Read Northwest Gbaya GBOA-A 2 Bible Online

GBOA-A 2 - Northwest Gbaya bible

GBOA-A 2

¹Ŋma bíí nutua ko Levii baa ŋma zɔŋa-duk kɔ‘i nɛ kóò.

²Be-zɔŋa'i baa zaŋ ɓɛɛ ko nɛ be-wiwii. N'aa zɔka bem’ɛi dee nyɛmna, a̧ hu̧sa̧ a̧ fio-zɛ taar.

³N'aa zɔka a̧ nyɛm mɛ hu̧si a̧ hegɔ siti na, a̧ baa be gɛsɛ nɛ wa fana nɛ̀ báà,[2] ɓɛɛ ɗafi kɔ̧ a̧ nɛ de-a. A̧ baa bem’ɛi e kɔ̧ a̧, ɓɛɛ a̧ ba a̧ nɛnɛ e mgbara o ɓoɓo sɛn mgbák ká̧ ŋgere nana-yì.

⁴Ɓɛɛ dàà kɔ̧-a̧ nɛ́ɛ̀ hu̧si nɛ be nyɛi̧a-a mɛ zɔk mɔ nɛ tɛ hɔ zu bem’ɛi.

⁵Ŋgimbi'i ká boko-bem ko wannu Egiptɛ tɛɛ so mɛ zui yi, ɓɛɛ o be-zɔŋa nɛ tɛɛ in a̧ yar kɔ-wa nɛ ká̧ ŋgere nana-yì nɛnɛ. Boko-bem ko wannu zɔka be gɛsɛ sɛn ká̧ ŋgere sɛn mgbara ɓoɓo, ɓɛɛ a̧ tom kó-de-tom kɔ̧-a̧ mɛ nɛɛ ba gɛsɛ‘i.

⁶A̧ hu̧i̧a̧ nú gɛsɛ‘i, ɓɛɛ a̧ zɔk bem’ɛi, ɓɛɛ duka nɛ be-wiwii a̧ hi̧i̧ kɔ̧a̧. Ko dee a̧, ɓɛɛ a̧ tɔ̧: «Mɛ̀ nɛ́ be Hebreu.»

⁷Nɛ mɔ'ɔ nɛ dàà ko bem’ɛi tɔ̧ɔ̧ ha̧ boko-bem ko wannu: «Ɛ́nɛ́ kɔ̧ɔ̧ a̧‘m nɛɛ sa ŋma ko Hebreu wen daia a̧ h’ɛ́nɛ́ nde?»

⁸A̧ kifa nú ha̧ a̧: «Mɛ̀ nɛ́», ɓɛɛ boko-bem’ɛi nɛɛ sa nɛ naa-wan-bem tɛnɛ.

⁹Boko-bem ko wannu Egiptɛ tɔ̧ɔ̧ ha̧ kóò‘i: «Mɛ̀ bá bem’ɛ sinɛ, mɛ̀ há̧ bere ha̧ a̧, mɛ̀ dáí a̧ ha̧‘m, ɓɛɛ mi tɛ yoɓi mɛ.» Kóò‘i baa bem sinɛ, ɓɛɛ a̧ ku̧ naŋ ha̧a̧ bere ha̧ a̧.

¹⁰Ɗoŋ nɛ bem gasa kaɗi, naa kɔ̧-a̧ baa a̧ sinɛ ha̧ boko-bem ko wannu nɛ zɔka a̧ hee bem kɔ‘i ga. A̧ saa nin-a'e «Moisɛ», wen n'aa tɔ̧ɔ̧‘e, «wi baa a̧ ɗɔɔ yi».

¹¹Ŋgimbi'i, nɛ̀ Moisɛ gasa kaɗi, a̧ nɛɛ mɛ zɔk o nya-a̧; sɛn hi̧i̧ a̧ zɔka o ŋga tom nɛ o nya-a̧ de nɛ yi-a, ɓɛɛ a̧ zɔk ŋma be Egiptɛ fara gusa ŋma nya-a̧ Hebreu.

¹²A̧ zɔka mɔ katɛ a̧ lɛŋ, ŋma bíí bo na, ɓɛɛ a̧ gbɛ be Egiptɛ‘i hu̧si ɗɔɔ nyɛmɛ.

¹³Nɛ mɔ sa̧a̧, a̧ pia ɗoŋ. A̧ kpaa o be Hebreu yiitoo fara dee biro, ɓɛɛ a̧ ak wi-kii-wen: «Wen ge sa mɛ mbɛr nya-mɛ ge?»

¹⁴Wi’ɛi kifa nú ha̧ a̧: «Nɛ o'o ee mɛ nɛ wan k’ɛɛ in wi-gɔn-kita zu yɛ o? Mɛ ta kɔ-mɛ‘e, mɛ tɛ gbɛ‘m hee mɔ'ɔ nɛ mɛ gbɛɛ nɛ be Egiptɛ'ɛ ga nde?» Kíì dee Moisɛ, ɓɛɛ a̧ ta'e mɔ nɛ‘i dee lɛŋ hu̧si na!

¹⁵Nɛ̀ wannu Egiptɛ zia mɔ nɛ yaka, a̧ kia yuwar mɛ gbɛ Moisɛ, ɓɛɛ Moisɛ yu mɔ yak katɛ a̧ nɛ nyɛi̧a-a si sɛn nu ko Madiaŋ. A̧ nɛɛ duk nu ká̧ gɔna-yi nɛ wa za̧a̧ so.

¹⁶Gasa wi-ɗafi-sɔ̧ sɛn Madiaŋ a̧a̧ so nɛ̀ boko-bem mɔɔrɔ-ɗoŋ-yiitoo. Wa tɛɛ mɛ ɗu yi a sɛn kɔ̧ kombon-nɔ-yì ko o sami ko dáà kɔ-wa.

¹⁷Nɛ mɔ'ɔ nɛ o wi-dai-sami hɔa, ɓɛɛ ndak wa yinɛ. Moisɛ kura ye ɗoŋ o boko-bem nɔ‘i, ɓɛɛ a̧ ha̧ yi ha̧ o mɔ-dai kɔ-wa.

¹⁸O boko-bem nɔ‘i sii ɗoŋ tɛ dáà kɔ-wa Jetro. A̧ aka wa: «Wen ge ɛnɛ pia ɗoŋ nɛ haya-a sɔsɔɔ'ɛ ge?»

¹⁹Wa tɔ̧ɔ̧ mgbara mɔ nɛ yaka: «Nɛ́ ŋma be Egiptɛ a̧ kpasa yɛ er o wi-dai-sami. Nɛ́ kpɔk a̧‘i a̧ ɗuu yi ha̧ o mɔ-dai k’ɛɛ mbɛt.»

²⁰A̧ aka o boko-bem kɔ̧-a̧: «A̧ a̧a̧ bɔɔ de? Wen ge s’ɛnɛ ee a̧ duk ge? Ɛ̀nɛ̀ sá a̧ tɛnɛ ha̧ a̧ nyɔŋ mɔ.»

²¹Nɛ mɔ'ɔ nɛ Moisɛ kpɛka mɛ de ye in Jetro, ɓɛɛ Jetro ha̧ boko-bem kɔ‘i Sipɔra nɛ kóò ha̧ Moisɛ.

²²Boko-bem’ɛi koo be-wiwii, ɓɛɛ Moisɛ sa nin-a'e Gɛrsɔm; nɛ mɔ nɛ tɔ̧: «Mi nɛ gɛnɛ sɛn gɔni nu.»

²³Ɗoŋ ŋgimbi nyɛi̧a, ɓɛɛ wannu Egiptɛ fea. O bezaŋ Israɛl nɛ yaa so tɛ bara hiɗa mɔ, ɓɛɛ aia-nú kɔ-wa daŋ si ŋgɔn hɔ tɛ Sɔ̧.

²⁴Sɔ̧ zia aia-nú kɔ-wa, ɓɛɛ tɛ-a mbaŋ ɗoŋ nɔɔ-tɔk n'aa nɔɔ so in Abraham, Izak in Jakob.

²⁵Hegɔ, a̧ zɔka o bezaŋ Israɛl, ɓɛɛ ko de a̧ ha̧ wa.