋ tɛ yɛ kaɗi'e nde, ɛ̀ɛ̀ wɛn war zik nɛ̀ kaya nɛ ɔ sa̧a̧, ɓɛɛ dukbíí a̧ ya nɛ nyɛi̧a-a.»

²⁴GASA WAN tɔ̧ɔ̧ ha̧ a̧: «Mɛ̀ zír woyo, ɓɛɛ mɛ̀ dáŋ in Arɔŋ, ɓɛɛ o wi-ɗafi-sɔ̧ in o oi bíí a̧ ká‘i nak tɛ mɛ daŋ pii tɛ GASA WAN na, wen ká see-aa tɛ̀ɛ́ kur zu wa.»

²⁵Moisɛ zira sitɛ o bíí, ɓɛɛ a̧ tɔ̧ mɔ‘i ha̧ wa.